Abantu abaninzi baye bayeka ukuhamba icawa ngenxa yokuba abazifumani iimpendulo kweyona mibuzo ibalulekileyo abanayo okanye intuthuzelo. Ngoko ke, kutheni ufanele uye kwiintlanganiso zamaNgqina kaYehova? Yintoni oza kuyifumana apho?

Uvuyo lokuba kunye nabantu abanothando. Ngenkulungwane yokuqala, kwasekwa amabandla apho amaKristu ayeza kunqula uThixo, afunde iZibhalo aze akhuthazane. (Hebhere 10:24, 25) Apho ayeziva ekhululekile kunye nabahlobo bokwenene—abazalwana bawo abangamaKristu. (2 Tesalonika 1:3; 3 Yohane 14) Silandela loo mzekelo wawo yaye nathi siyavuya.

Ingenelo yokufunda indlela yokusebenzisa imigaqo yeBhayibhile. Njengokuba kwakunjalo ngamaxesha okubhalwa kweBhayibhile, amadoda, abafazi kunye nabantwana bahlanganisana ndawonye. Abafundisi abafanelekayo basebenzisa iBhayibhile ukuze basincede siqonde indlela esinokuyisebenzisa ngayo imigaqo yayo ebomini bethu. (Duteronomi 31:12; Nehemiya 8:8) Wonk’ umntu unokuba negalelo kwiingxubusho ezenziwa nabaphulaphuli nasekuculeni, ebonisa ithemba esinalo njengamaKristu.—Hebhere 10:23.

Ukholo lwakho kuThixo luza komelezwa. Umpostile uPawulos waxelela elinye ibandla oku: “Kuba ndilangazelela ukunibona, . . . ukuze sikhuthazane elukholweni, olwenu kunye nolwam.” (Roma 1:11, 12) Xa sikunye namanye amaKristu kwiintlanganiso ukholo lwethu luyomelela size sizimisele ngakumbi ukuphila ngemigaqo yeBhayibhile.

Kutheni ungakhe uziphe ixesha uye kuzibonela oku kwiintlanganiso zethu? Uya kwamkelwa ngobubele. Kungenwa simahla—akukho nkongozelo.

• Nguwuphi umzekelo esiwuxelisayo kwiintlanganiso zebandla?

• Singenelwa njani ngokuya kwiintlanganiso zamaKristu?

Enoba kuza kufuneka sihambe kumahlathi ashinyeneyo okanye kwimozulu embi, sisoloko sisiya kwiintlanganiso zamaKristu. Kutheni amaNgqina kaYehova esenza umgudu ongako wokuhlanganisana namanye amaKristu ngaphezu nje kweenzima zobomi nokudinwa?

Kuyasinceda. Ethetha ngabo sihlanganisana nabo ebandleni, umpostile uPawulos wabhala wathi, “Masinyamekelane.” (Hebhere 10:24) Eli binzana lithetha “ukucinga nzulu ngomntu,” oko kukuthi, ukwazana. Ngoko amazwi alo mpostile asikhuthaza ukuba sibaxhalabele abanye. Xa sizazi kakuhle ezinye iintsapho zamaKristu, sifunda ukuba abanye kuzo baye boyisa imiqobo efana neyethu yaye banokusinceda nathi senjenjalo.

Kwakha ubuhlobo obungapheliyo. Kwiintlanganiso zethu sihlanganisana kungekhona njengabantu nje abazanayo, kodwa njengeqela labahlobo abasondeleleneyo. Ngezinye izihlandlo, sizonwabisa kunye. Lunceda entwenini unxulumano olunjalo? Sihloniphana ngakumbi yaye oko kusenza sithandane ngakumbi. Ngoko xa abazalwana noodade wethu beneengxaki, siyakwazi ukubanceda kuba sele bengabahlobo bethu bokwenene. (IMizekeliso 17:17) Xa sinxulumana nabo bonke abantu bebandla, sibonisa ukuba ‘siyanyamekelana.’—1 Korinte 12:25, 26.

Sikukhuthaza ukuba uzikhethele abahlobo abenza ukuthanda kukaThixo. Abahlobo abanjalo bafumaneka kumaNgqina kaYehova. Ungavumeli nantoni na ikuyekise ukunxulumana nathi.

