Qho ngonyaka, ulutsha olukhuliswa ngamaNgqina KaYehova luyabhaptizwa. Ngaba nawe ukhe wacinga ngokubhaptizwa? Ukuba kunjalo kuza kufuneka uyazi ukuba kuthetha ntoni ukuzinikela nokubhaptizwa.

• Kuthetha ukuthini ukubhaptizwa?

• Kuthetha ntoni ukuzinikela?

• Kutheni kubalulekile ukubhaptizwa?

• Bathini oontanga bakho?

• Inyani nobuxoki

Kuthetha ukuthini ukubhaptizwa?

Xa kuthethwa ngokubhaptizwa eBhayibhileni akuthethwa ngokutshizwa nje ngamanzi, kodwa kuthethwa ngokutshoniswa wonke emanzini ibe eso sisenzo esibaluleke kakhulu.

• Ukutshoniswa emanzini xa ubhaptizwa kubonisa wonke umntu ukuba awusaphileli ukwenza ukuthanda kwakho.

• Ukukhutshwa emanzini kubonisa ukuba uqalisa ubomi obutsha yaye uzimisele ukwenza oko kufunwa nguThixo.

Xa ubhaptizwa ubonisa wonke umntu ukuba nguYehova onelungelo lokukuxelela into elungileyo nengalunganga ibe uthembisa ukuba uza kusoloko ukhetha ukwenza into ayifunayo.

Khawucinge ngoku: Kutheni umele utsho phambi komntu wonke ukuba uzimisele ukuthobela uYehova? Funda eyoku-1 Yohane 4:19 neSityhilelo 4:11.

Kuthetha ntoni ukuzinikela?

Ngaphambi kokuba ubhaptizwe ufanele uzinikele kuYehova. Uyenza njani loo nto?

Uthandaza wedwa uthembisa uYehova ukuba uza kumkhonza ngonaphakade, ukwathembisa nokuba uza kumkhonza enoba kuvela eyiphi ingxaki ibe abanye bakhetha ukwenza ntoni.

Ukubhaptizwa kubonisa wonke umntu ukuba uye wazinikela. Kubonisa abanye ukuba awusaphileli ukwenza izinto ozifunayo kodwa wenza izinto ezifunwa nguYehova.—Mateyu 16:24.

Khawucinge ngoku: Kutheni ubomi bakho buza kuba bhetele xa uzinikele kuYehova? Funda uIsaya 48:17, 18 namaHebhere 11:6.

Kutheni Kubalulekile Ukubhaptizwa?

UYesu wathi kufuneka babhaptizwe abafundi bakhe. (Mateyu 28:19,20) Ngoko amaKristu kusafuneka abhaptizwe. IBhayibhile ide ithi kufuneka umntu abhaptizwe ukuze asindiswe.—1 Petros 3:21.

Sekunjalo ufanele ubhaptizwe kuba umthanda uYehova ibe unombulelo ngokuba ngumhlobo wakhe. Ufanele uzive njengoMdumisi owabhala wathi: “Ndiza kumbuyekeza ngantoni uYehova ngazo zonke izinto ezintle andenzele zona?. . . Ndibize egameni likaYehova. Ndiza kuzenza izinto endizifunge kuYehova.”—INdumiso 116: 12-14.

Khawucinge ngoku: Zeziphi izinto ezintle ozenzelwe nguYehova? Ungawubonisa njani umbulelo kuye? Funda iDuteronomi 10:12, 13 namaRoma 12:1.

Ukuba uyayenza into ethethwa yiBhayibhile ibe uzenzela ubuhlobo noThixo, kusenokwenzeka ukuba ucinga ngokubhaptizwa. Uzazi njani ukuba ukulungele?a

Kweli nqaku kuza kuphendulwa le mibuzo ilandelayo:

• Kufuneka ndibe nolwazi olungakanani?

• Ndimele ndenze ntoni?

• Bathini oontanga bakho?

Kufuneka ndibe nolwazi olungakanani?

