Yiba Nesibindi NjengoTsadoki

1-2. Wayengubani uTsadoki? (1 Kronike 12:​22, 26-28)

KHAWUBE nombono wamadoda ayi-340 000 edibene ukuze enze uDavide abe ngukumkani wakwaSirayeli. Kangangeentsuku ezintathu, la madoda ahleli kwiinduli ezinamatye kufutshane neHebron. Kumnandi, ayancokola, acula iingoma zokudumisa uYehova, ayahleka nokuhleka. (1 Kron. 12:39) Phakathi kwaloo madoda kwakukho nomfana onguTsadoki, ekusenokwenzeka ukuba abantu abaninzi zange bamqaphele. Kodwa uYehova waqiniseka ukuba siyazi ukuba wayekhona. (Funda izi-1 Kronike 12:​22, 26-28.) Wayengubani uTsadoki?

² UTsadoki wayengumbingeleli owayesebenza noMbingeleli Omkhulu uAbhiyatare. Wayekwayimboni enobulumko neyayikwazi ukuziqonda izinto ezazifunwa nguYehova. (2 Sam. 15:27) Abantu babesiya kuye xa befuna ukucetyiswa. Wayenaso nesibindi. Kweli nqaku siza kuthetha ngeendlela awabonisa ngazo ukuba unaso.

3. (a) Kutheni kufuneka abantu bakaYehova babe nesibindi? (b) Siza kuthetha ngantoni kweli nqaku?

³ Kule mihla yokugqibela, uSathana wenza konke okusemandleni akhe ukuze abantu bakaThixo baphelelwe lukholo. (1 Pet. 5:8) Njengoko silinde ukuba uYehova ade amtshabalalise uSathana neli hlabathi lakhe libi, kufuneka sibe nesibindi. (INdu. 31:24) Makhe sithethe ngezinto ezintathu esinokuzenza ezinokubonisa ukuba sinesibindi njengoTsadoki.

MELA UBUKUMKANI BUKATHIXO

4. Kutheni kufuneka abantu bakaYehova babe nesibindi ukuze bamele uBukumkani bakhe? (Jonga nomfanekiso.)

⁴ Thina bakhonzi bakaYehova sibumela ngokunyanisekileyo uBukumkani BukaThixo. Kodwa loo nto idla ngokufuna sibe nesibindi. (Mat. 6:33) Ngokomzekelo, kufuneka sibe nesibindi ukuze siphile ngemithetho kaYehova, sikwazi nokushumayela iindaba ezilungileyo ezingoBukumkani kweli hlabathi libi. (1 Tes. 2:2) Nokuhlala singathathi cala kwiipolitiki zeli hlabathi lingamanyananga kufuna sibe nesibindi. (Yoh. 18:36) Abantu bakaYehova abaninzi baye baphelelwa yimali, babethwa okanye bavalelwa etrongweni ngenxa yokungathathi cala kwiipolitiki okanye ukungavumi ukuba semkhosini.

5. Kutheni kwakufuneka uTsadoki abe nesibindi ukuze akwazi ukuya emfazweni noDavide?

⁵ UTsadoki wayengayelanga nje ukwenza uDavide abe nguKumkani eHebron. Wayexhobele nokulwa. (1 Kron. 12:38) Wayelungele ukuya emfazweni noDavide, nokukhusela amaSirayeli kwiintshaba zawo. Yena wayengakuqhelanga ukulwa ezimfazweni, kodwa wayenesibindi.

6. Yintoni awayenzayo uDavide eyayinokwenza uTsadoki afune ukuba nesibindi njengaye? (INdumiso 138:3)

⁶ UTsadoki owayengumbingeleli wakufunda phi ukuba nesibindi? Wayephila namadoda awayenaso. Ngokuqinisekileyo wafunda kuwo. Ngokomzekelo, xa uDavide waba nesibindi ‘sokukhokela amaSirayeli aye ezimfazweni,’ onke ayefuna ukumenza uKumkani. (1 Kron. 11:​1, 2) Wayesoloko ethembela ngoYehova ukuba uza kumnceda oyise iintshaba zakhe. (INdu. 28:7; funda iNdumiso 138:3.) Akhona namanye amadoda uTsadoki awafunda kuwo ukuba nesibindi, amadoda afana noYehoyada, unyana wakhe owayengumphumi-mkhosi uBhenaya, kunye nezinye iinkosi eziyi-22 ezazingakwicala likaDavide. (1 Kron. 11:​22-25; 12:​26-28) Onke la madoda ayezimisele ukukhusela uDavide nokumenza abe nguKumkani.

