IBhayibhile Iyabutshintsha Ubomi Babantu

Yintoni eyabangela ukuba ijoni elalikade lilivukela-mbuso nesela litshintshe indlela elalikade liphila ngayo? Yintoni eyenza ukuba intshatsheli yekarati itshintshe usukelo lwayo ebomini? Utata wavuzwa njani ngokungamncami unyana wakhe? Funda la mabali alandelayo ukuze ufumane iimpendulo.

“Ndonwabile nangona ndakhula ndisokola.”—GARRY P. AMBROCIO

IMINYAKA YOBUDALA: 47

ILIZWE: PHILIPPINES

UBOMI BANGAPHAMBILI: WAYELIVUKELA MBUSO

INDLELA ENDANDIKADE NDIPHILA NGAYO: Ndakhulela kwidolophu encinane yaseVintar. Ummandla esasihlala kuwo wawungqongwe ziintaba eziluhlaza, amanzi acwengileyo yaye unempepho etsho kamnandi. Sakhula sisokola nangona sasihlala kwindawo ezolileyo. Ekhaya kwaqhekezwa kwaza kwebiwa nemfuyo.

Xa ndandikwishumi elivisayo ndandinxila neetshomi zam ibe ndanditshaya nokutshaya, ngenxa yoko kwakufuneka ndibe ukuze ndithenge icuba notywala. Ndade ndeba nezacholo zikamakhulu. Umkhosi wawurhanela ukuba ndililungu lamavukela mbuso ekuthiwa yiNew People’s Arm (NPA) yaye wawudla ngokundibamba uze undibethele ugqirha nezicaka. Loo nto yandenza ndawajoyina loo mavukela mbuso. Ndachitha iminyaka emihlanu ndihlala ezintabeni kunye namajoni eNPA. Apho sasiphila ubomi bentshontsho. Sasisoloko sibaleka umkhosi. Ekugqibeleni ndakruquka kukuzimela ezintabeni ndaza ndazinikezela kwirhuluneli yephondo laseIlocos Norte. Yandiphatha kakuhle kangangokuba yada yandifunela nomsebenzi. Noko ke, ndaqhubeka nemikhwa yam emidala njengokuqhekeza emizini yabantu.

INDLELA EBUTSHINTSHE NGAYO UBOMI BAM IBHAYIBHILE: Ndandisebenza noLoida, ibhinqa elaliliNgqina likaYehova. Landidibanisa noJovencio waza yena wandifundisa iBhayibhile. Kodwa ke kwakunzima ukwahlukana nemikhwa yam. Ndandidla ngokutshaya ngaphambi kokufika kukaJovencio yaye ndandisaqhubeka nezenzo zobugewu. Ekugqibeleni ndabanjwa ngamapolisa ndisaphula umthetho ndaza ndagwetywa iinyanga ezili-11 entolongweni. Ngelo xesha ndathandaza kuYehova ndimcela ukuba andincede. Ndamcela ukuba andixolele aze andiphe umoya oyingcwele ukuze undikhokele kwaye undomeleze.

Emva kwexesha elithile ndatyelelwa lelinye iNgqina likaYehova lindiphathele iBhayibhile. Ndayifunda ndaza ndafumanisa ukuba uYehova unenceba, uthando yaye uyaxolela. Ndamcela ukuba andiphe amandla okuyeka izinto ezingalunganga. Oko ndakufunda kwiMizekeliso 27:11 kwandinceda kakhulu. Kwaba ngathi uYehova uthetha nam. Le vesi ithi: “Yiba nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.”

Emva kokukhululwa kwam entolongweni, ndaqhubeka ndifunda iBhayibhile namaNgqina, ndaya enkonzweni yawo ndaza ndaphila ngemithetho yeBhayibhile. Ekugqibeleni uYehova wandinceda ndahlukana nemikhwa emibi. Emva koko ndazinikela kuYehova uThixo.

INDLELA ENDINGENELWE NGAYO: Ndonwabile nangona ndakhula kabuhlungu. Ndiye ndatshintsha nangona ndandilikhoboka lemikhwa emibi. (Kolose 3:9, 10) Namhlanje ndinxulumana nabantu bakaYehova abacocekileyo yaye ndinceda abanye bafunde ngoThixo ongumongami uYehova.

“Ndandifuna ukumela iBrazil.”—JULIANA APARECIDA SANTANA ESCUDEIRO

IMINYAKA YOBUDALA: 31

ILIZWE: BRAZIL

UBOMI BANGAPHAMBILI: WAYEYINTSHATSHELI YEKARATI

INDLELA ENDANDIKADE NDIPHILA NGAYO: Ndakhulela eLondrina. Le dolophu yayicocekile kwaye inenzolo nangona inkoliso yabantu balapho ingamahlwempu. Xa ndandineminyaka elishumi ubudala ubhuti wam wandikhuthaza ukuba ndifunde ikarati. Utata wavuma nangona ekuqaleni wayekrikriza.

