Iimbekiselo Zencwadi Yobomi BamaKristu Nomsebenzi Wokushumayela
© 2025 Watch Tower Bible and Tract Society of Pennsylvania
SEPTEMBA 1-7
UBUTYEBI OBUPHUMA ELIZWINI LIKATHIXO IMIZEKELISO 29
Phepha Iinkolelo Namasiko Angathandwayo NguThixo
wp16.06 6, ibhokisi
Imibono Ngabo Baphila Emazulwini
Njengamabanjwa asetsheyinini, izigidi zabantu zikhonkxwe ziinkolelo nakukoyika iidemon. Basebenzisa amakhubalo nemilingo besithi bayazikhusela. Akuyomfuneko ukwenjenjalo. IBhayibhile isiqinisekisa ngala mazwi asithuthuzelayo: “Amehlo [kaYehova] asingasinga emhlabeni wonke ukuba ababonise amandla abo bantliziyo ziphelele kuye.” (2 Kronike 16:9) UYehova uThixo onamandla lee kunoSathana, uya kukukhusela ukuba uthembele ngaye.
Ukuze uYehova akukhusele, kufuneka ufunde uze wenze oko akuthandayo. Ngokomzekelo, amaKristu ase-Efese ekuthethwa ngawo eBhayibhileni aqokelela zonke iincwadi zawo zemilingo azitshisa. (IZenzo 19:19, 20) Ngendlela efanayo, nawe ukuze uThixo akukhusele, ufanele utshabalalise amakhubalo, izinto zokuvumisa, iincwadi zemilingo nayo nantoni na enokwenza needemon.
Yimele Inyaniso Engokufa
13 Ukuba awuqinisekanga ngesiko elithile, thandaza kuYehova uze ucele ubulumko. (Funda uYakobi 1:5) Emva koko phanda kwiincwadi zethu. Ukuba kuyimfuneko, buza kubadala abakwibandla lakho. Abazukuchazela into omele uyenze kodwa baza kukubonisa imigaqo yeBhayibhile, njengale kuthethwa ngayo apha. Xa uzenza ezi zinto, uza kuqeqesha ‘amandla akho okuqonda’ ibe la mandla aza kukunceda ukwazi “ukwahlula okulungileyo nokubi.”—Heb. 5:14
“Ndiya Kuhamba Enyanisweni Yakho”
12 Amasiko nezenzo ezingafunwayo nguThixo. Amalungu eentsapho zethu, abantu esisebenza nesifunda nabo basenokufuna ukuba nathi sibhiyozele imihla yokuzalwa okanye ezinye iiholide. Yintoni enokusinceda singenzi amasiko okanye sibhiyozele iiholide angazifuniyo uYehova? Ngokuthi sihlale sicinga ngendlela uYehova azijonga ngayo ezi zinto. Enye into enokusinceda kukufunda iincwadi zethu ezisixelela ukuba zisuka phi ezi holide. Xa sizikhumbuza ngezizathu eziseBhayibhileni zokuba singamele sizibhiyozele, siyaqiniseka ukuba sihamba ngendlela ‘eyamkelekileyo eNkosini.’ (Efe. 5:10) Xa sithembela kuYehova nakwiLizwi lakhe ‘asizukungcangcazela ngumntu.’—IMize. 29:25.
Ubuncwane ObuseBhayibhileni
it “Ukuncoma Umntu Ngokugqithisileyo” 1
Ukuncoma Umntu Ngokugqithisileyo
Kukuncoma umntu ngendlela echuliweyo, ukumzukisa, ukumtyibela ngezincomo okanye ukumncoma ngezincomo ezingafanelanga ukuba ziya kuye. Le nto isenokumenza azibone ebaluleke kakhulu kunabanye abantu, ize imenze akhulelwe likratshi. Le nto, umntu usenokuyenza kuba efuna ukuzithandisa okanye efuna ukufumana intw’ethile kuloo mntu amncomayo, nto leyo ezakwenza lo unconywayo azibone efanelwe kukuzukiswa. Ixesha elininzi loo nto isenokwenza lomntu unconywayo azibone sesengxakini. (IMi 29:5) Ukuncoma umntu ngokugqithisileyo ayibobulumko obuvela ezulwini, kodwa bobe hlabathi kuba buqhutywa kukuzicingela wedwa, ukuba nomkhethe, nokuhanahanisa. (Yak 3:17) Ukunganyaniseki, ukumncoma umntu ngenjongo yokumzukisa nokumenza azive ebaluleke kakhulu, zonke ezizinto ziyenyayeka kuYehova.—2Ko 1:12; Gal 1:10; Efe 4:25; Kol 3:9; ISi 21:8.
SEPTEMBA 8-14
UBUTYEBI OBUPHUMA ELIZWINI LIKATHIXO IMIZEKELISO 30
“Ungandiniki Buhlwempu Nabutyebi”
Simele Sithande Bani Ukuze Sonwabe Nyhani?
10 Sonke siyayidinga imali bazalwana. Iyasikhusela ngandlel’ ithile. (INtshu. 7:12) Kodwa ngaba umntu angonwaba nyhani xa enemali eyanele nje izinto azidingayo? Nangoku! (Funda iNtshumayeli 5:12.) UAgure, unyana kaYake, wabhala wathi: “Musa ukundinika ubuhlwempu okanye ubutyebi. Mandidle ukutya endikumiselweyo.” Sizicacele isizathu sokuba angafuni ukuba lihlwempu. Kaloku wathi wayengafuni kulingeka ukuba ebe, kuba loo nto yayiza kumhlazisa uThixo. Kodwa yintoni eyayimenza acele ukuba angabi sisityebi? Wabhala wathi: “Ukuze ndingabi nakwanela ndize ndikukhanyele ndithi: ‘Ngubani na uYehova?’” (IMize. 30:8, 9) Mhlawumbi nawe unabantu obaziyo abathembe ubutyebi babo kunokuba bathembe uThixo.
11 Soze ukwazi ukumvuyisa uThixo ukuba uthanda imali. UYesu wathi: “Akukho bani unokukhonza iinkosi ezimbini; kuba usenokuyithiya enye aze ayithande enye, okanye anamathele kwenye aze ayidele enye. Aninakukhonza uThixo nobuTyebi.” Ngaphambi kokuba athethe la mazwi wayethe: “Musani ukuziqwebela ubuncwane emhlabeni, apho kudla khona inundu nomhlwa, nalapho amasela aqhekeza khona ebe. Kunoko, ziqwebeleni ubuncwane ezulwini, apho inundu nomhlwa zingadliyo khona, nalapho amasela angaqhekeziyo ebe.”—Mat. 6:19, 20, 24.
