—obuya kuninceda ninqule uMdali wenu buze buniqeqeshele iimbopheleleko ezizayo?

Hlala Ulungelelene

19, 20. Sisiphi isimo sengqondo esilungeleleneyo ozimisele ukuba naso ebomini naxa ukhonza uYehova?

¹⁹ Sonke sinako ukuzabalazela ukulungelelana—singazicingeli ngokugqith’ emgceni. Asiyi kufuna ukuba ‘ngamalungisa kakhulu.’ (INtshu. 7:16) Ukuba noburharha ngamathuba athile kunokwenza abantu bakhululeke, enoba kusekhaya, emsebenzini, okanye xa sisebenzisana nabazalwana noodadewethu ebandleni. Amalungu eentsapho aya kukulumkela ukuthi ehleli nje abe ehlab’ amadlala kwabanye ukuze ikhaya lihlale liyindawo yoxolo. Ebandleni, sonke sinokuhleka kunye size sonwabele ukuba kunye, sigcine iincoko neemfundiso zethu zisakha yaye zikhuthaza.—2 Kor. 13:10; Efe. 4:29.

²⁰ Siphila kwihlabathi elingamgqaliyo uYehova neliyithatha lula imithetho yakhe. Ngokwahlukileyo, abantu bakaYehova bakuxhalabele kakhulu ukuthobela nokunyaniseka kuThixo wabo. Kumnandi ngokwenene ukuba yinxalenye yenkitha yabantu abanqula uYehova “ngako konke ukundileka” [abangazithathi lula izinto]! Ngamana singazimisela ukungazithathi lula izinto ebomini naxa sikhonza uYehova.

Yenza Izigqibo Ezizukisa UThixo

“Onobuqili uyawaqwalasela amanyathelo akhe.”—IMIZE. 14:15.

1, 2. (a) Yiyiphi eyona nto sifanele siyixhalabele kuzo zonke izigqibo esizenzayo? (b) Yiyiphi imibuzo esiza kuyixubusha?

KUSENOKWENZEKA ukuba senza inqwaba yazo mihla le. Ezinye zezezinto ezingenamsebenzi. Ukanti ezinye zinokubutshintsha ubomi bethu. Ziintoni ezo? Zizigqibo. Kuzo zonke izigqibo esizenzayo, enoba zibalulekile okanye akunjalo, eyona nto siyixhalabeleyo kukuzukisa uThixo.—Funda eyoku-1 kwabaseKorinte 10:31.

² Ngaba ukufumanisa kulula ukwenza izigqibo, okanye ngaba kulucelomngeni? Ukuze sibe ngamaKristu aqolileyo, simele sifunde ukwahlula okulungileyo kokubi size senze izigqibo ezivisisana nezinto esizikholelwayo, kungekhona iinkolelo zabanye abantu. (Roma 12:1, 2; Heb. 5:14) Ziziphi ezinye izizathu ezivakalayo zokuba sifanele sifunde ukwenza izigqibo ezizizo? Kutheni ngamanye amaxesha kunzima kangaka ukuzenza? Yaye ngawaphi amanyathelo esinokuwathatha ukuze siqinisekise ukuba izigqibo esizenzayo zizukisa uThixo?

Kutheni Sifanele Senze Izigqibo Nje?

3. Yintoni esifanele siyiphephe xa sisenza izigqibo?

³ Ukuba kunzima ukwenza izigqibo kwimibandela ephathelele imilinganiselo yeBhayibhile, abantu esifunda okanye esisebenza nabo basenokugqiba kwelokuba siyazithandabuza izinto esizikholelwayo yaye sikhukuliseka lula. Basenokuxoka, baqhathe okanye bebe baze bazame ukuseyisela ukuba ‘silandele isihlwele’ ngokwenza izinto abazenzayo okanye ngokufihla oko bakwenzayo. (Eks. 23:2) Kodwa ke, umntu okwaziyo ukwenza izigqibo ezizukisa uThixo akayi kuvumela uloyiko okanye umnqweno wokwamkeleka umbangele ukuba aziphathe ngendlela engqubana nesazela sakhe esiqeqeshwe yiBhayibhile.—Roma 13:5.

