Igosa Elithembekileyo NeQumrhu Lalo Elilawulayo
“Ngubani ngokwenene elo gosa lithembekileyo, elo liyingqondi, inkosi yalo eya kulimisela phezu kweqela layo labalindi ukuhlala lilinika umlinganiselo walo wokutya ngexesha elifanelekileyo?”—LUKA 12:42.
1, 2. Nguwuphi umbuzo owabuzwa nguYesu ngokuphathelele imihla yokugqibela?
XA WAYEBANIKA umqondiso ekwakuza kubonwa ngawo imihla yokugqibela, uYesu wabuza lo mbuzo: “Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo?” Emva koko uYesu wathi kuba liye lathembeka, eli khoboka liya kuvuzwa ngokumiselwa phezu kwayo yonke impahla yeNkosi yalo.—Mat. 24:45-47.
2 Kwiinyanga ezingaphambili, uYesu wayebuze kwalo mbuzo ufanayo. (Funda uLuka 12:42-44.) Wabiza lo mkhonzi ngokuthi ‘ligosa’ yaye ‘impahla yendlu yakhe’ wayibiza ngokuba ‘liqela lakhe labalindi.’ Igosa ngumntu omiselwe ukunyamekela izinto zekhaya okanye ukuba ngumphathi wezicaka. Ukanti, nalo igosa likwasisicaka. Ngubani eli khoboka okanye igosa, yaye likulungiselela njani ‘ukutya ngexesha elifanelekileyo’? Kubalulekile ukuba sonke silazi ijelo elisilungiselela ukutya kokomoya.
3. (a) Bathini abahlalutyi beNgqobhoko xa becacisa ‘ikhoboka’ awathetha ngalo uYesu? (b) Ngubani ‘igosa,’ okanye ‘ikhoboka,’ yaye ngoobani ‘iqela labalindi,’ okanye ‘impahla yendlu’?
3 Abahlalutyi beNgqobhoko badla ngokuthi la mazwi kaYesu abhekisela kubantu abaphathiswe imbopheleleko phakathi kwabo bazibiza ngokuba bangamaKristu. Kodwa xa yayisenza umzekeliso, “inkosi” uYesu ayizange ithi kuya kubakho amakhoboka amaninzi akumahlelo awahlukahlukeneyo eNgqobhoko. Kunoko, yabonisa ngokucacileyo ukuba kuya kubakho ‘igosa,’ okanye ‘ikhoboka,’ elinye, eya kulimisela phezu kwempahla yayo yonke. Ngoko, njengoko eli phephancwadi lidla ngokucacisa, kumele ukuba igosa lifanekisela ‘umhlambi omncinane’ wabafundi abathanjisiweyo njengeqela. Kwincwadi yeVangeli kaLuka, uYesu wayesandul’ ukuthetha ngalo mhlambi. (Luka 12:32) ‘Iqela labalindi,’ okanye ‘impahla yendlu,’ ibhekisela kwakweli qela kodwa kwindima ephunyezwa ngumntu ngamnye. Nanku ke umbuzo obangel’ umdla, Ngaba lungu ngalinye lodidi lwekhoboka linenxaxheba ekulungiseleleni ukutya kokomoya ngexesha elifanelekileyo? Impendulo sinokuyifumana xa sihlolisisa oko kuthethwa ziZibhalo.
Umkhonzi KaYehova Wamandulo
4. UYehova waluchaza njani uhlanga lwakwaSirayeli wamandulo, yaye yintoni ekubalulekileyo ukuba siyiphawule ngolo hlanga?
4 UYehova wachaza abantu bakhe, uSirayeli wamandulo njengomkhonzi wakhe. “‘Ningamangqina am [isininzi],’ utsho uYehova, ‘ningumkhonzi wam [isinye] endimnyulileyo.’” (Isa. 43:10) Onke amalungu olu hlanga ayequkiwe kolu didi lomkhonzi. Noko ke, kubalulekile ukuphawula ukuba, abantu ababenikwe imbopheleleko yokufundisa uhlanga, ngababingeleli nabaLevi ababengengobabingeleli.—2 Kron. 35:3; Mal. 2:7.
