IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w11 9/15 iphe. 16-20
  • Lubaleke Ngonyamezelo Ugqatso

No video available for this selection.

Sorry, there was an error loading the video.

  • Lubaleke Ngonyamezelo Ugqatso
  • IMboniselo Evakalisa UBukumkani BukaYehova—2011
  • Imixholwana
  • Amanqaku Afanayo
  • Kufuneka Unyamezele Ukuze Uphumelele
  • ‘Ilifu Lamangqina’
  • Aphumelela—Njani?
  • Oko Sikufundayo
  • Unako Ukunyamezela Kude Kuse Ekupheleni
    IMboniselo Evakalisa UBukumkani BukaYehova—1999
  • Ukubaleka Ugqatso Ngonyamezelo
    IMboniselo Evakalisa UBukumkani BukaYehova—1991
  • “Balekani Ngendlela Yokuba Niwufumane”
    IMboniselo Evakalisa UBukumkani BukaYehova—2011
  • “Lubaleke Kude Kube Sekugqibeleni Ugqatso”
    IMboniselo Evakalisa UBukumkani BukaYehova (Efundwayo)—2020
Khangela Okunye
IMboniselo Evakalisa UBukumkani BukaYehova—2011
w11 9/15 iphe. 16-20

Lubaleke Ngonyamezelo Ugqatso

“Masilubaleke ngonyamezelo ugqatso olubekwe phambi kwethu.”—HEB. 12:1.

1, 2. UPawulos walithelekisa nantoni ikhondo lobomi bomKristu?

NYAKA ngamnye, kubakho ugqatso lweembaleki kwiindawo ngeendawo. Iimbaleki eziphum’ izandla zingenela ugqatso zinenjongo enye—ukuphumelela. Uninzi lwabantu oluba nenxaxheba aludli ngokuba neenjongo eziphezulu. Luyaneliseka luze luzidle ngokufika nje entanjeni.

2 EBhayibhileni, ikhondo lobomi bomKristu lifaniswa nogqatso. Oku umpostile uPawulos wakubhala kwincwadi yakhe yokuqala eyayisiya kumaKristu aseKorinte yamandulo. Wathi: “Anazi na ukuba iimbaleki elugqatsweni zibaleka zonke, kodwa inye kuphela eyamkela umvuzo? Balekani ngendlela yokuba niwufumane.”—1 Kor. 9:24.

3. Kwakutheni ukuze uPawulos athi inye kuphela imbaleki efumana umvuzo?

3 Ngaba uPawulos wayesithi mnye kuphela umKristu owayeza kufumana umvuzo aze onke amanye abalekele ilize? Yayingenakwenzeka loo nto! Iimbaleki ezazingenela ukhuphiswano zaziziqeqesha zize zizibhokoxe ngenjongo yokuphumelela. UPawulos wayefuna ukuba abazalwana bakhe bazibhokoxe ngolo hlobo njengoko bekwindlela esa kubomi obungunaphakade. Xa besenjenjalo, babenokuba nethemba lokufumana umvuzo wobomi. Ewe, kugqatso lwamaKristu, bonke abafika entanjeni bayawufumana umvuzo.

4. Yintoni esifanele siyihlole ngokuphathelele ugqatso olubekwe phambi kwethu?

4 Loo mazwi ayakhuthaza, kodwa akamele athathwe lula ngabo bakugqatso lobomi namhlanje. Ngoba? Kuba umvuzo—enoba bubomi ezulwini okanye kwiParadesi emhlabeni—awunakulinganiswa nanto. Eneneni, olu gqatso lude yaye aluyondlwan’ iyanetha; mininzi imiqobo, iziphazamiso nezinto eziyingozi esidibana nazo. (Mat. 7:13, 14) Okubuhlungu kukuba, abantu abaninzi baye bayekelel’ umxakatho, bancama okanye bada bawa nasendleleni. Yiyiphi imiqobo neengozi esinokudibana nazo kugqatso lobomi? Unokuziphepha njani? Yintoni onokuyenza ukuze ufike entanjeni uze uluphumelele ugqatso?

Kufuneka Unyamezele Ukuze Uphumelele

5. Njengoko kubhalwe kumaHebhere 12:1, yintoni eyachazwa nguPawulos ngokuphathelele ugqatso?

5 Kwincwadi yakhe eyayisiya kumaKristu angamaHebhere eYerusalem nakwaYuda, uPawulos waphinda wacaphula izinto ezazisenziwa ziimbaleki elugqatsweni. (Funda amaHebhere 12:1.) Akazange atsalele ingqalelo kwisizathu sokuba selugqatsweni kuphela kodwa wachaza nento enokwenziwa ngumntu ukuze aphumelele. Ngaphambi kokuba sihlole isiluleko sikaPawulos esiphefumlelweyo esasisiya kumaKristu angamaHebhere size sifunde kuso, makhe siqwalasele oko kwashukumisela uPawulos ukuba abhale le leta noko wayekhuthaza abafundi beeleta zakhe ukuba bakwenze.

6. AmaKristu ayephantsi kwayiphi ingcinezelo eyayivela kwiinkokeli zonqulo?

6 AmaKristu enkulungwane yokuqala, ingakumbi lawo ayehlala eYerusalem nakwaYuda, ajongana neemvavanyo ezininzi nobunzima. Ayephantsi kwenkcaso ekrakra evela kwiinkokeli zonqulo zamaYuda, ezazinempembelelo enamandla ebantwini. Ngaphambilana, ezi nkokeli zaphumelela kwiyelenqe lokutyhola uYesu Kristu ngokuqhwaya udushe nelokumbulalisa njengesaphuli-mthetho. Zazityhala ngesifuba kwinkcaso yazo. Kwincwadi yeZenzo, sifunda iingxelo ezininzi zendlela ezaziwagrogrisa nezaziwahlasela ngayo amaKristu, ziqala ngokukhawuleza emva kwemimangaliso yePentekoste yowama-33 C.E. Ngokuqinisekileyo, oku kwakubaphilisa kabuhlungu abo bathembekileyo.—IZenzo 4:1-3; 5:17, 18; 6:8-12; 7:59; 8:1, 3.