12 Abazalwana abaninzi bafumanise ukuba ukuphila ngezinto ezimbalwa kubenza bonwabe, kwaye babe nexesha elingakumbi lokukhonza uYehova. UJack, umzalwana waseMerika, wathengisa umzi wakhe omkhulu neshishini awayenalo ukuze abe nguvulindlela nenkosikazi yakhe. Ubalisa athi: “Kwakunzima kona ukushiya umzi wethu omhle. Kodwa kangangeminyaka ndandigoduka ndingonwabanga ngenxa yeengxaki zasemsebenzini. Inkosikazi yam yayinguvulindlela othe ngxi, isoloko yonwabile. Yayidla ngokuthi, ‘Akakho umqeshi obhetele kunalo ndimsebenzelayo!’ Ngoku nam ndinguvulindlela, ibe sobabini sisebenzela uMntu omnye, uYehova.”
Yoyika UYehova Uze Wonwabe
◆ 30:15, 16—Ifundisa ntoni le mizekeliso?
Ibonisa ukunganeliseki komntu onomnqweno wokubawa. Izimungunyi-gazi zizingxala ngegazi, kanye njengokuba abantu ababawayo besoloko befuna ngamandla imali engakumbi okanye igunya. Ngokunjalo, elabafileyo ngungxow’ ayizali lihlala likhamisile ukuze lifumane amaxhoba okufa angakumbi. Isizalo esingazalanga ‘sikhalela’ abantwana. (Genesis 30:1) Umhlaba othwaxwe yimbalela uwasela onke amanzi emvula uze ngokukhawuleza ubonakale womile kwakhona. Yaye umlilo otshabalalise zonke izinto eziphoswe kuwo udangazela amadangatye athi alenye zonke izinto ezitshayo onokufikelela kuzo. Banjalo ke abantu ababawayo. Kodwa abo bakhokelwa bubulumko bokuhlonel’ uThixo abaqhutywa ngokungenasiphelo kukuzingca okunjalo.
Ukuphila Ngezinto Onazo—Ungakwazi Njani?
Yonga imali ngaphambi kokuba uthenge. Nangona isenokubonakala isemva, into yokonga imali ngaphambi kokuba uthenge sesinye sezona zigqibo zobulumko ezinokukunceda ungangeni matyaleni. Ukwenjenjalo kuye kwanceda abaninzi abangena ematyaleni, anjengenzala kwimali ebangela ukuba lenyuke ixabiso laloo nto ithengwayo. IBhayibhile ithi imbovane “ilumkile” kuba ibutha “ukutya kwayo ngexesha lokuvuna” isenzela ingomso.—IMizekeliso 6:6-8; 30:24, 25.
Hlala Ulundwendwe LukaYehova Ngonaphakade!
18 Kuhle ukuba khe sicinge ngendlela esiyijonga ngayo imali. Zibuze: Ngaba ndisoloko ndizibona sendicinga ngemali nezinto endinokuzithenga? Ukuba ndiyibolekile, ngaba ndiyibuyisa kade kuba ndicinga ukuba umntu ondibolekileyo akayidingi? Ngaba ukuba nemali kundenza ndizive ndibalulekile, kodwa kube nzima ukuba nobubele ebantwini? Ngaba ndicinga ukuba abazalwana noodade abanemali eninzi bathanda yona kunoYehova? Ngaba ndivana nabantu abazizityebi, andibahoyanga abasokolayo? Sifumene inyhweba enkulu yokuba ziindwendwe ententeni kaYehova. Ukuze sihlale sizizo kufuneka singayithandi imali. Xa sisenza loo nto, uYehova akasoze asishiye.—Funda amaHebhere 13:5.
Ubuncwane ObuseBhayibhileni
Indalo Ityhila Ubulumko BukaYehova
11 Esinye isilwanyana esincinane esinokusifundisa izinto ezibalulekileyo, yimbila. (Funda IMizekeliso 30:26.) Ibufana nomvundla omkhulu kodwa yona ineendlebe ezincinane nemilenze emifutshane. Esi silwanyana sincinane sihlala emaweni. Amehlo abukhali embila ayinceda ibone ingozi isekude, yaye ukuhlala kwayo kwiingxondorha nemixawuka kuyayikhusela kwiintshaba zayo. Iimbila zikhula bhetele xa zihlala zininzi, nto leyo ezenza zikhuseleke zize zifudumale ebusika.
12 Yintoni esinokuyifunda kwimbila? Okokuqala, phawula ukuba esi silwanyana asizibeki esichengeni sokuhlaselwa. Kunoko, sisebenzisa amehlo aso abukhali ukuze sibone iintshaba zaso zisekude, size sihlale kufutshane nemigxuma neengxondorha ezinokusikhusela. Ngokufanayo, sifanele sibe namehlo abukhali ngokomoya ukuze sikwazi ukubona iingozi ezikwihlabathi likaSathana. Umpostile uPetros walumkisa amaKristu esithi: “Hlalani nithe qwa, nilindile. Utshaba lwenu, uMtyholi, luhambahamba njengengonyama egqumayo, efuna ubani engamqwengayo.” (1 Pet. 5:8) Ngoxa wayesemhlabeni, uYesu wahlala elumkele nayiphi na imigudu kaSathana yokwaphula ingqibelelo yakhe. (Mat. 4:1-11) UYesu wabamisela umzekelo omhle abalandeli bakhe!
13 Enye indlela esinokulumka ngayo kukusebenzisa inkuselo yokomoya esiyinikwa nguYehova. Asimele sikutyeshele ukufunda iLizwi likaThixo nokuya kwiintlanganiso zamaKristu. (Luka 4:4; Heb. 10:24, 25) Ukongezelela, kanye njengoko imbila ikhula bhetele xa ihlala nezinye, nathi kufuneka sisondelelane namanye amaKristu ukuze ‘sikhuthazane nawo elukholweni.’ (Roma 1:12) Xa sizivumela ukuba sikhuselwe nguYehova, sibonisa ukuba siyavumelana namazwi omdumisi uDavide, owabhala wathi: “UYehova yingxondorha yam negwiba lam noMsindisi wam. UThixo wam liliwa lam. Ndiya kusabela kuye.”—INdu. 18:2.
