“Zigcineni Kuthando LukaThixo”
“Zigcineni kuthando lukaThixo, ngoxa nilindele inceba yeNkosi yethu uYesu Kristu nikhangele kubomi obungunaphakade.”—YUDE 21.
1, 2. UYehova ubonise njani ukuba uyasithanda, yaye sazi njani ukuba akanakuqhubeka esithanda enoba sikhetha ukuphila ngayiphi indlela?
ZININZI iindlela uYehova uThixo aye wasibonisa ngazo ukuba uyasithanda. Noko ke, eyona ndlela ibalaseleyo aye wabonisa ngayo ukuba uyasithanda, lilungiselelo ledini lentlawulelo. Usithanda kakhulu kangangokuba wathumela uNyana wakhe amthandayo apha emhlabeni ukuze asifele. (Yoh. 3:16) UYehova wenza oko kuba efuna siphile ngonaphakade, yaye ufuna ukuqhubeka esithanda ngonaphakade!
2 Noko ke, ngaba uYehova unokuqhubeka esithanda enoba sikhetha ukuphila ngayiphi indlela? Akunjalo. Kuba kuYude indinyana yama-21, sifunda esi sibongozo: “Zigcineni kuthando lukaThixo, ngoxa nilindele inceba yeNkosi yethu uYesu Kristu nikhangele kubomi obungunaphakade.” Ibinzana elithi “zigcineni kuthando lukaThixo” libonisa ukuba kukho into esimele siyenze. Ngoko ke, yintoni esifanele siyenze ukuze sihlale eluthandweni lukaThixo?
Sinokuhlala Njani Eluthandweni LukaThixo?
3. Yintoni uYesu awathi kwakubalulekile ukuba ayenze ukuze ahlale eluthandweni lukaYise?
3 Impendulo yalo mbuzo siyifumana kumazwi kaYesu awawathetha ngobusuku bakhe bokugqibela apha emhlabeni. Wathi: “Ukuba niyayigcina imiyalelo yam, niya kuhlala eluthandweni lwam, kanye njengoko nam ndiyigcinile imiyalelo kaBawo ndaza ndahlala eluthandweni lwakhe.” (Yoh. 15:10) Kucacile ukuba, uYesu wayesazi ukuba ukuze uYise akholiswe nguye, kwakufuneka agcine imiyalelo yakhe. Ngoko ke, ukuba uNyana kaThixo ofezekileyo kwakubalulekile ukuba agcine imiyalelo kaYehova, kubekela phi ke ngathi?
4, 5. (a) Yiyiphi eyona ndlela esibonisa ngayo ukuba siyamthanda uYehova? (b) Kutheni singenasizathu sokungakufuni ukuthobela imiyalelo kaYehova?
4 Eyona ndlela sibonisa ngayo ukuba siyamthanda uYehova, kukumthobela. Umpostile uYohane wakuchaza ngale ndlela oku: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yoh. 5:3) Enyanisweni, abantu abaninzi namhlanje abakuthandi ukuthobela. Noko ke, phawula eli binzana: “Kwaye ayinzima imiyalelo yakhe.” UYehova akafuni ukuba senze into esingenakukwazi ukuyenza.
5 Ngokomzekelo: Ngaba ubuya kucela umhlobo wakho omthandayo ukuba aphakamise into oyaziyo ukuba inzima? Ubungayi kuyenza into enjalo! UYehova unobubele ngakumbi kunathi yaye ngoyena uzaziyo iintsilelo zethu. IBhayibhile iyasiqinisekisa ukuba uYehova ‘uyakhumbula ukuba siluthuli.’ (INdu. 103:14) Akanakufuna ukuba senze into engaphaya kwamandla ethu. Ngenxa yoko, asinasizathu sokungafuni ukuthobela imiyalelo yakhe. Kunoko, siyaqonda ukuba ukuthobela uYehova kusinika ithuba lokubonisa uBawo wethu wasezulwini ukuba simthanda ngokwenene yaye sifuna ukuqhubeka simthanda.
Isipho Esikhethekileyo Esivela KuYehova
6, 7. (a) Yintoni isazela? (b) Chaza indlela isazela esinokusinceda ngayo sihlale eluthandweni lukaThixo.
