Isahluko 13

Ndinokuyeka Njani Ukukhathazeka Kangaka?

“Xa abahlobo bam beneengxaki, ndisoloko ndikulungele ukubathwalela zona. Kodwa ndithi ndakufika ekhaya—xa ndingekho phakathi kwabantu—ndingene egumbini lam zize zehle iinyembezi.”—UKellie.

“Xa ndikhathazekile, ndiye ndikhethe ukuhlala ndedwa. Naxa ndimenywa ndiba nesizathu sokungayi. Andifuni bayazi indlela endivakalelwa ngayo ekhaya. Bacinga ukuba ndonwabile.”—URick.

NGABA indlela ovakalelwa ngayo iyafana nekaKellie okanye uRick? Ukuba kunjalo, musa ukukhawuleza ugqibe kwelokuba kukho into ephosakeleyo ngawe. Eneneni, sonke sikhe sikhathazeke ngamanye amaxesha. Nkqu namadoda namabhinqa aseBhayibhileni ayekhe akhathazeke.—1 Samuweli 1:6-8; INdumiso 35:14.

Ngamanye amaxesha uyasazi isizathu sokuba ukhathazeke kodwa maxa wambi uye ungasazi. UAnna oneminyaka eli-19 ubudala uthi: “Usenokukhathazeka kungekho nto ibuhlungu ikwehleleyo. Enoba ubomi bakho abunazingxaki kubakho amaxesha okukhathazeka ngokwenene. Nangona oku kungavakali kusengqiqweni kodwa kuyenzeka!”

Enoba siyintoni isizathu—enoba sibonakala singekho—yintoni onokuyenza xa ukhathazeke ngokugqithiseleyo? Zama ukwenza oku kulandelayo:

1. Thetha ngentlungu yakho. Xa wayesentlungwini, uYobhi wathi: “Ndiza kuthetha ngobukrakra bomphefumlo wam!”—Yobhi 10:1.

UKellie: “Xa ndithethe nomnye umntu ndifumana isiqabu kuba utsho ayazi intlungu endikuyo. Unokundinceda ndiyoyise kutsho kuthi qabu!”

Nali icebiso: Bhala apha ngezantsi igama lomhlobo onokuzityand’ igila kuye xa ukhathazeke kakhulu.

․․․․․

2. Yibhale phantsi intlungu okuyo. Ukuba indlela okhathazeke ngayo ichaphazela indlela obujonga ngayo ubomi, zibhale phantsi iingcinga zakho. Ngamanye amaxesha uDavide wayekhe achaze indlela awayeba buhlungu ngayo kwiindumiso zakhe eziphefumlelweyo. (INdumiso 6:6) Ukubhala ngeemvakalelo ezinjalo kunokukunceda ‘ulondoloze ubulumko bobuqili namandla okucinga.’—IMizekeliso 3:21.

UHeather: “Ukubhala phantsi kundinceda ndikwazi ukucingisisa ngezinto ezindikhathazayo. Xa ukwazi ukuchaza iimvakalelo zakho uze uzame ukuqonda oyena nobangela wendlela ovakalelwa ngayo, unokuziva ubhetele.”

Nali icebiso: Sebenzisa isicangca esikwiphepha 93 ukuze ukwazi oko umele ukwenze. Oko kuya kukunceda ukuba uyeke ukukhathazeka.

3. Yithandazele. IBhayibhile ithi ukuba uyazithandazela izinto ezikuxhalabisayo, ‘uxolo lukaThixo olungaphaya kokuqonda luya kuyilinda intliziyo yakho namandla akho engqondo.’—Filipi 4:7.

UEsther: “Ndandisicinga ndisincame isizathu sokuba ndikhathazeke. Ndabongoza uYehova ukuba andincede ndiphinde ndonwabe. Yayindikruqula into yokusuka nje ndikhathazeke. Kodwa ekugqibeleni ndahlukana nokuhlala ndidakumbile. Ungaze uwajongele phantsi amandla omthandazo!”

