Lutsha—qeqeshani Amandla Enu Okuqonda!
“Ukutya okuqinileyo kokwabantu abaqolileyo, abo bathe ngokuwasebenzisa amandla abo okuqonda bawaqeqeshela ukubalula kokubini okulungileyo nokubi.”—HEBHERE 5:14.
1, 2. (a) Imeko yethu yanamhlanje ifana njani neyamaKristu amandulo ase-Efese? (b) Ziintoni ezinokukukhusela engozini, kwaye unokuzihlakulela njani ezo zinto?
“HLALANI nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizithengele ixesha elifanelekileyo, ngenxa yokuba imihla ingendawo.” (Efese 5:15, 16) Ukususela oko umpostile uPawulos wabhala loo mazwi kwiminyaka engamawaka amabini eyadlulayo, ‘abantu abangendawo namabhedengu baye bahambela phambili ukususela kokubi ukusa kokubi ngakumbi.’ Siphila ‘kumaxesha amanqam ekunzima ukuqhubana nawo,’ okanye njengoko enye inguqulelo isitsho, kumaxesha “anobungozi.”—2 Timoti 3:1-5, 13; Phillips.
2 Noko ke, unako ukuziphepha iingozi ezikulalele endleleni ngokuhlakulela “ubuqili, . . . ulwazi namandla okucinga.” (IMizekeliso 1:4, NW) IMizekeliso 2:10-12 ithi: “Ubulumko buya kungena entliziyweni yakho, ukwazi kwenze mnandi umphefumlo wakho. [“Amandla okucinga,” NW] okugcina, ukuqonda kokulondoloza; ukuba kukuhlangule endleleni embi, kubantu abathetha impenduka.” Kodwa unokuzihlakulela njani ezo zinto? EyamaHebhere 5:14 ithi: “Ukutya okuqinileyo kokwabantu abaqolileyo, abo bathe ngokuwasebenzisa amandla abo okuqonda bawaqeqeshela ukubalula kokubini okulungileyo nokubi.” Njengakubo nabuphi na ubugcisa, kuye kufuneke uqeqesho ukuze ubani akwazi ukusebenzisa amandla akhe okuqonda. Igama lesiGrike elisetyenziswe nguPawulos apha ngokoqobo lithetha ‘ukuba ngoqeqeshwe njengomntu owenza imidlalo yomthambo.’ Unokuyiqalisa njani ingqeqesho enjalo?
Indlela Yokuqeqesha Amandla Akho Okuqonda
3. Unokuwasebenzisa njani amandla akho okuqonda xa kufuneka wenze isigqibo?
3 Phawula ukuba amandla akho okuqonda—ukukwazi kwakho ukuqonda okulungileyo nokubi—aqeqeshwa “ngokuwasebenzisa.” Xa kufuneka wenze isigqibo, ukufunisela, ukwenza izinto ungacinganga, okanye ukulandela umndilili akudli ngakuphumela kukhetho lobulumko. Ukuze wenze izigqibo zobulumko, umele usebenzise amandla akho okuqonda. Njani? Okokuqala, ngokuyiphicotha ngenyameko imeko uze ufumane zonke izibakala. Buza xa kuyimfuneko. Lwazi olunye ukhetho olukhoyo. IMizekeliso 13:16 ithi: “Bonke abanobuqili benza ngokwazi.” Emva koko, zama ukuqonda oko imithetho okanye imigaqo yeBhayibhile ikutshoyo ngaloo mbandela. (IMizekeliso 3:5) Kakade ke, ukuze uyenze loo nto umele uyazi iBhayibhile. Kaloku yiloo nto eyabangela ukuba uPawulos asikhuthaze ukuba sitye “ukutya okuqinileyo”—sifunde “ububanzi nobude nomphakamo nobunzulu” benyaniso.—Efese 3:18.
