Yifune Ngenyameko Intsikelelo KaYehova
“[UThixo] ungumvuzi wabo bamfuna ngenyameko.”—HEB. 11:6.
1, 2. (a) Abantu abaninzi bayifuna njani intsikelelo kaThixo? (b) Kutheni sifanele sibe nomdla wokufumana intsikelelo kaYehova?
“UTHIXO akusikelele!” Abantu badla ngokuthetha la mazwi xa bebulela umntu obancedileyo. Abefundisi beecawa ezahlukahlukeneyo badla ngokusikelela abantu, izilwanyana nezinto ezingaphiliyo. Abanye abantu baya kwiindawo zonqulo ukuze bafumane intsikelelo. Iinkokeli zopolitiko zidla ngokucela uThixo ukuba asikelele amazwe azo. Ucinga ukuba kufanelekile ukwenza izicelo ezinjalo? Ngaba bayayifumana? Ngoobani ngokwenene abafumana intsikelelo evela kuThixo yaye ngoba?
2 UYehova waxela kwangaphambili ukuba ngemihla yokugqibela, wayeya kuba nabantu abacocekileyo nabaseluxolweni abavela kwiintlanga zonke ababeya kushumayela iindaba ezilungileyo zoBukumkani kuse eziphelweni zomhlaba nakuba bethiyiwe yaye bechaswa. (Isa. 2:2-4; Mat. 24:14; ISityhi. 7:9, 14) Thina baye bavuma ukuba yinxalenye yabo bantu siyayifuna intsikelelo kaThixo, kuba ngaphandle kwayo asinakuphumelela. (INdu. 127:1) Kodwa sinokuyifumana njani intsikelelo kaThixo?
Abantu Abathobekileyo Bayazifumana Iintsikelelo
3. Wawuya kuba yintoni umphumo wokuthobela kwamaSirayeli?
3 Funda iMizekeliso 10:6, 7. Ngaphambi nje kokuba abantu bohlanga lwakwaSirayeli bangene kwiLizwe Lesithembiso, uYehova wabathembisa ukuba babeya kuphumelela baze bakhuselwe ukuba babenokuliphulaphula ilizwi lakhe. (Dut. 28:1, 2) Ngoko, ngokuqinisekileyo abo bathobelayo babeya kuzifumana iintsikelelo zikaYehova.
4. Kuthetha ukuthini ukuthobela ngokunyanisekileyo?
4 Ayefanele abe nesimo sengqondo esinjani amaSirayeli xa ethobela? UMthetho kaThixo wawusithi wayengayi kukholiswa ngabantu bakhe xa bengamkhonzi “ngemihlali nangentliziyo enovuyo.” (Funda iDuteronomi 28:45-47.) UYehova akalindelanga ukuba abantu bakhe babe njengezilwanyana okanye iidemon xa bemthobela. (Marko 1:27; Yak. 3:3) Xa sithobela uThixo ngokunyanisekileyo sibonisa ukuba siyamthanda. Xa sithobela uYehova ngovuyo sibonisa ukuba sinokholo lokuba imiyalelo yakhe ayikho nzima nokuba “ungumvuzi wabo bamfuna ngenyameko.”—Heb. 11:6; 1 Yoh. 5:3.
5. Ukuthembela kwizithembiso zikaYehova kwakuya kumnceda njani umntu ukuba athobele umthetho okwiDuteronomi 15:7, 8?
5 Phawula indlela ukuthembela kwizithembiso okwabonakaliswa ngayo ekuthobeleni umthetho obhalwe kwiDuteronomi 15:7, 8. (Yifunde.) Ukuba babedlulisa nje usana kunina xa bethobela lo mthetho, amahlwempu ayesenokuncedakala kodwa ngaba oku kwakuya kubuqinisa ubuhlobo phakathi kwabantu bakaThixo? Okubaluleke nangakumbi, ngaba kwakuya kubonisa ukholo kumandla kaYehova okunyamekela abakhonzi bakhe nombulelo ngokufumana ithuba lokumxelisa ngokuba nesisa? Akunjalo! UThixo wayeyibona intliziyo yomntu onesisa ngokwenene yaye wathembisa ukuba uya kumsikelela ngako konke akwenzayo. (Dut. 15:10) Ukuba nokholo kweso sithembiso kwakuya kubakhokelela esenzweni yaye oko kwakuya kubangela ukuba bafumane iintsikelelo ezininzi.—IMize. 28:20.
6. AmaHebhere 11:6 afanele asiqinisekise ngantoni?
6 Ukongezelela ekubeni nokholo kuYehova njengoMvuzi wabakhonzi bakhe, amaHebhere 11:6 abonisa olunye uphawu olufunekayo ukuze umntu afumane intsikelelo kaThixo. Phawula ukuba uYehova uyabavuza ‘abo bamfuna ngenyameko.’ Igama elisetyenziswe apha, lolwimi lwamandulo libhekisela ekwenzeni umgudu. Ngoko ukuba nathi senza umgudu, sinokuyifumana intsikelelo! Le ntsikelelo ifumaneka kokuphela koThixo oyinyaniso, “ongenakuxoka.” (Tito 1:2) Ukutyhubela izigidi ngezigidi zeminyaka uye wabonisa ukuba izithembiso zakhe zinokuthenjwa. Ilizwi lakhe alize lisilele; liyaphumelela. (Isa. 55:11) Ngoko sinokuqiniseka ukuba, xa sibonakalisa ukholo lokwenyaniso uya kusivuza.
7. Sinokuyifumana njani intsikelelo ‘ngembewu’ ka-Abraham?
7 UYesu Kristu waba yinxalenye ephambili ‘yembewu’ ka-Abraham. AmaKristu athanjisiweyo ayinxalenye yesibini yaloo ‘mbewu’ yaxelwa kwangaphambili. Aye athunywa ukuba ‘avakalise ngokubanzi iimbalasane zalowo wawabizayo ukuba aphume ebumnyameni angene ekukhanyeni kwakhe okungummangaliso.’ (Gal. 3:7-9, 14, 16, 26-29; 1 Pet. 2:9) Asinakuba nolwalamano oluhle noYehova xa singabathobeli abo uYesu abamisele phezu kwempahla yakhe. Ngaphandle koncedo ‘lwekhoboka elithembekileyo neliyingqondi,’ besingenakukuqonda oko sikufundayo kwiLizwi likaThixo yaye besingenakukwazi nokukusebenzisa ebomini bethu. (Mat. 24:45-47) Xa sizisebenzisa ebomini bethu izinto esizifunda eZibhalweni, sinokufumana intsikelelo kaThixo.
Ukuxhalabela Ukwenza Ukuthanda KukaThixo
8, 9. Usolusapho uYakobi wawenza njani umgudu ngokuvisisana nesithembiso sikaThixo?
8 Ukwenza umgudu ukuze sifumane intsikelelo kaThixo kunokusikhumbuza ngosolusapho uYakobi. Wayengayazi indlela ezaziya kuzaliseka ngayo izithembiso zikaThixo kuAbraham, kodwa wakholelwa ukuba uYehova wayeya kuyandisa imbewu kayisemkhulu, eyayiya kuba luhlanga olukhulu. Ngenxa yoko, ngowe-1781 B.C.E., uYakobi waya kufuna umfazi kwaHaran. Wayengafuni nje umntu owayeza kuba liqabane elihle; kunoko, wafuna ibhinqa elingumkhonzi kaYehova elikhulileyo ngokomoya nelaliza kubakhulisa kakuhle abantwana bakhe.
9 Siyazi ukuba uYakobi wadibana noRakeli, isalamane sakhe. Wamthanda uRakeli waza wavuma ukusebenzela uyise uLabhan, kangangeminyaka esixhenxe ukuze amnike yena njengomfazi wakhe. Eli yayingelobali nje lothando. UYakobi wayesazi kakuhle isithembiso esenziwa nguThixo uSomandla kuyisemkhulu uAbraham waza wasiphinda kuyise, uIsake. (Gen. 18:18; 22:17, 18; 26:3-5, 24, 25; 27:19) Ngenxa yoko, uIsake wathi kunyana wakhe uYakobi: “UThixo uSomandla uya kukusikelela aze akuqhamise, akwandise, uze ngokuqinisekileyo ube yintlanganisela yezizwana. Kwaye uya kukunika intsikelelo ka-Abraham, wena nembewu yakho ndawonye nawe, ukuze ulidle ilifa ilizwe ophambukele kulo, elo uThixo amnike lona uAbraham.” (Gen. 28:3, 4) Ngoko umgudu owenziwa nguYakobi ukuze afumane umfazi ofanelekileyo nokuze abe nentsapho, wawubonisa ukholo awayenalo koko kwathethwa nguYehova.
10. Yintoni eyabangela ukuba uYehova amsikelele uYakobi?
10 UYakobi wayengafuni butyebi ukuze aphile tofotofo nentsapho yakhe. Wayecinga ngesithembiso eyayithenjiswe yona intsapho yakhe. Wayecinga ngokwenza ukuthanda kukaYehova. UYakobi wayezimisele ukwenza konke okusemandleni ukuze afumane intsikelelo kaThixo nakuba kwakukho imiqobo. Waqhubeka ezimisele de waluphala, yaye uYehova wamsikelela.—Funda iGenesis 32:24-29.