Nali icebiso: Sebenzisa iNdumiso 139:23, 24 njengomzekelo wendlela onokuthandaza ngayo kuYehova. Phalaza imbilini yakho uze umcele akuncede uyazi eyona nto ikukhathazayo.

Ukongezelela kula macebiso angasentla, unomthombo oluncedo, iLizwi likaThixo iBhayibhile. Ukuzalisa ingqondo yakho ngezinto ezakhayo ozifunde eBhayibhileni kunokukunceda uphucule indlela ocinga ngayo nendlela ozenza ngayo izinto. (INdumiso 1:1-3) Amacebiso angakumbi okufunda iindinyana zeBhayibhile eziluncedo unokuwafumana ngokufunda umxholo othi “Umzekelo Wokuxeliswa” okwimiqulu yezi ncwadi. Kwiphepha 227 kuMqulu 2, uza kubona nendlela umpostile uPawulos awalwisana ngayo neemvakalelo eziphosakeleyo ezazibangelwa kukungafezeki.

Xa Usoloko Ukhathazekile

URyan uthi: “Ngezinye iintsasa ndiye ndivakalelwe ngathi kubhetele ndingavuki kunokuba ndivukele ilize.” URyan udandathekile yaye asinguye yedwa onale ngxaki. Uphando lubonisa ukuba om-1 kwaba-4 kubantu abaselula uyadandatheka ngaphambi kokuba abe mdala.

Unokuzazi njani xa udandathekile? Ezinye iimpawu iba kukutshintsha ngokukhawuleza kwendlela ovakalelwa ngayo nozenza ngayo izinto, ukuzenza ikheswa, ukungabi namdla wokwenza nantoni na, ukutshintsha ngokuphawulekayo kwendlela otya ngayo, ukungalali kakuhle nokuziva ungaxabisekanga okanye ukuzibek’ ityala ngokungeyomfuneko.

Enyanisweni, sonke siba nazo ezi mpawu ngamanye amaxesha. Kodwa ukuba kuqengqeleka iiveki unazo, thetha nabazali bakho niye kubona ugqirha. Ugqirha unokukunceda ubone enoba uyagula kusini na.a

Ukuba udandathekile, ungabi nazintloni. Ngokufumana unyango, uninzi luye lwachacha—mhlawumbi lwada lwafumana isiqabu olungazange lwasifumana. Enoba ukukhathazeka kwakho kubangelwa kukudandatheka okanye akunjalo, khumbula amazwi athuthuzelayo eNdumiso 34:18 athi: “UYehova usondele kwabo baphuke intliziyo; yaye abo bamoya utyumkileyo uyabasindisa.”

[Umbhalo osemazantsi]

IZIBHALO EZIBALASELISA

“UYehova usondele kwabo baphuke intliziyo; yaye abo bamoya utyumkileyo uyabasindisa.”—INdumiso 34:18.

ICEBISO

Bhala indlela ovakalelwa ngayo xa ukhathazekile nento ocinga ukuba ngunobangela. Emva kwenyanga, funda oko ukubhalileyo. Ngaba itshintshile indlela obuvakalelwa ngayo? Ukuba kunjalo, bhala oko kukuncedileyo.

NGABA UBUSAZI . . . ?

Akukho nto iphosakeleyo ngokulila nokuba uyinkwenkwe. Ngesinye isihlandlo uKumkani uDavide wathi: “Ubusuku bonke ndiyasidadisa isingqengqelo sam.”—INdumiso 6:6.

OKO NDICEBA UKUKWENZA!

Ukuze ndibe bhetele, ndinokwenza ezi zinto: ․․․․․

Ukuba kunye naba bahlobo kuza kundinceda xa ndikhathazekile: ․․․․․

Oko ndifuna ukukubuza abazali bam ngalo mba ․․․․․

UCINGA NTONI?

● Ngaba kuyanceda ukulila?

● Ukuba phakathi kwabanye abantu kunokukunceda njani xa ukhathazekile?