4. Kutheni kubalulekile ukwazi imigaqo kaThixo?
4 Ukwenjenjalo kubalulekile kuba asifezekanga, sityekele ekoneni. (Genesis 8:21; Roma 5:12) UYeremiya 17:9 uthi: “Intliziyo inenkohliso ngaphezu kweento zonke, isisifo esibi.” Xa singakhokelwa yimigaqo kaThixo, sisenokuzibetha ngemf’ iphindiwe size sicinge ukuba into ethile ilungile—ngenxa nje yokuba inyama yethu iyikhanuka. (Thelekisa uIsaya 5:20.) Umdumisi wabhala: “Umfana uya kuwuqaqambisa ngantoni na umendo wakhe? Ngokuzigcina ngokwelizwi lakho. Ngeziyalezo zakho ndinokuqonda, ngenxa yoko ndiwuthiyile wonke umendo wobuxoki.”—INdumiso 119:9, 104.
5. (a) Kutheni olunye ulutsha oluninzi lulandela umendo wobuxoki? (b) Omnye oselula wayenza eyakhe njani inyaniso?
5 Siyintoni isizathu sokuba olunye ulutsha olukhuliswe ziintsapho ezingamaKristu lulandele umendo wobuxoki? Ngaba asikokuba olo lutsha lungazange ‘lukungqine ngokwalo ukulunga nokwamkeleka nokugqibelela kokuthanda kukaThixo’? (Roma 12:2) Olunye lusenokuza ezintlanganisweni nabazali balo kwaye luzazi ngentloko ezinye zeemfundiso ezisisiseko zeBhayibhile. Kodwa luthi lwakucelwa ukuba lungqine iinkolelo zalo okanye lucacise eminye yemibandela enzulu yeLizwi likaThixo, ulwazi lwalo lube luncinane ngendlela noko edanisayo. Ulutsha olunjalo lunokulahlekiswa lula. (Efese 4:14) Ukuba unjalo nawe, kutheni ungazimiseli ukwenza utshintsho nje? Omnye udade oselula ukhumbula oku: “Ndandilwenza uphando. Ndizibuze oku, ‘Ndazi njani ukuba olu lunqulo olululo? Ndazi njani ukuba kukho uThixo ogama linguYehova?’ ”a Ukuzihlolisisa kwakhe ngenyameko iZibhalo kwamenza weyiseka ukuba izinto awayezifundiswe ngabazali bakhe zazinjalo kanye!—Thelekisa IZenzo 17:11.
6. Yintoni onokuyenza ukuze ‘uqiniseke ngoko kwamkelekileyo eNkosini,’ uYehova?
6 Wakuba uxhobe ngolwazi lwemigaqo kaYehova, kuya kuba lula nangakumbi ukuba ‘uqiniseke ngoko kwamkelekileyo eNkosini.’ (Efese 5:10) Ukanti kuthekani ukuba akuqinisekanga ngekhondo lobulumko omele ulithabathe kwimeko ethile? Thandaza kuYehova ucele ulwalathiso. (INdumiso 119:144) Zama ukuthetha nabazali bakho okanye nomnye umKristu oqolileyo ngaloo mbandela. (IMizekeliso 15:22; 27:17) Ulwalathiso oluluncedo lunokufumaneka nangokwenza uphando eBhayibhileni nakwiimpapasho zeWatch Tower. (IMizekeliso 2:3-5) Okukhona uwasebenzisa amandla akho okuqonda, kokukhona eya esiba bukhali.
Ukubonakalisa Ukuqonda Ekuzihlaziyeni
7, 8. (a) Unokuwasebenzisa njani amandla akho okuqonda ukuze wazi enoba umele uye embuthweni okanye ungayi? (b) Yintoni imbono yeBhayibhile ngokuzihlaziya?
7 Ngoku makhe sikhangele indlela onokusebenzisa ngayo amandla akho okuqonda phantsi kweemeko ezithile. Ngokomzekelo, masithi umenywe kwimbutho ethile. Mhlawumbi usenokuba ude wafumana nesimemo esibhaliweyo esichaza ngale mbutho. Kuthiwa iqela lolutsha olungamaNgqina liza kube lilapho. Kodwa ke kuza kuhlawulwa imali ethile ukuze kuhlangatyezwane neendleko. Ngaba ufanele uye?