6 Kula maxesha anzima esiphila kuwo, zininzi izigqibo esimele sizenze ezichaphazela ukuthobela kwethu uThixo. Sinokuqiniseka njani ukuba ezi zigqibo ziyavisisana nokuthanda kukaThixo? UYehova usinike isipho esinokusinceda kakhulu kulo mbandela wokuthobela. Eso sipho sisazela. Yintoni isazela? Bubuchule obukhethekileyo bokukwazi ukuzihlolisisa. Isazela sifana nomgwebi ongaphakathi kuthi, osincedayo sicingisise ngokhetho esilwenzayo ebomini okanye ngezigqibo esisele sizenzile size sizihlole enoba zifanelekile okanye azifanelekanga, zilungile okanye ziphosakele kusini na.—Funda eyabaseRoma 2:14, 15.
7 Sinokusinceda njani isazela? Cinga ngalo mzekeliso. Masithi umntu uhamba kwintlango enkulu. Akukho ndlela nazibhodi zokwalathisa indlela. Kodwa uhamba aye kufika kwindawo aya kuyo. Njani? Usebenzisa ikhampasi. Ikhampasi sisixhobo esifana newotshi esibhalwe iimbombo ezine zomhlaba yaye inosiba olusoloko lwalathe emntla. Ukuba ebengenayo ikhampasi, loo mntu ebeya kubhadula ancame. Ngokufanayo, umntu ongenaso isazela uya kusoloko esenza izigqibo zobuyatha ebomini.
8, 9. (a) Yintoni esifanele sihlale siyikhumbula ngezazela zethu? (b) Yintoni esinokuyenza ukuze izazela zethu zisincede?
8 Noko ke njengekhampasi, isazela sinokusilahlekisa. Ukuba umntu ohamba entlango unokubeka imagnethi ecaleni kwekhampasi, usiba lwayo lunokuyeka ukwalatha emntla. Yintoni eya kwenzeka ukuba nathi sivumela iintliziyo zethu zilawule izigqibo esizenzayo? Utyekelo esinalo lokuzingca lunokulahlekisa izazela zethu. IBhayibhile ithi “intliziyo inenkohliso kunayo nantoni na yaye iyatyhudisa.” (Yer. 17:9; IMize. 4:23) Ngapha koko, ukuba umntu ohamba entlango akanayo imaphu echanileyo, ikhampasi ayinakumnceda nganto. Ngokufanayo, xa singakhokelwa liLizwi likaThixo elingaguquguqukiyo, iBhayibhile, izazela zethu azinakusinceda nganto. (INdu. 119:105) Okubuhlungu kukuba, abantu abaninzi namhlanje baphenjelelwa kakhulu yiminqweno yentliziyo yaye abayikhathalelanga imilinganiselo yokuziphatha eseLizwini likaThixo. (Funda eyabase-Efese 4:17-19.) Kungenxa yoko le nto abantu abaninzi besenza izinto ezimanyumnyezi nakuba badalwa benezazela.—1 Tim. 4:2.
9 Sifanele sizimisele ukungafani nabo! Kunoko, masiqhubeke sivumela iLizwi likaThixo ukuba liqeqeshe izazela zethu ukuze zikwazi ukusinceda. Kufuneka sikhokelwe zizazela eziqeqeshwe ngeBhayibhile kunokuvumela iminqweno yethu yokuzingca ukuba isilawule. Kwangaxeshanye, kufuneka sizihlonele izazela zabazalwana noodadewethu bokomoya. Simele siphephe ukubakhubekisa, sikhumbule ukuba izazela zabo zisenokuba buthathaka kunezethu.—1 Kor. 8:12; 2 Kor. 4:2; 1 Pet. 3:16.