[Amagama acatshulweyo akwiphepha 96]

“Xa ndikhathazekile ndiyakuphepha ukuzenza ikheswa. Ewe kona, ndiye ndifune ukuba ndedwa ukuze ndicingisise ngeemvakalelo zam mhlawumbi ndide ndilile nokulila. Kodwa emva koko, ndiyayazi ukuba ndimele ndibe phakathi kwabantu ukuze ndiyeke ukucinga ngayo nantoni na endikhathazayo.”—UChristine.

[Isicangca/Imifanekiso ekwiphepha 93]

Isalathiso Samaphepha

Oko Unokukwenza Ukuze Ungakhathazeki Bhala kwesi sicangca

․․․․․ → ․․․․․ → ․․․․․

․․․․․ → ․․․․․ → ․․․․․

[Umfanekiso okwiphepha 95]

Xa ucela uncedo uze uzimisele, inokuphela intlungu okuyo

Isahluko 14

Kutheni Ndingazibulali Nje?

“KULUNGE ngakumbi ukufa kum kunokuphila.” Ngubani owathetha la mazwi? Ngaba ngumntu owayengakholelwa kuThixo? Ngaba ngumntu owayeshiye uThixo? Ngaba ngumntu owayeshiywe nguThixo? Akunjalo. Le yayiyindoda eyayizinikele kuThixo kodwa eyayinentliziyo elihlwili, uYona.—Yona 4:3.

IBhayibhile ayithi uYona wayeza kuzibulala. Kunoko, isicelo sakhe sibonisa ukuba maxa wambi kwanomkhonzi kaThixo usenokuba neengxaki ezingaphezu kwamandla akhe.—INdumiso 34:19.

Xa lusonganyelwa ziingxaki olunye ulutsha luye lungazi ukuba lusaphilela ntoni. Lusenokuvakalelwa ngendlela efanayo nekaLaura oneminyaka eli-16 ubudala, owathi: “Kangangeminyaka, bendisoloko ndidandatheka. Ndandisoloko ndicinga ukuzibulala.” Ukuba kukho umntu omaziyo owakhe wathi kuwe ufuna ukuzibulala—okanye nawe unengxaki efanayo—yintoni onokuyenza? Makhe sihlolisise into enokubangela ukuba ucinge ngolo hlobo.

Unobangela Wokuphelelwa Lithemba

Yintoni enokwenza ukuba umntu acinge ngokuzibulala? Zisenokuba zininzi izizathu. Kaloku, siphila ‘kwixesha lamanqam ekunzima ukujamelana nalo’ yaye ulutsha oluninzi olukwishumi elivisayo luxinezelekile. (2 Timoti 3:1) Kwakhona, ukungafezeki kwabantu kusenokubabangela ukuba bahlale becinga ngezinto ezibuhlungu ezibehlelayo neziqhubeka emhlabeni. (Roma 7:22-24) Maxa wambi oku kubangelwa kukuphathwa kakubi. Kwezinye iimeko oku kungenxa yempilo. Kwelinye ilizwe kuqikelelwa ukuba abantu abangaphezu kwama-90 ekhulwini bazibulala ngenxa yokuba begula ngengqondo.a

Kakade ke, sonke sinazo iingxaki. IBhayibhile ithi, “yonke indalo iyagcuma kwaye isentlungwini.” (Roma 8:22) Loo ndalo iquka ulutsha. Ulutsha lusenokuxinezeleka ngenxa yezi zinto zilandelayo:

● Ukufa kwesalamane okanye umhlobo

● Iingxwabangxwaba zentsapho

● Ukungaphumeleli esikolweni

● Ukwaliwa ngumntu omthandayo

● Ukuphathwa kakubi (njengokubethwa okanye ukuxhatshazwa ngokwesini)

Yinyaniso into yokuba kungekudala lonke ulutsha luza kujamelana nenye yezi meko zidweliswe ngasentla. Kutheni abanye bekwazi ukumelana nezi ngxaki? Iingcali zithi ulutsha oluninzi luxhom’ izandla lusithi alunakuze luncedakale. Ngamanye amazwi, luphelelwa lithemba. Alufuni kufa; kunoko lufuna ukuphelisa intlungu.