Ukulungiselela ukubhaptizwa akuthethi kuthi umele wazi yonke into ngentloko njengaxa ufuna ukupasa esikolweni. Sekunjalo, ukuze uqiniseke ukuba izinto ezibhalwe eBhayibhileni ziyinyani, kuza kufuneka ‘uqeqeshe amandla akho okuqonda.’ (Roma 12:1) Ngokomzekelo:

• Ngaba uqinisekile ukuba uThixo ukhona ibe umele umkhonze?

  IBhayibhile ithi: “Umntu osondela kuThixo umele akholelwe ukuba ukho, ibe ungumvuzi wabo bamfuna ngokuzimisela.”—Hebhere 11:6.

  Khawuzibuze: ‘Kutheni ndikholelwa kuThixo?’ (Hebhere 3:4) ‘Kutheni ndimele ndimkhonze?’—ISityhilelo 4:11.

  Ngaba ufuna uncedo? Funda inqaku elithi: “Ngaba Zadalwa okanye Zazivelela? Inxalenye 1: Kutheni Umele Ukholelwe KuThixo?”

• Ngaba uqinisekile ukuba izinto eziseBhayibhileni zivela KuThixo?

  IBhaybhile ithi: “Sonke iSibhalo siphefumlelwe nguThixo ibe sinceda ekufundiseni, ekululekeni, ekulungiseni izinto, nasekusiqeqesheni ukuba senze izinto ezilungileyo.”—2 Timoti 3:16.

  Khawuzibuze: ‘‘Kutheni ndikholelwa ukuba iBhayibhile ayibhalwanga ngabantu?’—Isaya 46:10; 1 Tesalonika 2:13.

  Ngaba ufuna uncedo? Funda inqaku elithi: “Ingandinceda Njani IBhayibhile— Inxalenye 1: Ukwazi Izinto EziseBhayibhileni Yakho.”

• Ngaba uqinisekile ukuba UYehova usebenzisa ibandla lamaKristu ukuze kwenziwe umsebenzi wakhe?

  IBhaybhile ithi: “Makazukiswe ngenxa yezinto azenzileyo ngebandla nangoKristu Yesu kuzo zonke izizukulwana ngonaphakade kanaphakade.”—Efese 3:21.

  Khawuzibuze: ‘Ngaba izinto endizifunda kwiintlanganiso zamaNgqina KaYehova ndizibona njengezinto ezivela kuYehova okanye ziimfundiso zabantu?’ (Mateyu 24:45) ‘Ngaba ndiyaya kwiintlanganiso nokuba abazali bam abayi bona?’—Hebhere 10:24, 25.

  Ngaba ufuna uncedo? Funda inqaku elithi: “Kutheni Umele Uye Kwiintlanganiso EziseHolweni YoBukumkani?”

Ndimele ndenze ntoni?

Awumelanga ube ngumntu ongazenziyo iimpazamo ukuze ubhaptizwe. Sekunjalo, umele ubonise ukuba ukufuna nyhani ‘ukusuka kwizinto ezimbi uze wenze ezilungileyo.’ (INdumiso 34:14) Ngokomzekelo:

• Ngaba uphila ngendlela uYehova afuna uphile ngayo?

  IBhaybhile ithi: “Yibani nesazela esilungileyo.”—1 Petros 3:16.

  Khawuzibuze: ‘Ndiye ndabonisa njani ukuba ‘ingqondo yam iqeqeshekile ukuze ikwazi ukwahlula phakathi kokulungileyo nokubi?’ (Hebhere 5:14) ‘Ngaba akhona amaxesha endikhe ndangazenzi izinto ezimbi nangona oontanga bam bebendinyanzela ukuba ndizenze?’ ‘Ngaba iitshomi zam zindinceda ndenze izinto ezilungileyo?’—IMizekeliso 13:20.

  Ngaba ufuna uncedo? Funda inqaku elithi: “Ndingasiqeqesha Njani Isazela Sam?“

• Ngaba uyaqonda ukuba uza kuziphendulela kuYehova ngezinto ozenzayo?

  IBhaybhile ithi: “Ngamnye wethu uza kuziphendulela kuThixo.”—Roma 14:12.