• Kutheni kuyingenelo ukunxulumana ezintlanganisweni?

• Uya kuza nini kwiintlanganiso zethu ukuze uqhelane namanye amaNgqina?

Kwiintlanganiso zamaKristu enkulungwane yokuqala kwakuculwa, kuthandazwa, kufundwa kuze kuxutyushwe iZibhalo,—akwenziwa zithethe. (1 Korinte 14:26) Unokulindela into enjalo nakwiintlanganiso zethu.

Zifundisa izinto eziseBhayibhileni nezisebenzisekayo. Mpela-veki nganye, ibandla liphulaphula intetho yesidlangalala yemizuzu engama-30 ebonisa indlela esimele sizisebenzise ngayo iZibhalo ebomini bethu nakumaxesha esiphila kuwo. Sonke sikhuthazwa ukuba sityhile iiBhayibhile zethu. Emva koko, kubakho iSifundo se-“Mboniselo” apho kufundwa inqaku elikuhlelo lokufundisa kangangeyure baze abantu abasebandleni bagqabaze. Le ngxubusho iyasinceda sikwazi ukusebenzisa ulwalathiso lweBhayibhile ebomini bethu. Kufundwa inqaku elifanayo kumabandla angaphezu kwali-100 000 asehlabathini lonke.

Zisinceda siphucule ubuchule bethu bokufundisa. Siphinda siye kwiintlanganiso eziba ngorhatya phakathi evekini ukuze siphulaphule ucwangciso oluneenxalenye ezintathu olunomxholo othi Ubomi BamaKristu Nomsebenzi Wokushumayela, okwincwadi ethi Incwadi Yeentlanganiso Yobomi BamaKristu Nomsebenzi Wokushumayela. Inxalenye yokuqala ethi Ubutyebi Obuphuma ELizwini LikaThixo, isinceda siqhelane neenxalenye zeBhayibhile ezifundwe libandla ngaphambi kweentlanganiso. Emva koko yinxalenye ethi Yikhuthalele Intsimi, apho kubakho imiboniso yendlela yokuncokola ngeBhayibhile nabanye abantu. Usihlalo uphawula aze athethe ngezinto ezinokusinceda siphucule indlela esifunda nesithetha ngayo. (1 Timoti 4:13) Inxalenye yokugqibela ethi Indlela Yokuphila YamaKristu, isibonisa indlela esinokuyisebenzisa ngayo imigaqo yeBhayibhile kubomi bethu bemihla ngemihla. Kubakho nengxubusho yemibuzo neempendulo esenza siyiqonde ngakumbi iBhayibhile.

Xa usezintlanganisweni zethu, ngokuqinisekileyo uya kuyithanda indlela efundiswa ngayo iBhayibhile.—Isaya 54:13.

• Yintoni onokuyilindela kwiintlanganiso zamaNgqina kaYehova?

• Ungathanda ukuya kweziphi iintlanganiso zethu eziqhutywa veki nganye?

Ngaba ukhe wayibona indlela amaNgqina kaYehova anxiba kakuhle ngayo xa esiya kwiintlanganiso zawo kule ncwadana inemifanekiso? Kutheni siyilumkela kangaka indlela esinxiba nesizilungisa ngayo?

Sihlonela uThixo wethu. Liyinyaniso lona elokuba uThixo akajongi imbonakalo yangaphandle. (1 Samuweli 16:7) Sekunjalo, xa sihlanganisene ukuze simnqule, sifuna ukubonakalisa intlonelo kuye nakwabo sinqula nabo. Ukuba besiza kuma phambi kwejaji kwinkundla yamatyala, besiya kunxiba size sizilungise ngendlela ebonisa ukuba siyamhlonela. Ngokufanayo, indlela esibonakala ngayo ezintlanganisweni ibonisa indlela esimhlonela ngayo “uMgwebi womhlaba wonke,” uYehova uThixo, nendawo esimnqulela kuyo.—Genesis 18:25.

