Ibhokisi Yemibuzo

◼ Ziyintoni iingenelo zokuya kwiintlanganiso zebandla ohlala kwintsimi yalo?

Ebandleni sikhuthazwa ukuba ‘sivuselelane eluthandweni nasemisebenzini emihle.’ (Heb. 10:24, 25) Sifundiswa inyaniso kwaye sixhotyiselwa ukufeza umsebenzi wokwenza abafundi. (Mat. 28:19, 20) Kwakhona somelezwa ukuba sinyamezele izilingo ngokuthembeka kwaye sinabaveleli abanothando abasinceda sihlangabezane neengcinezelo namaxhala. Kucacile ukuba ibandla libalulekile ukuze sihlale siphilile ngokomoya. Noko ke, ngaba zikho iingenelo zokuya kwiintlanganiso zebandla esihlala kwintsimi yalo?

Iimeko zabantu azifani, kwaye izinto ezinjengempangelo, iqabane elingakholwayo nezinto zokuhamba zinokusichaphazela isigqibo sikabani kulo mba. Ukanti, kubakho iingenelo zokwenene zokomoya nezinye xa umntu enxulumana nebandla ahlala kwintsimi yalo. Abadala banokukwazi ukukhawuleza banxibelelane nabo bonke abavakalisi xa kukho into engxamisekileyo. IZingxobo Zemibuzo zexa elidluleyo ziye zabalaselisa ezinye iingenelo eziliqela.—Agasti 1991 (kwiCD-ROM nguMeyi 1991), Aprili 1976 (kwiCD-ROM nguMatshi 1976), noFebruwari 1967 (kwiCD-ROM nguJanuwari 1967).

Ngokuqhelekileyo kuba lula ukuya kwiintlanganiso kwindawo ekufuphi, ibe loo nto isenza sikwazi ukufika kwangethuba ukuze sincokole nabanye, senze izinto ezifuna ukwenziwa size sibekho xa kuculwa ingoma nakumthandazo wokuvula. Xa abanomdla behlala kufutshane nathi, kudla ngokuba lula ukufikelela kubo, ukubaqhubela izifundo zeBhayibhile nokubalathisa kwiintlanganiso ezikufuphi kubo.

Siqinisekile ukuba iintloko-ntsapho ziya kuwucingisisa nzulu lo mba, ziqwalasele zonke izibakala ezibandakanyekileyo ekugqibeni ngoko kuyingenelo ngokomoya nangokwenyama kwiintsapho zazo.—1 Tim. 5:8.