Indlela Intlawulelo Esisindisa Ngayo
“Lowo ubonisa ukholo kuNyana unobomi obungunaphakade; lowo ungamthobeliyo uNyana akayi kububona ubomi, kodwa ingqumbo kaThixo ihleli phezu kwakhe.”—YOH. 3:36.
1, 2. Sisiphi esinye sezizathu ezabangela ukuba kupapashwe iZion’s Watch Tower?
“NGO-OKTOBHA 1879 inkupho yesine yeli phephancwadi yathi: “Nabani na oyifundisisayo iBhayibhile uyayibona indlela okubaluleke ngayo ukufa kukaKristu.” Elo nqaku laqukumbela ngala mazwi axhokonx’ ingcinga: “Masiyigatye nantoni na enokusenza sicinge ukuba uKristu akazange afe njengombingelelo wokucamagushela izono zethu.”—Funda eyoku-1 kaYohane 2:1, 2.
2 Esinye sezizathu zokuba kupapashwe iZion’s Watch Tower yokuqala ngoJulayi 1879, yayikukuthethelela imfundiso eseBhayibhileni yentlawulelo. Yayiqulethe ‘ukutya okufike ngexesha elifanelekileyo,’ kuba ngasekupheleni kweminyaka yee-1800, abo babezibiza ngokuba ngamaKristu baqalisa ukuthandabuza ukuba ukufa kukaYesu kuyintlawulelo yezono zethu. (Mat. 24:45) Ngelo xesha, abaninzi babekhukuliswa yingcamango yendaleko, ephikisanayo nesibakala sokuba ekuqaleni umntu wayefezekile. Abo bathethelela ingcamango yendaleko bafundisa ukuba umntu uya ephucuka ngokuphucuka yaye ngenxa yoko akukho mfuneko yentlawulelo. Ngoko, esi siluleko sikaPawulos siya kuTimoti sifanelekile: “Kulondoloze oko ukuphathisiweyo, ukhwebuke kwiintetho ezililize ezihlambela oko kungcwele nakwiimpikiswano zoko kubizwa ngokuba ‘lulwazi’ kuxokwa. Ngokuqhayisa ngolwazi olunjalo abathile baye baphambuka elukholweni.”—1 Tim. 6:20, 21.
3. Yiyiphi imibuzo esiza kuyihlolisisa?
3 Ngokuqinisekileyo, uzimisele ukuba ‘ungaphambuki elukholweni.’ Ngenxa yoko, kuya kuba kuhle ukuhlolisisa le mibuzo: Kutheni ndivakalelwa kukuba intlawulelo iyimfuneko kum? Lingakanani ixabiso layo? Ndinokungenelwa njani kweli lungiselelo lixabisekileyo elinokundisindisa kwingqumbo kaThixo?
Sinokusindiswa Kwingqumbo KaThixo
4, 5. Yintoni ebonisa ukuba ingqumbo kaThixo ihleli phezu kwale nkqubo yezinto ingendawo?
4 IBhayibhile nembali yoluntu ibonisa ukuba ukususela oko uAdam wawela esonweni, ingqumbo kaThixo ‘ihleli phezu’ koluntu. (Yoh. 3:36) Ubungqina boku kukuba bonke abantu bayafa. Ulawulo lukaSathana alukwazi ukukhusela abantu kwiintlekele yaye akukho rhulumente ukwaziyo ukwanelisa zonke iintswelo zabantu. (1 Yoh. 5:19) Ngenxa yoko abantu bathwaxwa ziimfazwe, ulwaphulo-mthetho nobuhlwempu.
5 Kucacile ke ngoko ukuba, le nkqubo yezinto ingendawo uYehova akayisikeleli. UPawulos wathi: “Ingqumbo kaThixo iyatyhilwa ivela ezulwini nxamnye nako konke ukungabi nabuthixo.” (Roma 1:18-20) Ngenxa yoko, abo baphila ngendlela engamkholisiyo uThixo baya kuvuna imiphumo yoko. Namhlanje, ingqumbo kaThixo yaziswa ngezigidimi eziyimigwebo eziphalazwa njengezibetho kwihlabathi likaSathana, yaye zifumaneka kwiimpapasho zethu ezininzi ezisekelwe eBhayibhileni.—ISityhi. 16:1.
6, 7. Nguwuphi umsebenzi amaKristu athanjisiweyo akhokela kuwo yaye liliphi ithuba elisavulekele abo bayinxalenye yehlabathi likaSathana?
6 Ngaba loo nto ithetha ukuba abantu abanakukhululeka kulawulo lukaSathana baze baxolelaniswe noThixo? Akunjalo, kuba umnyango okhokelela ekuxolelanisweni noYehova usavulekile. AmaKristu athanjisiweyo ‘angoonozakuzaku abasendaweni kaKristu,’ ayakhokela kubulungiseleli basesidlangalaleni yaye abongoza abantu esithi: “Yibani ngabaxolelanisiweyo noThixo.”—2 Kor. 5:20, 21.
7 Umpostile uPawulos wathi uYesu ‘uyasihlangula kwingqumbo ezayo.’ (1 Tes. 1:10) UYehova uya kubonakalisa umsindo wakhe wokugqibela xa etshabalalisa ngonaphakade aboni abangaguqukiyo. (2 Tes. 1:6-9) Ngoobani abaya kusinda? IBhayibhile ithi: “Lowo ubonisa ukholo kuNyana unobomi obungunaphakade; lowo ungamthobeliyo uNyana akayi kububona ubomi, kodwa ingqumbo kaThixo ihleli phezu kwakhe.” (Yoh. 3:36) Bonke abo baya kube bephila xa le nkqubo ifikelela esiphelweni, nababonakalisa ukholo kwidini likaYesu lentlawulelo, abayi kutshatyalaliswa ngemini yokugqibela yengqumbo kaThixo.
Indlela Intlawulelo Esebenza Ngayo
8. (a) Liliphi ithemba ababenalo uAdam noEva? (b) UYehova wazingqina njani enguThixo wokusesikweni?
8 UAdam noEva badalwa befezekile. Ukuba babeye bahlala bethembekile kuThixo, ngoku ngebehleli nenzala yabo ngolonwabo kumhlaba oyiParadesi. Noko ke, okubuhlungu kukuba abazali bethu bokuqala bawaphula ngabom umthetho kaThixo. Ngenxa yoko, bagwetyelwa ukufa baza bagxothwa kwiParadesi yamandulo. Xa uAdam noEva befumana abantwana, babesele benesono yaye ekugqibeleni loo ndoda nomfazi wokuqala baluphala baza bafa. Oku kungqina ukuba uYehova uyaligcina ilizwi lakhe. Ngaphezulu, unguThixo wokusesikweni. UYehova wayemlumkisile uAdam ukuba xa enokutya kwisiqhamo esalelweyo uya kufa—yaye wafa.
9, 10. (a) Kutheni inzala ka-Adam isifa? (b) Sinokusinda njani ekufeni okungunaphakade?
9 Njengenzala ka-Adam, sazalwa singafezekanga, sinesono yaye ekugqibeleni siyafa. Xa uAdam wonayo, nathi saba ngaboni nangona sasingekazalwa. Ngoko nathi isigwebo sokufa siyasichaphazela. Ukuba uYehova ebenokusijika esi sigwebo engakhange ahlawule intlawulelo, ebeya kuba akaligcinanga ilizwi lakhe. Ngenxa yoko, uPawulos wayebhekisela kuthi sonke xa esithi: “Siyazi ukuba uMthetho ngowokomoya; kodwa mna ndingowokwenyama, ndithengiswe phantsi kwesono. Hayi usizana endilulo! Ngubani na oya kundihlangula kulo mzimba usisisulu sokufa?”—Roma 7:14, 24.
10 NguYehova uThixo kuphela, owayenokwenza ilungiselelo elisemthethweni ukuze asixolele izono zethu aze asikhulule kwisigwebo sokufa okungunaphakade. Oku wakwenza ngokuthumela uNyana wakhe amthandayo esuka ezulwini ukuba aze kuzalwa njengomntu ofezekileyo aze anikele ngobomi bakhe njengentlawulelo. Ngokungafaniyo noAdam, uYesu wahlala efezekile. Eneneni, “akazange enze sono.” (1 Pet. 2:22) Ngenxa yoko, uYesu wayenokukwazi ukuba nguyise wenzala efezekileyo. Kunoko, wavumela iintshaba zikaThixo ukuba zimbulale ukuze athabathe inzala ka-Adam enesono baze abo babonakalisa ukholo kuye bafumane ubomi obungunaphakade. IZibhalo zithi: “Mnye uThixo, mnye nomlamli phakathi koThixo nabantu, uKristu Yesu, lowo wazinikela waba yintlawulelo yabo bonke.”—1 Tim. 2:5, 6.
11. (a) Iingenelo zentlawulelo zinokuzekeliswa njani? (b) Ngoobani abaqukiweyo kwiingenelo zentlawulelo?
11 Indlela esebenza ngayo intlawulelo inokufaniswa nemeko yabantu abaye batyelwa imali yabo yonke yibhanki enobuqhophololo baze basale besematyaleni. Abo banini-bhanki bagwetywa iminyaka entolongweni. Kodwa kuthekani ngabo baphulukene neemali zabo? Ukuze baphume kobo bugxwayiba, banokuncedwa yindoda esisinhanha enobubele enokufaka le bhanki egameni layo ize ibuyisele onke loo maxhoba imali yawo, aze ahlawule onke amatyala awo. Ngokufanayo, uYehova uThixo noNyana wakhe amthandayo bathenga inzala ka-Adam baza bacima ityala layo lesono ngegazi likaYesu elaphalalayo. Kungenxa yoko le nto uYohane uMbhaptizi wathi ngoYesu: “Yabonani, iMvana kaThixo esusa isono sehlabathi!” (Yoh. 1:29) Ihlabathi ekususwa izono zalo asingobantu abaphilayo kuphela kodwa kuqukwa nabafileyo.
Ixabiso Lentlawulelo
12, 13. Yintoni esinokuyifunda kwindlela uAbraham awayekulungele ngayo ukunikela ngoIsake?
12 Asinakuze sikuqonde ngokupheleleyo oko uBawo wethu wasezulwini noNyana wakhe amthandayo kwafuneka bakuncame ukuze kufumaneke intlawulelo. Kodwa kukho iingxelo zeBhayibhile ezinokusinceda sikuqonde oku. Ngokomzekelo, cinga indlela amele ukuba wayevakalelwa ngayo uAbraham kuhambo lwakhe lweentsuku ezintathu oluya eMoriya ethobela lo myalelo kaThixo: “Nceda, uthabathe unyana wakho, unyana wakho okuphela kwakhe, omthanda kunene, uIsake, uze uthabathe uhambo oluya kwilizwe laseMoriya yaye apho uze umnikele njengomnikelo otshiswayo kwenye yeentaba endiya kukutyumbela yona.”—Gen. 22:2-4.
13 Ekugqibeleni uAbraham waya kufika kule ntaba. Cinga indlela amele ukuba wayebuhlungu ngayo njengoko wayebopha uIsake izandla neenyawo, waza wamlalisa phezu kwesibingelelo awayesakhile. Umele ukuba wayebuhlungu ngokwenene uAbraham xa ebeka imela emqaleni elungiselela ukubulala unyana wakhe! Cinga nendlela awayevakalelwa ngayo uIsake njengoko wayelele esibingelelweni elindele ukuva ukungena kwemela ebukhali awayeza kubulawa ngayo. Ingelosi kaYehova yamnqanda uAbraham kanye ngelo xesha. Le nto yenziwa nguAbraham noIsake isinceda siqonde oko kwafuneka uYehova akuncame xa wayevumela abantu abaqhutywa nguSathana ukuba babulale uNyana wakhe. Indlela uIsake awathobela ngayo uAbraham ibonisa indlela uYesu awayekulungele ngayo ukubandezeleka ngenxa yethu nokusifela.—Heb. 11:17-19.
14. Yintoni eyenzeka kuYakobi esinceda siqonde ixabiso lentlawulelo?
14 Oko kwenzeka kuYakobi kunokusinceda siliqonde ixabiso lentlawulelo. Oyena nyana wakhe wayemthanda uYakobi, yayinguYosefu. Okubuhlungu kukuba, abantakwabo Yosefu babemmonela yaye bemthiyile. Sekunjalo, uYosefu wavuma ukuthunywa nguyise ukuba aye kubona abantakwabo. Ngelo xesha, babesalusa imihlambi kaYakobi kumgama oziikhilomitha ezili-100 ukusuka kwikhaya labo eHebron. Cinga nje indlela awavakalelwa ngayo uYakobi xa oonyana bakhe bebuya nesambatho sikaYosefu esizele ligazi! Wathi: “Sisambatho eside sonyana wam! Umele ukuba uqwengwe lirhamncwa elikhohlakeleyo! Ngokuqinisekileyo uYosefu uqwengiwe!” Yonke le nto yamkhathaza kakhulu uYakobi yaye wazilela uYosefu iintsuku ezininzi. (Gen. 37:33, 34) UYehova akavakalelwa ngendlela abavakalelwa ngayo abantu abangafezekanga. Sekunjalo, ukucamngca ngoko kwenzeka kuYakobi kunokusinceda sibone indlela uThixo awavakalelwa ngayo xa uNyana wakhe amthandayo ephathwa ngenkohlakalo waza wabulawa emhlabeni.
Iingenelo Zentlawulelo
15, 16. (a) UYehova wabonisa njani ukuba uyayamkela intlawulelo? (b) Uye wangenelwa njani wena kwintlawulelo?