Sibonisa imilinganiselo esiphila ngayo. IBhayibhile ikhuthaza amaKristu ukuba anxibe “ngokuthozama nangengqondo ephilileyo” njengabo ‘bahlonela uThixo.’ (1 Timoti 2:9, 10) Ukunxiba “ngokuthozama” kuthetha ukukuphepha ukunxiba impahla enokusitsalel’ amehlo, evez’ umzimba nevuselela inkanuko. Kwakhona, ukuba ‘nengqondo ephilileyo’ kusinceda sikwazi ukukhetha impahla engekho xazalala. Le migaqo ayisibandezi inkululeko yokuzikhethela. Inkangeleko yethu entle ‘inokuyihombisa imfundiso yoMsindisi wethu’ ize ‘imzukise uThixo.’ (Tito 2:10; 1 Petros 2:12) Xa sinxiba kakuhle kwiintlanganiso, sibangela ukuba abanye bakujonge njengento enzulu ukunqula uYehova.

Ungoyiki ukuya kwiHolo yoBukumkani ngenxa yokuba usithi akunazo iimpahla. Akufuneki ude ube neempahla ezibizayo okanye ezimbejembeje ukuze ufaneleke, ucoceke okanye ubukeke.

• Ibaluleke kangakanani indlela esinxiba ngayo xa sinqula uThixo?

• Yiyiphi imigaqo esikhokelayo kumba wokunxiba nokuzilungisa?

Ukuba ufundelwa liNgqina likaYehova, kusenokwenzeka ukuba ulungiselela kusengaphambili. Ukuze ungenelwe ezintlanganisweni, kufuneka wenjenjalo. Xa oku sikwenza rhoqo, imiphumo iba mihle.

Kukugqiba ngexesha nendawo oza kufundisisa kuyo. Liliphi elona xesha unokufundisisa kakuhle ngalo? Ngaba kusekuseni okanye ebusuku emva kokuba abantwana belele? Enoba akungomntu ukwaziyo ukufunda ixesha elide, gqiba ngexesha onokufunda ngalo uze uzame ukuba kungabikho nto ikuphazamisayo. Funa indawo ezolileyo, uze ususe zonke izinto ezinokukuphazamisa ngokucima unomathotholo, umabonwakude neselfowuni. Ukuthandaza ngaphambi kokuba ufundisise kuya kukunceda uthobe amaxhala obomi ukuze ukwazi ukunikel’ ingqalelo kwiLizwi likaThixo.—Filipi 4:6, 7.

Kukukrwelela iimpendulo ukuze ukwazi ukuphendula. Qala ngokuwuqonda wonke umbandela owufundayo. Cinga ngomxholo wenqaku okanye isahluko, zibuze ngendlela imixholwana edibana ngayo nomxholo, uze uhlolisise imifanekiso kunye nemibuzo yempinda ebalaselisa iingongoma eziziintloko. Emva koko funda isiqendu ngasinye uze ukhangele impendulo yombuzo weso siqendu. Tyhila imibhalo ecatshuliweyo, uyifunde, uze ucinge ngendlela ewuxhasa ngayo umxholo. (IZenzo 17:11) Xa uyifumana impendulo, krwela amagama okanye amabinzana ambalwa akweso siqendu aza kukukhumbuza impendulo. Xa usezintlanganisweni ungaphakamisa isandla uze ugqabaze ngamazwi akho.

Ngokuhlolisisa imixholo eyahlukeneyo ekuxutyushwa ngayo veki nganye ezintlanganisweni, uya kongeza izinto ezintsha “kwingqwebo yobuncwane” bolwazi lwakho lweBhayibhile.—Mateyu 13:51, 52.

• Yintoni onokusoloko uyenza ukuze ulungiselele iintlanganiso?

• Unokuzilungiselela njani ukuze uphendule ezintlanganisweni?

Ukususela kumaxesha akudala, uYehova ebefuna ntsapho nganye ichithe ixesha kunye ukuze ibe nolwalamano olusondeleyo naye nokuze isondelelane. (Duteronomi 6:6, 7) Yiloo nto ebangela ukuba amaNgqina kaYehova abe nexesha alibekela ecaleni veki nganye ukuze abe nonqulo lwentsapho—exubusha ngokukhululekileyo izinto zokomoya eziyichaphazela ngokukhethekileyo intsapho yabo. Enoba uhlala wedwa, unokuzibekela ixesha oza kulichitha noThixo ngokwenza ufundisiso.