5. Ngokuvisisana noko kwathethwa nguYesu, luluphi utshintsho olwaluza kubakho?
5 Ngaba uhlanga lwakwaSirayeli likhoboka uYesu awathetha ngalo? Akunjalo. Kuba uYesu wathi kumaYuda omhla wakhe: “Ubukumkani bukaThixo buya kuthatyathwa kuni buze bunikwe uhlanga oluvelisa iziqhamo zabo.” (Mat. 21:43) Kucacile ukuba, kwakufuneka kubekho utshintsho. UYehova wayeza kusebenzisa uhlanga olutsha. Noko ke, ngokuphathelele ukufundiswa kwabantu ngemithetho kaThixo, umsebenzi wekhoboka elikumzekeliso kaYesu uyafana nalowo ‘womkhonzi’ kaThixo kuSirayeli wamandulo.
Ukuqalisa Kokubakho Kwekhoboka Elithembekileyo
6. Luluphi uhlanga olutsha olwaqalisa ukubakho ngePentekoste yowama-33 C.E., yaye ngoobani ababa yinxalenye yalo?
6 Uhlanga olutsha “uSirayeli kaThixo,” lubunjwa nguSirayeli wokomoya. (Gal. 6:16; Roma 2:28, 29; 9:6) Lwaqalisa ukubakho emva kokuthululwa komoya kaThixo ngePentekoste yowama-33 C.E. Emva koko, onke amaKristu athanjiswe ngomoya aba yinxalenye yohlanga olwaluza kuba ludidi lwekhoboka olwalunyulwe yiNkosi, uYesu Kristu. Ilungu ngalinye lolu hlanga lalithunywe ukushumayela iindaba ezilungileyo nokwenza abafundi. (Mat. 28:19, 20) Ngaba ilungu ngalinye lelo qela laliza kuba negalelo ekulungiseleleni ukutya kokomoya ngexesha elifanelekileyo? Masibone indlela iZibhalo eziwuphendula ngayo lo mbuzo.
7. Ekuqaleni, wawuyintoni umsebenzi ophambili wabapostile, yaye ziziphi iimbopheleleko ezingakumbi abazinikwayo?
7 Xa uYesu wayenyula abapostile bakhe abali-12, owona msebenzi uphambili ababethunywe ukuwenza, yayikukushumayela iindaba ezilungileyo kwabanye. (Funda uMarko 3:13-15.) Oku kuyavumelana nentsingiselo esisiseko yegama lesiGrike elithi apostolos, elithatyathwe kwisenzi esithi “thuma.” Noko ke ekuhambeni kwexesha, xa kwakusele kuza kusekwa ibandla lamaKristu, abapostile banikwa ‘izigxina zobuveleli.’—IZe. 1:20-26.
8, 9. (a) Yiyiphi eyona nto yayixhalatyelwe ngabapostile abali-12? (b) Ngoobani abanye iqumrhu elilawulayo elavumayo ukuba banikwe iimbopheleleko ezingakumbi?
8 Yiyiphi eyona nto yayixhalatyelwe ngabapostile abali-12? Impendulo yoku inokufunyanwa ngokuhlola iziganeko ezenzeka emva komhla wePentekoste. Xa kwakuphikiswana ngolwabiwo lwamihla le lokutya kwabahlolokazi, abapostile abali-12 babiza abafundi baza bathi: “Akukholekanga ngathi ukuba sishiye ilizwi likaThixo ukuze sabe ukutya ezitafileni.” (Funda iZenzo 6:1-6.) Emva koko abapostile bamisela abanye abazalwana abafanelekayo ngokomya ukuba banyamekele lo “mcimbi uyimfuneko” ukuze abapostile bazinikele ‘kubulungiseleli belizwi.’ UYehova walisikelela eli lungiselelo, kuba “ilizwi likaThixo laqhubeka likhula, nenani labafundi landa kakhulu eYerusalem.” (IZe. 6:7) Ngoko yayingabapostile ababenembopheleleko yokulungiselela ukutya kokomoya.—IZe. 2:42.