SEPTEMBA 15-21
UBUTYEBI OBUPHUMA ELIZWINI LIKATHIXO IMIZEKELISO 31
Funda Kumacebiso Othando Lukamama
Bafundise Imilinganiselo Yokuziphatha Abantwana Bakho
Mfundise yonke into ngesondo. Kubalulekile ukulumkisa. (1 Korinte 6:18; Yakobi 1:14, 15) Noko ke, iBhayibhile ithetha ngesondo njengesipho sikaThixo kungekhona umgibe kaSathana. (IMizekeliso 5:18, 19; INgoma yazo iiNgoma 1:2) Xa abantwana bakho ubaxelela ngengozi kuphela loo nto inokubenza babe nembono egqwethekileyo nengqubana nezibhalo ngalo mba. Elinye ibhinqa eliselula laseFransi uCorrina lithi: “Abazali bam babesoloko bethetha ngokuziphatha okubi kuphela xa bethetha ngesondo loo nto yandenza ndalijonga kakubi.”
Qiniseka ukuba abantwana bakho bazi yonke into ngesondo. Umama waseMexico ekuthiwa nguNadia uthi: “Bendisoloko ndizama ukubaxelela abantwana bam ukuba isondo yindalo kaYehova uThixo ayenzele ukuba abantu bazonwabise. Kodwa lifanele lenziwe emtshatweni kuphela. Linokusenza sonwabe okanye singonwabi kuxhomekeka ukuba silisebenzisa njani.”
Ukuthetha Nabantwana Ngendlela Yokusebenzisa Utywala
Yiba ngowokuqala ukuthetha naye ngotywala. UMark, utata waseBritani uthi: “Indlela yokusebenzisa utywala ingababhida abantwana. Ndabuza unyana wam oneminyaka eyi-8 ukuba kulungile okanye kurongo ukusela utywala. Sathetha ngokukhululekileyo ibe loo nto yamnceda wazola, waza wachaza indlela acinga ngayo.”
Uza kumnceda umntwana wakho xa ungathethi kanye ngotywala. Kuxhomekeke kwiminyaka yomntwana wakho, ungathetha ngabo nangezinye izinto zobomi ezifana nendlela yokukhuseleka endleleni nangesondo
Yiba ngumzekelo. Abantwana bafana neziponji—bafunda kwizinto abazibonayo—ibe uphando lubonisa ukuba abantwana bafunda kakhulu kubazali. Le nto ithetha ukuba xa usebenzisa utywala xa uneengxaki okanye unestres, umntwana wakho uza kucinga ukuba naye makabusebenzise xa enamaxhala. Ngoko makafunde kuwe. Qiniseka ukuba ubusebenzisa kakuhle utywala
Fundisa Abantwana Ukuthobeka
Mfundise ukupha. Menze abone ukuba “kunoyolo ngakumbi ukupha kunokwamkela.” (IZenzo 20:35) Unokumbonisa njani? Ninokubhala abantu abafuna ukuthengelwa izinto, abadinga imoto nabafuna ukulungiselelwa izinto. Hamba naye xa uyokubanceda. Makabone indlela ovuya ngayo xa unceda abanye. Loo nto iya kubangela ukuba umntwana wakho akubone apha kuwe ukuba kuyintoni ukuthobeka.—Umgaqo weBhayibhile: Luka 6:38
Ubuncwane ObuseBhayibhileni
Imfundo Ngamaxesha Okubhalwa KweBhayibhile
7 KwaSirayeli, abantwana babefundiswa besebancinane ngooyise noonina. (Duteronomi 11:18, 19; IMizekeliso 1:8; 31:26) KwiDictionnaire de la Bible yesiFrentshi, umphengululi weBhayibhile uE. Mangenot wabhala: “Esakukwazi nje ukuthetha, umntwana wayefunda iindawana ezimbalwa zoMthetho. Unina wayephindaphinda indinyana; xa eyazi, wayemnika enye. Kamva, iindinyana ezibhaliweyo ababekwazi ukuzicengceleza ngentloko babezinikwa. Ngaloo ndlela, babefundiswa indlela yokufunda, yaye xa bebadadlana, babenokuqhubeka nokufunda izinto zonqulo ngokufunda nokucamngca ngomthetho weNkosi.”
8 Oku kubonisa ukuba indlela esisiseko yokufundisa eyayisetyenziswa yayikukufaka entliziyweni izinto ezazifundiswa. Izinto ezazifundiwe ngemithetho kaYehova neenkqubano zakhe nabantu bakhe zazimele zibetheleleke entliziyweni. (Duteronomi 6:6, 7) Kwakumele kucamngcwe ngazo. (INdumiso 77:11, 12) Ukuze kuncedwe abadala nabancinane bakhumbule, kwakusetyenziswa iindlela ezahlukahlukeneyo zokwenza kube lula ukukhumbula. Ezi zaziquka ukulandelelaniswa koonobumba, iindinyana ezilandelelanayo kwindumiso ziqalisa ngonobumba owahlukileyo, ngokokulandelelana kwabo (njengeMizekeliso 31:10-31); imfano-zandi (amagama aqala ngonobumba okanye ngesandi esifanayo); nokusetyenziswa kwamanani, njengalawo asetyenziswe kwinxalenye yokugqibela yeMizekeliso isahluko 30. Okubangela umdla kukuba iKhalenda yaseGezere, omnye weyona mizekelo midala yemibhalo yamandulo yesiHebhere, abanye abaphengululi bacinga ukuba yabhalwa ngumntwana wesikolo ezama ukubethelela izinto kwinkumbulo.
SEPTEMBA 22-28
UBUTYEBI OBUPHUMA ELIZWINI LIKATHIXO INTSHUMAYELI 1–2
Qhubeka Uqeqesha Abantu Abasebatsha
‘Ezi Zinto Zidlulisele Kubantu Abathembekileyo’
3 Abaninzi kuthi bayawuthanda umsebenzi wabo, ibe bebengavuya ukuba bebenokuwenza oko. Okubuhlungu kukuba, ukususela kuAdam, isizukulwana ngasinye besisaluphala kuze kulandele esinye. (INtshu. 1:4) Kutshanje, le nto yenze izinto zanzinyana kumaKristu enene. Umsebenzi wabantu bakaYehova uye wanda waza wanzima. Njengoko sisenza imisebenzi engazange yenziwe ngaphambili, kuye kwafuneka kusetyenziswe iindlela ezintsha, kwaye kumaxesha amaninzi kusetyenziswe ubugcisa bale mihla obutshintsha umhla nezolo. Abanye abantu abadala bayanzinyelwa kukubusebenzisa. (Luka 5:39) Kwanaxa bekwazi, basenokungabi nawo amandla alingana nawabantu abangaphantsi kubo ngeminyaka. (IMize. 20:29) Ngoko, abantu abadala, kuba bebathanda abo bangaphantsi kubo ngeminyaka, kulindeleke ukuba babaqeqeshe ukuze bakwazi ukuthwala iimbopheleleko ezingakumbi.—Funda iNdumiso 71:18.