Lixesha lokusondela ngakumbi kuYehova. “Sondelani kuThixo, naye uya kusondela kuni.” (Yakobi 4:8) Simazi kakuhle uYehova xa sifunda ngobuntu bakhe nangemisebenzi yakhe ekwiLizwi lakhe iBhayibhile. Indlela elula yokuqalisa unqulo lwentsapho kukuba nibe nexesha enilichitha kunye nifunda iBhayibhile ngokuvakalayo, mhlawumbi nilandele ucwangciso lofundo lweBhayibhile lweveki-ngeveki olukwiNtlanganiso Yobomi BamaKristu Nomsebenzi Wokushumayela. Lungu ngalinye lisenokufunda inxalenye ethile yeBhayibhile, lize libalise oko belikufunda.

Lixesha lokusondelelana njengentsapho. Amadoda nabafazi, abazali nabantwana, basondelelana ngakumbi xa befunda iBhayibhile kunye njengentsapho. Esi ifanele ibe sisihlandlo esimnandi nesizolileyo, esibangela ukuba lungu ngalinye lentsapho likhangele phambili kuso veki nganye. Kuxhomekeka kubudala babantwana, abazali basenokukhetha imixholo eza kunceda intsapho, mhlawumbi kwiMboniselo nakuVukani! Nisenokuthetha ngengxaki abantwana abaye bayifumana esikolweni nendlela yokuyicombulula. Kutheni ningabukeli inxalenye ekwi-JW Broadcasting (tv.jw.org/xh) nize niyixubushe kunye? Nisenokuqhelisela iingoma eziza kuculwa kwiintlanganiso, nize emva koko ninandiphe izimuncumuncu.

Eli xesha nilichitha kunye veki nganye ninqula uYehova njengentsapho, liya kuninceda nikunandiphe ukufundisisa iLizwi likaThixo yaye uya kuyisikelela imigudu eniyenzayo.—INdumiso 1:1-3.

• Kutheni sibekela bucala ixesha lokunqula njengentsapho?

• Yintoni enokwenziwa ngabazali ukuze yonke intsapho isinandiphe esi sihlandlo?

Kutheni bonwabe kangaka nje aba bantu? Baya kwindibano. Njengabakhonzi bakaThixo bamandulo ababeyalelwa ukuba bahlanganisane kathathu ngonyaka, sikhangela phambili ekubeni kunye njengeqela elikhulu. (Duteronomi 16:16) Nyaka ngamnye, sineendibano ezintathu: Iindibano zesiphaluka ezimbini zosuku olunye nendibano yengingqi yeentsuku ezintathu. Singenelwa njani kwezi ndibano?

Zomeleza ubuzalwana bethu. Kanye njengokuba amaSirayeli ayenandipha ukudumisa uYehova “phakathi kweendimbane ezihlanganiseneyo,” nathi siyakunandipha ukunqula uYehova kwezi zihlandlo zikhethekileyo. (INdumiso 26:12; 111:1) Ezi ndibano zibangela ukuba sidibane namaNgqina akwamanye amabandla okanye akwamanye amazwe. Enye into ebangela uvuyo ngesi sihlandlo lixesha lesidlo sasemini apho sinandipha isidlo kunye kwindawo yendibano. (IZenzo 2:42) Kwezi ndibano sizibonela ngawethu uthando ‘nomanyano lwabazalwana’ abasehlabathini lonke.—1 Petros 2:17.

Ziyasinceda senze inkqubela kwizinto zokomoya. Kwakhona amaSirayeli ayengenelwa ‘ngokuwaqonda amazwi’ eZibhalo awayewaxelelwa. (Nehemiya 8:8, 12) Nathi siyayixabisa imfundiso yeBhayibhile esiyifumana kwezi ndibano. Intetho nganye isekelwe eSibhalweni. Sifunda ukwenza ukuthanda kukaThixo ebomini bethu kwiintetho ezibangel’ umdla, kungcelele lweentetho nakwimiboniso yezinto ezenzekileyo. Siyakhuthazeka xa sisiva amava abantu abahlangabezana ngokuphumelelayo neengxaki zokuba ngumKristu kula maxesha obunzima. Imidlalo yesinxibo samandulo eyenziwa kwiindibano zengingqi ibangela ukuba imfundiso yeBhayibhile iphile size sikwazi ukuyisebenzisa ebomini bethu. Kwindibano nganye kubhaptizwa abo bafuna ukufuzisela uzahlulelo lwabo kuThixo.