8 Heke, khawusebenzise amandla akho okuqonda ke ngoku. Okokuqala, fumana inkcazelo. Iza kuba ngakanani loo mbutho? Ngoobani abaza kubakho? Iza kuqalisa nini? Iphele nini? Kuza kube kusenziwa ntoni? Iza kwalathiswa njani? Emva koko, yenza uphando, khangela phantsi komxholo othi “Social Gatherings [Iimbutho Zokuzonwabisa],” nothi “Entertainment [Ukuzonwabisa]” kwiWatch Tower Publications Index.b Yintoni onokuyifumana kuphando lwakho? Phakathi kwezinye izinto, uya kufumanisa ukuba uYehova akazichasanga iimbutho zokuzonwabisa. Enyanisweni, INtshumayeli 8:15 ithi ukongezelela ekusebenzeni nzima, ‘akukho nto imlungeleyo umntu phantsi kwelanga, ngaphezu kokuba adle, asele, avuye.’ Ewe, kwanoYesu Kristu waya kwizidlo ezikhethekileyo yaye ubuncinane kwanakumtshato omnye. (Luka 5:27-29; Yohane 2:1-10) Ukubutha kunokuba yingenelo xa kugcinwa kulungelelene.
9, 10. (a) Ziziphi iingozi ezinokubakho kwezinye iimbutho? (b) Yiyiphi imibuzo osenokuzibuza yona ngaphambi kokuba ugqibe kwelokuba uye okanye ungayi embuthweni ethile?
9 Noko ke, iimbutho ezingalungiselelwanga kakuhle zisenokuxwaya inkathazo. Kweyoku-1 kwabaseKorinte 10:8, sifunda indlela unxulumano olungelolwabulumko olwakhokelela ngayo kuhenyuzo nasekubulaweni ‘kwamaSirayeli angathembekanga angamawaka angamashumi amabini anesithathu ngamini-nye.’ Esinye isilumkiso esibuyisa iingqondo sesifumaneka kwayebaseRoma 13:13 esithi: “Njengakwixesha lasemini masihambe ngokundilisekileyo, kungekhona kwiziyunguma nakuselelwano, kungekhona kwiintlobano ezingavumelekanga nakwihambo evakalala, kungekhona kwimbambano nekhwele.” (Thelekisa eyoku-1 kaPetros 4:3.) Kuyinyaniso ukuba, alinakumiselwa inani labantu abanokubakho ezimbuthweni. Kodwa ke ngokusuka kumava kuye kwabonakala ukuba okukhona imbutho isiba nkulu, kokukhona kusiba nzima ukuyilawula. Iimbutho ezincinane, ezilawulwa kakuhle azidli ngakujika zibe “ngamatheko angalawulekiyo.”—Galati 5:21, Byington.
10 Ngokuqinisekileyo uphando lwakho luza kuxhokonxa imibuzo engakumbi, enjengethi: Ngaba akho amanye amaKristu aqolileyo aza kubakho kule mbutho? Ngubani kanye kanye oyixhasa ngemali le mbutho? Ngaba injongo yale mbutho kukukhuthaza ulwalamano olucocekileyo okanye kukuzalisa isipaji somntu othile? Ngaba ikho imiqathango ebekiweyo yokuba ngoobani abanokuza? Ukuba le mbutho yenziwa ngempela-veki, ngaba iza kuphela ngexesha elisengqiqweni ukuze abo bezileyo bakwazi ukuya kubulungiseleli bamaKristu ngosuku olulandelayo? Ukuba kuza kubakho umculo kuze kungqungqwe, ngaba uza kuvisisana nemilinganiselo yamaKristu? (2 Korinte 6:3) Kusenokungabi lula ukuyibuza loo mibuzo. Kodwa IMizekeliso 22:3 iyalumkisa: “Onobuqili ubona into embi, azifihle; ke zona iziyatha ziya kugqitha kuyo, zihlawuliswe.” Ewe, unako ukuzibaleka iimeko eziyingozi ngokusebenzisa amandla akho okuqonda.