4 Kusenokuba nzima kwabo baneembopheleleko ukubanika igunya nabo bangaphantsi kubo ngeminyaka. Abanye sukube besoyika ukuthathelwa isikhundla abasithanda kunene. Abanye banexhala lokuba bengazukwazi ukujonga yonke into yaye becinga ukuba, ukuba ingaba ngabo bangaphantsi kubo ngeminyaka ababambe iintambo, izinto ziza konakala. Abanye basenokuthi abanalo ixesha lokuqeqesha omnye umntu. Kwelinye icala, nabo bafuna ukuqeqeshwa bafanele balinde xa bengade banikwe umsebenzi ongakumbi
Ubuncwane ObuseBhayibhileni
it “Intshumayeli” 1
Intshumayeli
Igama lesiHebere elithi Qo·heʹleth (elithetha “Umhlanganisi”) lichaza umsebenzi owawusenziwa ngukumkani owayekhokela amaSirayeli. (INt 1:1, 12) Yayingumsebenzi kakumkani ukuqiniseka ukuba yena nabo bakhethwe nguYehova babemanyene ukuze baqhubeke bekhonza uKumkani onguThixo wabo wokwenyaniso ngokuthembeka. (1Ku 8:1-5, 41-43, 66) Ngenxa yoko, into yokuba ukumkani wayelungile okanye wayengalunganga yayinokubonakala ekubeni ubenza abantu bamkhonze uYehova okanye hayi. (2Ku 16:1-4; 18:1-6) USolomon owayengumhlanganisi, wayesele enze umsebenzi omkhulu wokuhlanganisa amaSirayeli kunye nabanye abantu bezinye iintlanga etempileni. Le ncwadi ibonisa xa umhlanganisi wanceda abantu bakaThixo bayeka ukwenza izinto ezimbi, ukuze benze izinto ezintle njengohlanga olwaluzinikele kuThixo walo . Igama elithi Ek kle si a stes (Intshumayeli), liyasetyenziswa nakwiiBhayibhile zethu zesiNgesi, liguqulelwe kwigama elithi Qo he’leth ngokwe Greek Septuagint elithetha “ilungu lebandla”.
SEPTEMBA 29–OKTOBHA 5
UBUTYEBI OBUPHUMA ELIZWINI LIKATHIXO INTSHUMAYELI 3–4
Qinisani Umtshato Wenu
Ukuyisebezisa Kakuhle Iteknoloji
● Ukuzisebenzisa kakuhle izinto zeteknoloji kungawunceda umtshato. Ngokomzekelo, abanye abantu abatshatileyo bancokola kunye emini.
“Umyalezo othi ‘Ndiyakuthanda’ okanye ‘Ndicinga ngawe’ unganenza nisondelelane.”—UJonathan.
● Ukusebenzisa kakubi izixhobo zeteknoloji kungabangela iingxaki emtshatweni. Ngokomzekelo abanye abantu basoloko besebenzisa iifowuni neethabhleti zabo ibe loo nto itya ixesha ebebenokulisebenzisa bekunye namaqabane abo.
“Ndiqinisekile ukuba umyeni wam ebenokukuvuyela ukuncokola nam ukuba bendingasoloko ndisebenzisa ifowuni.”—UJulissa.
● Abanye abantu bathi bayakwazi ukuncokola neqabane labo babe besebenzisa ifowuni kwangexesha elinye. USherry Turkle isazi ngezentlalo uthi: “Akunokwenzeka ukuba umntu enze izinto ezimbini ngexesha elinye. Sekunjalo, nokuba abantu bathi ukwenza izinto ezimbini ngexesha elinye kulungile, kodwa akunjalo.” Uqhubeka athi: “Xa sizama ukwenza izinto ezininzi ngexesha elinye akukho nenye ephumelelayo.”
“Kumnandi ukuncokola nomyeni wam kodwa akumnandanga xa encokola nam esenza ezinye izinto. Ndiziva ngathi andibalulekanga.”—USarah.
Eyona nto ibalulekileyo: Indlela oyisebenzisa ngayo iteknoloji ingawakha okanye iwuchithe umtshato wakho
Ligcineni Livutha “Idangatye LikaYa”
12 Abantu abatshatileyo banokumlinganisa njani uAkwila noPrisila? Khanicinge ngezinto enimele nizenze. Ngaba zikhona kwezo zinto eninokuzenza kunye? Ngokomzekelo, uAkwila noPrisila babeshumayela kunye. Ngaba nani nisoloko niyenza loo nto? UAkwila noPrisila babesebenza kunye. Kusenokwenzeka ukuba wena nomntu otshate naye aniphangeli kunye, kodwa ngaba ninokuyenza kunye imisebenzi yasekhaya? (INtshu. 4:9) Xa niyenza kunye imisebenzi, iba ngathi niliqela elinye, nitsho nikwazi nokuncokola. Sekuyiminyaka engaphezu kweyi-50 ngoku uRobert noLinda betshatile. URobert uthi: “Xa sithetha inyani, asinaxesha lininzi lokuzihlaziya sikunye. Kodwa xa ndivasa izitya, umfazi wam azosule; okanye xa ndisebenza egadini, aze kundincedisa, ndiye ndivuye kakhulu. Xa sisenza izinto kunye siyavana, nothando lwethu luhlale luvutha.”
13 Nantsi into emaningayilibali: Ukuba kunye njee kusenokunganenzi nimanyane. Omnye umfazi waseBrazil uthi: “Kule mihla zininzi izinto eziphazamisayo, kangangokuba ndiye ndafumanisa ukuba sisenokuziqhatha sithi sinalo ixesha lokuba kunye, kuba nje sihlala endlini enye. Ndibonile ukuba kufuneka singabi kunye nje ngegama, kodwa kufuneka sihoyane.” Khawuve ukuba wenza ntoni uBruno nomfazi wakhe uTays, ukuze baqiniseke ukuba bayahoyana xa bekunye. UBruno uthi: “Xa sikunye, siye sibeke iifowuni phaa size sonwabe.”