10. Ziziphi iinkalo ezintathu zobomi esiza kuxubusha ngazo?
10 Masihlole iinkalo ezintathu zobomi esinokubonisa ngazo ukuba uYehova simthobela kuba simthanda. Kwinkalo nganye, kubandakanyeke isazela, kodwa ukuze sisincede sifanele sikhokelwe yimigaqo yokuziphatha eseBhayibhileni. Iindlela ezintathu esinokubonisa ngazo ukuba uYehova siyamthanda yaye siyamthobela, zezi: (1) Sithanda abantu abathandwa nguYehova, (2) siyabahlonela abo banikwe igunya, yaye (3) sizabalazela ukuhlala sicocekile phambi koThixo.
Thanda Abantu Abathandwa NguYehova
11. Kutheni sifanele sithande abo bathandwa nguYehova?
11 Okokuqala, sifanele sithande abantu abathandwa nguYehova. Abantu bayafana neziponji. Bafunxa nantoni na ekufuphi nabo. UMdali wethu uyayazi indlela abahlobo abanokuba yingozi ngayo nabanokuba luncedo ngayo kwabanye. Ngenxa yoko, usinika esi siluleko sobulumko: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMize. 13:20; 1 Kor. 15:33) Akukho namnye kuthi ofuna ‘ukuhlelwa bububi.’ Sonke sifuna ukuba ‘zizilumko.’ Akukho mntu unokwenza uYehova abe sisilumko ngakumbi okanye amphembelele ukuba enze okubi. Kodwa, usimisela umzekelo omhle ekukhetheni abahlobo. Khawucinge ngoku—ngabaphi abantu abangafezekanga uYehova abakhethayo ukuba babe ngabahlobo bakhe?
12. Ngabantu abanjani abakhethwa nguYehova ukuba babe ngabahlobo bakhe?
12 UYehova wabiza usolusapho uAbraham ngokuba ‘ngumhlobo wakhe.’ (Isa. 41:8) Le ndoda yayithembekile, ililungisa yaye ithobela, iyindoda yokholo. (Yak. 2:21-23) Ngabantu abanjalo uYehova abenza abahlobo bakhe. Nanamhlanje ukhetha abantu abanjalo. Ukuba uYehova ukhetha abahlobo abanjalo, ngaba nathi asifanele sikhethe ukuhamba nezilumko ukuze nathi sibe zizilumko?
13. Yintoni enokusinceda sikhethe abahlobo abafanelekileyo?
13 Yintoni enokukunceda ukhethe abahlobo abafanelekileyo? Ukufunda imizekelo eseBhayibhileni kunokukunceda. Cinga ngobuhlobo bukaRute noninazala uNahomi, uDavide noYonatan nangoTimoti noPawulos. (Rute 1:16, 17; 1 Sam. 23:16-18; Fil. 2:19-22) Enye yezona zinto zazibangela ukuba babe ngabahlobo abasenyongweni kukuba: Ubuhlobo babo babusekelwe ekuthandeni uYehova ngokunyanisekileyo. Ngaba unokubafumana abahlobo abathanda uYehova ngendlela nawe omthanda ngayo? Qiniseka ukuba unokubafumana abahlobo abanjalo kwibandla lamaKristu. Abo bahlobo abanakukuphembelela ukuba wenze izinto ezimbi. Kunoko, baya kukunceda ukuba uthobele uYehova, ukhule ngokomoya uze uhlwayelele umoya. (Funda eyabaseGalati 6:7, 8.) Baya kukunceda ukuba uhlale eluthandweni lukaThixo.
Hlonela Abo Banikwe Igunya
14. Ziziphi izinto ezenza kube nzima ukuhlonela igunya?
14 Indlela yesibini esibonisa ngayo ukuba uYehova siyamthanda ibandakanya abo banikwe igunya. Simele sibahlonele abo banikwe igunya. Kutheni ngamanye amaxesha kunzima ukwenza oku? Esinye isizathu kukuba, abantu abanikwe igunya abafezekanga. Nathi asifezekanga. Silwa notyekelo esizelwe nalo lokuvukela.
15, 16. (a) Kutheni kubalulekile ukuba sihlonele abo uYehova abanike imbopheleleko yokunyamekela abantu bakhe? (b) Yintoni esiyifundayo kwindlela uYehova awawajonga ngayo amaSirayeli awayevukela uMoses?
15 Ngoko ke usenokuzibuza, ‘Ukuba kunzima kangako ukuhlonela igunya, kutheni simele silihlonele?’ Impendulo iphathelele imbambano yolongamo. Nguwuphi umlawuli omkhethayo? Ukuba sikhetha uYehova njengoMongami, kufuneka sihlonele igunya lakhe. Ukuba asimhloneli, ngaba sinokutsho ngokwenene ukuba unguMlawuli wethu? Ngapha koko, uYehova usebenzisa abantu abangafezekanga, abo abanike imbopheleleko yokunyamekela abantu bakhe. Ukuba siyabavukela abo bantu, uYehova uya kusijonga njani?—Funda eyoku-1 kwabaseTesalonika 5:12, 13.
16 Ngokomzekelo, xa amaSirayeli ayembombozela yaye evukela uMoses, uYehova wavakalelwa kukuba avukela yena. (Num. 14:26, 27) UThixo akatshintshanga. Xa nathi sinokuvukela abantu abanike igunya, siya kuba sivukela yena!
17. Sisiphi isimo sengqondo esifanelekileyo esifanele sibe naso kwabo banikwe imbopheleleko ebandleni?
17 Umpostile uPawulos uchaza isimo sengqondo esifanelekileyo esifanele sibe naso kwabo banikwe imbopheleleko kwibandla lobuKristu. Wabhala: “Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu njengabo baya kuphendula; ukuze bakwenze oku ngovuyo kungekhona ngokuncwina, kuba oko kungenza umonakalo kuni.” (Heb. 13:17) Enyanisweni, silwa nzima ukuze sibe nesi simo sengqondo sokuthobela. Noko ke, simele sikhumbule ukuba sifuna ukuhlala eluthandweni lukaThixo. Ngaba asimele senze umgudu ukuze sifikelele olo sukelo?
Hlala Ucocekile Phambi KukaYehova
18. Kutheni uYehova efuna sihlale sicocekile?
18 Indlela yesithathu esibonisa ngayo ukuba siyamthanda uYehova kukuzama ukuhlala sicocekile phambi kwakhe. Abazali badla ngokuqiniseka ukuba abantwana babo bahlala becocekile. Ngoba? Esinye isizathu kukuba, xa umntwana ecocekile uba sempilweni. Ngaphezulu, umntwana ococekileyo uye abonakale ukuba abazali bakhe bayamthanda yaye bayamnyamekela. Ngokufanayo, uYehova ufuna nathi sicoceke. Uyazi ukuba xa sicocekile siya kuba sempilweni. Uyazi nokuba simela yena njengoBawo wethu wasezulwini. Oku kubaluleke kakhulu kuba, nabanye abantu banokufuna ukukhonza uThixo ngenxa yokubona indlela esahluke ngayo kweli hlabathi lingcolileyo.
19. Sazi njani ukuba kubalulekile ukucoceka emzimbeni?
19 Ziziphi iindlela esifanele sicoceke ngazo? Simele sicoceke kuzo zonke iinkalo zobomi bethu. KuSirayeli wamandulo, uYehova wacacisa ukuba kwakubalulekile ukuba abantu bakhe bacoceke emzimbeni. (Lev. 15:31) UMthetho kaMoses wawubandakanya ukulahlwa kwenkunkuma, ukuhlanjwa kwezitya, iinyawo nempahla. (Eks. 30:17-21; Lev. 11:32; Num. 19:17-20; Dut. 23:13, 14) AmaSirayeli akhunjuzwa ukuba uThixo wawo, uYehova, ungcwele—okuthetha ukuthi “uhlambulukile” yaye “usulungekile.” Nabakhonzi bakaThixo ongcwele bafanele babe ngcwele.—Funda iLevitikus 11:44, 45.