7. (a)  Yintoni eye yenziwa ngabanye abazalwana abasebatsha esinokufunda kubo? (b)  Kwividiyo yintoni oyifundileyo kuMzalwan’ uNsilu?

⁷ Xa sicinga ngesibindi abaye banaso abanye ukuze bamele uYehova noBukumkani bakhe, nathi sitsho sifune ukuba naso. UKumkani wethu uKristu uYesu, zange avume ukungena izinto zepolitiki zeli hlabathi likaSathana. (Mat. 4:​8-11; Yoh. 6:​14, 15) Wayesoloko ethembele ngoYehova ukuba uza kumnceda abe nesibindi. Nanamhlanje sinabazalwana abaninzi abasebatsha esinokufunda kubo, abaye abavuma ukungena kwizinto zeepolitiki okanye ukuba semkhosini. Unokufunda ngabanye babo ku-jw.org/xh.a

NCEDA ABAZALWANA BAKHO

8. Abadala banokusidinga xa kutheni isibindi ukuze bancede abazalwana noodade?

⁸ Abantu bakaYehova bayakuthanda ukuncedana. (2 Kor. 8:4) Kodwa ngamanye amaxesha kuye kufuneke babe nesibindi ukuze benze loo nto. Ngokomzekelo, xa kukho imfazwe abadala baye baqonde ukuba abazalwana noodade bayakudinga ukukhuthazwa, nokuncedwa ngezinto eziqinisa ukholo okanye ezinye izinto abanokuzidinga. Ngenxa yokuba bezithanda izimvu, abadala baye bazincede nokuba loo nto inokubabeka engozini. (Yoh. 15:​12, 13) Xa besenza loo nto, babonisa ukuba banesibindi njengoTsadoki.

9. Ku-2 Samuweli 15:​27-29, uDavide wathi uTsadoki makenze ntoni? (Jonga nomfanekiso.)

⁹ Ubomi bukaDavide babusengozini. Unyana wakhe uAbhisalom wayezimisele ukumbulala, ukuze ibe nguye ukumkani. (2 Sam. 15:​12, 13) Kwakufuneka uDavide akhawuleze emke eYerusalem. Wathi kwizicaka zakhe: “Phakamani, masibalekeni, akukho nomnye kuthi oza kusinda ku-Abhisalom!” (2 Sam. 15:14) Zathi xa zihamba, wabona ukuba kuza kufuneka kubekho umntu oshiyekayo ukuze amane emxelela ngezinto uAbhisalom awayeceba ukuzenza. Ngoko uDavide wathi uTsadoki nabanye ababingeleli mababuyele esixekweni ukuze babe ziintlola. (Funda u-2 Samuweli 15:​27-29.) Le nto wayesithi mabayenze yayiyingozi, inokubabulalisa nokubabulalisa. Ngoko kwakufuneka balumke kakhulu. UAbhisalom wayeyindoda enekratshi, engaxoleliyo nenamaqhinga. Ngoko khawucinge into awayenokuyenza kuTsadoki nakwabanye ababingeleli, xa efumanisa ukuba babeziintlola ezazifuna ukukhusela uDavide!

10. UTsadoki nabantu ababekunye naye bamkhusela njani uDavide?

¹⁰ UDavide wenza icebo elaliza kufuna ukuba uTsadoki asebenze noHushayi, owayengomnye wabahlobo bakaDavide abathembekileyo. (2 Sam. 15:​32-37) UHushayi wenza ngathi ukwicala lika-Abhisalom, wamcebisa ngendlela awayemele amhlasele ngayo uDavide. Loo ndlela yayiza kunika uDavide ithuba lokubaleka. Emva koko waxelela uTsadoki noAbhiyatare ngeli cebo. (2 Sam. 17:​8-16) Wona la madoda mabini axelela uDavide. (2 Sam. 17:17) UYehova wanceda uTsadoki nabanye ababingeleli bakwazi ukukhusela uDavide.​—2 Sam. 17:​21, 22.