14 Kodwa niza kuthini ukuba anonwabi xa nikunye? Mhlawumbi izinto enizithandayo azifani okanye niyadikana. Yintoni eninokuyenza? Cinga ngalaa mlilo besikhe sathetha ngawo. Awubi lidangatye nje zisuka. Ufuna kumane kufakwa iinkuni kancinci kancinci. Nani ke, ninokuqala ngokuba kunye ixeshana nje elincinci ngosuku, nenze into eniza kuyithanda nobabini nengazukunixabanisa. (Yak. 3:18) Xa niqala kancinci ngolo hlobo, luza kuya luvutha uthando lwenu
Ligcineni Livutha “Idangatye LikaYa”
3 Ukuze lingacimi “idangatye likaYa,” umyeni nomfazi wakhe bamele basebenzele ukumthanda kakhulu uYehova. Iza kuwunceda njani loo nto umtshato wabo? Ukuba kubalulekile kubo ukuba ngabahlobo bakaYehova, baza kuba nomdla wokuzenza izinto abacebisa ukuba bazenze, ize loo nto ibancede baphephe iingxaki ezinokulwenza luphole uthando lwabo, bakwazi ukulungisa nezo sele zikhona. (Funda iNtshumayeli 4:12.) Abantu abamthanda kakhulu uYehova baye bazame ukumlinganisa ngokusebenzela ukuba neempawu anazo, ezifana nobubele, umonde nokuxolela. (Efe. 4:32–5:1) Xa abantu abatshatileyo benezi mpawu, uthando lwabo luyakhula. ULena, udade oneminyaka engaphezu kweyi-25 etshatile uthi, “Kuba lula ukumthanda nokumhlonipha umntu oneempawu ezifana nezikaYehova.”
Ubuncwane ObuseBhayibhileni
it “Uthando” 39
Uthando
“Ixesha Lokuthanda.” UYehova akalubonisi uthando lwakhe kwabo benza izinto ezimbi. UYehova ubathanda bonke abantu ngaphandle kwabo bamcaphukelayo. Ngoko ixesha lokuba uYehova abonakalise uthando lwakhe kubo liye liphele. UYehova noYesu Kristu bayabuthanda ubulungisa ibe bayabucaphukela ububi. (INd 45:7; Heb 1:9) Abo bamthiyileyo uThixo wokwenyaniso abafanelwanga luthando lwakhe. Eneneni akuncedi nganto ukuqhubeka ubonisa uthando kubantu abanjalo, kuba abo bamcaphukelayo uThixo abazokubonisa uxabiso ngothando lwakhe. (INd 139:21, 22; Isa 26:10) Ngoko ke uThixo ubathiyile abantu abanjalo ibe uzakubatshabalalisa ngexesha elifanelekileyo.—INd 21:8, 9; INt 3:1, 8.
OKTOBHA 6-12
UBUTYEBI OBUPHUMA ELIZWINI LIKATHIXO INTSHUMAYELI 5–6
Indlela Yokubonisa Intlonelo KuThixo Wethu
Zukisa UYehova Ngokubonisa Isidima
17 Kufanele kunikelwe ingqalelo ekhethekileyo ekuboniseni isidima xa sinqula uYehova. INtshumayeli 5:1 ithi: “Lulinde unyawo lwakho xa sukuba usiya endlwini yoThixo oyinyaniso.” UMoses noYoshuwa bayalelwa ukuba bakhulule iimbadada zabo xa bekwindawo engcwele. (Eks. 3:5; Yosh. 5:15) Ukwenza kwabo ngolo hlobo kwakuya kubonisa intlonelo nokuthobeka. Ababingeleli abangamaSirayeli kwakufuneka banxibe iimpahla zangaphantsi zelinen “zokugubungela ubuze benyama yabo.” (Eks. 28:42, 43) Oku kwakuthintela ukuvela okungenasidima kwamalungu athile xa bekhonza esibingelelweni. Lungu ngalinye lentsapho yombingeleli kwakufuneka lilondoloze imilinganiselo kaThixo enesidima.
18 Ukuba nesidima xa sinqula kuquka imbeko nentlonelo. Ukuze sinikwe imbeko nentlonelo, simele senze izinto ngendlela efanelwe yintlonelo. Asimele sibonise isidima sohanahaniso okanye senze ngathi sinaso. Ayifanele ibe yinto nje yokubonwa ngabantu, kodwa ifanele ibonwe nguThixo—ezintliziyweni zethu. (1 Sam. 16:7; IMize. 21:2) Isidima sifanele sibe yinxalenye yobomi bethu size sichaphazele indlela esenza ngayo izinto, isimo sethu sengqondo, ulwalamano lwethu nabanye kwanendlela esizijonga nesivakalelwa ngayo ngeziqu zethu. Eneneni, isidima sifanele sibonakale ngamaxesha onke nakuyo yonke into esiyithethayo nesiyenzayo. Xa kufikelelwa kwihambo yethu, kwimbonakalo nendlela esinxiba nesizilungisa ngayo, sifuna ukuthobela la mazwi ompostile uPawulos: “Siyakuphepha ukuba sisikhubekiso nangayiphi na indlela, ukuze kungafunyanwa siphoso kubulungiseleli bethu; kodwa ngandlela zonke siyazincomela njengabalungiseleli bakaThixo.” (2 Kor. 6:3, 4) ‘Sihombisa imfundiso yoMsindisi wethu, uThixo, ezintweni zonke.’—Tito 2:10
Fundisisa IBhayibhile Ukuze Imithandazo Yakho Ibe Nentsingiselo
21 UYesu wathandaza ngentlonelo yaye enokholo. Ngokomzekelo, ngaphambi kokuba avuse uLazaro “uYesu wawaphakamisela ezulwini amehlo akhe waza wathi: ‘Bawo, ndiyakubulela ngokuba uye wandiva. Enyanisweni, bendisazi ukuba usoloko undiva.’” (Yoh. 11:41, 42) Ngaba nawe uthandaza ngentlonelo enjalo yaye unokholo? Xa ufunda umthandazo kaYesu ongumzekelo uya kuphawula ukuba eyona nto iphambili kuwo kukungcwaliswa kwegama likaYehova, ukufika koBukumkani bakhe nokwenziwa kokuthanda kwakhe. (Mat. 6:9, 10) Khawucinge ngeyakho imithandazo. Ngaba ibonisa umdla onawo ngoBukumkani bukaYehova, ukwenziwa kokuthanda kwakhe nokungcwaliswa kwegama lakhe elingcwele? Imele ibe njalo.
