ISIFUNDO 36
Yiba Nenyani Kuzo Zonke Izinto
Wonke umntu ufuna ukuba nabahlobo abanenyani. Naye ke uYehova ufuna abahlobo bakhe babe nenyani. Kodwa ayikho lula le nto, kuba abantu abaninzi esiphakathi kwabo abananyani. Kusinceda njani ukuba nenyani kuzo zonke izinto?
1. Kubaluleke ngantoni ukuba nenyani?
Sibonisa ukuba siyamthanda ibe siyamhlonipha uYehova xa sinyanisekile kwabanye. Khawucinge ngale nto: UYehova uzazi zonke izinto esizenzayo nesizicingayo. (Hebhere 4:13) Uyasibona xa sikhetha ukuba nenyani ibe iyamvuyisa loo nto. Kaloku iLizwi lakhe lithi: “UYehova uyamenyanya umntu onamaqhinga, kodwa ungumhlobo osenyongweni walowo wenza izinto ezintle.”—IMizekeliso 3:32.
2. Zeziphi ezinye izinto esinokunyaniseka kuzo ebomini bethu?
UYehova ufuna ‘sithethe inyaniso omnye komnye.’ (Zekariya 8:16, 17) Ithetha ukuthini le nto? Ithetha ukuba xa sithetha neentsapho zethu, abantu esisebenza nabo, abazalwana noodade okanye abantu abasemagunyeni, asithethi buxoki okanye sibachazele into eza kwenza bacinge into engeyiyo. Abantu abanenyani abazibi izinto zabanye okanye babaqhathe. (Funda iMizekeliso 24:28 namaEfese 4:28.) Bayibhatala yonke irhafu abafanele bayibhatale. (Roma 13:5-7) Xa sisenza ezi zinto nezinye, sibonisa ukuba sifuna “ukuziphatha ngokunyaniseka kuzo zonke izinto.”—Hebhere 13:18.
3. Kusinceda ngantoni ukuba nenyani?
Xa sisaziwa ngokuba nenyani, abantu bayasithemba. Senza wonke umntu ebandleni azive ekhuselekile, njengakwintsapho ethandanayo. Siba nesazela esicocekileyo. Xa sinenyani, sihombisa “imfundiso yoMsindisi wethu uThixo,” ibe senza nabanye bafune ukumkhonza.—Tito 2:10.
FUNDA NEZINYE IZINTO
Jonga indlela ekunceda ngayo ukuba nenyani nendlela ekumenza azive ngayo uYehova. Uze ufunde ukuba unganyaniseka njani ebomini bakho.
4. Xa sinenyani, siyamvuyisa uYehova
Funda iNdumiso 44:21 noMalaki 3:16, nize nincokole ngale mibuzo:
Xa ucinga, kutheni singafanele sicinge ukuba sinokuyifihla inyani?
Xa ucinga, uYehova uziva njani xa sikhetha ukuthetha inyani noba sekunzima?
Xa abantwana bethetha inyani, bayabavuyisa abazali babo. Xa sithetha inyani, siyamvuyisa uYehova
5. Yiba nenyani kuzo zonke izinto ozenzayo
Abantu abaninzi bacinga ukuba ayinakwenzeka into yokuba sihlale sinenyani. Kodwa khawujonge ukuba kutheni kubalulekile ukuba sihlale sinenyani. Dlala IVIDIYO.
Funda amaHebhere 13:18, nize nincokole ngokuba sinokunyaniseka njani . . .
kwiintsapho zethu.
esikolweni okanye emsebenzini.
kwezinye izinto.
6. Kuyasinceda ukuba nenyani
Ekuqaleni, kusenokubonakala ngathi ukuba nenyani kusifaka engxakini. Kodwa njengokuba ixesha lihamba, uza kubona ukuba kuyasinceda. Funda iNdumiso 34:12-16, nize nincokole ngalo mbuzo:
Ukuba nenyani kubuphucula njani ubomi bakho?
Abayeni nabafazi abanenyani bayawuqinisa umtshato wabo
Abasebenzi abanenyani bayathenjwa ngabaqeshi babo
Abahlali abanenyani batsho baziwe kakuhle ngabasemagunyeni
ABANYE ABANTU BATHI: “Ukuxoka nje kancinci akumoshi nto.”
Kutheni ukholelwa ukuba uYehova ucaphukela bonke ubuxoki?
UFUNDE NTONI?
UYehova ufuna abahlobo bakhe babe nenyani kuzo zonke izinto abazithethayo nabazenzayo.
Khawutsho
Zeziphi ezinye izinto esinokunyaniseka kuzo ebomini bethu?
Kutheni singafanele sicinge ukuba sinokuyifihla inyani?
Kutheni ufuna ukuhlala unenyani?
JONGA NEZI ZINTO
Abazali bangabafundisa njani abantwana babo ukuba babe nenyani?
Kunceda ngantoni ukuzenza izinto esizithembisileyo?
Khawujonge ukuba simele siyibhatale na irhafu naxa isetyenziswa kakubi.
“Irhafu—Ngaba Ufanele Uyihlawule?” (IMboniselo, Septemba 1, 2011)
Yintoni eyenza enye indoda yatshintsha ubomi bayo yaza yenza umsebenzi owawuza kuyenza ibe nenyani?
“Ndafunda Ukuba UYehova Unenceba Ibe Uyaxolela” (IMboniselo, Meyi 1, 2015)