11. Sinokuba naso njani isibindi esifana nesikaTsadoki xa sinceda abazalwana noodade?

¹¹ Sinokuba naso njani isibindi njengoTsadoki xa kufuneka sincede abazalwana noodade abasengozini? (1) Thobela imiyalelo. Kwiimeko eziyingozi, kubaluleke kakhulu ukuba sihlale simanyene. Yithobele imiyalelo esuka kwiofisi yesebe. (Heb. 13:17) Abadala bamele bahlale beyihlola imiyalelo yokulungiselela intlekele esuka kwintlangano, neyezinto ekufuneka zenziwe xa isenzeka, bahlale bewahlola namalungiselelo asekuhlaleni exesha lentlekele. (1 Kor. 14:​33, 40) (2) Yiba nesibindi kodwa ulumke. (IMize. 22:3) Cinga ngaphambi kokuba wenze. Sukuzifaka engozini ngokungeyomfuneko. (3) Thembela ngoYehova. Khumbula ukuba eyona nto uYehova ayifunayo kukuba ukhuseleke, kukhuseleke nabazalwana noodade. Unokukunceda ukhuseleke xa ubanceda.

12-13. Ufunda ntoni kwinto eyenzeka kuViktor noVitalii? (Jonga nomfanekiso.)

¹² Khawucinge ngoViktor noVitalii, abadala ababini ababesisa ukutya namanzi kubazalwana noodade baseUkraine. UViktor uthi: “Sasikukhangela kuyo yonke indawo ukutya. Amaxesha amaninzi kwakudutyulwana kufutshane nalapho sikhoyo. Omnye umzalwana wanikela ngokutya okwakusevenkileni yakhe. Loo mnikelo wanceda abavakalisi abaninzi banokutya okwakuza kubaqhuba kangangexesha. Sathi sisalayisha izinto kwilori yethu, kwaqhushumba ibhombu kumgama omalunga neemitha eziyi-20 ukusuka kwindawo esasikuyo. Imini yonke ndandithandaza, ndicela uYehova andincede ndibe nesibindi sokuqhubeka ndibanceda abavakalisi.”

¹³ Yena uVitalii uthi: “Kwakufuneka sibe nesibindi nyhani. Uhambo lwam lokuqala lwaluziiyure eziyi-12. Kuyo yonke loo ndlela ndandithandaza.” UVitalii waba nesibindi, kodwa elumkile nokulumka. Uphinda athi: “Ndandisoloko ndicela uYehova andincede ndilumke futhi ndithobeke. Ndandiqhuba kuphela kwiindlela ababesithi abasemagunyeni makuhanjwe kuzo. Kuye kwandinceda ukubona abazalwana noodade besebenzisana. Babesusa izinto ezivale indlela, baqokelele ukutya, iimpahla, nezinye izinto ezibalulekileyo ezaziza kudingwa ngabazalwana, baze bazilayishe kwilori yethu. Nathi babesipha ukutya, basinike nendawo yokuphumla.”

HLALA UTHEMBEKILE KUYEHOVA

14. Sinokuziva njani xa umntu esimthandayo eshiya uYehova?

¹⁴ Enye yezona ngxaki zinzima kakhulu ezinokusenza sityhafe kuxa umntu wasekhaya okanye umhlobo eshiya uYehova. (INdu. 78:40; IMize. 24:10) Ukuba simthanda kakhulu loo mntu, kunokuba nzima nyhani ukunyamezela. Ukuba ikhe yakwehlela loo nto, ukucinga ngoTsadoki kungakomeleza.