“Oko Ukubhambathisileyo, Kufezekise”
12 Kodwa ukubhaptizwa sisiqalo nje. Emva koko, sifuna ukuqhubeka siphila ngendlela ebonisa ukuba sizahlulele kuThixo. Sinokuzibuza le mibuzo: ‘Ndiye ndenza inkqubela engakanani ukususela oko ndibhaptiziwe? Ngaba ndisaqhubeka ndimkhonza uYehova ngentliziyo iphela? (Kol. 3:23) Ngaba ndisathandaza, ndisayifunda iBhayibhile, ndisaya kwiintlanganiso, kwaye ndiya kangangoko kunokwenzeka entsimini? Okanye ngaba kukho ukuyekelela kwezi zinto?’ Umpostile uPetros wathi asinakuphola ukuba kukholo lwethu siqhubeka sisongeza ulwazi nokunyamezela, nokuzinikela kuThixo.—Funda eyesi-2 kaPetros 1:5-8
Ubuncwane ObuseBhayibhileni
Imibuzo Evela Kubafundi
INtshumayeli 5:8 ithetha ngomphathi owenza ngokungekho mthethweni nocinezela umntu olihlwempu. Lo mphathi umele angalibali ukuba kusenokwenzeka ukuba ujongiwe ngumphathi wakhe okanye ngumphathi womphathi wakhe. Kusenokwenzeka ukuba kukho nabaphathi bakarhulumente abakhulu kakhulu kunabo baphathi. Okubuhlungu kukuba, kusenokwenzeka ukuba bonke abaphathi bakarhulumente banamaqhinga kwaye bayaqhatha. Loo maqhinga abo aye abangele iingxaki kubantu ababaphetheyo.
Nokuba izinto ezenzekayo zisenza singabi nathemba, simele sithuthuzelwe kukwazi ukuba noyena mphathi uphezulu kurhulumente ujongiwe nguYehova. Sinokucela uThixo asincede, siphose yonke imithwalo yethu kuye. (INdu. 55:22; Fil. 4:6, 7) Siyazi ukuba “amehlo kaYehova ajonga-jonga emhlabeni wonke ukuze abonise amandla akhe ngenxa yabo bantliziyo zipheleleyo kuye.”—2 Kron. 16:9.
Ngoko iNtshumayeli 5:8 isenza siqonde ukuba koorhulumente babantu, kusoloko kukho umntu onengunya ngaphezu komnye. Eyona nto ibalulekilyo kukuba, le vesi isinceda singalibali ukuba uYehova ngoYena Mphathi Mkhulu kubo bonke. Ngoku uyalawula ngoNyana wakhe uYesu Kristu, onguKumkani woBukumkani bakhe. USomandla, ojonge zonke izinto ezenzekayo nabo bonke abantu, zonke izinto uzenza ngobulungisa, unjalo ke noNyana wakhe.
OKTOBHA 13-19
UBUTYEBI OBUPHUMA ELIZWINI LIKATHIXO INTSHUMAYELI 7-8
“Yiya Endlini Yokuzila”
it “Ukuzila” 9
Ukuzila
Ixesha Lokuzila. INtshumayeli 3:1, 4 ithi kukho “ixesha lokulila nexesha lokuhleka; ixesha lokwenza isijwili nexesha lokudanisa;.” Ekubeni abantu besifa, kuyabonakala ukuba intliziyo yezilumko iba ‘sendlini yabazilileyo’ endaweni yokuba ibe sendlini yobumnandi. (INt 7:2, 4; thelekisa IMi 14:13.) Ngoko, umntu osisilumko uye aziphe ithuba lokubonisa uvelwano nelokuthuthuzela abo baswelekelweyo, endaweni yokukhetha ukuyozonwabisa. Loo nto imnceda ahlale ekhumbula ukuba ubomi bufutshane aze aqhubeke emthanda uMdali wakhe.
Bancede Abantu Abakhathazekileyo
15 UWilliam, owaswelekelwa yinkosikazi yakhe kwiminyaka eyadlulayo uthi: “Ndiyavuya xa abanye abantu bebalisa ngenkosikazi yam, kuba loo nto indenza ndibone ukuba ebethandwa. Le nto indinceda nyhani. Ndithuthuzeleka nyhani xa abantu besenza le nto kuba ndihleli ixesha elide nenkosikazi yam ibe ndandiyithanda gqitha.” UBianca owaswelekelwa ngumyeni, uthi: “Xa abantu bethandaza kunye nam baze bandifundele isibhalo esinye okanye ezimbini ndiye ndithuthuzeleke. Ndiye ndithuthuzeleke naxa bethetha ngomyeni wam okanye bendimamela xa ndithetha ngaye.”
“Lilani Kunye Nabantu Abalilayo”
16 Ungaze uwakhe kancinci amandla okuthandaza nomKristu ofelweyo nokumthandazela. Nangona kusenokuba nzima ukukhupha iingcinga zakho kwimeko entununtunu ngolo hlobo, xa uthetha okusentliziyweni yakho, kwanokuba iinyembezi ziyehla kwalapha kuwe kwaye nelizwi liyangcangcazela, inokudamba intlungu yakhe. UDalene ukhumbula oku: “Oodade babekhe bafike beze kundithuthuzela, ibe ndandibabuza ukuba bangandithandazela na. Babeye baqalise ukuthandaza, kube nzima nokuthetha ekuqaleni, kodwa qho, emva kwamazwana ambalwa nje, amazwi abo ayeqina baze batsho ngowona mthandazo usuka kumazantsi eentliziyo. Ukholo nothando lwabo olomeleleyo, kunye nokundixhalabela kwabo, ziluqinisile ukholo lwam.”
“Lilani Kunye Nabantu Abalilayo”
17 Abantu ababi buhlungu ngendlela efanayo. Ngoko, fumaneka nje wena, ungafumaneki kwiintsuku zokuqala xa kusekho abahlobo nezizalwana kuphela, kodwa fumaneka nasemva kweenyanga abantu bebuyele kwizinto zabo. “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.” (IMize. 17:17) AmaKristu amele amthuthuzele umzalwana okanye udade logama nje esadinga ukuthuthuzelwa kwintlungu yakhe.—Funda eyoku-1 kwabaseTesalonika 3:7.
18 Ukhumbule ukuba abantu xa befelwe, amanxeba abo anokuthunukwa kukufika komhla awasweleka ngawo okanye abatshata ngawo, luhlobo oluthile lomculo, ziifoto, kukwenza izinto ezithile, nkqu nevumba, isandi okanye ixesha elithile lonyaka. Izinto ezininzi ezenziwa ngumzalwana okanye ngudade obetshatile—ezinjengokuya endibanweni okanye eSikhumbuzweni—zinokuwavusa amanxeba xa ezenza okokuqala eyedwa. Omnye umzalwana uthi: “Ndandilindele ukuba kube nzima kakhulu xa kufika umhla esatshata ngawo okokuqala engekho, ibe kwakungelula. Kodwa abazalwana noodade abambalwa benza into baza bamema abahlobo bam abasondeleyo ukuze ndingabi ndedwa.”