4. Kutheni abanye abantu besenokufuna ukusenzela izigqibo?

⁴ Abanye abantu abafuna ukusenzela izigqibo sukube bengenanjongo yakusilahlekisa. Abahlobo abafuna ukusinceda basenokusicenga ukuba sisebenzise icebiso labo. Ukuba sihlala kude nekhaya, kusenokwenzeka ukuba izalamane zethu zisayixhalabele impilo-ntle yethu ibe zisenokuqhubeka zisenzela izigqibo ezibalulekileyo. Ngokomzekelo, cinga ngomba wonyango. IBhayibhile ikugxeka ngokucacileyo ukutofelwa kwegazi. (IZe. 15:28, 29) Kodwa ke, eminye imiba ephathelele impilo ayibekwanga ngokucacileyo yaye ifuna ukuba ngamnye wethu azenzele isigqibo sokuba luluphi unyango aya kulwamkela okanye angalwamkeli.a Izihlobo nezalamane zethu zisenokufuna ukusinyanzela kule miba. Noko ke, mKristu ngamnye ozahluleleyo waza wabhaptizwa umele athwale “owakhe umthwalo” xa esenza izigqibo ezifana nezi. (Gal. 6:4, 5) Eyona nto sifanele siyixhalabele kukuba nesazela esilungileyo phambi koThixo, kungekhona phambi kwabantu.—1 Tim. 1:5.

5. Sinokukuphepha njani ukwaphukelwa yinqanawa yokholo lwethu?

⁵ Ukuthingaza kunokusifaka engozini enkulu. Umfundi uYakobi wathi umntu othingazayo ‘akazinzanga kuzo zonke iindlela zakhe.’ (Yak. 1:8) Njengendoda ekhwele iphenyane elingenamphini wokulilawula kulwandle olundlongondlongo, uya kuphehluzeliswa ziingcamango zabantu eziguquguqukayo. Kunokuba lula gqitha ngomntu onjalo ukuba aphukelwe yinqanawa yokholo lwakhe aze atyhole abanye abantu ngobugxwayiba akubo! (1 Tim. 1:19) Sinokuyiphepha njani loo nto? Simele ‘sizinziswe elukholweni.’ (Funda eyabaseKolose 2:6, 7.) Ukuze sizinze, kufuneka sifunde ukwenza izigqibo ezibonisa ukuba sinokholo kwiLizwi likaThixo eliphefumlelweyo. (2 Tim. 3:14-17) Kodwa ke, yintoni enokubangela kube nzima ukwenza izigqibo ezizizo?

Isizathu Sokuba Kunokuba Nzima Ukwenza Izigqibo

6. Lunokusichaphazela njani uloyiko?

⁶ Uloyiko lunokusenza sithingaze—soyike ukwenza isigqibo esingachananga, soyike ukusilela okanye soyike ukubonakala sizizidenge ebantwini. Siyaqondakala isizathu sokuba sixhalabe ngolo hlobo. Akakho umntu ofuna ukwenza isigqibo esingesiso, esidala iinkathazo size mhlawumbi sizise nehlazo. Sekunjalo, ukuthanda uThixo neLizwi lakhe kunokusinceda soyise uloyiko. Ngaziphi iindlela? Ukuthanda uThixo kuya kusibangela ukuba sifunde iLizwi lakhe neempapasho ezisekelwe kulo ngalo lonke ixesha ngaphambi kokwenza izigqibo ezibalulekileyo. Xa sisenjenjalo ziya kuba mbalwa iimpazamo esiya kuzenza. Ngoba? Kuba iBhayibhile inako ‘ukunika abangenamava ubuqili, nomfana ukwazi namandla okucinga.’—IMize. 1:4.

7. Yintoni esinokuyifunda kumzekelo kaKumkani uDavide?

⁷ Ngaba siya kuhlala sisenza izigqibo ezizizo? Akunjalo. Sonke siyazenza iimpazamo. (Roma 3:23) Ngokomzekelo, uKumkani uDavide wayeyindoda elumkileyo nethembekileyo. Sekunjalo, ngamanye amaxesha wenza izigqibo ezingezizo ezamfaka enkathazweni yena nabanye abantu. (2 Sam. 12:9-12) Kodwa ke, akazange avumele iimpazamo zakhe zimenze angakwazi ukwenza izigqibo ezikholisa uThixo. (1 Kum. 15:4, 5) Nangona siye senza iimpazamo kwixesha elidluleyo, sinako ukuzenzela izigqibo ukuba, njengoDavide, sikhumbula ukuba uYehova uya kuzixolela izono zethu. Uya kuqhubeka ebaxhasa abamthandayo nabamthobelayo.—INdu. 51:1-4, 7-10.