Ukusebenzisa Ukuqonda Xa Uceba Imfundo Yakho
11. Ulutsha lunokuwasebenzisa njani amandla alo okuqonda xa luceba ikamva lalo?
11 IBhayibhile ithi kububulumko ukuceba ikamva. (IMizekeliso 21:5) Ngaba wena nabazali bakho nikhe naxubusha ngekamva lakho? Mhlawumbi uceba ukungenela ubulungiseleli bexesha elizeleyo njengovulindlela. Ngokwenene, awukho umsebenzi onokukwanelisa ngaphezu kwalowo. Ukuba uzenzela imikhwa emihle yokufundisisa kwaye uhlakulela ubuchule kubulungiseleli, sele uqalisile ukulungiselela lo msebenzi ubangela imincili. Phofu ke ukhe wayicinga indlela oza kuzixhasa ngayo kubulungiseleli? Ukuba kwixesha elizayo ufuna ukuba nosapho, ngaba uza kukwazi ukuyinyamekela loo mbopheleleko yongezelelekileyo? Ukuze wenze izigqibo ezilungeleleneyo nezisengqiqweni kwimibandela enjalo kufuneka usebenzise amandla akho okuqonda.
12. (a) Ezinye iintsapho ziye zazilungiselela njani iimeko eziguquguqukayo zoqoqosho? (b) Ngaba ukufumana imfundo eyongezelelekileyo kuyangqubana nokuzibekela usukelo lokuba nguvulindlela? Cacisa.
12 Kwezinye iindawo ubani usakwazi ukuthi ngoxa esebenza, afumane uqeqesho lobugcisa okanye lomsebenzi othile oluncedo. Lukho ulutsha olufunda ukusebenza kwishishini lakowalo okanye oluqeqeshwa ngabahlobo balo abakhulileyo abanamashishini. Olunye lufundela izinto eziza kuba luncedo ekuziphiliseni kamva. Xa amathuba anjalo engekho, emva kokuwucingisisa nzulu lo mbandela, abazali basenokwenza amalungiselelo okuba abantwana babo bafumane imfundo eyongezelelekileyo emva kokuba bephumelele amabanga aphezulu. Ukuceba kusengaphambili ukuze ukwazi ukunyamekela iimbopheleleko zobuntu obukhulu ngokukodwa xa injongo ikukuba nesabelo kwinkonzo yobuvulindlela kangangexesha elide akuchasananga nokubeka uBukumkani bukaThixo kwindawo yokuqala. (Mateyu 6:33) Kwaye imfundo eyongezelelekileyo ayithethi kuthi ubani akanakuba nguvulindlela. Ngokomzekelo, elinye iNgqina eliselula kwakukudala lifuna ukuba nguvulindlela. Emva kokuphumelela kumabanga aphezulu, abazali balo—nabo abangoovulindlela abathe ngxi—benza amalungiselelo okuba lifumane imfundo eyongezelelekileyo. Lakwazi ukuba nguvulindlela ngoxa lifunda, kwaye ngoku linendlela yokuzixhasa njengoko liqhubeka linguvulindlela.
13. Iintsapho zifanele ziwuphicothe njani umbandela wemfundo eyongezelelekileyo?
13 Kumbandela wemfundo eyongezelelekileyo, intsapho nganye inelungelo nembopheleleko yokuzenzela isigqibo sayo. Xa zikhethwe kakuhle izifundo, zinokuba luncedo. Noko ke, isenokuba ngumgibe. Ukuba ucinga ngokuqhubeka nemfundo enjalo, luyintoni usukelo lwakho? Ngaba kukuzilungiselela ukuze usingathe iimbopheleleko zobuntu obukhulu ngendlela ebekekileyo? Okanye ngaba “uzifunela izinto ezinkulu”? (Yeremiya 45:5; 2 Tesalonika 3:10; 1 Timoti 5:8; 6:9) Kuthekani ngokuqhubeka nemfundo eyongezelelekileyo ukude nekhaya, mhlawumbi uhlala kweso sikolo ufunda kuso? Ngaba oko bekuya kuba bubulumko xa sicinga nangesilumkiso sikaPawulos sokuba “unxulumano olubi lonakalisa imikhwa esebenzisekayo”? (1 Korinte 15:33; 2 Timoti 2:22) Ukhumbule kwakhona ukuba “ixesha eliseleyo lifinyele.” (1 Korinte 7:29) Uza kuchitha ixesha elingakanani ufundela loo nto uyifundelayo? Ngaba iza kuthabatha inxalenye enkulu yeminyaka yobutsha bakho? Ukuba kunjalo, uthini ke njengokuba iBhayibhile ikhuthaza ukuba “ukhumbule ke uMdali wakho ngemihla yobutsha bakho”? (INtshumayeli 12:1) Ngaphezu koko, ngaba izifundo zakho ziza kukunika ithuba lokuba wenze izinto ezibalulekileyo kumaKristu ezinjengokuya kwiintlanganiso, inkonzo yasentsimini kunye nofundisiso lobuqu? (Mateyu 24:14; Hebhere 10:24, 25) Ukuba amandla akho okuqonda abukhali, soze lusithele usukelo lokomoya xa wena nabazali bakho niceba ikamva lakho.
