Ngaba Unqulo Lungunobangela Wogonyamelo Nemfazwe?
UMFUNDISI nombhali wenkulungwane ye-18 uJonathan Swift wabhala wathi: “Sineenkonzo ezaneleyo zokusenza sibe nentiyo, kodwa azanele ukusenza sithandane.” Abantu abaninzi bathi iicawa zingunobangela weyantlukwano. Kodwa ke abanye ababoni ngolo hlobo.
Ngokomzekelo, cinga ngesigqibo elafikelela kuso iqela labaphengululi beSebe Lezifundo Zoxolo KwiYunivesithi yaseBradford eUnited Kingdom. Aba baphandi babeyalelwe yiBritish Broadcasting Corporation ukuba baphande enoba unqulo lungunobangela woxolo okanye ugonyamelo kusini na.
Kwingxelo yabo, aba baphengululi bathi: “Emva kokuhlola imbali ebhalwe ziingcali ezahlukahlukeneyo, siye safumanisa ukuba zimbalwa iimfazwe eziye zabangelwa yicawa kule minyaka ili-100 idluleyo.” Eli qela labaphengululi lathi, “ ezinye iimfazwe ekudla ngokuthiwa kumajelo eendaba nangabanye abantu zibangelwe yicawa, enyanisweni yayiziimfazwe zobuhlanga, zokulwela inkululeko okanye zokuzikhusela.”
Noko ke, abantu abaninzi bathi izinto ezenziwa ngabefundisi okanye ukuthula kwabo, kuye kwazixhasa iimfazwe ezininzi, njengoko ezi zicatshulwa zilandelayo zibonisa:
● “Kubonakala ngathi apho kukho unqulo kubakho nogonyamelo. . . Kwiminyaka yakutshanje, kuye kwakho imfazwe ebangelwe lunqulo phakathi kwamaKristu eUnited States, phakathi kwamaSilamsi namaYuda kuMbindi Mpuma, kwaxabana amaHindu namaSilamsi kuMzantsi Asiya kwaza kwabakho nezidubedube kwiicawa zaseAfrika naseIndonesia. . . . Abantu ababandakanyekileyo kwezi ngxwabangxwaba baye bathembela kwiicawa ukuze zibanike izizathu ezibambekayo zokuba baziphindezele.”—ITerror in the Mind of God—The Global Rise of Religious Violence.
● “Into engumnqa kukuba awona mazwe kukhonzwa kakhulu kuwo ngawona kwenziwa izenzo zenkohlakalo. . . . Ukwanda kweecawa kuye kwasilela ukunciphisa ulwaphulo-mthetho. . . . Ubungqina buzicacele: Ukuze ufumane iindawo ezikhuselekileyo, ezifanelekileyo, ezinocwangco neziphucukileyo ufanele ungahlali kwiindawo ezinonqulo.”—IHoly Hatred.
● “AmaBhaptizi adume ngokulwa kunokuba akhuthaze uxolo. . . . Xa amahlelo eecawa kunye nelizwe zazahlukaniswe ngumba wobukhoboka [eUnited States] nazezinye izinto ezazisenzeka ngenkulungwane yeshumi elinesithoba, amaBhaptizi akuMntla nawakuMzantsi ayeyixhasa imfazwe esithi yayifanele iliwe yaye ayesithi uThixo wayengakuwo. Kwakhona, amaBhaptizi azixhasa iimfazwe zaseNgilani (1812), eMexico (1845) naseSpeyin (1898), ethethelela ezi zimbini zokugqibela ‘ngelithi zaziza kukhulula abantu abacinezelweyo ngokonqulo kuze ngaloo ndlela kuvele iindawo ezingakumbi ekunokushunyayelwa kuzo.’ Asikokuba amaBhaptizi ayefuna imfazwe kunoxolo kodwa kwathi kwakuvuka imfazwe ayixhasa.”—IReview and Expositor—A Baptist Theological Journal.
● “Ababhali-mbali baye bafumanisa ukuba impembelelo yecawa idla ngokubakho kuzo zonke iintlanga nakuwo onke amaqela abandakanyekileyo emfazweni. Kudala kwaliliselwa ngelithi ‘oothixo bangakuthi’ xa kukhuthazwa abantu ukuba baye emfazweni.”—IThe Age of Wars of Religion, 1000-1650—An Encyclopedia of Global Warfare and Civilization.
● “Abefundisi . . . bafanele bakuhlolisise nzulu ukusilela kwabo ukukhokela baze baqwalasele neyona milinganiselo ziphila ngayo iinkonzo zabo. . . . Liyinyaniso elokuba zonke iicawa zilangazelela uxolo kodwa liyathandabuzeka elokuba ziya kukwazi ukuluzisa.”—IViolence in God’s Name—Religion in an Age of Conflict.
Ukutyhubela imbali, zonke iicawa ezinkulu zeNgqobhoko (amaKatolika, amaOthodoki namaProtestanti) ziye zathumela abefundisi ukuze bakhuthaze amajoni, bathandazele abafileyo nabasecicini lokufa, macala omabini emikhosi elwayo. Ngokwenza oku, bakuqwabazel’ iliso ukuphalazwa kwegazi baza basikelela namajoni omkhosi.
Kodwa ke abanye basenokuma ngelithi, unqulo alunakubekw’ ityala ngobukho beemfazwe. Kodwa ke umbuzo ngulo, Ngaba unqulo luye lwaphumelela kwimizamo yalo yokumanyanisa uluntu?
[Ibhokisi ekwiphepha 5]
“Izolo uMfundisi webandla lamaBhaptizi aseMadison Avenue, uGqr. uCharles A. Eaton uxelele amarhamente akhe ukuba indlu yecawa iza kusetyenziselwa ukubhalisa abantu abafuna ukuya emkhosini.”
“Ungomnye wabefundisi abaninzi kule dolophu abaye bashumayela ngemfazwe kusasa ngeCawa nabaye bakhuthaza amadoda namabhinqa ukuba bangqine ukunyaniseka kwabo kwilizwe nakwidemokhrasi ngokuncedisa ngokukhawuleza emfazweni. Iicawa ezininzi zihonjiswe ngeeflegi.”—“I-The New York Times,” Aprili 16, 1917.