Ileta Evela EGrenada

Ukuchitha Usuku Elwandle

KUCHULUMANCISA ngokwenene ukuthunywa ukuba uye kushumayela ivangeli kwelinye ilizwe. Uye ucinge ngabantu balapho, ilizwe elo uya kulo nezinto oza kuhlangabezana nazo xa ulapho.

Mna nomfazi wam savuya gqitha xa sathunywa ukuba siye kushumayela eGrenada ilizwe elinonxweme oluhle neendawo zokuqubha ezingayiwayo. Ewe kona sasikufuna ukuqubha, kodwa sasinomdla ngokukhethekileyo kubantu balapho.

Sihlala kufutshane nonxweme oluhle lwaseGrand Anse. Xa usiya elunxwemeni uhamba kwindlela enamagophe neneendawo ezibukekayo kunye neenduli eziluhlaza. Kwindlela eya elwandle unqumla iintaba, amahlathi, uze ubone iingxangxasi nezinye iindawo ezintle. Sitsho sibonakale isizathu sokuba abantu bekuthanda ukutyelela le ndawo. Eli lizwe lihle ngendlela engathethekiyo kangangokuba umqhubi angade awise nemoto yakhe kuba ebukele ubuhle balo. Iindlela zinamgophe kangangokuba kungalula ngeemoto ukuba zitshayisane.

Safika eConvention Trade Center, esendleleni eya kunxweme lwaseGrand Anse. Apho safika kukho inkonzo yamaNgqina ekwakukho kuyo abantu abamalunga nama-6 00. Le yayiyimini ekhethekileyo kuLesley noDaphne, indoda nomfazi wayo abaneminyaka emalunga nama-70 ubudala. Kaloku uLesley wayeza kubhaptizwa. UDaphne wayekhangele phambili kolu suku kuba yena wabhaptizwa ngamaNgqina kaYehova ngowe-1958.

Kubaluleke kakhulu kumaNgqina ukubhaptizwa ngokuntywiliselwa emanzini. Umntu ubhaptizwa xa eyazi inyaniso yeBhayibhile yaye ephila ngokuvisisana nayo. Ubhaptizo olwenziwa ekuhleni lubonisa ukuba umntu uzahlulele kuYehova uThixo.

Kuloo nkonzo ndandiza kushumayela ukuze ndicacise oko kuthethwa ziZibhalo ngobhaptizo. Ekupheleni kwentshumayelo uLesley kunye nabanye abantu ababini ababeza kubhaptizwa bema ngenyawo. Wayenxibe ihempe emhlophe neqhina, etsho ngoncumo olugoso. Ndathi kubo: ‘Niguqukile na kwizono ebenikade nizenza naza nazahlulela ukwenza ukuthanda kukaYehova?’ Ukuphendula kwabo ngokuvakalayo besithi “Ewe” kwenza kwacaca ukuba babezahlulele ngokwenene.

Ndachukumiseka gqitha ekubeni ndandiyazi imvelaphi kaLesley. Kwadlula amashumi eminyaka engavumi ukufunda iBhayibhile de yena nomfazi wakhe batyelela kwesinye isiqithi. Ngoxa babelapho bagqiba ekubeni ngamnye aziyele kweyakhe inkonzo. ULesley wathi kuDaphne: “Yiya kweyakho icawa nam ndiza kuya kweyam.”

Ngenye imini uLesley washiya uDaphne eHolweni yoBukumkani waza yena waya kwicawa yaseTshetshi. Ukuphuma kwecawa uLesley waya kulanda umfazi wakhe kwiHolo yoBukumkani. Wamkelwa ngezandla ezishushu nguye wonke umntu nangona babengamazi. Wayithanda kakhulu loo nto Lesley. Akukho mntu owayencokole naye ecaweni yakhe. ULesley wathi kuDaphne: “Andisoze ndiphinde ndiwubeke umcondo wam kula cawa. Akukho mntu uye wandihoya phaya, nditsho nomfundisi lo wembala. Ndiye ndafika ndaphinda ndahamba kungekho umntu undihoyileyo.” ULesley akazange aphinde aye eTshetshi.

Emva koko uLesley waqalisa ukufunda iLizwi likaThixo de wafikelela kwinqanaba lokubhaptizwa. Abantu ababeza kubhaptizwa baya elwandle. AmaNgqina kaYehova adla ngokubabhaptizela equleni abantu kodwa ngale mini babhaptizelwa elwandle kuba lwalukufutshane.

Unxweme lwaseGrand Anse luziikhilomitha ezintathu ubude yaye lunentlabathi emhlophe namanzi afudumeleyo. Abantu ababeselwandle bamangaliswa kukubona kufika abantu abanxibe kakuhle. ULesley yena wayenxibe isikipa neblukhwe emfutshane. Unokuyithelekelela indlela awavuya ngayo uDaphne xa wabona umyeni wakhe ebhaptizwa emva kweminyaka engama-50 yena ebhaptiziwe. Ilanga laloo mini laliqaqambile ibe naye wayetsho ngoncumo oluqaqambileyo. Nabantu ababequbha elwandle basithelela kuvuyo esasinalo. Babeqhwab’ izandla njengoko kwakubhaptizwa.

Isibhakabhaka esiluhlaza, intlabathi emhlophe namaza olwandle azukisa uMdali. Umdali wayezukiswa nangakumbi njengoko abantu ababebhaptizwa babephuma elwandle. Kwasivuyisa gqitha ukubabona. Leyo yayiyimini ekhethekileyo ibe kuLesley noDaphne yayiyeyona mini imnandi bakha bayichitha elwandle.