9 Ekuhambeni kwexesha, abanye banikwa iimbopheleleko ezinkulu. Ibandla lakwa-Antiyokwe lakhokelwa ngumoya oyingcwele ukuba limisele uPawulos noBharnabhas njengabathunywa bevangeli. Nabo baba ngabapostile nangona babengekho phakathi kwabapostile bokuqala abali-12. (IZe. 13:1-3; 14:14; Gal. 1:19) Iqumrhu elilawulayo eliseYerusalem lavumelana nokumiselwa kwabo. (Gal. 2:7-10) Kungekudala emva koko, uPawulos waba nenxaxheba ekulungiseleleni ukutya kokomoya. Wabhala incwadi yakhe yokuqala ephefumlelweyo.
10. Ngenkulungwane yokuqala, ngaba onke amaKristu athanjiswe ngomoya ayenenxaxheba ekulungiseleleni ukutya kokomoya? Chaza.
10 Noko ke, ngaba onke amaKristu ayenenxaxheba ekwalathiseni umsebenzi wokushumayela nokulungiselela ukutya kokomoya? Akunjalo. Umpostile uPawulos uthi: “Abangobapostile bonke, andibi kunjalo? Abangobaprofeti bonke, andibi kunjalo? Abangobafundisi bonke, andibi kunjalo? Abenzi misebenzi yamandla bonke, andibi kunjalo?” (1 Kor. 12:29) Nangona onke amaKristu athanjiswe ngomoya ayeshumayela, ngabambalwa kuphela—amadoda asibhozo—abasetyenziswayo ukubhala iincwadi ezingama-27 zeZibhalo ZamaKristu ZesiGrike.
Ikhoboka Elithembekileyo Kule Mihla
11. Ikhoboka lamiselwa ukuba linyamekele eyiphi “impahla”?
11 Amazwi kaYesu akuMateyu 24:45 abonisa ngokucacileyo ukuba udidi lwekhoboka elithembekileyo neliyingqondi luya kuba lusekho emhlabeni ngexesha lesiphelo. KwiSityhilelo 12:17 lubizwa ngokuba ‘ngabaseleyo’ bembewu yomfazi. Njengeqela, aba baseleyo baye bamiselwa phezu kwayo yonke impahla kaKristu esemhlabeni. “Impahla” igosa elithembekileyo elimiselwe ukuba liyinyamekele zizinto zeNkosi ezisemhlabeni, eziquka abantu abasemhlabeni abaya kulawulwa buBukumkani nezakhiwo ezisetyenziselwa ukunyamekela umsebenzi wokushumayela iindaba ezilungileyo.
12, 13. UmKristu uzazi njani ukuba unethemba lokuphila ezulwini?
12 UmKristu uzazi njani ukuba unethemba lokuphila ezulwini yaye uyinxalenye yentsalela kaSirayeli wokomoya? Impendulo ifumaneka kumazwi kampostile uPawulos awayewabhekisa kwabo babenethemba lokuphila ezulwini: “Bonke abo baqhutywa ngumoya kaThixo, bangoonyana bakaThixo. Kuba anifumananga moya wobukhoboka obangela uloyiko kwakhona, kodwa nifumene umoya wokwenziwa oonyana, moya lowo esithi ngawo sidanduluke sisithi: ‘Abha, Bawo!’ Umoya lowo ngokwawo ungqinelana nomoya wethu ukuba singabantwana bakaThixo. Ukuba, ngoko, singabantwana, sikwaziindlalifa: eneneni iindlalifa zikaThixo, kodwa iindlalifa ezimanyene noKristu, ukuba nje sibandezeleka ndawonye naye ukuze sizukiswe ndawonye naye.”—Roma 8:14-17.