• Kutheni iindibano zisisihlandlo esibangel’ uvuyo?

• Unokungenelwa njani xa uye kwindibano?

Kanye ngaphambi kokuba afe, uYesu wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Kodwa lo msebenzi wokushumayela ehlabathini lonke wawuza kufezwa njani? Ngokulandela umzekelo owamiselwa nguYesu ngoxa wayesemhlabeni.—Luka 8:1.

Sizama ukuya emakhayeni abantu. UYesu waqeqesha abafundi bakhe ukuba bashumayele iindaba ezilungileyo kwindlu ngendlu. (Mateyu 10:11-13; IZenzo 5:42; 20:20) Abo bashumayeli bevangeli benkulungwane yokuqala babelwa imimandla ekhethekileyo ababemele bashumayele kuyo. (Mateyu 10:5, 6; 2 Korinte 10:13) Nanamhlanje, umsebenzi wethu wokushumayela ulungelelaniswe kakuhle, yaye bandla ngalinye linentsimi yalo elimele liyigubungele. Oku kubangela ukuba sifeze umyalelo kaYesu ‘wokushumayela ebantwini nokuba sinikele ubungqina obucokisekileyo.’—IZenzo 10:42.

Sizabalazela ukufikelela ebantwini naphi na apho bafumaneka khona. UYesu waphinda wamisela umzekelo wokushumayela kwiindawo zikawonke-wonke, njengaselunxwemeni okanye ngasequleni. (Marko 4:1; Yohane 4:5-15) Nathi sincokola nabantu ngeBhayibhile naphi na apho bakhoyo—ezitratweni, kwiindawo zamashishini, kwiipaki okanye ngefowuni. Xa sinethuba sishumayela kubamelwane, abantu esiphangela nabo, esifunda nabo, nakwizalamane zethu. Yonke le migudu iye yabangela ukuba izigidi zabantu abasehlabathini lonke bazive “iindaba ezilungileyo zosindiso.”—INdumiso 96:2.

Ngaba akukho mntu ucinga ngaye onokuthanda ukumxelela ngeendaba ezilungileyo zoBukumkani bukaThixo, nokuba ezi ndaba zithetha ntoni ngekamva lakhe? Ungazigcini esifubeni ezi ndaba zimnandi. Xelela abanye ngazo!

• Ziziphi “iindaba ezilungileyo” ezimele zishunyayelwe?

• Yiyiphi indlela amaNgqina kaYehova awuxelisa ngayo umzekelo kaYesu wokushumayela?

Ibinzana elithi “vulindlela” lidla ngokubhekisela kwabo baqala intsimi entsha baze bavulele abanye indlela. UYesu wayefana novulindlela, kuba wayethunywe emhlabeni ukuza kuxelela abantu ngeendaba ezinik’ ubomi, ebavulela indlela yosindiso. (Mateyu 20:28) Namhlanje, abalandeli bakhe bayamxelisa kuba bachitha ixesha elininzi kangangoko kunokwenzeka ‘besenza abafundi.’ (Mateyu 28:19, 20) Abanye baye bakwinkonzo yobuvulindlela.

Uvulindlela ngumshumayeli wevangeli wexesha elizeleyo. Onke amaNgqina kaYehova ngabavakalisi beendaba ezilungileyo. Noko ke, abanye baye baba ngoovulindlela abathe ngxi, bechitha iiyure ezingama-70 nyanga nganye kumsebenzi wokushumayela. Ukuze bakwazi ukwenza oku, abaninzi baye bayeka ukuphangela ixesha elizeleyo baze benza umsebenzi wesingxungxo. Abanye baye bacelwa ukuba babe ngoovulindlela abakhethekileyo kwimimandla apho kufuneka abavakalisi boBukumkani khona, bechitha iiyure ezili-130 nangaphezulu nyanga nganye beshumayela. Oovulindlela baphila ubomi obulula, beqinisekile ukuba uYehova uya kubanika izinto eziyimfuneko. (Mateyu 6:31-33; 1 Timoti 6:6-8) Abo bangenakukwazi ukushumayela ixesha elizeleyo, banokuba ngoovulindlela abangabancedani ukuba bayakwazi ukwandisa ixesha abalichitha entsimini libe ziiyure ezingama-30 okanye ezingama-50 ngenyanga.