Ngaba Akukho Ndlela Yimbi?

Kusenokwenzeka ukuba kukho othile omaziyo ofuna ukuphelisa intlungu kangangokuba ude walitsolisa elokuba ufuna ukuzibulala. Ukuba kunjalo, yintoni onokuyenza?

Ukuba umhlobo wakho uxinezelekile ukusa kwinqanaba lokuba afune ukuzibulala, mkhuthaze ukuba afune uncedo. Emva koko, kungakhathaliseki ukuba yena uvakalelwa njani, thetha nomntu oqolileyo. Ungakhathazeki ngokuba oko kusenokubuphelisa ubuhlobo benu. Ngokuchazela omnye umntu ngengxaki yakhe, usenokumsindisa umhlobo wakho!

Kodwa kuthekani ukuba nguwe ocinga ngokuzibulala? Chazela omnye umntu ngendlela ovakalelwa ngayo—umzali, umhlobo, okanye nabani na omnye okhathalayo oza kukuphulaphula. Akukho nto uza kuphulukana nayo kodwa kuza kukunceda ukuthetha ngeengxaki zakho.b

Kakade ke, iingxaki zakho aziyi kupheliswa kukuba uthetha ngazo. Kodwa kusenokwenzeka ukuba ufuna umntu oza kukuxhasa ukuze ukwazi ukujamelana nazo. Oko kusenokukunceda ufumane isicombululo.

Iimeko Ziyatshintsha

Xa uxinezelekile, khumbula oku: Nakuba kusenokubonakala kungekho themba, ekuhambeni kwexesha izinto ziza kutshintsha. Umdumisi uDavide, owajamelana neengxaki ezininzi ebomini, ethandaza wathi: “Ukuzila kwam ukutshintshe kwaba kukungqungqa.”—INdumiso 30:11.

UDavide wayesazi ukuba iingxaki zifika zidlule. Ngaba kunjalo nakuwe? Ezinye iingxaki zisenokubonakala zingaphezu kwamandla akho. Kodwa yiba nomonde. Izinto ziyatshintsha, amaxesha amaninzi ziba bhetele kunokuba bekunjalo. Kwezinye iimeko, iingxaki ziba bhetele ngendlela ongakhange uyicinge. Kwezinye, usenokumelana nengxaki ngendlela engakhange ithi qatha kwaukuthi qatha engqondweni. Ingongoma isekubeni, iingxaki ezixinezelayo azinakuhlala ngonaphakade.—2 Korinte 4:17.

Ukubaluleka Komthandazo

Eyona ndlela ibalulekileyo yokuphalaza imbilini yakho kukuthandaza. Unokuthandaza ngendlela uDavide awathandaza ngayo: “Ndigocagoce, Thixo, uze uyazi intliziyo yam. Ndihlolisise, uze uzazi iingcamango zam eziphazamisayo, ubone enoba kukho nayiphi na indlela yobubi kum, undikhokelele endleleni yexesha elingenammiselo.”—INdumiso 139:23, 24.

Ukuthandaza asiyonto nje yokucombulula iingxaki. Kukuthetha noBawo wethu osemazulwini ofuna ukuba ‘uphalaze intliziyo yakho’ kuye. (INdumiso 62:8) Hlolisisa ezi nyaniso ngoThixo:

● Uyazazi izinto ezingunobangela wokuba uxinezeleke.—INdumiso 103:14.

● Ukwazi ngaphezu kokuba uzazi.—1 Yohane 3:20.

● “Ukukhathalele.”—1 Petros 5:7.

● Kwihlabathi lakhe elitsha, uThixo uya “kuzisula zonke iinyembezi” emehlweni akho.—ISityhilelo 21:4.