13 Ngamafuphi singathi, la maKristu athanjiswe ngomoya oyingcwele kaThixo yaye afumana ‘ubizo’ lwasezulwini. (Heb. 3:1) NguThixo owabizayo. Nawo, akathandabuzi okanye oyike ukuvuma ukwenziwa oonyana bakaThixo. (Funda eyoku-1 kaYohane 2:20, 21.) Ngoko akazikhetheli ukuya kuphila ezulwini, kodwa nguYehova owabeka itywina lakhe okanye umoya wakhe oyingcwele.—2 Kor. 1:21, 22; 1 Pet. 1:3, 4.
Imbono Echanileyo
14. Abo bathanjisiweyo balugqala njani ubizo lwabo?
14 Abo bathanjisiweyo bafanele bazigqale njani njengoko belindele umvuzo wabo wasezulwini? Bayaqonda ukuba nangona befumene olu bizo lukhethekileyo, iselubizo nje. Bamele bahlale bethembekile de bafe ukuze bafumane lo mvuzo. Ngokuthobeka, bavakalelwa njengoPawulos: “Bazalwana, andizigqali njengosele ekuzuzile; kodwa kukho into enye ngako: Ndiyazilibala izinto ezingasemva ndize ndolulele kwizinto ezingaphambili, ndisukela umvuzo wobizo lwaphezulu lukaThixo ngoKristu Yesu.” (Fil. 3:13, 14) Abo bentsalela bafanele benze konke okusemandleni ukuze ‘bahambe ngokulufaneleyo ubizo ababizwa ngalo, ngokuthobeka okupheleleyo kwengqondo,’ “ngoloyiko nangokungcangcazela.”—Efe. 4:1, 2; Fil. 2:12; 1 Tes. 2:12.
15. AmaKristu afanele abajonge njani abo bathabatha kwimifuziselo eSikhumbuzweni, yaye abo bathanjisiweyo bazigqala njani?
15 Kwelinye icala, amanye amaKristu afanele abajonge njani abantu abathi bathanjisiwe baze bathabathe kwimifuziselo eSikhumbuzweni? Akafanele abagwebe. Oko kuxhomekeke kuloo mntu nakuYehova. (Roma 14:12) Noko ke, amaKristu athanjiswe ngokwenene akafuni kuphathwa ngendlela eyahlukileyo. Akacingi ukuba ngenxa yokuba ethanjisiwe, anolwazi olukhethekileyo olodlula nolo lwamanye amalungu ‘esihlwele esikhulu’ anamava. (ISityhi. 7:9) Engacingi nokuba afumana umoya oyingcwele omninzi kunalowo ufunyanwa ‘zezinye izimvu.’ (Yoh. 10:16) Akalindelanga ukuphathwa ngendlela ekhethekileyo; engacingi nokuba kuba ethabatha kwimifuziselo anegunya elingaphezu kwelabadala bebandla abamiselweyo.
16-18. (a) Ngaba bonke abathanjiswa banesabelo ekutyhileni indlela entsha yokuqonda inyaniso yeBhayibhile? Yenza umzekelo. (b) Kutheni kungekho mfuneko yokuba iQumrhu Elilawulayo libuze bonke abo bathi bathanjisiwe ngaphambi kokuba lenze izigqibo?
16 Ngaba bonke abathanjiswa abasemhlabeni banesabelo ekutyhileni indlela entsha yokuqonda inyaniso yeBhayibhile? Akunjalo. Nangona njengeqela udidi lwekhoboka lunembopheleleko yokondla indlu yokomoya, asingawo onke amalungu odidi lomkhonzi anembopheleleko okanye izabelo ezifanayo. (Funda eyoku-1 kwabaseKorinte 12:14-18.) Njengoko kukhankanyiwe kwiziqendu ezingaphambili, ngenkulungwane yokuqala, onke amaKristu ayenesabelo kumsebenzi obalulekileyo wokushumayela. Kodwa ngabambalwa kuphela abasetyenziselwa ukubhala iincwadi zeBhayibhile nokwalathisa ibandla lamaKristu.