Ndaziqeqesha ngokuzimisela yaye ndaba yintshatsheli yephondo laseParana. Kamva ndafumana iintshinga eziliqela yaye ngowe-1993 ndaba yintshatsheli yekarati eBrazil. Ndandifuna ukulwa nabantu bamazwe ngamazwe. Noko ke, intsapho yakowethu yayingenayo imali yokuhlawula iindleko zam zokuya phesheya.

Ndandinethemba lokuba ikarati yayiza kuqukwa kwiOlimpiki ibe loo nto yenzeka ekugqibeleni. Ndandifuna ukumela iBrazil kuloo midlalo, ngenxa yoko ndaziqeqesha ngokuzimisela ndaza ndafumana inkxaso yemali eyandenza ndakwazi ukulwa eFransi, eVietnam, eMzantsi Korea, eJapan naseMzantsi Merika. Usukelo lwam olulandelayo yayikukuya kwimidlalo yamazwe aseMerika, ngoko ndalwa ngokuzimisela kangangokuba ndaba ngomnye wabantu abathathu abakhethwa ukuba baye kuloo midlalo eyayiseSanto Domingo, eDominican Riphabliki, ngowe-2003.

INDLELA EBUTSHINTSHE NGAYO UBOMI BAM IBHAYIBHILE: Ngowama-2001, mna nesinqanda-mathe sam sadibana namaNgqina kaYehova aza aqalisa ukusifundisa iBhayibhile. Ekuqaleni ndandingenamdla kangako. Ndandisoloko ndidinwe ibe ndandidla ngokulala xa sifunda. Nakuba kunjalo, izinto endandizifunda zazingena entliziyweni kwaye loo nto yabonakala kukhuphiswano olwalandelayo.

Ekubeni ndandikhethiwe ukuba ndiye kudlala kwimidlalo yamazwe aseMerika kwafuneka ndibe nenxaxheba kwimidlalo yokuzilolonga. Xa kwafika ixesha lokuba ndilwe, ndasuka ndema bhunxe. Ngequbuliso kwatsho kwathi thaa engqondweni yam ukuba umKristu akafanelanga alwe, nkqu nasemidlalweni. Kwathi qatha umyalelo weBhayibhile othi “uze umthande ummelwane wakho njengawe siqu.” (Mateyu 19:19) Ndashiya elo qonga ngoko nangoko. Abantu bandithi ntshoo ngamehlo bengakholelwa.

Ukufika kwam ekhaya ndacinga nzulu ngobomi bam. Ndathatha incwadana enemifanekiso epapashwe ngamaNgqina ethetha ngoko kufunwa nguThixo kuthi. Kuyo kwakuchatshulwe iNdumiso 11:5 ethi “umphefumlo Wakhe [uYehova] umthiyile ngokuqinisekileyo nabani na othanda ugonyamelo.” Loo mazwi andihlaba entliziyweni aza andenza ndayiyeka ikarati.

Abaqeqeshi bam abazange basithande eso sigqibo. Bazama ukundijika besithi ndandingoyena mdlali ugqwesileyo elizweni ibe ndandinokukwazi ukudlala kwiOlimpiki. Kodwa ndandingazi kubuya ngamva.

Ngelo xesha sasisele sitshatile nesinqanda-mathe sam. Naso sasisele sishumayela kwizindlu ngezindlu kunye namaNgqina. Wayedla ngokubuyela ekhaya evuyile aze andibalisele ngezinto awayencokole ngazo nabantu. Ndandisazi ukuba kwakuza kufuneka nditshintshe ukuba ndandifuna ukuphila njengaye. Ndayishiya inkonzo endandingena kuyo ndaza ekugqibeleni ndabhaptizwa ukuze ndibe liNgqina.

INDLELA ENDINGENELWE NGAYO: Mna nomyeni wam sonwabile yaye simanyene kuba siphila ngemithetho yeBhayibhile. Ndiyamxhasa njengoko esenza imisebenzi yebandla. Ngendandilwile ndaza ndafumana imbasa yegolide nodumo. Kodwa ndicinga ukuba ayikho into yeli hlabathi lingenabulungisa enokuthelekiswa nelungelo lokukhonza uYehova uThixo.

“Utata akazange andincame.”—INGO ZIMMERMANN

IMINYAKA YOBUDALA: 44

ILIZWE: JAMANI

UBOMI BANGAPHAMBILI: WAYENGUNOGADA WASEBHARINI

INDLELA ENDANDIKADE NDIPHILA NGAYO: Ndazalelwa kwidolophu yaseGelsenkirchen enemigodi yamalahle yaye abazali bam babehamba kwiicawa ezahlukeneyo. Utata wayeliNgqina likaYehova. Kodwa umama wayengafuni ukuba mna nodade wethu siye notata enkonzweni yakhe. Utata wayesebenza iiyure ezilishumi nangaphezulu eqhuba iilori. Wayedla ngokungena emsebenzini ngentsimbi yesibini okanye yesithathu ekuseni. Nakuba kwakunjalo, wayesoloko esifundisa ngoThixo. Noko ke, ndandingazixabisi izinto awayesifundisa zona.

