Abantu Abaselula Bayabuza . . .

Ndinokumelana Njani Nabantu Abanomsindo?

“Wayelugcwabevu ngumsindo. Ndicinga ukuba mhlawumbi wandibona ndimncinane, waza wafuna ukundibetha. Njengoko ndandiphepha, ndathi: ‘Yima kancinane! Khawume kancinane! Mus’ ukungxama! Kutheni ufuna ukundibetha nje? Akukho nto ndikwenze yona. Andiyazi neyona nto ikucaphukisileyo. Ngaba singathetha ngale nto?’”—UDavid oneminyaka eli-16 ubudala.

NGABA ukhe walixhoba lokuvuyelelwa yindlavini enomsindo? IBhayibhile yaxela kwangaphambili ukuba namhlanje abantu baya kuba ‘ziindlobongela, bengakuthandi ukulunga.’ (2 Timoti 3:3) Yaye nangona kusenokwenzeka ukuba uzame kangangoko unako ukukuphepha “ukuba liqabane lakhe nabani na onomsindo . . . , nomntu obhabhama ngumsindo,” kusenokubakho amaxesha apho ungenakubaphepha abantu abanomsindo. (IMizekeliso 22:24) Yintoni omele uyenze xa ukuloo meko?

Ukumelana Nomsindo

Namhlanje ulutsha oluninzi lunokusuka nalo lube nomsindo. Kodwa ukusabela ngaloo ndlela kubangela intlungu engakumbi. Ngaphezu koko, ukucaphuka kuya kubangela ukuba nibe nomsindo ngokufanayo. IMizekeliso 26:4 ithi: “Musa ukusiphendula isiyatha ngokobudenge baso, ukuze nawe ungalingani naso.” UJeremy oselula wabubona ubunyaniso bala mazwi ngendlela ebuhlungu. Ukhumbula ehleli etafileni esikolweni ngexesha lekhefu, yaye uthi: “Kwakukho iqela lamakhwenkwe elalithanda ukuqhulana lize lihlekise nangabanye abantu. Lalithanda ukuthetha ngam. Ndandidla ngokunganikeli ngqalelo koko likuthethayo. Kodwa xa omnye walo waqalisa ukuthetha ngomama, ndacaphuka ndaza ndaya kuye ndivutha ngumsindo.” Waba yintoni umphumo? UJeremy uthi: “Wandinkula kanobom.”

IBhayibhile inikela eli cebiso lobulumko: “Impendulo, xa inobulali, isusa umsindo, kodwa ilizwi elibangela intlungu linyusa umsindo.” (IMizekeliso 15:1) Ewe, ukuphendula umntu onomsindo ‘ngelizwi elibangela intlungu’ kuzenza zibe mbi nangakumbi izinto. Noko ke, impendulo enobulali, ngokufuthi iyawudambisa umsindo ize yenze kubekho uxolo kwimeko ebinokuba mbi.

Khumbula uDavid okhankanywe ekuqaleni. Wakwazi ukwenza indlavini ukuba imcacisele isizathu sokuba ibe nomsindo. Kwathi kanti kukho umntu obe ukutya kwale ndlavini, yaye yayikhuphela umsindo kuye nabani na edibana naye. UDavid waqiqa nayo ngelithi: “Ukundibetha akuyi kukubuyisa ukutya kwakho.” Wandula ke wacebisa ukuba baye evenkileni yokutya elapho esikolweni. UDavid uthi: “Ekubeni ndandimazi umntu othengisa apho, ndakwazi ukuyifumanela okunye ukutya. Yandixhawula, yaza emva koko yaba nobuhlobo kum.” Ngaba uyayibona indlela amazwi anobulali anamandla ngayo? Njengoko umzekeliso usitsho, ‘ulwimi olunobulali lunokwaphula ithambo.’—IMizekeliso 25:15.

Ubulali—Bubuthathaka Okanye Ngamandla?

