Funda KwiLizwi LikaThixo

Unokusondela Njani KuThixo?

Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zayo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Ngaba uThixo uphulaphula yonke imithandazo?

UYehova umema abantu bazo zonke iintlanga ukuba basondele kuye ngomthandazo. (INdumiso 65:2) Kodwa akaphulaphuli yonke imithandazo. Ngokomzekelo, xa amaSirayeli ayeqhubeka esenza izinto ezimbi, uYehova akazange avume ukuyiphulaphula imithandazo yawo. (Isaya 1:15) Nemithandazo yendoda ephethe kakubi umfazi wayo inokuthinteleka. (1 Petros 3:7) Sekunjalo, uThixo uyabaphulaphula aboni xa beguquka.—Funda eyesi-2 Kronike 33:9-13.

2. Sifanele sithandaze njani?

Umthandazo lilungelo nenxalenye yonqulo lwethu, ngoko sifanele sithandaze kuYehova kuphela. (Mateyu 4:10; 6:9) Ekubeni singafezekanga, simele sithandaze egameni likaYesu kuba nguye “indlela.” (Yohane 14:6) UYehova akafuni siphindaphinde into enye okanye siyibhale imithandazo kodwa ufuna sithandaze ngokusuka entliziyweni.—Funda uMateyu 6:7; Filipi 4:6, 7.

UMdali wethu unokuva nemithandazo esiyenza ngentliziyo. (1 Samuweli 1:12, 13) Ufuna sithandaze nanini na, ekuseni, ebusuku, ngexesha lokutya naxa sineengxaki.—Funda iNdumiso 55:22; Mateyu 15:36.

3. Kutheni amaKristu ehlanganisana?

Akululanga ukusondela kuThixo kuba siphila phakathi kwabantu abangenalukholo kuye nabahlekisa ngesithembiso sokubakho koxolo emhlabeni. (2 Timoti 3:1, 4; 2 Petros 3:3, 13) Ngoko kufuneka sibe nonxulumano olwakhayo nabazalwana bethu.—Funda amaHebhere 10:24, 25.

Unokusondela kuThixo ukuba uhlakulela ubuhlobo nabantu abamthandayo. Iintlanganiso zamaNgqina kaYehova zikunika ithuba lokomelezwa lukholo lwabanye.—Funda amaRoma 1:11, 12.

4. Unokusondela njani kuThixo?

Unokusondela kuThixo ngokucamngca ngezinto ozifunde kwiLizwi lakhe. Camngca ngezenzo zakhe, ulwalathiso nezithembiso zakhe. Ukucamngca kukwenza ube noxabiso ngothando nobulumko bukaThixo.—Funda uYoshuwa 1:8; INdumiso 1:1-3.

Unokusondela kuThixo ukuba ukholosa ngaye kwaye unokholo kuye. Kodwa ukholo lufana nento ephilayo efuna ukunyanyekelwa. Kufuneka usoloko ulomeleza ukholo lwakho ngokucamngca ngezinto ozikholelwayo.—Funda 1 Tesalonika 5:21; Hebhere 11:1, 6.

5. Kuya kukunceda njani ukusondela kuThixo?

UYehova ubakhathalele abo bamthandayo. Uyabakhusela kuyo nantoni na enokwenzakalisa ukholo nethemba labo lobomi obungunaphakade. (INdumiso 91:1, 2, 7-10) Uyasilumkisa ukuba sikuphephe ukuphila ngendlela eza kusenzakalisa size singonwabi. UYehova usifundisa eyona ndlela ifanelekileyo yokuphila.—Funda iNdumiso 73:27, 28; Yakobi 4:4, 8.

Ukuze ufumane inkcazelo engakumbi, funda isahluko 17 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.