8. Sifunda ntoni kwinto eyathethwa ngumpostile uPawulos ngokutshata?

⁸ Ikho into enokusenza singakoyiki kangako ukwenza izigqibo. Yintoni? Kukuqonda ukuba maxa wambi zininzi iindlela ezichanileyo zokwenza into enye. Masenze umzekelo ngendlela uPawulos awaqiqa ngayo ngomba wokutshata. Waphefumlelwa ukuba abhale athi: “Ukuba nabani na ucinga ukuba uziphatha ngokungafanelekanga ngobunyulu bakhe, ukuba uthe wadlula entlahleni yobutsha, yaye le yindlela ekufanele kwenzeke ngayo, makenze oko akufunayo; akoni. Mabatshate. Kodwa ukuba nabani na uzimisele entliziyweni yakhe, engenayo intswelo, kodwa enegunya lokwenza ukuthanda kwakhe yaye enze isigqibo entliziyweni yakhe, sokugcina ubunyulu bakhe, uya kuba wenza kakuhle.” (1 Kor. 7:36-38) UPawulos wathi ukungatshati lelona khondo lililo, kodwa akazange athi kuphela kwekhondo elichanileyo.

9. Ngaba imele isixhalabise indlela abanye abantu abazijonga ngayo izigqibo zethu? Cacisa.

⁹ Ngaba simele sizixhalabise ngendlela abanye abantu abazijonga ngayo izigqibo esizenzayo? Ewe, ukusa kumlinganiselo othile. Phawula oko uPawulos wakuthethayo ngokutya ukutya ekwakusenokwenzeka ukuba kubingelelwe kwizithixo. Wavuma ukuba isigqibo sona sisenokuba asiphosakalanga, kodwa sinokumenzakalisa umntu onesazela esibuthathaka. Wagqiba kwelithini uPawulos? Wathi: “Ukuba ukutya kuyamkhubekisa umzalwana wam, andisayi kuze ndiyitye kwakhona inyama konke konke, ukuze ndingamkhubekisi umzalwana wam.” (1 Kor. 8:4-13) Nathi sifanele sicinge ngendlela izigqibo zethu ezinokuzichaphazela ngayo izazela zabanye abantu. Kakade ke, eyona nto sifanele siyixhalabele ngokuyintloko yindlela ukhetho lwethu olunokubuchaphazela ngayo ubuhlobo bethu noYehova. (Funda eyabaseRoma 14:1-4.) Yiyiphi imigaqo yeBhayibhile eya kusinceda senze izigqibo ezizukisa uThixo?

Amanyathelo Amathandathu Okwenza Izigqibo Ezizizo

10, 11. (a) Sinokukuphepha njani ukuzigqatsa entsatsheni? (b) Yintoni abadala abamele bangayilibali xa besenza izigqibo ezichaphazela ibandla?

¹⁰ Kuphephe ukuzigqatsa. Ngaphambi kokwenza nantoni na, sifanele sizibuze, ‘Ngaba ndinalo igunya lokwenza esi sigqibo?’ UKumkani uSolomon wathi: “Kufikile na ukukhukhumala [ukuzigqatsa]? Ngoko ihlazo liyeza; kodwa bunabathozamileyo ubulumko.”—IMize. 11:2.

¹¹ Abazali basenokunika abantwana babo umnyinyiva wokwenza ezinye izigqibo, kodwa ke abantwana abafanele bacinge ukuba elo gunya lelabo. (Kol. 3:20) Abafazi noomama banegunya elithile entsatsheni kodwa bafanele babamkele ubuntloko bamadoda abo. (IMize. 1:8; 31:10-18; Efe. 5:23) Ngokufanayo, amadoda afanele ayamkele into yokuba igunya analo lilinganiselwe yaye afanele azithobe kuKristu. (1 Kor. 11:3) Abadala benza izigqibo ezichaphazela ibandla. Kodwa ke, bayaqiniseka ukuba ‘abagqithi kwizinto ezibhalwe’ kwiLizwi likaThixo. (1 Kor. 4:6) Nabo bathobela ulwalathiso abalufumana kwikhoboka elithembekileyo. (Mat. 24:45-47) Sinokukuphepha ukuziqhwayela inkathazo nentlungu thina kunye nabanye abantu ukuba ngokuzithoba senza izigqibo kuphela xa sinikwe igunya lokuzenza.