Ukugcina Ukuthandana Ngaphambi Komtshato Kubekekile
14. (a) Yiyiphi imigaqo efanele ikhokele izibini ezenza amadinga xa zibonakalisa uthando omnye komnye? (b) Ezinye izibini ziye azasebenzisa kuqonda njani xa kufikwa kulo mba?
14 Enye inkalo ekufuneka kuyo amandla akho okuqonda yile yokuthandana ngaphambi komtshato. Kuyinto yemvelo ukufuna ukubonakalisa uthando kumntu omkhathalelayo. Kuyabonakala ukuba isibini esinyulu esichazwe kwiNgoma yazo iiNgoma sasisenza izenzo ezithile zokubonakalisa uthando ngaphambi kokuba sitshate. (INgoma yazo iiNgoma 1:2; 2:6; 8:5) Namhlanje, ezinye izibini ezithandana ngaphambi komtshato zisenokuvakalelwa ngokufanayo ukuba ukubambana ngezandla, ukuphuzana nokuwolana kufanelekile, ngokukodwa xa sele ziqonda ukuba ziza kutshata. Kodwa khumbula: “Okholose ngeyakhe intliziyo usisidenge.” (IMizekeliso 28:26) Okulusizi kukuba uninzi lwezibini luye alwasebenzisa ukuqonda ngokuzifaka kwiimeko ezinokuzenza zilalanise. Iimbonakaliso zothando ziye zegqithisa kwaye azalawulwa; umphumo uye waba zizenzo ezingacocekanga ezide zaphumela ekuziphatheni okubi ngokwesini.
15, 16. Ngawaphi amanyathelo anokuthatyathwa zizibini ukuze ziqiniseke ukuba ukuthandana kwazo ngaphambi komtshato kuhlala kubekekile?
15 Ukuba wenza amadinga, usisilumko ukuba uyakuphepha ukuba wedwa okanye ukuba kwiimeko ezingafanelekanga naloo mntu uza kuba liqabane lakho. Ngoko kunokuba kuhle ukuba nibe phakathi kweqela labantu okanye kwindawo kawonke wonke. Ezinye izibini ziye zenze ilungiselelo lokuba nempelesi. Enye into, qwalasela la mazwi akuHoseya 4:11: ‘Iwayini, newayini entsha, ziwexula intliziyo.’ Utywala bunokukwenza ungacingi kakuhle kwaye bunokukhokelela isibini kwisenzo esiza kuzisola ngaso kamva.
16 IMizekeliso 13:10 ithi: “Ngokukhukhumala kuvuka ukulwa kuphela; ubulumko bunabavuma ukucetyiswa.” Ewe ‘cebisanani’ nize nixubushe indlela eniza kuziphatha ngayo. Zisikeleni umda iimbonakaliso zothando, ngamnye azihlonele iimvakalelo kunye nesazela somnye. (1 Korinte 13:5; 1 Tesalonika 4:3-7; 1 Petros 3:16) Kusenokuba nzima ekuqaleni ukuthetha ngalo mba ekubeni untununtunu, kodwa kunokuthintela iingxaki ezinzulu ezinokwenzeka kamva.
Ukufundiswa “Kwasebuncinaneni”
17. UDavide wamenza njani uYehova ‘wayinkoloseko yakhe kwasebuncinaneni bakhe,’ kwaye sisiphi isifundo esidluliselwa koku kulutsha lwanamhlanje?
