Kutheni Unqulo Lungakwazi Ukumanyanisa Abantu?
UKUTHI unqulo lungunobangela wazo zonke iimfazwe bekuya kutheth’ ukuthi ngezimbalwa iimfazwe ukuba unqulo belungekho. Kodwa ngaba kunjalo ngokwenene? Ngaba ingaphela imfazwe xa lungekho unqulo? Nokuba impendulo yakho ithini, lizicacele elokuba: Unqulo alukhange lubamanyanise abantu. Makhe sihlole ezinye zezizathu zokuba oku kuyinyaniso.
Ukwahlulwa Lunqulo
Abantu baziintlaba zahlukane ngenxa yonqulo yaye iinkonzo ezininzi ezinkulu bezisoloko zisilwa. Ngaba sikho isizathu sokukholelwa ukuba amaBhuda, amaHindu, amaKristu, amaSilamsi namaYuda aya kuze ahlale ngoxolo?
Okunye okubuhlungu kukuba nganye yezi nkonzo zinkulu inamaqela angavaniyo. Ngokomzekelo, kuqikelelwa ukuba iicawa zobuKristu zingamahlelo ahlukahlukeneyo angaphezu kwama-30 000. AmaSilamsi anamaqela aneenkolelo ezingafaniyo. Elinye ijelo leendaba lakuMbindi Mpuma lithi, umphengululi oliSilamsi uMohsen Hojjat usandul’ ukuthi, “ukungamanyani kwamaSilamsi ngoyena nobangela weengxaki zawo.” Nezinye iinkonzo ezinkulu njengamaBhuda, amaHindu namaYuda zinamaqela ajongene ngezikhondo zamehlo.
Ukugxuphuleka Konqulo Kwezopolitiko
Kubonakala ngathi ayikho into olungangeni kuyo unqulo. Iphephancwadi iThe Economist lithi “abantu beecawa bathetha ngokukhululekileyo ngeenkolelo zabo, naphi na kuquka nakwezoshishino. Kwakhona, unqulo lunempembelelo nakwezoqoqosho.” Oku kubangela ukuba abantu babe ziintlaba zahlukane kunokuba bamanyane. Kodwa eyona nto iye yayingozi embalini kukugxuphuleka konqulo kwezopolitiko.
Kwingxelo yakutshanje ebekukhe kwabhekiselwa kuyo kwinqaku elandulela eli, iqela lababhali-mbali lathi, “unqulo lusenokuba ngunobangela wemfazwe xa unqulo norhulumente belala ngengub’ enye.” Oku kuveza inyaniso engenakuphikwa yokuba: Unqulo belusoloko luyintlaka nexolo nezopolitiko nomkhosi.
Kunokuqhambuka Imfazwe Nanini Na
Kumazwe amaninzi iinkonzo ezinkulu ziye zaba yimiqondiso yobuzwe nohlanga. Ngenxa yoko akukho lula ukubona umahluko phakathi kweengxwabangxwaba ezibangelwa kukuthanda isizwe, ucalucalulo, ubuhlanga okanye unqulo. Le ngxubevange inokubangela imfazwe enokwahlukanisa ihlabathi nanini na.
Okudidayo kukuba iinkonzo ezininzi zithi zimela uThixo weBhayibhile, uMdali. Ngaba isengqiqweni into yokuba usomandla, noMdali onothando nolumkileyo axhase iinkonzo ezibangela iyantlukwano nophalazo-gazi?
[Umfanekiso okwiphepha 6]
Amawakawaka amaNgqina kaYehova aye avalelwa ezintolongweni ngenxa yokungathath’ icala kwiingxwabangxwaba