19 Kodwa ke abantu abafelweyo abadingi kuthuthuzelwa ngezihlandlo ezikhethekileyo zodwa. UJunia uthi: “Uncedo kunye nobudlelane obufumana xa ingengomhla ukhethekileyo budla ngokunceda kakhulu. Loo mathuba angacetywanga abaluleke kakhulu kwaye ayathuthuzela.” Nyhani ke, asinakukwazi ukuyisusa yonke intlungu okanye ukuvala isikhewu esishiywe kukusweleka kwesihlobo somzalwana okanye udadewethu, kodwa sinako ukumthuthuzela ngokuzama ukumnceda. (1 Yoh. 3:18) UGaby ukhumbula oku: “Ndiyambulela uYehova ngabadala abanothando abebesoloko besecaleni kwam ngeli xesha limnyama. Ngokwenene bandenze ndaziva iingalo zikaYehova ezinothando emagxeni am.
Ubuncwane ObuseBhayibhileni
“Bonke Baza Kutsho Bazi Ukuba Ningabafundi Bam”
18 Ngamanye amaxesha sisenokubona ukuba kufuneka sithethe nomKristu osikhubekisileyo. Kodwa ngaphambi kokuba siye kuthetha naye, nantsi imibuzo esinokuzibuza yona: ‘Ngaba ndiyazi kakuhle into eyenzekileyo?’ (IMize. 18:13) ‘Ngaba uyenze ngabom le nto?’ (INtshu. 7:20) ‘Zange ndenze into efana nale komnye umntu?’ (INtshu. 7:21, 22) ‘Ukuthetha naye akuzuyenza ibe nkulu le ngxaki?’ (Funda iMizekeliso 26:20.) Ukuba siqale sicinge ngale mibuzo, sinokufumanisa ukuba indlela esimthanda ngayo umzalwana okanye udadewethu yenza siyilibale naloo nto into asenze yona
OKTOBHA 20-26
UBUTYEBI OBUPHUMA ELIZWINI LIKATHIXO INTSHUMAYELI 9–10
Hlala Uzijonga Ngendlela Efanelekileyo Iingxaki Zakho
Ungaze Ube “Nomsindo Nxamnye NoYehova
20 Beka ityala kumntu elimfaneleyo. Kutheni simele senjenjalo? Kaloku, ezinye iingxaki zethu sisenokuba sizibangele ngokwethu. Xa kunjalo, simele siyivume loo nyaniso. (Gal. 6:7) Masingazami ukugxeka uYehova ngeengxaki zethu. Kutheni kungebobulumko nje ukwenjenjalo? Cinga ngalo mzekelo: Imoto isenokukwazi ukubaleka. Ukuba umqhubi ebenokudlula kwisantya esifanelekileyo ngoxa eza kujika egopheni ize ke loo moto iye kuntlitheka, ngaba kumele kugxekwe umenzi wayo ngaloo ngozi? Unotshe! Ngokufanayo, uYehova usidale sanenkululeko yokuzikhethela. Kodwa uye wasinika imiyalelo esikhokelayo ukuze senze izigqibo zobulumko. Ngoko ke, asinaso kwaphela isizathu sokugxeka uMdali wethu ngeempazamo esizenzayo.
21 Kakade ke, asizizo zonke iingxaki esinazo ezibangelwa ziimpazamo nazizenzo zethu eziphosakeleyo. Ezinye izinto zisehlela ngenxa ‘yexesha nesehlo esingenakubonwa kwangaphambili.’ (INtshu. 9:11) Noko ke, eyona nto singamele siyilibale kukuba uSathana uMtyholi ngoyena nobangela wobungendawo. (1 Yoh. 5:19; ISityhi. 12:9) Nguye olutshaba lwethu—asingoYehova!—1 Pet. 5:8.
UYehova Uyabathanda Abantu Abathobekileyo
10 Xa sithobekile kuza kuba lula ukumelana neengxaki. Ngamanye amaxesha, kusenokwenzeka izinto ebomini bethu esisenokubona ngathi bezingamelanga ukuba ziyenzeka. UKumkani uSolomon owayesisilumko wathi: “Ndibabone abakhonzi bekhwele amahashe kodwa iinkosana zihamba kanye njengabakhonzi emhlabeni.” (INtshu. 10:7) Ngamanye amaxesha abantu abanobuchule abasoloko beqatshelwa. Kodwa bona abantu abangenabuchule kangako ngabona banconywayo. Nangona kunjalo, uSolomon wathi kungabhetele ukuba sinokuzamkela izinto ngendlela eziyiyo kunoba sicaphuke kuba zingenzeki ngendlela esifuna ngayo. (INtshu. 6:9) Ukuba sithobekile kuza kuba lula ukuzamkela izinto ngendlela eziyiyo nokuba asizithandi.
Ngaba Indlela Ozihlaziya Ngayo Iyingenelo?
KUYO yonke iBhayibhile, sifumana amazwi abonisa ukuba uYehova ufuna siphile size sibunandiphe ubomi. Ngokomzekelo, iNdumiso 104:14, 15 ithi uYehova ubangela “kuphume ukutya emhlabeni, newayini eyenza intliziyo yomntu ofayo ibe nemihlali, ukukhazimlisa ubuso ngeoli, nesonka sokuxhasa intliziyo yomntu ofayo.” Eneneni, uYehova ukhulisa izityalo ukuze zithwale ukutya, ioli newayini zize zibe sisixhaso kuthi. Kodwa iwayini ‘yenza intliziyo ibe nemihlali.’ Yenza okungaphaya kokwaneleyo ukuze sihlale siphila size sonwabe ngakumbi. (INtshu. 9:7; 10:19) Ewe, uYehova ufuna sonwabe, zize neentliziyo zethu zizaliswe ‘kukuchwayita.’—IZe. 14:16, 17.
2 Ngoko ke, akukho sizathu sokuba sizive sinetyala xa ngamanye amaxesha sicwangcisa ixesha ‘lokuqwalasela ngenyameko iintaka zezulu’ ‘neenyibiba zasendle’ okanye sinandipha ezinye izinto ezisihlaziyayo nezenza ubomi bube mnandi. (Mat. 6:26, 28; INdu. 8:3, 4) Ubomi obumnandi “sisipho sikaThixo.” (INtshu. 3:12, 13) Ukugqala ixesha lokuzonwabisa njengenxalenye yeso sipho kuya kusishukumisela ukuba silisebenzise ngendlela eya kumonwabisa noMniki waso
Ubuncwane ObuseBhayibhileni
it “Ukuthetha Ngabantu, Ukungcolisa Amagama Abantu” 4, 8
Ukuthetha Ngabantu, Ukungcolisa Amagama Abantu
Ukuthetha ngabantu kunokukhokhelela ekungcoliseni amagama abantu, loo nto isenokubangela iingxaki nakulowo ungcolisa amagama abantu. Anyanisile amazwi obulumko akwiNtshumayeli 10:12-14 xa esithi: “Imilebe yesidenge iyasitshabalalisa. Amazwi okuqala omlomo waso bubudenge, nawokugqibela yimpambano ebangela intlekele. Kodwa isidenge sithetha singayeki.”