7. Ngawaphi amaxesha amanqam awayephila kuwo amaKristu awabhalelwa nguPawulos?

7 Kwakhona, loo maKristu ayephila kwixesha langaphambi kwesiphelo senkqubo yezinto yamaYuda. UYesu wayewaxelele ngentshabalalo eyayiza kufikela uhlanga lwamaYuda olungathembekanga. Wayewaxelele nangeziganeko ezaziza kwenzeka ngaphambi kwesiphelo, ewanika nemiyalelo engqalileyo ngento awayeza kuyenza ukuze asinde. (Funda uLuka 21:20-22.) Yintoni ke awayeza kuyenza? UYesu wawalumkisa wathi: “Kodwa zilumkeleni ukuba iintliziyo zenu zingaze zisindwe kukuzingxala ngokutya nokusela kakhulu nangamaxhala obomi, ize ngequbuliso loo mini inifikele ngephanyazo.”—Luka 21:34.

8. Yintoni eyayinokubangela ukuba amanye amaKristu ayekelel’ umxakatho okanye oyisakale?

8 Ngexesha uPawulos awabhala ngalo incwadi yakhe eyayisiya kumaHebhere, kwakusele kudlule malunga neminyaka engama-30 ukususela oko uYesu wakhupha eso silumkiso. Achaphazeleka njani loo maKristu kukuhamba kwexesha? Amanye anikezela kwinkcaso neziphazamiso zemihla ngemihla aza akakwazi ukuhambela phambili ngokomoya, nto leyo eyayinokuwomeleza. (Heb. 5:11-14) Kuyabonakala ukuba amanye azixelela ukuba ubomi babuya kuba lula xa enokusuka nje alandele uninzi lwamaYuda olwaluwangqongile. Ngaphezu koko, loo maYuda ayengamlahlanga ngokupheleleyo uThixo; ayesawuthobela ukusa kumkhamo othile uMthetho wakhe. Amanye amaKristu ayelukuhlwa yaye esoyika abantu abathile ebandleni ababeqhankqalazela ukuba kubanjelelwe kuMthetho kaMoses namasiko. Yintoni eyayinokuthethwa nguPawulos neyayiza kunceda abazalwana bakhe abangamaKristu ukuze bahlale bephaphile ngokomoya baze banyamezele elugqatsweni?

9, 10. (a) Luluphi ukhuthazo lukaPawulos esilufunda ngasekupheleni kwamaHebhere isahluko 10? (b) Kwakutheni ukuze uPawulos abhale ngezenzo zokuthembeka zamangqina amandulo?

9 Kubangel’ umdla ukujonga indlela uPawulos, awathi ephefumlelwe nguThixo, wafuna ngayo ukomeleza amaKristu angamaHebhere. Kwisahluko se-10 sencwadi yakhe, uPawulos wachaza ukuba uMthetho ‘usisithunzi sezinto ezilungileyo eziza kuza’ yaye walichaza ngokucacileyo ixabiso ledini lentlawulelo likaKristu. Ngasekupheleni kweso sahluko, uPawulos wabongoza abafundi beeleta zakhe ngala mazwi: “Kufuneka ninyamezele, ukuze, nakuba nikwenzile ukuthanda kukaThixo, namkele inzaliseko yesithembiso. Kuba ‘sekulithuba elincinane kakhulu,’ ukuba athi ‘lowo uzayo afike yaye akayi kulibala.’”—Heb. 10:1, 36, 37.

10 KumaHebhere isahluko 11, uPawulos ucacisa ngobuchule oko kuthethwa lukholo lwenene kuThixo. Yaye ukuchaza esebenzisa imizekelo yamadoda nabafazi bokholo. Ngaba wayephume emxholweni? Akunjalo. Lo mpostile wayesazi ukuba abazalwana bakhe kwakufuneka baqonde ukuba ukholo lufuna inkalipho nonyamezelo. Umzekelo omhle wabo bakhonzi bakaYehova bamandulo nababethembekile wawuza komeleza amaHebhere ukuze amelane neemvavanyo nobunzima awayejongana nabo. Ngenxa yoko, emva kokuchaza izenzo zokholo zabo bantu bamandulo babenyanisekile, uPawulos wayefanele ukuthi: “Ngenxa yokuba sinelifu elikhulu kangaka lamangqina elisingqongileyo, masithi nathi sibothule bonke ubunzima nesono esisithandela ngokulula, yaye masilubaleke ngonyamezelo ugqatso olubekwe phambi kwethu.”—Heb. 12:1.

‘Ilifu Lamangqina’

11. Kunokuba nayiphi impembelelo kuthi ukucinga ‘ngelifu elikhulu lamangqina’?

11 ‘Ilifu elikhulu lamangqina’ lalingengobabukeli nje, ngokungathi kunjalo, ababezele ukubukela ugqatso okanye beze kubona enoba imbaleki abayithandayo iyaphumelela kusini na. Kunoko, babebandakanyeke njengeembaleki elugqatsweni. Yaye babebaleke ngempumelelo baza bafika entanjeni. