Umlawuli Ofihlakeleyo Wehlabathi Uyabhencwa

NGESINYE isihlandlo, uYesu wathi: “Umlawuli weli hlabathi uza kuphoselwa phandle.” Kamva, wolek’ umsundulo wathi ‘umlawuli wehlabathi akanandlela yakubambelela kuye’ yaye “umlawuli weli hlabathi ugwetyiwe.” (Yohane 12:31; 14:30; 16:11) Wayethetha ngabani uYesu?

Xa sicinga ngoko uYesu wakuthethayo ‘ngomlawuli weli hlabathi,’ kucacile ukuba wayengenakuba ubhekisela kuYise, uYehova uThixo. Ngubani ke “umlawuli weli hlabathi”? Uza “kuphoselwa phandle” ngayiphi indlela yaye ‘ugwetywe’ njani?

“Umlawuli Weli Hlabathi” Uyaziveza

Njengokuba inkokeli yezikrelemnqa idla ngokuqhayisa ngamandla ayo, wenjenjalo uMtyholi xa wayelinga uYesu, uNyana kaThixo. Emva kokuba ebonise uYesu “zonke izikumkani” zehlabathi, uSathana wathi kuye: “Ndiza kukunika lonke eli gunya nozuko lwazo, ngenxa yokuba linikelwe kum, kwaye ndilinika nabani na endisukuba ndinqwenela ukumnika. Wena, ke ngoko, ukuba wenza isenzo sonqulo phambi kwam, konke kuya kuba kokwakho.”—Luka 4:5-7.

Ukuba uMtyholi wayeligama nje elimela ububi, njengokuba abanye bekholelwa ukuba kunjalo, wayenokumlinga njani uYesu? Ngaba uYesu wayelingwa ziingcinga zobubi okanye isidubedube esithile ekusenokwenzeka ukuba senzeka emva kokubhaptizwa kwakhe? Ukuba kunjalo, kunokutshiwo njani ukuba “akukho sono kuye”? (1 Yohane 3:5) UYesu akazange nakanye ayikhanyele impembelelo anayo uMtyholi ebantwini, kunoko wayivuma xa wathi ‘ungumlawuli weli hlabathi,’ nokuba ‘sisibulala-mntu nexoki.’—Yohane 14:30; 8:44.

Kwiminyaka emalunga nama-60 emva kokuthetha kukaYesu noMtyholi, umpostile uYohane wakhumbuza amaKristu ngamandla anawo uMtyholi, wathi “ihlabathi liphela lisemandleni ongendawo.” UYohane waphinda wathi “ulahlekisa umhlaba omiweyo uphela.” (1 Yohane 5:19; ISityhilelo 12:9) Kucacile ukuba, iBhayibhile ichaza isidalwa somoya esingabonakaliyo ‘njengomlawuli weli hlabathi.’ Kodwa unempembelelo engakanani eluntwini?

Umlawuli Wehlabathi Unamahlakani Amncedisayo

Xa umpostile uPawulos wayebhala ngomlo wamaKristu wokholo, wazichaza ngokucacileyo iintshaba zawo. Wathi: “Sizamazamana, kungekhona negazi nenyama, kodwa noorhulumente, namagunya, nabalawuli behlabathi bobu bumnyama, kwanemikhosi yoomoya abangendawo kwezasezulwini iindawo.” (Efese 6:12) Wabonisa ukuba lo mlo awukho phakathi kwabantu, kuba kuliwa, “kungekhona negazi nenyama,” kodwa kuliwa ‘nemikhosi yoomoya abangendawo.’

Ngokweenguqulelo zeBhayibhile zale mihla, le ‘mikhosi yoomoya ingendawo’ ayibhekiseli kubungendawo, kodwa ibhekisela kubantu bokomoya abanamandla nabakhohlakeleyo. Ezinye iinguqulelo ziliguqulela ngokuthi “imikhosi yoomoya engendawo ehlala ezulwini” (iThe Jerusalem Bible) okanye “imikhosi enamandla angaphezu kwawabantu” (iThe New English Bible). USathana ebesebenzisa igunya lakhe ngokusebenzisa iingelosi ezavukelayo nezashiya “indawo yazo efanelekileyo yokuhlala” ezulwini.—Yude 6.

Incwadi yeBhayibhile yesiprofeto sikaDaniyeli ichaza indlela aba “balawuli behlabathi” ababelilawula ngayo ihlabathi ukususela mandulo. Exhalatyiswa ngamaYuda awayebuyela eYerusalem evela ekuthinjweni eBhabhiloni ngowama-537 B.C.E., umprofeti uDaniyeli wawathandazela iiveki ezintathu. Ingelosi eyayithunyelwe nguThixo ukuba ize kumomeleza, yamchazela isizathu sokuba iye yalibaziseka. Yathi: “Inkosana yommandla wasebukhosini wasePersi yamelana nam iintsuku ezingamashumi amabini ananye.”—Daniyeli 10:2, 13.

Yayingubani le ‘nkosana yasePersi’? Kucacile ukuba le ngelosi yayingengoKoreshi uKumkani wasePersi, kuba ngelo xesha lo kumkani wayemthanda uDaniyeli nabantu bakowabo. Ngaphezu koko, ukumkani ongumntu wayenokukwazi njani ukusukuzana nesidalwa somoya iiveki ezintathu ngoxa ingelosi enye yakwazi ukubulala amajoni ali-185 000 ngosuku olunye? (Isaya 37:36) Le ‘nkosana yasePersi’ imel’ ukuba yayisisithunywa sikaMtyholi, idemon eyayilawula ummandla wobuKhosi basePersi. Kwakule ngxelo, ingelosi kaThixo yathi kuseza kufuneka ilwe “nenkosana yasePersi” kunye ‘nenkosana yaseGrisi.’—Daniyeli 10:20.

