Ngaba Unokuwusindisa Umtshato Wakho?

Abaninimzi baphawula ukuba umzi wabo uyawohloka kodwa bakhethe ukuwulungisa.

NGABA ufuna ukwenza into efanayo nakumtshato wakho? Ukuba kunjalo, uza kuqala ngaphi? Khawukhe uzame la macebiso alandelayo.

1 Yenzani isigqibo.

Vumelanani neqabane lakho ukuba niza kusebenzisana ekubuyiseleni uxolo emtshatweni wenu. Yibhaleni phantsi into enivumelene ngayo. Xa nobabini nizimisele niya kusebenzisana ekusindiseni umtshato wenu.—INtshumayeli 4:9, 10.

2 Khangelani le nto iyingxaki.

Yintoni le iphazamisa umtshato wenu? Ngesivakalisi nje esinye, bhalani eyona nto isilelayo okanye nantoni na eninokuyitshintsha emtshatweni wenu. (Efese 4:22-24) Kucacile ukuba, nisenokungaboni iingxaki ezifanayo neqabane lakho.

3 Zibekeleni usukelo.

Nifuna ukuba umtshato wenu ube unjani kwezi nyanga zintandathu zilandelayo? Ziziphi ezona zinto ninqwenela ukuba zitshintshe? Lubhaleni phantsi usukelo lwenu. Xa niyazi eyona nto niyifunayo emtshatweni wenu, ninako ukulufikelela usukelo lwenu.—1 Korinte 9:26.

4 Lisebenziseni icebiso leBhayibhile.

Xa sele niyibonile eyona ngxaki kwaye nizazi izinto enifuna ukuzitshintsha, khangelani icebiso eBhayibhileni. Imigaqo yayo ayiphelelwa lixesha yaye iluncedo ngokwenene. (Isaya 48:17; 2 Timoti 3:17) Ngokomzekelo, iBhayibhile ikhuthaza wena neqabane lakho ukuba nixolelane. Eneneni, iBhayibhile ithi, “kuyinto entle . . . ukukubetha ngoyaba ukunxaxha.”—IMizekeliso 19:11; Efese 4:32.

Kwanokuba ekuqaleni amalinge eniwenzayo abonakala engaphumeleli, musani ukulahl’ ithemba. Incwadi ethi The Case for Marriage ithi xa ichaza ngeziphumo ezincumisayo zolunye uhlolisiso: “Iyamangalisa into yokuba: ama-86 ekhulwini ezibini ezingonwabanga emitshatweni yazo kodwa zihlale kunye ziye zafumanisa ukuba emva kweminyaka emihlanu ziphinda zonwabe.” Kwanezibini ezithi azonwabanga ziye zafumanisa ukuba izinto zihamba zitshintshe.

Kusenokuba kunjalo nakuwe. AmaNgqina kaYehova, angabapapashi beli phephancwadi, aye afumanisa ukuba iBhayibhile inemigaqo enokuzinceda izibini ezitshatileyo. Ngokomzekelo, kuba mnandi kwimitshato emininzi ukuba amaqabane anobubele, anemfesane yaye axolelana ngokukhululekileyo. La makhosikazi afunde ukubaluleka kokuba ‘nomoya ozolileyo nowobulali’ aza wona amadoda ayibona indlela ekunceda ngayo ukungavuthi ngumsindo ngakumakhosikazi awo.—1 Petros 3:4; Kolose 3:19.

Le migaqo iseZibhalweni iyasebenza, ngenxa yokuba uMbhali weBhayibhile, uYehova uThixo ikwanguye umsunguli welungiselelo lomtshato. Khawukhe ucele inkcazelo engakumbi kumaNgqina kaYehova ngendlela iBhayibhile enokuwunceda ngayo umtshato wakho.a

[Umbhalo osemazantsi]