12. (a) Kutheni simele siphande? (b) Chaza indlela umntu anokulwenza ngayo olo phando.

¹² Phanda. USolomon wathi: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” (IMize. 21:5) Ngokomzekelo, ngaba ucinga ngokuvula ishishini? Musa ukuzivumela ulawulwe ziimvakalelo. Zazi zonke izibakala, funa icebiso kubantu abaqheleneyo noshishino, uze ukhangele imigaqo yeBhayibhile esebenza kulo. (IMize. 20:18) Xa usenza uphando, yiba namaphepha amabini—kwelinye udwelise iingenelo uze kwelinye udwelise iingxaki. Ngaphambi kokwenza isigqibo, ‘bala iindleko.’ (Luka 14:28) Hlola indlela isigqibo sakho esiya kuchaphazela ngayo kungekuphela nje imeko yakho yemali kodwa nobumoya bakho. Ukuphanda kufuna ixesha nomgudu. Kodwa xa usenjenjalo, usenokukuphepha ukwenza izigqibo ngokudyuduzela uze kamva ungene engxakini.

13. (a) Isiqinisekisa ngantoni incwadi kaYakobi 1:5? (b) Ukuthandazela ubulumko kunokusinceda njani?

¹³ Thandazela ubulumko. Izigqibo zethu ziya kumzukisa uThixo kuphela xa simcela ukuba asincedise ukuzenza. Umfundi uYakobi wathi: “Ngoko, ukuba kukho nabani na kuni oswele ubulumko, makaqhubeke ebucele kuThixo, kuba unika bonke ngesisa, engangcikivi; yaye uya kubunikwa.” (Yak. 1:5) Asinazintloni zokuvuma ukuba siyabufuna ubulumko bukaThixo xa sisenza izigqibo. (IMize. 3:5, 6) Ngaphezu koko, ukwayama ngokwethu ukuqonda kunokusilahlekisa lula. Xa sithandazela ubulumko size siphande ngemigaqo ekwiLizwi likaThixo, sivumela umoya oyingcwele usincede siqonde eyona nto isibangela ukuba senze okuthile.—Heb. 4:12; funda uYakobi 1:22-25.

14. Kutheni sifanele sikuphephe ukuthingaza?

¹⁴ Yenza isigqibo. Ungangxameli kweli nyathelo ungekaphandi yaye ungekabuthandazeli ubulumko. Umntu onobulumko uzinika ixesha ‘lokuqwalasela amanyathelo akhe.’ (IMize. 14:15) Noko ke, musa ukuzibekela amangomso izinto. Umntu othingazayo ukwenza izinto usenokuza nezingxengxezo ezingavakaliyo zokuba engakwazanga ukwenza into ethile. (IMize. 22:13) Kodwa ke ude asenze isigqibo—isigqibo sakhe kukuba agqityelwe ngabanye abantu.

15, 16. Kubandakanya ntoni ukuphumeza isigqibo?

¹⁵ Siphumeze isigqibo sakho. Siya kuba sidlale ngamandla ethu ukuba sinokwenza onke la matiletile size singasiphumezi isigqibo esisiso esisenzileyo. USolomon wathi: “Konke esikufumanayo ukuba sikwenze isandla sakho kwenze ngamandla akho onke.” (INtshu. 9:10) Ukuze siphumelele, simele sikulungele ukuncama izinto ezithile ukuze siphumeze izigqibo zethu. Ngokomzekelo, umvakalisi webandla usenokugqiba ekubeni abe nguvulindlela. Ngaba uya kuphumelela? Angaphumelela ukuba akavumeli umsebenzi wempangelo nokuzonwabisa zimqobe amandla zize zimtyele ixesha afanele alichithe kubulungiseleli.

¹⁶ Ezona zigqibo zifanelekileyo idla ngokuba zezona kunzima ukuziphumeza. Ngoba? Ngenxa yokuba “ihlabathi liphela lisemandleni ongendawo.” (1 Yoh. 5:19) Simele sizamazamane “nabalawuli behlabathi bobu bumnyama, kwanemikhosi yoomoya abangendawo kwezasezulwini iindawo.” (Efe. 6:12) Umpostile uPawulos nomfundi uYude bathi abo bagqiba ukuba bazukise uThixo baya kuyibelek’ ikrwempa.—1 Tim. 6:12; Yude 3.

