Ngaba Ungakwazi Ukubhaptizwa?

Zininzi izinto ozifundileyo ngoYehova njengokuba ufunda iBhayibhile. Mhlawumbi utshintshe ezinye izinto ebomini bakho ukuze uzenze izinto ozifundayo. Kodwa, kusenokubakho into ekwenza ungade uzinikele kuYehova uze ubhaptizwe. Kwesi sifundo, kuza kuthethwa ngezinye izinto ezinokwenza kube nzima ukuba ubhaptizwe, uze ubone nokuba ungenza njani ude ukwazi ukubhaptizwa.

1. Ziintoni omele uzazi ngaphambi kokuba ubhaptizwe?

Kufuneka uyazi “ngendlela echanileyo inyaniso” ukuze ubhaptizwe. (1 Timoti 2:4) Le nto ayithethi ukuba kufuneka uzazi zonke iimpendulo zemibuzo onokuyibuzwa ngabantu ngeBhayibhile ngaphambi kokuba ubhaptizwe. NamaKristu aneminyaka emininzi ebhaptiziwe asafunda izinto ezintsha nanamhlanje. (Kolose 1:9, 10) Kodwa kufuneka uzazi ezona zinto zibalulekileyo zifundiswa yiBhayibhile. Abadala bebandla baza kukunceda ubone ukuba uyazazi na izinto ekufuneka uzazile.

2. Ziintoni omele uzenze ngaphambi kokuba ubhaptizwe?

Ngaphambi kokuba ubhaptizwe, umele ‘uguquke uze ujike.’ (Funda iZenzo 3:19.) Le nto ithetha ukuba kufuneka uzisole ngezinto ezimbi obukade uzenza uze ucele uYehova akuxolele. Kufuneka uzimisele ukungazenzi izinto athi uThixo zimbi uze uphile ngendlela ayifunayo. Enye into omele uyenze kukuya kwiintlanganiso uze ushumayele nebandla.

3. Kutheni ungamele uvumele ukuba nexhala kukwenze ungabhaptizwa?

Abanye abantu banexhala lokuba abazukukwazi ukuzenza izinto abazithembise uYehova. Ewe kona, ngamanye amaxesha uza kuzenza iimpazamo njengabantu abathembekileyo ekuthethwa ngabo eBhayibhileni. Kodwa khumbula ukuba uYehova akalindelanga ukuba abakhonzi bakhe bangazenzi iimpazamo. (Funda iNdumiso 103:13, 14.) Uyavuya xa uzama kangangoko unako! Uza kukunceda. Phofu, uYehova uyasiqinisekisa ukuba akukho nto ‘inokumenza angasithandi.’​—Funda amaRoma 8:38, 39.

FUNDA NEZINYE IZINTO

4. Mazi kakuhle uYehova

Kufuneka umazi kakuhle kangakanani uYehova ngaphambi kokuba ubhaptizwe? Kufuneka umazi kakuhle ude umthande uze ufune ukwenza izinto ezimvuyisayo. Dlala IVIDIYO ukuze ubone indlela abantu abafundelwa iBhayibhile abayenze ngayo le nto emhlabeni wonke. Emva koko, ncokolani ngalo mbuzo.

IVIDIYO: Babezimisele Ukubhaptizwa (3:56)

• Kule vidiyo, yintoni encede abanye abantu bade bakwazi ukubhaptizwa?

Funda amaRoma 12:2, nize nincokole ngale mibuzo:

• Ngaba zikhona izinto ezifundiswa yiBhayibhile ozithandabuzayo, okanye awuqinisekanga ukuba amaNgqina KaYehova afundisa inyani?

• Ukuba uyathandabuza okanye awuqinisekanga, yintoni onokuyenza?