Xa ndandineminyaka eli-15 ubudala ndakruquka kukuya enkonzweni ndaza ndayeka. Kwisithuba esingangonyaka emva konyaka emva koko ndaqalisa ukudlala amanqindi. Emva koko ndachitha iminyaka emibini ndisenza unothanda. Xa ndandineminyaka eli-18 ubudala ndalishiya ikhaya.

Ndandizithanda kakhulu ezemidlalo yaye ndandizilolonga izihlandlo ezithandathu ngeveki, ndiqala ngamanqindi ndize emva koko ndiye kuphakamisa iintsimbi. Ngeempela-veki mna nabahlobo bam sasidla ngokuya ebharini. Ngenye imini ndalwa nenye indoda eyayisoyikeka kodwa ndayithi qwaka-qwaka nje. Umnini waloo ndawo sasisela kuyo wandibona waza wandiqesha ukuze ndibe ngunogada. Ndavuma kuba wayendithembisa umvuzo oncumisayo.

Ngeempelaveki ndandidla ngokuma emnyango ukuze ndigade abantu abangenayo. Kwakudla ngokufika abantu abamalunga ne-1000, ngoko ndandisoloko ndixakekile. Imilo yayiyinto yomhla nezolo. Ndandikhe ndihlaselwe ngemipu okanye ngemilomo yeebhotile. Abanye babantu endandingabavumeli ukuba bangene babedla ngokundilalela ngaphandle. Ndandineminyaka engama-20 yaye ndandicinga ukuba andinakoyiswa nto. Kodwa ke eyona nyaniso kukuba ndandingalawuleki, ndinochuku, ikratshi, amabhongo neenkani.

INDLELA EBUTSHINTSHE NGAYO UBOMI BAM IBHAYIBHILE: Utata akazange andincame. Wayedla ngokundithumelela IMboniselo noVukani!a Ndandingazifundi yaye zazifumba nje kwam. Ngenye imini ndagqiba kwelokuba ndikhe ndifunde ezinye zazo. Zazithetha ngendlela eziza kuphela ngayo ezopolitiko, ezoqoqosho kunye nonqulo yaza loo nto yandenza ndafowunela udade wethu. Yena nomyeni wakhe babengamaNgqina kaYehova. Bacela ukundifundisa iBhayibhile ndaza ndavuma.

Umgaqo ekuthethwa ngawo kumaGalati 6:7 wandenza ndafuna ukwenza utshintsho ebomini. Ubomi babundifundise ukuba yonke into endiyenzayo nendiyithethayo iza kuba negalelo kwinto obuza kuba yiyo ubomi bam ngomso. Kwakhona ndakhuthazwa kakhulu nguIsaya 1:18 othi: “‘Yizani, ke, silungelelanise imicimbi phakathi kwethu, utsho uYehova. Nangona izono zenu zingqombela, ziya kwenziwa mhlophe njengekhephu.’” Le vesi yandinceda ndisaqala nje ukufunda iBhayibhile ukuze ndingacingi ukuba ndinguncanyelweni.

Ngeenyanga nje ezintandathu ndandisele ndenze utshintsho nangona kwakunzima. Kwakufuneka ndahlukane neetshomi ezingalunganga. Ngoko ndaxelela iitshomi zam ukuba ndifunda iBhayibhile ndaza ndaqalisa ukuzishumayeza nazo. Zaqalisa ukundibaleka zisithi ndingumfundisi. Udade wethu wandinceda ndafumana umsebenzi ofanelekileyo.

Kwakhona ndaqalisa ukuya enkonzweni kwiHolo yoBukumkani awayengenela kuyo udade wethu kunye nomyeni wakhe, nangona yayikumgama weekhilomitha ezimalunga nama-30. Yayikho iHolo yoBukumkani eyayikufutshane nasekhaya kodwa ndandineentloni zokudibana nabantu ababendazi ndisengumntwana. Kanti ndandikoyika ukushumayela kummandla wasekhaya. Ndandiza kuthini ukuba ndandinokudibana nomntu endandikhe ndamgxotha kulaa ndawo ndandisebenza kuyo, okanye endandikhe ndamthengisela iziyobisi? Noko ke, xa ndandisenza imithambo ndafumanisa ukuba eyona iluncedo iba yeyona inzima. Ngenxa yoko ndashumayela ngoko nangoko ndisakufaneleka.

Enye into endandingayithandi kukufunda. Kodwa ke ndandisazi ukuba ukuze ndibe nokholo olomeleleyo kwakuza kufuneka ndiziqhelise ukuphanda nzulu ngezinto ezifundiswa yiBhayibhile. Ndafumanisa ukuba kufuneka uzimisele ukuze ube nokholo kanye njengokuba kufuneka uzimisele naxa uphakamisa iintsimbi.

INDLELA ENDINGENELWE NGAYO: Ndisadla amazimba. Kusafuneka ndilwe nobuthathaka bam. Kodwa ngoku ndonwabile kunye nomkam onobuntu obuhle bobuKristu. KumaNgqina kaYehova ndifumene abahlobo abanyanisekileyo endinokubathemba. Utata usweleke kwiminyaka emihlanu edluleyo, kodwa ngaphambi kokuba afe wavuyiswa kukwamkela unyana wakhe obuyileyo.

[Umbhalo osemazantsi]