11. Nguwuphi umgudu esifanele siwenze ngokuvisisana nokuthanda kukaThixo okutyhiliweyo?
11 NjengoYakobi, asizazi zonke iinkcukacha eziphathelele ukuphunyezwa kwenjongo kaYehova. Kodwa xa sifunda iLizwi likaThixo, siyakuqonda oko simele sikulindele ngokuphathelele “imini kaYehova.” (2 Pet. 3:10, 17) Ngokomzekelo, asiyazi ukuba iya kufika nini loo mini ngokuthe ngqo, kodwa siyazi ukuba ikufuphi. Siyalikholelwa iLizwi likaThixo xa lisithi, ukuba sinikela ubungqina obucokisekileyo kweli xesha lifutshane liseleyo, siya kuzisindisa thina nabo basiphulaphulayo.—1 Tim. 4:16.
12. Yintoni esinokuqiniseka ngayo?
12 Siyaqonda ukuba isiphelo singafika nokuba kunini; uYehova akazukulinda de wonke umntu olapha emhlabeni afumane ubungqina. (Mat. 10:23) Ngaphezulu, sifumana ulwalathiso olufanelekileyo ukuze sikwazi ukushumayela ngokucokisekileyo. Sibonisa ukholo, ngokuba nenxaxheba kulo msebenzi kangangoko kunokwenzeka sisebenzisa konke esinako. Ngaba siya kusoloko sishumayela kwintsimi enabantu abanomdla? Eneneni, asinakukwazi oko kusengaphambili. (Funda iNtshumayeli 11:5, 6.) Umsebenzi wethu kukushumayela, sinentembelo yokuba uYehova uya kusisikelela. (1 Kor. 3:6, 7) Sinokuqiniseka ukuba uyayibona imigudu esiyenzayo yaye uya kusebenzisa umoya wakhe oyingcwele ukuze usalathise.—INdu. 32:8.
Ukufuna Umoya Oyingcwele
13, 14. Amandla omoya oyingcwele kaThixo okunceda abakhonzi bakhe aye abonakaliswa njani?
13 Kuthekani xa sivakalelwa ngathi asinakukwazi ukuphumeza isabelo esithile okanye ukuba nenxaxheba kumsebenzi wokushumayela? Sifanele sicele uYehova ukuba asiphe umoya wakhe oyingcwele ukuze sibe nobuchule obungakumbi bokwenza umsebenzi wakhe. (Funda uLuka 11:13.) Umoya kaThixo unokwenza abantu bafanelekele ukwenza umsebenzi okanye isabelo enoba banemvelaphi enjani na. Ngokomzekelo, emva kokufuduka kwabantu bakhe eYiputa, umoya kaThixo wanceda abelusi namakhoboka ukuba oyise iintshaba zawo emfazweni nangona ayengenamava okulwa. (Eks. 17:8-13) Kungekudala emva koko, kwalo moya mnye wanceda uBhetsaleli no-Oholiyabhi ukuba baphumeze umsebenzi wokwakhiwa komnquba ngokwendlela uThixo awayeyalele ngayo.—Eks. 31:2-6; 35:30-35.
14 Lo moya unamandla waxhobisa abakhonzi bakaThixo ukuba banyamekele umsebenzi wentlangano xa kwakufuneka baqalise ukwenza umsebenzi wokushicilela. Kwileta awayibhalayo, uMzalwan’ uR. J. Martin, owayengumveleli wesebe lokushicilela ngelo xesha wachaza umsebenzi owawusele wenziwe ngowe-1927. “Ngexesha elifanelekileyo, iNkosi yawuvula umnyango; safumana umatshini omkhulu wokushicilela obizwa ngokuba yirotary nangona sasingawazi ukuba usetyenziswa njani. Kodwa iNkosi iyakwazi ukuvula iingqondo zabantu abanomdla wokuyikhonza ngomphefumlo uphela. . . . Kwiiveki nje ezimbalwa, wawusele uduma lo matshini; yaye usaduma nangoku, wenza umsebenzi nabenzi bawo ababengazi ukuba unokukwazi ukuwenza.” UYehova usayisikelela imigudu enjalo nanamhlanje.
15. EyabaseRoma 8:11 inokubakhuthaza njani abo bajamelene nesilingo?
15 Umoya kaYehova usebenza ngeendlela ezahlukahlukeneyo. Bonke abakhonzi bakaThixo bayawufumana lo moya yaye uyabanceda ukuba boyise neyona miqobo inzima. Kuthekani ukuba songanyelwa sisilingo? Sinokufumana amandla kumazwi kaPawulos akweyabaseRoma 7:21, 25, nakwisahluko 8:11. “Umoya walowo wavusa uYesu kwabafileyo” unokusinceda nathi soyise iminqweno yenyama. Le ndinyana yayibhalelwe amaKristu athanjisiweyo kodwa lo mgaqo uyasebenza kubo bonke abakhonzi bakaThixo. Sonke sinokufumana ubomi ngokuba nokholo kuKristu silwe ngamandla ukuze soyise iminqweno engafanelekanga size siphile ngokuvisisana nolwalathiso lomoya.
