Ngaba UThixo Unalo Igama?
Izinto ezidla ngokuthethwa ngabantu:
▪ “Igama lakhe nguNkosi.”
▪ “Hayi akanalo igama.”
UYesu yena wathini?
▪ “Nize nithandaze ngale ndlela: ‘Bawo wethu osemazulwini, malingcwaliswe igama lakho.’” (Mateyu 6:9) UYesu wayekholelwa ukuba uThixo unalo igama.
▪ “Ndilazisile igama lakho kubo yaye ndiza kulazisa, ukuze uthando owandithanda ngalo lube kubo ndize nam ndimanyane nabo.” (Yohane 17:26) UYesu wachazela abantu ngegama likaThixo.
▪ “Anisayi kuze nindibone nide nithi, ‘Usikelelwe lowo uzayo egameni likaYehova.’” (Luka 13:35; INdumiso 118:26) UYesu walisebenzisa igama likaThixo.
NOTHIXO ngenkqu uyasichazela igama lakhe. Wathi: “NdinguYehova. Lilo elo igama lam.”a (Isaiah 42:8) Igama elithi Yehova liyeyona ndlela iqhelekileyo esiXhoseni yokubhala igama lesiHebhere awazithiya lona uThixo. Kuya kukothusa mhlawumbi ukwazi ukuba eli gama lingaqhelekanga lesiHebhere livela izihlandlo ezingamawaka kwimibhalo-ngqangi yamandulo yeBhayibhile. Enyanisweni, livela kaninzi ukugqitha naliphi na elinye igama eliseBhayibhileni.
Xa ubuza uthi, “Ngubani igama likaThixo?” abanye abantu badla ngokuthi, “nguNkosi.” Le mpendulo ayikusi ndawo, kuba kufana nokuba xa ubuzwa ukuba, “Ngubani ophumelele unyulo?” uthi wena, “ngomnye wabo bebezigqatsile.” Zombini ezi mpendulo azicacanga, kuba “uNkosi” “nomnye wabo bebezigqatsile” asingomagama abantu.
Kwakutheni ukuze uThixo asichazele igama lakhe? Usichazele ngenjongo yokuba simazi. Ngokomzekelo, umntu unokubizwa ngokuthi Mnumzana, Mhlekazi, Tata, okanye Tatomkhulu, ngokweemeko. Ezi zibizo zisichazela nto ithile ngaye. Kodwa ligama lomntu elisenza sikhumbule yonke into esiyaziyo ngaye. Ngendlel’ efanayo ke, izibizo ezinjengesithi Nkosi, Somandla, Bawo, nesithi Mdali zisikhumbuza ngezinto ezahlukeneyo uThixo azenzayo. Kodwa ligama lakhe, elithi Yehova, kuphela elisikhumbuza ngazo zonke izinto esizaziyo ngaye. Sinokumazi njani ke phofu uThixo singazi negama eli lakhe?
Kubalulekile ukuba singaneli nje ukulazi, kodwa silisebenzise eli gama. Ngoba? Kaloku iBhayibhile ithi: “Wonk’ ubani obiza egameni likaYehova uya kusindiswa.”—Roma 10:13; Yoweli 2:32.
[Umbhalo osemazantsi]
a Ukuze ucacelwe ngoko kuthethwa ligama likaThixo, kwaye wazi nesizathu sokuba ezinye iiBhayibhile zingenalo, yiya kwiphepha le-195- ukuya kwele-197 lencwadi ethi Yintoni Ngokwenene Efundiswa YiBhayibhile? epapashwe ngamaNgqina kaYehova.
[Amagama acatshulweyo akwiphepha 6]
Umntu unokubizwa ngokuthi Mhlekazi, Ngqonyela, Tata, okanye Tatomkhulu, ngokweemeko. Kodwa ligama lomntu elisenza sikhumbule yonke into esiyaziyo ngaye.