Imbono YeBhayibhile

Ngaba Lukho Uyolo Ekunquleni UThixo?

OMNYE umbhali ozingomb’ isifuba ngokuba ngumKristu uthi: “Ndiyakholelwa kuThixo yaye ndiyamthanda. Kodwa . . ukuya ecaweni yonke le mihla kuyandikruqula.” Ngaba nawe uvakalelwa ngaloo ndlela? Liyinyaniso elokuba ukudikwa, ukunganeliseki noxinezeleko, kuye kwenza abathile bayila iindlela zabo zokunqula uThixo.

Elinye iphephandaba layichaza le ngxuba-kaxaka ngokuthi “kukuzenzela unqulo.” Kodwa abo banqwenela ukunqula uThixo bonwabile basenokunganeliseki ngulo zenzele wonqulo. Ngoba? Kaloku, nantoni na engabanelisiyo kunqulo ngoku isenokwenza banganeliseki ngonqulo nakwixa elizayo.

Oku kusizisa kulo mbuzo: Ngaba ukuphila ngeemfundiso zeBhayibhile kuyindinisa okanye kulizothe? Akunjalo! Ngokomzekelo, amazwi omdumisi weBhayibhile athi: “Yizani simemelele ngovuyo kuYehova! . . . Ngenani, masinqule size siqubude; masiguqe phambi koYehova uMenzi wethu.”—INdumiso 95:1, 6.

Omnye umdumisi wabonakalisa uxabiso lwakhe kuYehova ngokucula athi: “Nguwe wedwa Oyena Uphakamileyo phezu komhlaba wonke.” KwiZibhalo, uYehova ubizwa ngokuba ‘nguThixo onoyolo’ yaye abanquli bakhe baye balubonakalisa olo vuyo kwixesha lamandulo yaye basalubonakalisa nanamhlanje.—INdumiso 83:18; 1 Timoti 1:11.

Isiseko Sokuba Novuyo

Esona siseko sokuba novuyo lokwenene kunqulo lwethu kukwazi indlela uYehova aye wabonakalisa ngayo uthando lwakhe kuthi. Ulubonakalise njani? “Kuba uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.

Ngaloo ndlela, njengokuba iBhayibhile isitsho, ukuthanda kukaThixo kukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:3, 4) Oko akuthethi ukwazi iindinyana ezithile zeBhayibhile nje kuphela. Kunoko, kufuneka ‘siqonde’ oko sikufundayo yaye oku kubandakanya ukuyifunda ngenzondelelo nangocoselelo iBhayibhile. (Mateyu 15:10) Ukuba wenjenjalo uya: ‘Kukufumana ukumazi uThixo.’ Oko kunokuba luvuyo lokwenene!—IMizekeliso 2:1-5.

Kwinkulungwane yokuqala abantu baseMakedoni kwisixeko saseBhereya balufumana olo vuyo. Xa umpostile uPawulos wabafundisa ngeLizwi likaThixo, “balamkela ilizwi ngeyona ntumekelelo inkulu yengqondo, bezincina ngenyameko iZibhalo mihla le mayela nokuba zinjalo kusini na ezo zinto.” Babengenakuba nentumekelelo enjalo ukuba ukufunda kwabo iZibhalo kwakuyindinisa.—IZenzo 17:11.

UYesu wathi: “Banoyolo abo balambela baze banxanelwe ubulungisa, kuba baya kuhluthiswa.” (Mateyu 5:6) Njengabantu ababekade besifa yindlala kodwa ngoku abazondla ngokuthe rhoqo, abantu abaninzi namhlanje banochulumanco ngenxa yokuba indlala yabo yokomoya iyaneliswa. Ngoko ke, njengamaBhereya, baye baba “ngamakholwa.”—IZenzo 17:12.

Indlela Yobomi

AmaKristu okwenyaniso enkulungwane yokuqala ahamba ‘Ngendlela,’ ibinzana elisetyenziswe kwiZenzo 9:2, elibhekisela kwindlela entsha yokuphila eyayilandelwa ngamaKristu amandulo. Namhlanje, abo bafuna uvuyo ngokunqula uThixo bafanele benze okufanayo. Kufuneka bavumele iinyaniso zeBhayibhile zixonxe indlela yabo yokucinga nendlela abaziphatha ngayo imihla ngemihla.