16. Yintoni esifanele siyenze ukuze sifumane umoya kaThixo oyingcwele?
16 Ngaba sinokulindela ukuba uThixo asiphe umoya wakhe singakhange senze mgudu? Akunjalo. Ngaphandle kokuthandaza siwucele, simele sikhuthalele ukuzondla ngeLizwi likaThixo eliphefumlelweyo. (IMize. 2:1-6) Ngaphezulu, umoya kaThixo ukho kwibandla lamaKristu. Ukuya kwethu rhoqo kwiintlanganiso kubonisa ukuba sinomnqweno ‘wokuva oko ukutshoyo umoya kuwo amabandla.’ (ISityhi. 3:6) Ngapha koko, simele sikusebenzise oko sikufundayo. IMizekeliso 1:23 ithi: “Buyani ngokohlwaya kwam. Ngoko ndiza kumpompozisa kuni umoya wam.” Eneneni, uThixo uyabanika umoya wakhe oyingcwele “abo bamthobelayo njengomlawuli.”—IZe. 5:32.
17. Indlela esinokuyifumana ngayo intsikelelo kaThixo inokufaniswa nantoni?
17 Nangona kufuneka senze umgudu ukuze sifumane intsikelelo kaThixo, khumbula ukuba ukusebenza nzima kukodwa akubangeli ukuba uYehova athululele abantu bakhe intabalala yeentsikelelo. Ukufumana kwethu intsikelelo kunokufaniswa nendlela imizimba yethu engenelwa ngayo ekutyeni okunezondlo. UThixo wenza imizimba yethu ngohlobo lokuba sikunandiphe ukutya size sifumane nezondlo kuko. Nguye nolungiselela ukutya. Asiyazi ngokupheleleyo indlela ezakheka ngayo izondlo ezisekutyeni yaye inkoliso yethu ayinakuyichaza indlela imizimba yethu esebenzisa ngayo amandla afumaneka ekutyeni esikutyayo. Into esiyaziyo kukuba oku kuyenzeka yaye siyatya ukuze le nkqubo yenzeke. Ukuba sitya ukutya okunezondlo, singenelwa nangakumbi. Ngokufanayo, uYehova uyazichaza izinto esifanele sizenze ukuze sifumane ubomi obungunaphakade, yaye uyasinceda ukuze sikwazi ukufikelela loo milinganiselo. Ngokuqinisekileyo, uyasinceda kakhulu yaye sifanele simdumise. Sekunjalo, ukuze sifumane intsikelelo kaThixo, sifanele sisebenzisane naye senze ngokuvisisana nokuthanda kwakhe.—Hag. 2:18, 19.
18. Uzimisele ukwenza ntoni yaye ngoba?
18 Ngoko, zibhokoxe xa usenza izabelo zakho zonke. Ukuze uphumelele, thembela kuncedo lukaYehova ngalo lonke ixesha. (Marko 11:23, 24) Qiniseka ukuba “wonk’ ubani ocelayo uyamkela.” (Mat. 7:8) Abo bathanjiswe ngomoya baya kusikelelwa ngokufumana “isithsaba sobomi,” emazulwini. (Yak. 1:12) ‘Ezinye izimvu’ zikaKristu ezizabalazela ukufumana intsikelelo ngembewu ka-Abraham, ziya kuvuya xa zimva esithi: “Yizani, nina nisikelelweyo nguBawo, budleni ilifa ubukumkani obalungiselelwa nina ukususela ekusekweni kwehlabathi.” (Yoh. 10:16; Mat. 25:34) Enyanisweni, “abo basikelelwayo [nguThixo] baya kuwudla ilifa umhlaba,” ‘bahlale kuwo ngonaphakade.’—INdu. 37:22, 29.
Ngaba Unokuchaza?
• Yintoni ebandakanyekileyo ekuthobeleni ngokunyanisekileyo?
• Yintoni efunekayo ukuze sifumane intsikelelo kaThixo?
• Sinokuwufumana njani umoya oyingcwele kaThixo yaye unokusinceda njani?
[Imifanekiso ekwiphepha 9]
UYakobi wasukuzana nengelosi ukuze afumane intsikelelo kaYehova.
Ngaba nawe wenza umgudu ukuze ufumane intsikelelo?
[Umfanekiso okwiphepha 10]
Umoya oyingcwele kaThixo wanceda uBhetsaleli no-Oholiyabhi ukuba baphumeze isabelo sabo