  Khawuzibuze: ‘Ngaba ndinyanisekile kwisiqu sam nakwabanye abantu?’ (Hebhere 13:18) ‘Ngaba iimpazamo zam ndiyazivuma okanye ndiyazifihla ndize ndityhole abanye abantu xa ndizenzile?’—IMizekeliso 28:13.

  Ngaba ufuna uncedo? Funda inqaku elithi: “Yintoni Enokundinceda Xa Ndenze Iimpazamo?”

• Ngaba uzenzela ubuhlobo obusondeleyo noYehova?

  IBhaybhile ithi: “Sondelani kuThixo, naye uza kusondela kuni.”—Yakobi 4:8.

  Khawuzibuze: ‘Yintoni endiyenzayo ukuze ndibe nobuhlobo obusondeleyo noYehova?’ Ngokomzekelo, ‘Ndiyifunda kangaphi iBhayibhile?’ (INdumiso 1:1, 2) ‘Ngaba ndithandaza qho?’ (1 Tesalonika 5:17) Ngaba ndithandazela izinto endizifunayo?’ Ngaba iitshomi zam ziyamkhonza uYehova?’—INdumiso 15:1, 4.

  Ngaba ufuna uncedo? Funda inqaku elithi: “Ingandinceda Njani IBhayibhile—Inxalenye 2: Konwabele Ukufunda IBhayibhile” nelithi: “Kutheni Ndimele Ndithandaze?”

ICEBISO: Ukuze ulungiselele ukubhaptizwa, funda Isahluko 37 sencwadi ethi: “Abantu Abaselula Bayabuza—Iimpendulo Eziluncedo, Umqulu 2.” Sebenzisa kakhulu izinto ezikwiphepha 308 ukuya ku-309.

Ngaba into yokuzinikela kuYehova nokubhaptizwa iyakoyikisa? Ukuba kunjalo, eli nqaku liza kukunceda ulwe noko koyika.

Kweli nqaku

• Kuza kwenzeka ntoni xa ndenze isono esikhulu emva kokuba ndibhaptiziwe?

• Kuthekani ukuba ndinexhala lemisebenzi endiza kuyifumana emva kokuba ndibhaptiziwe?

• Kuthekani ukuba ndizibona ndingafaneleki ukukhonza uYehova?

• Into ethethwa ngoontanga bakho

Kuza kwenzeka ntoni xa ndenze isono esikhulu emva kokuba ndibhaptiziwe?

Isizathu sale ngxaki: Mhlawumbi wazi umntu owenza isono esikhulu waza wakhutshelwa ngaphandle kwebandla. (1 Korinte 5:11-13) Usenokuba nexhala lokuba le nto iza kwenzeka nakuwe.

“Xa ndandicinga ngokubhaptizwa, ndandiye ndoyike kuba ndicinga ukuba ndiza kumona uYehova. Ndandiba nombono wendlela loo nto enokubahlazisa ngayo abazali bam.”—URebekah.

Isibhalo esiyintloko: “Umntu ongalunganga makashiye indlela yakhe . . . Makabuyele kuYehova, oza kumenzela inceba, kuThixo wethu, kuba uza kumxolela kakhulu.”—Isaya 55:7.

Yicinge kanje: Nangona aboni abangaguqukiyo bekhutshelwa ngaphandle kwebandla, uYehova uba nenceda kubantu abaguqukayo baze bavume ukulungiswa.—INdumiso 103:13, 14; 2 Korinte 7:11.

Phofu ke, nantsi inyan’ emsulwa: Nokuba uyazenza iimpazamo, uThixo unokukunceda ulumkele izinto ezinokukwenza umone. (1 Korinte 10:13) Ngapha kwaloo nto, ngubani ogqibayo ngento oza kuyenza? Nguwe okanye ngomnye umntu?

“Ndandisoyika ukuba ndiza kwenza isono esikhulu emva kokuba ndibhaptiziwe. Kodwa ndaqonda ukuba eyona mpazamo yile yokuba ndingazukude ndibhaptizwe. Ndafumanisa ukuba andimele ndivumele izinto endizoyikayo zindiyekise into ebendifanele ukuba ndiyayenza.”—UKaren.