Umntu uba nguvulindlela kuba ethanda uThixo nabantu. NjengoYesu, namhlanje sibona indlela abantu abakulangazelela ngayo ukwazi uThixo neenjongo zakhe. (Marko 6:34) Kodwa ulwazi esinalo lunokubanceda nangoku, lubanike ithemba elingenakujika lekamva. Ukuthanda ummelwane kubangela ukuba uvulindlela asebenzise ixesha namandla akhe enceda abanye bazi iindaba ezilungileyo. (Mateyu 22:39; 1 Tesalonika 2:8) Ngenxa yoko, ukholo lwakhe luyomelela, usondela ngakumbi kuThixo kwaye uvuya kakhulu.—IZenzo 20:35.

• Unokumchaza njani uvulindlela?

• Yintoni ebangela ukuba abanye babe ngoovulindlela bexesha elizeleyo?

Ukufunda ngoThixo ibisoloko iyeyona nto aziwa ngayo amaNgqina KaYehova. Kulungiselelwe izikolo ezikhethekileyo zabo bazinikele ekushumayeleni ngoBukumkani ukuze bakwazi ‘ukubufeza ngokupheleleyo ubulungiseleli babo.’—2 Timoti 4:5.

ISikolo Senkonzo Yobuvulindlela. Ekupheleni konyaka wokuqala umntu enguvulindlela othe ngxi, umenywa kwisikolo seentsuku ezintandathu esisenokuqhutyelwa kwiHolo YoBukumkani ekufutshane. Senzelwe ukunceda oovulindlela basondele kuYehova, bakwazi ukusebenzisa zonke iindlela zokushumayela baze bahlale bethembekile enkonzweni.

ISikolo Sabavangeli BoBukumkani. Esi sikolo seenyanga ezimbini senzelwe ukuqeqesha oovulindlela abanamava nabakulungeleyo ukushiya amakhaya abo bayokunceda kwiindawo ezidinga abavakalisi abangakumbi. Baxelisa uYesu Kristu, oyena mVangeli mkhulu owayeshumayela emhlabeni nowathi: “Ndikho! Thuma mna.” (Isaya 6:8; Yohane 7:29) Ukushiya ikhaya besiya kukhonza kude kuquka ukutshintsha baze baphile ngendlela engafaniyo naleyo bebephila ngayo. Banokufika kusenziwa izinto ngendlela eyahlukileyo, imozulu yalapho bengayiqhelanga kwanokutya. Kusenokufuneka bade bafunde nolunye ulwimi. Esi sikolo sinabazalwana noodade abangatshatanga nabo batshatileyo, abaneminyaka eqala kweyi-23 ukuya kweyi-65. Sibanceda bakhulise iimpawu zobuthixo abaza kuzidinga kwizabelo zabo baze babe nobuchule obuza kubanceda basetyenziswe ngakumbi nguYehova nayintlangano yakhe.

ISikolo SaseGiliyadi. NgesiHebhere, igama elithi “Giliyadi” lithetha “AmaNgqina Amaninzi.” Ukususela ekuqaleni kwesikolo saseGiliyadi ngo-1943, kuye kwathunyelwa abafundi abaphumelele kuso abangaphezu kwe-8 000 ukuba baye kushumayela “ukusa eziphelweni zomhlaba.” (IZenzo 13:47) Aba bavangeli bafika ePeru kungekho nelinye ibandla. Ngoku angaphezu kwe-1 000 amabandla alapho. EJapan, bafika kukho amaNgqina angaphantsi kweshumi. Ngoku angaphezu kwe-200 000. Enye yezinto ezenziwa kwiklasi yaseGiliyadi ethatha iinyanga ezintlanu kukulifundisisa iLizwi likaThixo. Oovulindlela abakhethekileyo okanye abathunywa bevangeli, abakwiofisi yesebe, okanye abaveleli beziphaluka baye bamenywe kwesi sikolo ukuze bafumane uqeqesho olungakumbi lokuqinisa umsebenzi owenziwa ehlabathini lonke.

• Senzelwe ntoni ISikolo Senkonzo Yobuvulindlela?

• ISikolo Sabavangeli BoBukumkani senzelwe oobani?