5. Unokwenza ntoni xa kukho izinto ezenza kube nzima ukuba ubhaptizwe?

Xa sisenza isigqibo sokuba siza kuzinikela kuYehova size sibhaptizwe, sonke siba nazo iingxaki. Ukuze ubone umzekelo, dlala IVIDIYO, nize nincokole ngale mibuzo.

IVIDIYO: Xa Simthanda UYehova Siyazoyisa Iingxaki (5:22)

• Kule vidiyo, ziintoni ekwakufuneka aziyeke uNarangerel ukuze akwazi ukukhonza uYehova?

• Indlela amthanda ngayo uYehova yamnceda njani ukuze akwazi ukuziyeka?

Funda iMizekeliso 29:25 no-2 Timoti 1:7, nize nincokole ngalo mbuzo:

• Yintoni esenza sibe nesibindi sokoyisa iingxaki?

6. Mthembe uYehova ukuba uza kukunceda

UYehova uza kukunceda wenze izinto azithandayo. Dlala IVIDIYO, nize nincokole ngale mibuzo:

IVIDIYO: UYehova Uya Kukunceda (2:50)

• Kule vidiyo, yintoni eyayisenza kube nzima kulo mntu wayefundelwa iBhayibhile ukuba abhaptizwe?

• Yintoni awayifundayo yaza yamnceda wamthemba uYehova?

Funda uIsaya 41:10, 13, nize nincokole ngalo mbuzo:

• Kutheni unokuqiniseka ukuba ungazenza izinto ozithembisayo xa uzinikela kuYehova?

7. Mbulele kakhulu uYehova ngendlela akuthanda ngayo

Xa usiya ucinga ngendlela uYehova akuthanda ngayo, uza kuya umbulela uze ukufune nakakhulu ukumkhonza, ubomi bakho bonke. Funda iNdumiso 40:5, nize nincokole ngalo mbuzo:

• Ziintoni uYehova akwenzele zona ozibulela kakhulu?

Umprofeti uYeremiya wayemthanda uYehova nelizwi lakhe. Wayekuthanda kakhulu nokuthethelela igama likaYehova. Wathi: “Ilizwi lakho lindonwabisile, lavuyisa nentliziyo yam, kuba igama lakho libizwe kum, Yehova Thixo.” (Yeremiya 15:16) Khawuphendule le mibuzo:

• Kutheni kuvuyisa ukuba liNgqina LikaYehova?

• Ngaba uyafuna ukubhaptizwa ukuze ube liNgqina LikaYehova?

• Ngaba ikhona into ekunqandayo ukuba ungabhaptizwa?

• Ucinga ukuba yintoni omele uyenze ukuze ubhaptizwe?

UFUNDE NTONI?

UYehova angakunceda kuyo nantoni na eyenza kube nzima ukuba ude ubhaptizwe.

Khawutsho

• Kufuneka uyazi kangakanani iBhayibhile ukuze ubhaptizwe?

• Ziintoni omele uzitshintshe ngaphambi kokuba ubhaptizwe?

• Kutheni ungamele uvumele ukuba nexhala kukwenze ungabhaptizwa?

JONGA NEZI ZINTO

Jonga ukuba yintoni emele ikwenze ufune ukubhaptizwa.

“Ngaba Ukulungele Ukubhaptizwa?” (IMboniselo, Matshi 2020)

Jonga ukuba ungenza ntoni xa kukho izinto ezenza kube nzima ukuba ubhaptizwe.

“Ndinqandwa Yintoni Ndingabhaptizwa?” (IMboniselo, Matshi 2019)

Jonga indlela enye indoda eyohlukana ngayo nento eyayisenza kube nzima ukuba ibhaptizwe.

‘Kutheni Ungade Ubhaptizwe?’ (1:10)

Ekuqaleni, enye indoda ekuthiwa nguAtaa yayingade ibhaptizwe. Jonga ukuba yancedwa yintoni ukuze ikwazi ukwenza le nto ibaluleke kangaka.

Ngaba Oku Kufanele Kwenzeke Kum? (7:21)