Kuyavunywa ukuba, ingcamango yokuba ‘nolwimi olunobulali’ inokuvakala ingabangeli mdla. Kunokubonakala kuluphawu lokomelela nelobudoda ukubuyisela umsindo ngomsindo. Unokude woyike ukuba xa unobulali abanye baya kucinga ukuba uligwala. Kodwa kuthetha ukuthini ngokwenene ukuba nobulali? Ngokutsho kwenye imbekiselo, ukuba nobulali kuthetha ukuzola. Sekunjalo, lo mthombo mnye wongezelela ngelithi: “Umntu ozole ngolo hlobo womelele ngokungathi yintsimbi.” Ngaloo ndlela, ubulali abululo uphawu lobuthathaka nangayiphi na indlela, kodwa luphawu lwamandla. Njani?

Kaloku, phakathi kwezinye izinto, umntu onobulali uyakwazi ukuzeyisa yaye akacatshukiswa nje zizinto ezincinane. Kwelinye icala, umntu ongenabulali akazithembi, uhlala enomsindo okanye edandathekile. Kwakhona akakwazi ukuzeyisa. Ngenxa yokungakwazi ukulawula iimvakalelo zakhe, kusenokwenzeka ukuba usoloko ebandakanyeka kwiingxabano. Ewe, “unjengesixeko esityhoboziweyo, esingenaludonga, umntu ongenakuwuthintela umoya wakhe.” (IMizekeliso 25:28) Ngokwenene, oyena unamandla ngumntu onobulali!

Imizekelo YeBhayibhile Yobulali

Cinga ngoYesu Kristu. Wathi ‘unomoya wobulali, uthobekile ngentliziyo.’ (Mateyu 11:29) Akazange abe ngqwabalala okanye enze izinto ezingekho ngqiqweni, abuyisele ububi ngobubi. Enyanisweni, umpostile uPetros, umhlobo kaYesu, wathi: “Xa [uYesu] wayetshabhiswa, akazange aphindise atshabhise. Xa wayebandezeleka, akazange asongele, kodwa wahlala ezinikele kulowo ugweba ngobulungisa.” (1 Petros 2:23) Kodwa khumbula ukuba, kwalo Yesu mnye “wangena etempileni, waphosa phandle bonke abo babethengisa nababethenga etempileni.” (Mateyu 21:12) Yaye xa kwakunokubakho imfuneko yenkxaso kaThixo, uYesu wayenokubiza ‘imikhosi yeengelosi engaphezu kweshumi elinesibini’! (Mateyu 26:53) Ngenene, wayengelotyutyusi legwala.

Kwakhona cinga ngomzekelo owabekwa nguMgwebi uGidiyon, njengoko ubhalwe eBhayibhileni kuBagwebi 8:1-3. Emva koloyiso olukhulu emkhosini, wambi amajoni esizwe sakwaEfrayim akhubeka ngenxa yokuba ayevakalelwa kukuba ayengalunikwa udumo olufanelekileyo njengabantu aboyisileyo emfazweni. Acel’ umngeni ngelithi: “Yintoni na le usenze yona ngokungasibizi xa usiya kulwa noMidiyan?” Yaye “azama ukuqhwaya ingxabano naye kabukhali.” Ngoku uGidiyon ‘wayelikroti, elinamandla.’ (ABagwebi 6:12) Kwakulula ukuba aphendule ngomsindo kugculelo lwawo. Kunoko, waphendula ngobulali obenza ukuba bazole abo babebhavuma ngumsindo. UGidiyon wabuza: “Ke kaloku yintoni endiyenzileyo xa kuthelekiswa nani?” Asabela njani kule mpendulo yobulali? “Umoya wawo wadamba ngakuye.”

Okokugqibela, cinga ngengxelo yeBhayibhile yebhinqa elinguAbhigali. UDavide wayezimela njengembacu kutshaba lwakhe uSawule, ukumkani kaSirayeli. Nangona ayephila nzima njengeembacu, amadoda kaDavide ayewalondoloza aze awakhusele amaSirayeli angoowabo. Enye indoda ayincedayo yayingumyeni ka-Abhigali, uNabhali, indoda eyayisisityebi. Noko ke, uNabhali ‘wayengqwabalala noqheliselo lwakhe lulubi.’ Xa amadoda kaDavide ayeswele izinto, acela ukutya kuNabhali. Kunokuba abonise uxabiso ngokukhuselwa ngaphandle kwentlawulo ngamadoda kaDavide, uNabhali ‘wabakhalimela kakhulu’ abathunywa bakaDavide waza wababuyisela emva bephaca.—1 Samuweli 25:2-11, 14.

