Nceda Ulutsha Lwanelise Iimfuno Zalo
ULUTSHA lufuna umntu onokuthetha nalo ngosukelo lwalo, amathemba neengxaki zalo. Lufuna ubuhlobo obakhayo. Njengokuba bekhula, abantu abaselula bafuna ukuzazi nokwahluka kwabanye. Xa abazali benceda abantwana ukuba banelise ezi mfuno, bayabakhusela kulwalamano olusenokuba yingozi kubo, nakwi-Internet.
◼ Ulutsha lufuna ukuncokola. Xa kufikelelwa kumbandela wokuchaza indlela abavakalelwa ngayo, abantu abaselula basenokubonakala ngathi bazimele-geqe okanye kukho okuthile abakufihlayo. Kodwa qiniseka ukuba bayafuna ukuthetha—ewe bafuna ukuthetha nawe njengomzali—ngezinto ezibalulekileyo nezingabalulekanga kangako. Umbuzo ngulo, Ngaba ukulungele yaye uyafuna ukuphulaphula?—Yakobi 1:19.
Ungaze uvumele ukuxakekiswa bubomi kuhluthe ithuba lokuba uncokole nabantwana bakho. Ukuba iingxaki ziyakongamela, mhlawumbi lixesha lokucinga nzulu ngecebiso leBhayibhile elithi: “Uqiniseke ngezinto ezibaluleke ngakumbi.” (Filipi 1:10) Yintoni enokubaluleka ngaphezu kwabantwana bakho?
Ungangxami ngokucinga ukuba abantwana basenokuya koontanga ukuze bafumane icebiso kunokuya kubazali babo. Kolunye uhlolisiso, abafundi abangama-17 000 abakwibanga lesi-6 ukusa kwele-12 bacelwa ukuba benze umlinganiselo wempembelelo ababenayo abazali babo, abahlobo, abantu abadumileyo, amaziko osasazo nootitshala. Ukulinganisela nge-0 kwakuthetha ukuba abanayo impembelelo, kodwa isi-5 sasithetha ukuba banempembelelo enkulu. Phantse isiqingatha sabo sabanika isihlanu abazali baso.
Licacile ke ngoko elokuba wena njengomzali unokuba negalelo elikhulu ekuphembeleleni umntwana wakho kusukelo lwakhe nakwimilinganiselo yakhe yokuziphatha. Omnye umzali uthi: “Akunakubafikelela ngako konke okuthethayo. Kodwa ukuba akuthethi nabo, akunako ukubafikelela kwaphela.”
◼ Ulutsha lufuna abahlobo. Enye intwazana eneminyaka eli-15 ubudala, ithi: “Abazali abasoloko bekwazi oko abantwana bakwenzayo kwi-Internet okanye abakukhathalelanga.” Kule mihla siphila kuyo abazali abanakusuka nje bangakhathali ngabahlobo babantwana babo. Ngaba uyazi kuba abantwana bakho bachitha ixesha nabani, ubuso ngobuso okanye ngezinye iindlela? IBhayibhile ithi: “Unxulumano olubi lonakalisa imikhwa elungileyo.” (1 Korinte 15:33) Ewe, kukho izizathu ezivakalayo zokubazi abahlobo babantwana bakho.
Inkathalo ingaphezu nje kokukhusela abantu abaselula kwimpembelelo embi. Abantwana bafuna abahlobo abalungileyo. IBhayibhile ithi: “Ohamba nezilumko uya kuba sisilumko naye.” (IMizekeliso 13:20) Ngoko ke, kufuneka kuncedwe abantwana bafumane abahlobo abalungileyo—kuquka nabanye abaselula abamisela umzekelo omhle ekukhumbuleni uMdali wabo.—INtshumayeli 12:1.
UYehova uThixo unemilinganiselo yabantu abakhetha njengabahlobo bakhe, yaye sifanele simxelise. (INdumiso 15:1-5; Efese 5:1) Eneneni, eyona nto unokuyifundisa abantwana bakho ngobomi—ngamazwi nangezenzo—kukukhetha abahlobo abafanelekileyo.—2 Tesalonika 3:6, 7.
◼ Ulutsha lufuna ukuzazi. Eyona nkalo ibalulekileyo ekukhuleni kukuzazi ukuba ungubani—imikhwa eyenza umntwana ahluke kwabanye. Umzekeliso weBhayibhile uthi: “Nditsho kwaumntwana waziwa ngokuziphatha.” (IMizekeliso 20:11, IBhayibhile YesiXhosa yowe-1996) Omnye wemisebenzi yakho njengomzali kukubethelela imigaqo elungileyo entliziyweni yomntwana wakho.—Duteronomi 6:6, 7.
Ngokomzekelo: Abazali bayabakhethisa abantwana oko baza kukunxiba becinga ukuba babafundisa indlela yokunxiba ngokundilisekileyo. Kodwa ngaba unomfanekiso ngqondweni wegxibha elineminyaka engama-30 ubudala linxityiswa ngabazali balo? Kwaukucinga loo nto kwenz’ iintloni! Sinoko ke engqondweni, iBhayibhile isikhuthaza isithi: “Nambathe ubuntu obutsha”—ubuntu obufana nobukaKristu. (Kolose 3:10) Unokunceda umntwana wakho ngokwambatha ubuntu obutsha ngoqeqesho lothando “nasekweyiselweni kwengqondo.” (Efese 6:4) Basenokuthi ke bakukhula baze bazimele, bakhethe “ubuntu obutsha” njengempahla yabo baze bayibone njengempahla entle nenomtsalane.—Duteronomi 30:19, 20.
Zibuze oku: ‘Kanye kanye abantwana bam bavakalelwa njani ngemilinganiselo yeLizwi likaThixo? Ndinokubanceda njani babe “nengqondo ephilileyo”?’ (Tito 2:12) Usukelo lwakho asikuko ukukhulisa umntwana onguthoba sikutyele. Abanye abantwana bakwenza kakuhle oko bakuxelelweyo, ababuzi mibuzo, abaphikisi okanye bavukele. Kodwa umntwana onguvumazonke kuwe ngoku unokuba nguvumazonke nasehlabathini ngomso. Ngoko ke, qeqesha abantwana bakho ukuze bahlakulele “amandla okuqonda.” (Roma 12:1) Bancede baqonde ukuba kutheni imigaqo yeBhayibhile isengqiqweni yaye inokuba yinzuzo kuthi sonke.—Isaya 48:17, 18.
Ewe, ukunceda abantu abaselula bahlangabezane neemfuno zabo akuyondlwan’ iyanetha, kufuna umgudu. Kodwa imivuzo ikufanele oko! Ukuba umntwana wakho uphila ngemigaqo elungileyo oye wayibethelele kuye, uya kukwazi ukutsho uqinisekile ukuba abantwana ngokwenene “balilifa elivela kuYehova.”—INdumiso 127:3.
[Imifanekiso ekwiphepha 9]
Nceda umntwana wakho akhethe abahlobo abalungileyo ngamaKristu