IHLABATHI ELIGCWELE UBUBI

3 | Khusela Ubuhlobo Onabo Nabantu Obathandayo

KUTHENI KUBALULEKILE?

Njengoko izinto ezikhathaza abantu zisanda kwihlabathi eligcwele ububi, abantu abaninzi ababuhoyanga ubuhlobo babo.

Abantu bayazikhetha kubahlobo babo.
Abantu abatshate kunye baye baxabane.
Abazali baye bangazihoyi ncam okanye bangazihoyi kwaphela izinto ezikhathaza abantwana babo.

Into Omele Uyazi

Abahlobo babalulekile ingakumbi ngamaxesha anzima kuba basinceda sihlale sisempilweni ngokweemvakalelo.
Istres esibangelwa lihlabathi eligcwele ububi sinokubangela iingxaki engazilindelanga intsapho yakho.
Xa abantwana bakho besiva iindaba ezimbi basenokoyika ngaphezu kokuba usazi.

Into Onokuyenza Ngoku

IBhayibhile ithi: “Umhlobo wokwenene uthanda ngamaxesha onke, ibe ungumzalwana onokuthembela kuye ngamaxesha anzima.”—IMizekeliso 17:17.

Abahlobo banokusinceda baze basinike amacebiso aluncedo. Ukwazi ukuba kukho umntu okukhathaleleyo kunokukunceda ukwazi ukumelana neengxaki zosuku.

INDLELA YOKUMELANA NALE NTO—Amacebiso Aluncedo

Ngexesha lobubi, khusela ubuhlobo bakho nabantu obathandayo ngokusebenzisa la macebiso alandelayo

QINISA UMTSHATO WAKHO

Qinisa umtshato wakho

IBhayibhile ithi: “Ababini babhetele kunomnye. . . Kuba xa omnye wabo esiwa, omnye unokumphakamisa umhlobo wakhe.” (INtshumayeli 4:9, 10) Abantu abatshatileyo akufuneki balwe bodwa, kunoko indoda nomfazi kufuneka basebenzisane.

Sukukhuphela istres sakho emntwini otshate naye ngenxa yeengxaki onazo. Zama ukuba nomonde.
Kanye ngeveki, thetha nomntu otshate naye ngeengxaki eninokubanazo. Khumbula ukuba eyona nto enimele niyenze kukulungisa ingxaki, ningalwi nodwa.
Yibani nexesha lokwenza izinto enizithandayo kunye.
Khumbulani amaxesha amnandi enanikunye ngawo, mhlawumbi nibuke iifoto zenu zomtshato.

“Abantu abatshatileyo basenokungavumelani ngayo yonke into, kodwa loo nto ayithethi ukuba abanakukwazi ukusebenzisana. Abantu abatshatileyo banokwenza isigqibo kunye futhi banokwenza eso sigqibo siphumelele.”—UDavid.

GCINA UBUHLOBO BAKHO NABANYE

Gcina ubuhlobo bakho nabanye

Ukongezelela ekufumaneni uncedo kubahlobo, nawe unokucinga ngeendlela onokubaluncedo ngayo. Xa ukhuthaza abanye, nawe uyakhuthazeka.
Qho ngosuku thetha nabahlobo bakho uve ukuba banjani na.
Buza kubahlobo bakho ukuba baye benza njani ukuze bamelane neengxaki ezifana nezakho.

“Xa ujongene neengxaki ezinzima, abahlobo bangaba luncedo. Bangakunceda bakubonise indlela yokuyilungisa, enoba bakukhumbuza ngezinto osele uzazi. Abahlobo bakho bakukhathalele ibe nabo bayakwazi ukuba ubakhathalele.”—UNicole.

YIBA NGUMZALI OKHATHALAYO

Yiba ngumzali okhathalayo

IBhayibhile ithi: ‘Khawuleze ukuva, ucothe ukuthetha.’ (Yakobi 1:19) Ekuqaleni kusenokuba nzima ukuba abantwana bakho bathethe ngezinto abazoyikayo nabazicingayo, kodwa ukuba ubamamela ngomonde, uza kubanceda bathethe ngeemvakalelo zabo.

Yenza kube lula ukuba abantwana bakho bathethe ngendlela abavakalelwa ngayo. Abanye abantwana bathetha ngokukhululekileyo xa bekhwele imoto, besitya okanye behamba, kunaxa bethetha nabazali bejongene ubuso ngobuso.
Qiniseka ukuba abantwana bakho abasoloko besiva iindaba ezothusayo.
Abantwana bakho mabazazi izinto ozenzayo ukuze uqinisekise ukuba intsapho ikhuselekile.
Yiba nendlela yokumelana neengxaki ezisenokuvela uze uzifundise abantwana bakho.

“Thetha nabantwana bakho uze nabo ubavumele bachaze indlela abaziva ngayo. Kusenokwenzeka bafihla into abayoyikayo, ebaxhalabisayo nebenza umsindo. Bachazele ukuba nawe uziva ngaloo ndlela uze ubaxelele ukuba umelana njani nezo mvakalelo.”—UBethany.