Umpostile uPawulos wabongoza amaKristu ase-Efese ngale ndlela: “Nifanele nibulahle ubuntu obudala obuvisisana nehambo yenu yangaphambili.” Noko ke, kukho okungakumbi okwakufuneka, uPawulos ukuchaza ngale ndlela: “Nifanele . . . , nambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.”—Efese 4:22-24.a

Njengokuba sisamkela isiluleko, sisenza utshintsho ebomini bethu ukuze senze ukuthanda kukaThixo, sifumana uvuyo nolwaneliseko. Ithetha ukuthini loo nto? UPawulos wabhalela amaKristu ebandla laseKolose ewaxelela ukuba kwakufuneka enze utshintsho kubomini bawo ‘ukuze ahambe ngokumfaneleyo uYehova aze amkholise ngokupheleleyo.’ (Kolose 1:10) Ngokuqinisekileyo, ukwazi ukuba uThixo uyakholiswa sithi kusisizathu esivakalayo sokuba novuyo! Ngaphezu koko, uThixo ukwenza kube lula ukumkholisa “ngokupheleleyo.” Ukwenza njani oko? Ngokuxolela.

Sonke singaboni yaye sonke sifuna ukuxolelwa nguThixo. Wakha wathi umpostile uPawulos kweyoku-1 kaTimoti 1:15: “UKristu Yesu weza ehlabathini ukuze asindise aboni.” Xa uYesu wanikela ngobomi bakhe ngenxa yethu, wasivulela ithuba lokuba kuxolelwe izono zethu. Ngenxa yoko, umnquli wokwenyaniso uziva ekhululekile ngenxa yokususwa kwemvakalelo yokuziva enetyala entliziyweni yakhe. Loo mKristu, unokuba nesazela esicocekileyo yaye unokuvuyiswa kukwazi ukuba xa esenza ukuthanda kukaThixo, ziya kuxolelwa izono zakhe.

Esinye Isizathu Sokuvuya

Xa umntu enqula uThixo wokwenyaniso, akalokheswa. Umdumisi weBhayibhile, uDavide, wabhala wathi: “Ndaba nemihlali bakuthi kum: “Masiye endlwini kaYehova.’” (INdumiso 122:1) Enyanisweni, xa sisiya kwiintlanganiso zabanquli bokwenyaniso, uvuyo lwethu luyanda.

Emva kokuya kwintlanganiso yamaNgqina kaYehova, enye indoda yabhala yathi: “Samkelwa ngezandla ezishushu saza sayibona indlela abasondelelene ngayo. Ukuziphatha kakuhle kolutsha kufanele kubenza babe nelunda abazali babo. Ndifuna nje ukunixelela indlela endiye ndakuvuyela ngayo ukumenyelwa kwindawo echukumisa nehlab’ umxhelo ngale ndlela.”

Nawe, unokuvuyiswa kukukhonza uYehova njengokuba kwakunjalo ngoDavide mandulo. Wabongoza wathi: “Mkhonzeni uYehova ninemihlali. Ngenani phambi kwakhe ngentswahla yovuyo.” (INdumiso 100:2) Bonke abantu abanqula uThixo wokwenyaniso banokulindela ukuba unqulo lwabo lube loluvuyisayo.

[Umbhalo osemazantsi]

NGABA WAKHA WAZIBUZA?

◼ Siyintoni isiseko sonqulo lokwenyaniso?—1 Timoti 2:3-6.

◼ Lisinceda njani idini likaKristu ekubeni novuyo?—1 Timoti 1:15.

◼ Zinokusinceda njani iintlanganiso zebandla ukuze sikhonze uThixo ngovuyo?—INdumiso 100:1-5.

[Umfanekiso okwiphepha 10]

Ukuba nabanye xa kufundwa iBhayibhile kunokusivuyisa