17 Ngokomzekelo: Maxa wambi iZibhalo zithi ‘ibandla’ lisingatha imicimbi ethile yekomiti egwebayo. (Mat. 18:17) Kodwa ke, ngabadala kuphela abenza oku njengabameli bebandla. Abadala ababizi onke amalungu ebandla ukuze babuze izimvo zawo ngaphambi kokuba benze isigqibo. Baphumeza indima yabo yobuthixo; bangabameli bebandla liphela.
18 Ngokufanayo, namhlanje udidi lwekhoboka lumelwa ngamadoda ambalwa athanjisiweyo. La madoda abumba iQumrhu Elilawulayo lamaNgqina kaYehova. La madoda athanjiswe ngomoya alathisa umsebenzi woBukumkani nowokulungiselela ukutya kokomoya. Noko ke, njengakwinkulungwane yokuqala iQumrhu Elilawulayo alibuzi lungu ngalinye lodidi lwekhoboka ngaphambi kokuba lenze izigqibo. (Funda iZenzo 16:4, 5.) Kodwa ke, onke amaNgqina athanjisiweyo axakeke ngumsebenzi obalulekileyo wokuvuna owenziwayo ngoku. Amalungu odidi ‘lwekhoboka elithembekileyo neliyingqondi’ abumba iqela elinye, kodwa njengabantu ngabanye anemisebenzi eyahlukahlukeneyo.—1 Kor. 12:19-26.
19, 20. Yiyiphi imbono elungeleleneyo isihlwele esikhulu esinayo ‘ngekhoboka elithembekileyo neliyingqondi’ neQumrhu lalo Elilawulayo?
19 Ezi ngongoma zichazwe ngasentla, zifanele zisichaphazele njani isihlwele esikhulu esinethemba lokuphila ngonaphakade emhlabeni? Njengempahla kaKumkani, siyawaxhasa onke amalungiselelo enziwa liQumrhu Elilawulayo, elimela ‘ikhoboka elithembekileyo neliyingqondi.’ Amalungu esihlwele esikhulu anoxabiso ngokutya kokomoya okulungiselelwa liQumrhu Elilawulayo. Kwangaxeshanye, nakuba amalungu esihlwele esikhulu eluhlonela udidi lwekhoboka, akulumkele ukubaphakamisela phezulu abantu abathi bangamalungu olu didi. Akukho mKristu othanjiswe ngomoya kaThixo ngokwenene unokufuna okanye unokulindela ukuphathwa ngaloo ndlela.—IZe. 10:25, 26; 14:14, 15.
20 Enoba ‘siyimpahla yendlu,’ eyinxalenye yentsalela ethanjisiweyo, okanye singamalungu esihlwele esikhulu, masizimisele ukusebenzisana negosa elithembekileyo neQumrhu lalo Elilawulayo. Ngamana sonke ‘singahlala silindile’ size sithembeke de kube sekupheleni.—Mat. 24:13, 42.
Ngaba Uyakhumbula?
• Udidi ‘lwekhoboka elithembekileyo neliyingqondi’ lufanekisela bani, yaye ngoobani impahla yendlu?
• Umntu wazi njani ukuba unobizo lwasezulwini?
• Ngoobani abanembopheleleko yokulungiselela ukutya kokomoya?
• UmKristu othanjisiweyo ufanele azigqale njani?
[Umfanekiso okwiphepha 23]
Namhlanje, iQumrhu Elilawulayo limela udidi lwekhoboka elithembekileyo neliyingqondi. Nangenkulungwane yokuqala lalikho ilungiselelo elinjalo