17 Kuza kufuneka uhlale uthe qwa ukuze uyiphephe imigibe kaSathana—kwaye maxa wambi kofuneka ukhaliphe gqitha. Ewe, maxa wambi usenokuzifumana ungangquzulani nabahlobo bakho nje kuphela, kodwa ungquzulana nehlabathi liphela. Umdumisi uDavide wathandaza esithi: “Ulithemba lam, Nkosi yam, Yehova, inkoloseko yam kwasebuncinaneni bam. Thixo, undifundisile kwasebuncinaneni bam; unangoku ndiyayixela imisebenzi yakho ebalulekileyo.” (INdumiso 71:5, 17)c UDavide waziwa ngokuba nenkalipho. Kodwa waqalisa nini ukuba nayo? Eselula! Kwanangaphambi kokuba enze isenzo esaba yindumasi sokulwa noGoliyathi, uDavide wayebonakalise inkalipho engaqhelekanga ngokukhusela umhlambi kayise—ebulala ingonyama kunye nebhere. (1 Samuweli 17:34-37) Noko ke, uDavide walusa kuYehova lonke uzuko ngayo nayiphi na inkalipho awayenayo, embiza ngokuba ‘uyinkoloseko yakhe kwasebuncinaneni bakhe.’ Ukukwazi kukaDavide ukwayama ngoYehova kwamenza wakwazi ukumelana naso nasiphi na isilingo esasisiza kuye. Nawe uya kufumanisa ukuba xa usayama ngoYehova, uya kukunika inkalipho kunye namandla ‘okoyisa ihlabathi.’—1 Yohane 5:4.
18. Sisiphi isibongozo esinikelwa kulutsha oluhlonela uThixo namhlanje?
18 Amawaka olutsha olunjengawe aye ema ngenkalipho ibe sithethanje akhonza njengabavakalisi beendaba ezilungileyo ababhaptiziweyo. Siyambulela uThixo ngenxa yokholo nenkalipho eninayo nina baselula! Qhubekani nizimisela ukuba nibubaleke ubungendawo beli hlabathi. (2 Petros 1:4) Qhubekani niwasebenzisa amandla enu okuqonda aqeqeshwe ngeBhayibhile. Ukwenjenjalo kuya kunikhusela kwiintlekele zanamhlanje kuze ekugqibeleni kuniqinisekise ngosindiso. Njengoko inqaku lethu lokugqibela liza kubonisa, okunene niza kuphumelela ebomini.
[Imibhalo esemazantsi]
a Bona inqaku elithi “Abantu Abaselula Bayabuza . . . Ndingayenza Njani Inyaniso Ibe Yeyam?” kwinkupho kaVukani! kaNovemba 8, 1998.
b Inqaku elithi “Iimbutho Zokuzonwabisa—Nandipha Iingenelo, Phepha Imigibe” elikwinkupho yeMboniselo ka-Agasti 15, 1992, linenkcazelo etyebileyo ngalo mbandela.
c INdumiso 71 ibonakala iqhubeka nombandela osuka kwiNdumiso 70, echazwe kumbhalo ongasentla njengendumiso kaDavide.
Imibuzo Yempinda
◻ Oselula uwaqeqesha njani amandla akhe okuqonda?
◻ Oselula unokuwasebenzisa njani amandla akhe okuqonda xa kufikelelwa kumba wokuya kwiimbutho zamaKristu?
◻ Ziziphi izibakala ezinokuqwalaselwa xa ubani eceba imfundo yakhe?
◻ Izibini ezithandana ngaphambi komtshato zinokuwuphepha njani umgibe wokuziphatha okubi ngokwesini?
[Umfanekiso okwiphepha 15]
Ukufunda ukwenza uphando kuya kukunceda uqeqeshe amandla akho okuqonda
[Umfanekiso okwiphepha 16]
Kulula ukuvelela iimbutho ezincinane kwaye azidli ngakugqibela ngokuba ziziyunguma ezingalawulekiyo
[Umfanekiso okwiphepha 16]
Abazali bafanele babancede abantwana babo xa beceba imfundo yabo
[Umfanekiso okwiphepha 17]
Ukwenza amadinga phakathi kweqela labantu kuyakhusela