Kubalulekile Ukuba Ulale Ngokwaneleyo!

Ngaba ukho umntu onokukhanyela ukuba ukulala ngokwaneleyo kunegalelo elikhulu kwimpilo kabani? Mhlawumbi akakho. Noko ke, abantu abaninzi abazikhathazi kangako ngokulala. UShawn Currie, osisazi ngokusebenza kwengqondo nolisekela njingalwazi kwiUniversity of Calgary eKhanada uthi: “Kodwa ngemini elandelayo uyayiva imiphumo yokungalali.” Xa ungalalanga ngokwaneleyo, usenokuba nochuku yaye maxa wambi usenokuziva udandathekile.

Iphephandaba iCalgary Herald lithi: “Izazinzulu zithi ukulala kuhlaziya ingqondo, yaye xa umntu elele, ufunda okuthile.” Unjingalwazi uCurrie uthi: “Izinto ozaziyo zibetheleleka ngakumbi engqondweni ebusuku yaye nayiphi na into oyifunde emini iyabetheleleka engqondweni ebusuku. Ukungaphumli kuphazamisana nenkqubo yokufunda.” Ngapha koko, uthi “xa ulala ngokwaneleyo, mhlawumbi oko kuyakunceda ube ngolungeleleneyo.”

Ngoko ke, umntu ufanele alale kangakanani ukuze abe ulele ngokwaneleyo? Ngoxa iingcali ezininzi zidla ngokucebisa ukuba umntu alale iiyure ezisibhozo, uCurrie uthi: “Abantu abalali ixesha elilinganayo ukuze balale ngokwaneleyo.” Ngenxa yeso sizathu, ucebisa ukuba umntu aqiniseke ukuba ulala ngokwaneleyo. Kodwa umntu unokukwenza njani oku, ingakumbi abantu abathanda ukuphuthelwa? Nanga amanye amacebiso:

◼ Hlamba umzimba ngamanzi ashushu phambi kokuba ulale.

◼ Yenza umthambo ngokulinganiselweyo izihlandlo eziliqela ngeveki; kodwa musa ukwenza umthambo oza kukwenza ulale udiniwe.

◼ Makungabikho ngxolo kwigumbi lakho lokulala, ligcine limnyama yaye lipholile.

◼ Zama ukuvuka ngexesha elifanayo ntsasa nganye ukuze umzimba wakho uqhele ukulala ixesha elilinganayo.

Ngenxa yeengenelo zempilo, gqala ukulala njengento ebalulekileyo ebomini bakho.