Ukuba Uyagula

Njengokuba kukhankanyiwe ngaphambilana, ngokufuthi ukufuna ukuzibulala kubangelwa luhlobo oluthile lokugula. Ukuba kunjalo nakuwe, musa ukuba neentloni, cela uncedo. UYesu wavuma ukuba abantu abagulayo kufuneka baye kwagqirha. (Mateyu 9:12) Iindaba ezimnandi zezokuba izigulo ezininzi zinokunyangwa. Unyango lusenokukunceda uzive ubhetele!c

IBhayibhile ithembisa ukuba kwihlabathi elitsha likaThixo, “akakho ummi wakhona oya kuthi: ‘Ndiyagula.’” (Isaya 33:24) UThixo uthi ngelo xesha “izinto zangaphambili aziyi kukhunjulwa, zinganyuki zithi qatha entliziyweni.” (Isaya 65:17) Okwangoku, yenza konke okusemandleni akho ukuze umelane neengxaki zobomi, uqinisekile ukuba ngexesha elimiselwe nguThixo, ukudandatheka kuya kuba yinto yexesha elidluleyo.—ISityhilelo 21:1-4.

FUNDA OKUNGAKUMBI NGALO MBANDELA KUMQULU 2, ISAHLUKO 9

[Imibhalo esemazantsi]

IZIBHALO EZIBALASELISA

“Zaziseni izibongozo zenu kuThixo . . . ; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo.”—Filipi 4:6, 7.

ICEBISO

Xa udakumbile, hamba uye kubethwa ngumoya. Ukuphuma phandle uze wenze umthambo kunokukwenza uzive bhetele.

NGABA UBUSAZI . . . ?

Abanye abantu abachaphazelekayo xa umntu ezibulala zizalamane nabahlobo bakhe.

OKO NDICEBA UKUKWENZA!

Xa ndiziva ndingento yanto yaye ndingathandwa, ndiza kuthetha (bhala igama lomntu ofuna ukuzityand’ igila kuye) ․․․․․

Into endinokuba nombulelo ngayo ebomini ․․․․․

Oko ndifuna ukukubuza abazali bam ngalo mba ․․․․․

UCINGA NTONI?

● Kwanezona ngxaki zinkulu ziyaphela. Ukucinga ngaloo ndlela kunokukunceda njani?

● Umntu ozibulalayo ubafaka njani engxakini abanye abantu?

[Amagama acatshulweyo akwiphepha 104]

“Maxa wambi ndandidandatheka kakhulu kangangokuba ndide ndifune ukuzibulala, kodwa ngoku izinto zinjengasekuqaleni, ndiye ndancedwa kukuzingisa emthandazweni nasekufumaneni unyango.”—UHeidi

[Ibhokisi ekwiphepha 100]

Xa Uziva Udandathekile

Kwanamadoda namabhinqa okholo amaxesha okubhalwa kweBhayibhile ayekhe onganyelwe ngamaxhala obomi. Nantsi eminye imizekelo.

URebheka: “Ukuba kuza kuqhubeka ngale ndlela, ndingaba ndisaphilela ntoni ke?”—Genesis 25:22.

UMoses: “Nceda usele undibulala ndife fi, . . . ndingayiboni intlekele yam.”—Numeri 11:15.

UEliya: “Owu Yehova, wuthabathe umphefumlo wam, kuba andilunganga ngaphezu kookhokho bam.”—1 Kumkani 19:4.

UYobhi: “Owu akwaba ubungandifihla eShiyol, . . . undibekele umda wexesha uze undikhumbule!”—Yobhi 14:13.

Kwimeko nganye kwezi zingasentla, ekugqibeleni izinto zaba bhetele—ngendlela abangazange bacinge ngayo aba bantu. Qiniseka ukuba nakuwe kusenokuba njalo!

[Umfanekiso okwiphepha 102]

Ukudandatheka kufana namafu abonisa ukuba kuza kubakho isiphango—ekuhambeni kwexesha ayadlula