15 UYehova uThixo wavusa uNyana wakhe othembekileyo enomzimba wokomoya. (1 Pet. 3:18) UYesu ovusiweyo wabonakala kubafundi bakhe kangangeentsuku ezingama-40, esomeleza ukholo lwabo ebaxhobisela nomsebenzi omkhulu wokushumayela ababeza kuwenza. Emva koko wenyukela ezulwini. Apho wanikela khona kuThixo ixabiso legazi lakhe elaphalalayo ukuze lisetyenziswe kubalandeli bakhe bokwenyaniso ababonakalisa ukholo kwixabiso ledini lentlawulelo. UYehova uThixo wabonisa ukuba uyayamkela intlawulelo kaKristu ngokuthuma uYesu ukuba athulule umoya oyingcwele kubafundi bakhe ababehlanganisene eYerusalem ngePentekoste yowama-33 C.E.—IZe. 2:33.
16 Ngoko nangoko, aba balandeli bakaKristu baqalisa ukubongoza abanye abantu ukuba basabe ingqumbo kaThixo ngokubhaptizwa egameni likaYesu Kristu ukuze baxolelwe izono zabo. (Funda iZenzo 2:38-40.) Ukususela ngaloo mini, izigidi zabantu beentlanga zonke ababonakalisa ukholo kwidini lentlawulelo likaYesu, baye batsalwa nguThixo ukuze babe nolwalamano naye. (Yoh. 6:44) Ngoku masiqwalasele le mibuzo mibini: Ngaba ukho kuthi oye wafumana ithemba lobomi obungunaphakade ngenxa yokwenza imisebenzi emihle? Xa sele sinalo eli themba, ngaba sinokuphulukana nalo?
17. Ufanele uyijonge njani intsikelelo onayo yokuba ngumhlobo kaThixo?
17 Akukho namnye kuthi okufanelekelayo ukufumana intlawulelo. Kodwa ngokuba nokholo kuyo, izigidi zabantu namhlanje ziye zaba ngabahlobo bakaThixo, yaye zinethemba lokuphila ngonaphakade kwiparadesi esemhlabeni. Noko ke, ukuba ngabahlobo bakaYehova akusiqinisekisi ukuba siya kuhlala singabahlobo bakhe. Ukuze siphephe imini kaThixo yengqumbo, sifanele siqhubeke sibonisa uxabiso ‘ngentlawulelo kaKristu Yesu.’—Roma 3:24; funda eyabaseFilipi 2:12.
Qhubeka Ubonisa Ukholo Kwidini Lentlawulelo
18. Ukuba nokholo kwintlawulelo kuquka ntoni?
18 UYohane 3:36 ongumxholo weli nqaku ubonisa ukuba, ukuba nokholo kwiNkosi uYesu Kristu kubandakanya ukumthobela. Ukuba noxabiso ngentlawulelo kufanele kusenze siphile ngokuvisisana neemfundiso zikaYesu, siziphathe ngendlela awafundisa ukuba siziphathe ngayo. (Marko 7:21-23) ‘Ingqumbo kaThixo iza’ kufikela abo bangafuniyo ukuyeka ukwenza uhenyuzo, ukuqhula okungamanyala “nako konke ukungahlambuluki,” okuquka ukubukela imifanekiso engamanyala.—Efe. 5:3-6.
19. Sinokubonisa njani ukuba sinokholo kwintlawulelo?
19 Uxabiso lwethu ngentlawulelo lufanele lusenze sihlale sixakekile ‘zizenzo zozinikelo lobuthixo.’ (2 Pet. 3:11) Masizibekele ixesha elaneleyo lokuthandaza rhoqo nangokunyanisekileyo, senze ufundisiso lweBhayibhile lobuqu, siye kwiintlanganiso, senze unqulo lwentsapho size sishumayele ngoBukumkani ngenkuthalo. Singaze ‘silibale ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.’—Heb. 13:15, 16.
20. Ziziphi iintsikelelo eziya kufunyanwa ngabo banokholo kwintlawulelo?
20 Xa uYehova ekhuphela ingqumbo yakhe kweli hlabathi lingendawo, iya kusivuyisa into yokuba siye sabonisa ukholo kwintlawulelo saza saqhubeka sibonisa uxabiso ngayo. Nakwihlabathi likaThixo elitsha, siya kuqhubeka sinombulelo ngeli lungiselelo eliye lasisindisa kwingqumbo kaThixo.—Funda uYohane 3:16; neSityhilelo 7:9, 10, 13, 14.
Ubuya Kuphendula Uthini?
• Siyintoni isizathu sokuba sifune intlawulelo?
• Lingakanani ixabiso lentlawulelo?
• Ziziphi iingenelo ezifumaneka ngenxa yentlawulelo?
• Silubonisa njani ukholo kwintlawulelo yedini likaYesu?
[Umfanekiso okwiphepha 13]
Umnyango okhokelela kuxolelwaniso noYehova usavulekile
[Imifanekiso ekwiphepha 15]
Ukucamngca ngento eyenzeka kuAbraham, uIsake noYakobi, kuya kusinceda siliqonde ixabiso lentlawulelo