Akukuva oku, uDavide waba nomsindo waza wayalela amadoda akhe esithi: “Bhinqani elowo ikrele lakhe!” Xa uDavide namadoda akhe wayesiya kubulala uNabhali nawo onke amadoda amsulwa endlu yakhe, uAbhigali wangenelela. Wapha uDavide ukutya okuninzi nesiselo. Wacela uxolo ngento elizothe eyenziwe ngumyeni wakhe waza wabongoza uDavide ukuba abasindise abamsulwa.—1 Samuweli 25:13, 18-31.

Izingxengxezo zika-Abhigali zawuthomalalisa umsindo kaDavide. Eneneni, akuyiqonda indlela oyingozi ngayo umsindo wakhe, uDavide wathi: “Makabongwe uYehova uThixo kaSirayeli, okuthumeleyo ngale mini wandihlangabeza! Makubongwe nokuba nengqiqo kwakho, kubongwe nawe ondithinteleyo ngale mini ndingangeni etyaleni legazi nasekuzisindiseni ngesam isandla.” (1 Samuweli 25:32-35) Ewe, kwiimeko ezininzi ‘impendulo xa inobulali’ inokuwuthomalalisa umsindo wabanye. Noko ke, kuthekani ukuba impendulo yakho enobulali ayikwenzi oko?

“Rhoxa”

Unokukuphepha ukumcaphukisa ngakumbi umntu obhavumayo ngumsindo ngokumshiya. IBhayibhile ithi: “Apho kungekho nkuni uyacima umlilo.” Kwakhona icebisa ngelithi: “Ngaphambi kokuba kuvele ingxabano, rhoxa.” (IMizekeliso 17:14; 26:20) UMerissa oneminyaka eli-17 ubudala wathi: “Enye inkwenkwe edumileyo esikolweni yaza kum yaza yathi ifuna ukuthetha nam. Yandixelela ukuba ndimhle. Kungabanga thuba lide emva koko, intombazana ethandana nayo yaza kum iligqabi ngumsindo. Yandityhola ngelithi ndincwase inkwenkwe yayo yaza yafuna ukulwa nam! Ndazama ukuyicacisela okwenzekileyo, suka ayaphulaphula. Ukuphuma kwesikolo yaza namanye amantombazana ize kundibetha! Ngokukhawuleza ndafumana umntu oza kundikhusela, ndaza ndayicacisela loo ntombazana inomsindo ukuba andifuni kulwa yaye yinkwenkwe yayo eze kum. Emva koko ndayishiya imi apho.” UMerissa wakwazi ukulawula iimvakalelo zakhe. Akazange nje akuphephe ukulwa kodwa wathabatha amanyathelo okuzikhusela. Njengoko IMizekeliso 17:27 isitsho, “nabani na owabambayo amazwi akhe unolwazi, nomntu oqondayo unomoya opholileyo.”

Kodwa kuthekani ukuba nguwe ocaphukise omnye umntu—mhlawumbi ungazimiselanga? Cela uxolo ngokukhawuleza! Kusenokwenzeka ukuba kuphela kwento efunekayo ukuze udambise umsindo waloo mntu. La ngamaxesha azaliswe ziingcinezelo, yaye abantu abaninzi bacaphuka ngokukhawuleza. Kodwa ukuba usebenzisa imigaqo yeBhayibhile xa uqhubana nabanye, unokukuphepha ukuba lixhoba lomsindo womnye umntu.

[Imifanekiso ekwiphepha 17]

“Impendulo, xa inobulali, isusa umsindo”

[Umfanekiso okwiphepha 18]

Maxa wambi ekuphela kwento omele uyenze kukurhoxa