17. Yintoni uYehova ayilindeleyo kuthi ngokuphathelele izigqibo esizenzayo?

¹⁷ Sihlole kwakhona isigqibo sakho uze wenze utshintso xa kuyimfuneko. Asizizo zonke izigqibo eziphumelela kanye ngendlela ebezicetywe ngayo. Sonke sihlelwa “lixesha nasisihlo esingenakubonwa kwangaphambili.” (INtshu. 9:11) Nangona kunjalo, uYehova ulindele ukuba siqhubeke siziphumeza ezinye izigqibo kwanokuba siyavavanywa. Isigqibo somntu sokuzahlulela kuYehova okanye sokwenza isifungo somtshato asinakutshintshwa. UThixo ulindele ukuba siphile ngokuvisisana nezigqibo ezinjalo. (Funda iNdumiso 15:1, 2, 4.) Noko ke, izigqibo ezininzi azibalulekanga kangako. Umntu onobulumko uya kusoloko ezihlola izigqibo azenzileyo. Akayi kuvumela ikratshi okanye inkani zimthintele ukuba angasitshintshi isigqibo sakhe. (IMize. 16:18) Eyona nto ayixhalabeleyo kukuqiniseka ukuba indlela aphila ngayo isoloko imzukisa uThixo.

Qeqesha Abanye Ukuba Benze Izigqibo Ezizukisa UThixo

18. Abazali banokubafundisa njani abantwana babo ukwenza izigqibo ezizizo?

¹⁸ Kuninzi okunokwenziwa ngabazali ukunceda abantwana babo benze izigqibo ezizukisa uThixo. Ukumisela umzekelo omhle yenye yezona ndlela zintle zokufundisa. (Luka 6:40) Xa kufanelekile, abazali basenokucacisela abantwana babo ngendlela abaye bafikelela ngayo kwisigqibo esithile. Basenokuvumela abantwana babo ukuba benze ezinye izigqibo baze babancome xa ziphumelela. Kuthekani ukuba umntwana wenza isigqibo esingesiso? Umzali usenokufuna ukumkhusela umntwana wakhe kwimiphumo, kodwa loo nto ayiyi kumnceda. Ngokomzekelo, umzali usenokuvumela umntwana ukuba afumane iphepha-mvume lokuqhuba imoto. Masithi lo mntwana waphula umthetho wendlela aze anikwe itikiti. Umzali ebenokulihlawula ngokwakhe elo tikiti. Noko ke, ukuba bekunokufuneka umntwana asebenze ukuze ahlawule elo tikiti, ebeya kufunda ukuzimela ngenkqay’ elangeni.—Roma 13:4.

19. Yintoni esifanele siyifundise izifundo zethu zeBhayibhile, yaye sinokuyenza njani loo nto?

¹⁹ UYesu waxelela abalandeli bakhe ukuba bafundise abanye abantu. (Mat. 28:20) Enye yezona zinto zibalulekileyo esinokuyifundisa izifundo zeBhayibhile yindlela yokwenza izigqibo ezizizo. Ukuze sikwenze kakuhle oko, sifanele sikuphephe ukuzixelela into emaziyenze. Kubhetele kakhulu ukuqiqa nazo ngemigaqo yeBhayibhile ukuze zizigqibele ngokwazo into ezifanele ziyenze. Ngapha koko, “ngamnye wethu uya kuziphendulela kuThixo.” (Roma 14:12) Ngoko ke, sonke sinesizathu esivakalayo sokwenza izigqibo ezizukisa uThixo.

[Umbhalo osemazantsi]

Ubuya Kuphendula Uthini?

• Kutheni sifanele sifunde ukwenza izigqibo?

• Lunokusichaphazela njani uloyiko, yaye sinokuloyisa njani?

• Ngawaphi amanyathelo amathandathu esifanele siwathathe ukuze siqiniseke ukuba izigqibo zethu zizukisa uThixo?

[Ibhokisi/Umfanekiso okwiphepha 16]

Amanyathelo Okwenza Izigqibo Ezizizo

1 Kuphephe Ukuzigqatsa

2 Phanda

3 Thandazela Ubulumko

4 Yenza Isigqibo

5 Siphumeze

6 Sihlole Kwakhona Uze Wenze Utshintsho

[Umfanekiso okwiphepha 15]

Umntu othingazayo ufana nendoda ekhwele iphenyane elingenamphini wokulilawula kulwandle olundlongondlongo