Eyona nto ibalulekileyo: Ukuba uyakuphepha ukwenza izono njengamanye amaKristu, awuzukumona uYehova.—Filipi 2:12.

Ufuna uncedo? Funda inqaku elithi “Ndinokuxhathisa Njani Kwisilingo?”

Kuthekani ukuba ndinexhala lemisebenzi endiza kuyifumana emva kokuba ndibhaptiziwe?

Isizathu sale ngxaki: Usenokuba wazi abantu abasebatsha abaye baya kwezinye iindawo ezikude ukuze bakhonze uYehova. Unexhala lokuba abantu balindele ukuba wenze loo nto nawe.

“UmKristu obhaptiziweyo unokukwazi ukumenzela izinto ezininzi uYehova, kodwa abanye abantu abakakulungeli ukuzinikela kuYehova, abasebenzise okanye iimeko zabo azibavumeli.”—UMarie.

Isibhalo esiyintloko: “Mntu ngamnye makajonge izinto ezenziwe nguye, angazithelekisi namntu. Uza kutsho avuye ngenxa yesiqu sakhe.”—Galati 6:4.

Yicinge kanje: Kunokuba uzifanise nabanye, zimisele ukusebenzisa amazwi akuMarko 12:30: “Umele umthande uYehova uThixo wakho ngentliziyo yakho yonke.”

Apha kuthiwa ufanele ukhonze uYehova ngentliziyo yakho yonke, hayi eyomnye umntu. Ukuba umthanda nyhani uYehova, uza kutsho ufumane neendlela zokumkhonza ngamandla onke.

“Nangona ukubhaptizwa kubalulekile, akukwenzi ube nobomi obunzima. Ukuba uhlala ukunye nabantu abalungileyo, baza kukunceda. Ukumane usenza imisebenzi ethile kuza kukwenza uvuye. Xa ungafuni ukubhaptizwa, uzifaka kwenkulu ingxaki le.”—UJulia.

Eyona nto ibalulekileyo: Mayibaluleke kuwe indlela uYehova abonise ngayo ukuba uyakuthanda. Loo nto iza kwenza ukuba nawe ufune ukumsebenzela ngamandla.—1 Yohane 4:19.

Ufuna uncedo? Funda inqaku elithi, “Ndinokuthenjwa Kangakanani?”

Kuthekani ukuba ndizibona ndingafaneleki ukukhonza uYehova?

Isizathu sale ngxaki: UYehova uLawula yonke indalo, kodwa bona abantu abayiyo kwanto! Usenokuzibuza ukuba uYehova uyayazi na ukuba ungumntu okhoyo.

“Kuba abazali bam bengamaNgqina kaYehova, ndandikhathazwa kukucinga ukuba mna andingomhlobo naye, nokuba akanditsalelanga kuye.”—UNatalie.

Isibhalo esiyintloko: “Akukho mntu unokuza kum engatsalwanga nguLowo undithumileyo, uTata.”—Yohane 6:44.

Yicinge kanje: Kusenokwenzeka ukuba into yokuba ucinga ngokubhaptizwa ibonisa ukuba uYehova uyakutsala ukuze ube ngumhlobo wakhe amthandayo. Ngaba uyafuna ukwamkela esi simemo?

Ungalibali nokuba nguYehova okhetha abantu aza kubatsala, hayi omnye umntu. IBhayibhile isenza siqiniseke ngokuthi “sondelani kuThixo, . . . uza kusondela kuni.”—Yakobi 4:8.

“Into yokuba umazi uYehova futhi ekutsalile ibonisa ukuba uyakuthanda. Ngoko ukuba ucinga ukuba awufaneleki ukuba umkhonze, khumbula nokuba yena akatsho. Ibe ke uYehova usoloko enyanisile.”—USelina.

Eyona nto ibalulekileyo: Ukuba uzenzile izinto ethi iBhayibhile mazenziwe ngabantu abaza kubhaptizwa, ukulungele ukukhonza uYehova. Nantsi enye into, uYehova ukufanele ukukhonzwa.—ISityhilelo 4:11.

Ufuna uncedo? Funda inqaku elithi, “Kutheni Kufuneka Ndithandaze?”