20. Ziziphi iindlela esinokuhlala sicocekile ngazo?
20 Ngoko ke, sifanele sicoceke ngaphakathi nangaphandle. Sifanele sizame ukugcina iingqondo zethu zicocekile. Sibambelela kwimilinganiselo kaYehova yokuziphatha, kungakhathaliseki ukuba abantu esiphila nabo baziphethe kakubi kangakanani na ngokwesini. Okona kubaluleke ngakumbi kukuba, unqulo lwethu silugcina lucocekile, yaye asivumeli ukuba ludyojwe lunqulo lobuxoki. Sihlala sikhumbula isilumkiso esiphefumlelweyo esikuIsaya 52:11, esithi: “Mkani, mkani, phumani apho, ningachukumisi nto ingahlambulukanga; phumani phakathi kwazo, zigcineni nihlambulukile.” Nanamhlanje, sihlala sicocekile ngokomoya ngokuphepha ukuchukumisa zonke izinto zonqulo uBawo wethu wasezulwini azigqala njengezingacocekanga. Kungenxa yoko le nto, singabandakanyeki kwimibhiyozo neeholide zonqulo ezithandwayo namhlanje. Inyaniso kukuba, kunzima ukuhlala sicocekile. Kodwa ke, abantu bakaYehova bayazama ukuhlala becocekile ukuze bahlale eluthandweni lukaThixo.
21. Sinokuqiniseka njani ukuba siya kuhlala eluthandweni lukaThixo?
21 UYehova ufuna sihlale eluthandweni lwakhe ngonaphakade. Kodwa sonke kufuneka sizame ngamandla ukuhlala eluthandweni lukaThixo. Oko sinokukwenza ngokulandela umzekelo kaYesu nangokubonisa ukuba siyamthanda uYehova ngokuthobela imiyalelo yakhe. Ukuba senjenjalo siya kuqiniseka ukuba akukho nto iya ‘kusahlula eluthandweni lukaThixo olukuye uKristu Yesu iNkosi yethu.’—Roma 8:38, 39.
Ngaba Uyakhumbula?
• Zinokusinceda njani izazela zethu ukuze sihlale eluthandweni lukaThixo?
• Kutheni sifanele sithande abantu abathandwa nguYehova?
• Kutheni kubalulekile ukuba sihlonele abo banikwe igunya?
• Kubaluleke kangakanani ukucoceka kubantu bakaThixo?
[Ibhokisi/Umfanekiso okwiphepha 20]
INCWADI EKHUTHAZA UKUZIPHATHA OKUHLE
Kwindibano yesithili yowama-2008/2009 kwakhululwa incwadi enamaphepha angama-224 enomxholo othi “Zigcineni Kuthando LukaThixo.” Yintoni injongo yale ncwadi intsha? Yenzelwe ukunceda amaKristu ukuba afunde ngemilinganiselo kaYehova aze ayithande, inikela ingqalelo ngokukhethekileyo kwindlela amaKristu amele aziphathe ngayo. Xa sifunda incwadi ethi “Zigcineni Kuthando LukaThixo” siya kuqiniseka ngakumbi ukuba ukuphila ngemilinganiselo kaYehova yeyona ndlela ifanelekileyo yaye kuya kusenza sifumane ubomi obungunaphakade kwixa elizayo.
Ngaphezu koko, le ncwadi yenzelwe ukusinceda sibone ukuba ukuthobela uYehova akuloxanduva. Kunoko, yindlela yokubonisa uYehova ukuba siyamthanda. Ngenxa yoko, le ncwadi iya kusenza sizibuze, ‘Kutheni ndithobela uYehova?’
Xa abanye besenza impazamo yokushiya uthando lukaYehova, ingxaki idla ngokubandakanya ukuziphatha kungekhona ukungaqondi imfundiso ethile. Ngoko ke, kubalulekile ukuba, sikhulise uthando noxabiso lwethu ngemithetho nemigaqo kaYehova esikhokelayo imihla ngemihla! Siqinisekile ukuba le ncwadi intsha iya kunceda izimvu zikaYehova ehlabathini lonke zibambelele koko kulungileyo, zize zingqine uSathana elixoki, yaye okubaluleke ngakumbi zihlale eluthandweni lukaThixo!—Yude 21.
[Umfanekiso okwiphepha 18]
“Ukuba niyayigcina imiyalelo yam, niya kuhlala eluthandweni lwam, kanye njengoko nam ndiyigcinile imiyalelo kaBawo ndaza ndahlala eluthandweni lwakhe”