Sifunda ntoni kule ngxelo? Sifunda ukuba bakhona “abalawuli behlabathi” abangabonakaliyo, iinkosana eziziidemon ezisebenzisana nomphathi wazo uSathana uMtyholi ukulawula eli hlabathi. Kodwa yintoni injongo yazo?

Umlawuli Wehlabathi Uziveza Eyona Nto Ayiyo

KwiSityhilelo, incwadi yokugqibela yeBhayibhile, umpostile uYohane uthetha ngendlela uYesu, onguMikayeli umphathi weengelosi, amoyisa ngayo uMtyholi needemon zakhe aze achaze imiphumo emibi yokugxothwa kwakhe ezulwini. Sifunda oku: “Yeha kuwo umhlaba . . . ngenxa yokuba uhlile weza kuni uMtyholi, enomsindo omkhulu, esazi ukuba ixesha analo lifutshane.”—ISityhilelo 12:9, 12.

Uwubonakalisa njani uMtyholi umsindo wakhe? Kanye njengokuba iinkokeli zezaphuli mthetho zisebenzisa umgaqo ‘wokulawula okanye ukutshabalalisa,’ uMtyholi needemon zakhe zifuna umhlaba kunye nabantu zitshabalale nabo. Ekubeni esazi ukuba ixesha lakhe lifutshane, uMtyholi uye wasebenzisa enye inxalenye yehlabathi lakhe—ezoshishino—ukuze akhuthaze ukuba nguhlohl’ esakhe, nto leyo ebangela ukuba bushokoxeke ubuncwane bomhlaba kuze konakaliswe indalo ehlabathini lonke, nto leyo ebeka esichengeni ubomi babantu.—ISityhilelo 11:18; 18:11-17.

Ukususela oko abantu babakho, ukunyolukela kukaMtyholi igunya kubonakala kwezopolitiko nakunqulo. Incwadi yeSityhilelo ifanisa amagunya ezopolitiko nerhamncwa uMtyholi alinike ‘igunya elikhulu.’ Ithetha ngobuhlobo obukhoyo phakathi kwezopolitiko nonqulo njengokukrexeza kokomoya okucekisekayo. (ISityhilelo 13:2; 17:1, 2) Cinga nje ngengcinezelo, ubukhoboka, iimfazwe ukutyhubela iinkulungwane eziye zabulala izigidi zabantu. Ngaba ukho umntu onokuthi izinto ezimanyumnyezi eziye zenzeka ukutyhubela imbali yoluntu ziqhelekile? Okanye ngaba kungenxa yokuntlokothiswa yimimoya engendawo engabonakaliyo?

IBhayibhile iyambhenca lowo ebesoloko entlokothisa iinkokeli zabantu namagunya ehlabathi. Enoba bayazi okanye abazi, abantu babonakalisa iimpawu zomlawuli wehlabathi nomgaqo wakhe ‘wokulawula okanye ukutshabalalisa.’ Kodwa kuya kude kube nini abantu belawulwa nguMtyholi?

Ukutshatyalaliswa KukaMtyholi

Umsebenzi kaKristu emhlabeni ngenkulungwane yokuqala wabonisa ukuba uMtyholi needemon zakhe baza kubulawa. Xa abafundi bakaYesu bamxelela indlela abazikhuphe ngayo iidemon, wathi: “Ndiqalise ukumbona uSathana sele ewile ezulwini njengombane.” (Luka 10:18) Ngaloo mazwi, uYesu wayevuyiswa kukubona ukuba wayeza kumoyisa umlawuli wehlabathi xa ebuyele ezulwini njengoMikayeli uMphathi weengelosi. (ISityhilelo 12:7-9) Iziprofeto zeBhayibhile zibonisa ukuba esi siganeko senzeka ezulwini malunga nowe-1914.a

Ukususela ngaloo mini, uMtyholi ebesazi ukuba iintsuku zakhe zibaliwe. Nangona ‘lonke ihlabathi lilele emandleni akhe,’ izigidi zabantu azikhange zilahlekiswe nguye. IBhayibhile iye yazivula amehlo ukuze zimbone zize zazi namaqhinga akhe. (2 Korinte 2:11) Bakhuthazwa ngamazwi umpostile uPawulos awawabhalela amanye amaKristu athi: “UThixo onika uxolo uya kumtyumza uSathana kamsinya phantsi kweenyawo zenu.”b—Roma 16:20.

Kungekudala uMtyholi uza kutshabalala! Ngaphantsi kolawulo lukaKristu olunothando, abantu abangamalungisa baya kuguqula isihlalo seenyawo zikaThixo sokomfuziselo, umhlaba ube yiparadesi. Ugonyamelo, intiyo nokunyoluka ziya kuphela. IBhayibhile ithi: “Izinto zangaphambili aziyi kukhunjulwa.” (Isaya 65:17) Kuya kuba sisiqabu ngokwenene ukuphuncuka kumlawuli ofihlakeleyo weli hlabathi naphantsi kwegunya lakhe!

[Imibhalo esemazantsi]

[Amagama acatshulweyo akwiphepha 9]

Ngaphantsi kolawulo lukaKristu olunothando, abantu abangamalungisa baya kuguqula umhlaba ube yiparadesi