Iliso Lokhozi

NGUMBHALI KAVUKANI! ESPEYIN

XA BETHETHA ngendoda eneliso elibukhali, abantu baseSpeyin bathi ineliso lokhozi (vista de águila). Nabantu baseJamani banentetho efanayo (Adlerauge). Kangangeenkulungwane, iliso elibukhali lokhozi belisoloko lisetyenziswa kwizaci ezininzi. Incwadi kaYobhi, eyabhalwa ngaphezu kweminyaka engamawaka amathathu adlulayo, ithi ngokhozi: “Amehlo alo aqhubeke ekhangela mgama.”—Yobhi 39:27, 29.

Ukhozi lunokukwazi ukubona kude kangakanani? Incwadi iThe Guinness Book of Animal Records ithi: “Ngokuqhelekileyo, ukhozi olubugolide (iAquila chrysaetos) linokukwazi ukubona ukushukuma komvundla okumgama ongaphezu kweekhilomitha ezimbini.” Abanye abantu bakholelwa ukuba ukhozi lunokukwazi ukubona nakumgama ongaphezu kwalowo!

Yintoni ebangela ukuba ukhozi lukwazi ukubona kude kangako? Okokuqala, ukhozi olubugolide lunamehlo amabini amakhulu gqitha. Xa ithetha ngokhozi olubugolide, iBook of British Birds ithi, amehlo alo “makhulu gqitha kodwa akakho nzima kangangokuba lude lungakwazi ukubhabha.”

Kwakhona, ekukhanyeni amehlo okhozi abona kakuhle kakhulu phantse ngokuphindwe kahlanu kunawethu—aneecones ezimalunga nesi-1 000 000 kwisikwemilimitha ngoxa awethu eneecones ezingama-200 000 kwisikwemilimitha. Phantse zonke ezi seli zinxibelelana neneuron. Ngenxa yoko, umthambo-luvo weliso lokhozi, odlulisela inkcazelo engqondweni ngoko kubonwa liliso, unemicu ephindwe kabini kunaleyo yabantu. Ngoko ke siyaqondakala isizathu sokuba ezi zidalwa zibe namehlo abukhali ngale ndlela! Okokugqibela, njengazo zonke iintaka ezizingela amaxhoba, ukhozi lunamehlo abukhali anokukwazi ukukhawuleza abone izinto ezikufuphi nezikude. Nako oku kubangela ukuba amehlo okhozi abalasele gqitha kunawethu.

Ukhozi lukwazi ukubona kakuhle ekukhanyeni emini, kodwa zona izikhova zibona kakuhle ebusuku. Iintaka ezizingela ebusuku aziboni kakuhle ekukhanyeni yaye zinamehlo amakhulu. Ngenxa yoko, ebusuku zinokukwazi ukubona kakuhle izihlandlo ezingaphezu kwe-100 kunabantu. Noko ke, xa kumnyama thsu, izikhova zixhomekeka ngokukhethekileyo ekuveni kwazo ukuze zifumane ixhoba.

Ngubani obangele ukuba ezi ntaka zibe nezi mpawu? UThixo wabuza uYobhi wathi: “Ngaba kungomyalelo wakho oluthi ukhozi lubhabhe luye phezulu?” Ngokuqinisekileyo, akukho mntu unokuzukiswa ngale ndalo imangalisayo. NoYobhi ngokwakhe wavuma ngokuthobeka wathi: “Ndiyazi [Yehova] ukuba uyakwazi ukuzenza zonke izinto.” (Yobhi 39:27; 42:1, 2) Iliso lokhozi bubungqina obungakumbi obubonisa ukuba uMdali wethu unobulumko.

[Umfanekiso okwiphepha 21]

Ukhozi olubugolide

[Umfanekiso okwiphepha 21]

I-“Snowy owl”