Ngamanye amaxesha ukuthetha ngabantu kusenokungabiyingozi (nangona kusenokukhokelela ekungcoliseni amagama abantu). Kona ukungcolisa amagama abantu kusoloko kuyingozi ibe kunokubakhathaza abanye kude kubenze bangavani. Umntu usenokungcolisa amagama abantu ngabom okanye engaqondanga. Loo nto isenokumosha ubuhlobo bethu noThixo nokuba umntu uyenza ngabom okanye engaqondanga, kuba ‘ukuqala uchuku phakathi kwabantu abazalwa kunye’ yenye yezinto uThixo azicaphukelayo. (IMi 6:16-19) Igama lesiGrike elithi di·aʹbo·los lithetha ukungcolisa amagama abantu. Eli gama liyasetyenziswa naseBhayibhileni xa kuthethwa ngoSathana “uMtyholi,” lowo wangcolisa igama likaThixo. (Yoh 8:44; ISi 12:9, 10; Gen 3:2-5) Le nto ibonisa ukuba ukungcolisa amagama abantu kweza ngaye.
OKTOBHA 27–NOVEMBA 2
UBUTYEBI OBUPHUMA ELIZWINI LIKATHIXO INTSHUMAYELI 11–12
Yonwabela Ubomi Usempilweni
Ilanga Nomoya—Izibulala Ntsholongwane Zemvelo
Nemitha yelanga inazo izibulala ntsholongwane. Imagazini i-Journal of Hospital Infection ithi, “uninzi lweentsholongwane ezisemoyeni ezigulisayo ziyafa elangeni.”
Ngoko ke ukuchitha ixesha elaneleyo elangeni, ukhe ufumane nempepho kungakunceda
Buxabise Ubomi Obuphiwe NguThixo
6 Nangona iBhayibhile ingeyoncwadi esixelela indlela emasiyihoye ngayo impilo yethu okanye emasitye ngayo, isixelela indlela uYehova acinga ngayo ngezi zinto. Ngokomzekelo, isixelela ukuba ‘siziphephe izinto ezinokwenzakalisa imizimba’ yethu. (INtshu. 11:10) Ithi masingatyi okanye sisele kakhulu kuba ezo zinto ziyingozi empilweni yethu. (IMize. 23:20) UYehova ulindele ukuba sizibambe xa sikhetha into emasiyitye okanye emasiyisele, size sigqibe ukuba siza kuyitya okanye siyisele kangakanani.—1 Kor. 6:12; 9:25.
7 Xa sisebenzisa ingqondo, izigqibo esizenzayo ziza kubonisa ukuba siyabuxabisa ubomi esibuphiwe nguThixo. (INdu. 119:99, 100; funda iMizekeliso 2:11.) Ngokomzekelo, kufuneka sicinge kakuhle ngento emasiyitye. Ukuba kukho ukutya esikuthandayo esaziyo ukuba kuyasigulisa, siza kusebenzisa ingqondo size singakutyi. Enye indlela esibonisa ngayo ukuba siyayisebenzisa ingqondo kukulala iiyure ezaneleyo, ukujima qho, ukuhlala siklini nokuklina iindawo esihlala kuzo.
‘Zenzeni Izinto Ezithethwa LiLizwi LikaThixo’
2 Abantu abakhonza uYehova bonwabile. Yintoni ebenza bonwabe? Zininzi izizathu, kodwa esinye sezona zibalulekileyo kukuba silifunda yonk’ imihla iLizwi LikaThixo, futhi sizama ngamandla ethu onke ukuzenza izinto esizifunda kulo.—Funda uYakobi 1:22-25.
3 Zininzi iindlela esincedakala ngazo xa ‘sizenza izinto ezithethwa lilizwi likaThixo.’ Kaloku siyazi ukuba loo nto ibaluleke kakhulu xa sifuna ukuvuyisa uYehova. Ukumvuyisa kwenza nathi sonwabe. (INtshu. 12:13) Xa sizenza izinto ezikwiLizwi eliphefumlelwe nguThixo, siya sivana neentsapho zethu namanye amaKristu. Mhlawumbi kuye kwanjalo nakuwe. Siye sisinde nakwiingxaki ezininzi abaye babe nazo abantu abangaphili ngendlela kaYehova. Siyavumelana noKumkani uDavide. Kaloku emva kokuba ethethe ngomthetho, imiyalelo nezigwebo zikaYehova, wagqibezela ngala mazwi: “Ekuzithobeleni kukho umvuzo omkhulu.”—INdu. 19:7-11.
Ubuncwane ObuseBhayibhileni
it “Ukuphefumlelwa” 10
Ukuphefumlelwa
Ubungqina bubonisa ukuba, nangona lamadoda ayesetyenziswa nguThixo ekubhaleni iBhayibhile, kodwa babengezo robhothi, babengaxelelwa yonke into amabayibhale. Kumpostile uYohane sifunda ngeSityhilelo esiphefumlelwe nguThixo esaziswa yingelosi isebenzisa imiqondiso waza ke yena uYohane ‘wangqina ngelizwi uThixo awalikhuphayo nangezinto ezathethwa nguYesu Kristu, nangazo zonke izinto awazibonayo.’ (ISi 1:1, 2) ‘Umoya oyingcwele wamnceda uYohane wabona izinto ezaziza kwenzeka ngemini yeNkosi’ ibe kwathiwa kuye: “Le nto uyibonayo yibhale kumsongo.” (ISi 1:10, 11) Ngoko uThixo wabona kulungile ukuba avumele ababhali beBhayibhile ukuba basebenzise iingqondo zabo ekukhetheni amagama ukuze bacacise imibono ababeyibona (Hab 2:2), kodwa uYehova wayesoloko ebakhokela ukuze bangabhali kuphela izinto ezichanileyo kodwa bazibhale ngendlela evumelana nentando kaYehova. (IMi 30:5, 6) Indlela ababezinikele ngayo siyibona kwiNtshumayeli 12:9, 10, kuba bacingisisa baza baphandisisa ukuze baqokelele ‘amazwi obuciko, ibe babhala amazwi achanileyo enyaniso.’—Thelekisa uLuk 1:1-4.