15. Kwakutheni ukuze uTsadoki adinge isibindi ukuze ahlale ethembekile kuYehova? (1 Kumkani 1:​5-8)

¹⁵ UTsadoki wahlala ethembekile kuYehova nangona umhlobo wakhe uAbhiyatare wakhetha ukungathembeki. Le nto yenzeka ekupheleni kolawulo lukaDavide. Xa uDavide wayesele eza kufa, unyana wakhe uAdoniya wazama ukuzenza ukumkani, nangona uYehova wayekhethe uSolomon. (1 Kron. 22:​9, 10) UAbhiyatare wakhetha ukuba ngakwicala lika-Adoniya. (Funda izi-1 Kumkani 1:​5-8.) Le nto yayisenziwa nguAbhiyatare yayingekuko ukungathembeki kuDavide nje kuphela, yayikukungathembeki nakuYehova. Khawucinge indlela amele ukuba waba buhlungu futhi waphoxeka ngayo uTsadoki. Kangangeminyaka engaphezu kweyi-40, yena noAbhiyatare babesebenza kunye bengababingeleli. (2 Sam. 8:17) Babehoya “iTyeya kaThixo wokwenene.” (2 Sam. 15:29) Ekuqaleni, omabini la madoda ayexhasa ulawulo lukaDavide, esenzela uYehova neminye imisebenzi.​—2 Sam. 19:​11-14.

16. Inoba yintoni eyanceda uTsadoki wahlala ethembekile?

¹⁶ UTsadoki wahlala ethembekile kuYehova, nangona engazange abe njalo yena uAbhiyatare. UDavide zange akhe angamthembi uTsadoki. Xa iqhinga lika-Adoniya lavelayo, uDavide wakhetha uTsadoki, uNatan noBhenaya ukuba benze uSolomon abe ngukumkani. (1 Kum. 1:​32-34) Kumele ukuba kwamkhuthaza nyhani uTsadoki ukuba kunye noNatan nabanye abantu ababengakwicala likaKumkani uDavide, ababekhonza uYehova bethembekile. (1 Kum. 1:​38, 39) Xa uSolomon waba ngukumkani, “wafaka umbingeleli uTsadoki endaweni ka-Abhiyatare.”​—1 Kum. 2:35.

17. Unokumlinganisa njani uTsadoki xa umntu omthandayo eshiya uYehova?

¹⁷ Ungamlinganisa njani uTsadoki? Ukuba umntu omthandayo ukhetha ukumshiya uYehova, yenza kucace ukuba ukwicala likabani. (Yosh. 24:15) UYehova uza kukunceda ube nesibindi. Thetha naye ngomthandazo, uze uthi nca kubantu abamkhonza bethembekile. UYehova uyithanda kakhulu into yokuba uthembekile kuye, futhi uza kukusikelela.​—2 Sam. 22:26.

18. Ufunda ntoni kwinto eyenzeka kuMarco noSidse?

¹⁸ Cinga ngento eyenzeka kuMarco nenkosikazi yakhe uSidse, abaneentombi ezimbini ezashiya inyaniso. UMarco uthi: “Uqala ngolwa suku bazalwa ngalo ukubathanda kakhulu abantwana bakho. Ungenza nantoni na ukuze ubakhusele. Yiloo nto kusiba buhlungu kakhulu xa bekhetha ukushiya uYehova. Kodwa uYehova ebesoloko enathi. Uye waqiniseka ukuba xa indim otyhafileyo, iyomelela inkosikazi yam, kuze xa kutyhafe yona komelele mna.” USidse uthi: “Besingasoze sikwazi ukunyamezela ukuba uYehova ebengasiniki amandla esiwadingayo. Ndandikhathazwa kukucinga ukuba bemshiyile nje uYehova abantwana bethu kungenxa yam, ngoko ndathandaza ndimxelela indlela endiziva ngayo. Kungabanga xesha lide emva koko, omnye udade endamgqibela kudala wathi kum, ‘Sidse, sukulibala ukuba ayinguwe owenze abantwana bakho bashiya uYehova.’ UYehova undincede ndahlala ndikuvuyela ukumkhonza.”

19. Yintoni ozimisele ukuyenza?

¹⁹ UYehova ufuna bonke abakhonzi bakhe babe nesibindi njengoTsadoki. (2 Tim. 1:7) Kodwa akafuni sithembele kumandla ethu, ufuna sithembele ngaye. Xa kusenzeka into efuna ube nesibindi, thetha noYehova. Unokuqiniseka ukuba uza kukwenza ube nesibindi njengoTsadoki.​—1 Pet. 5:10.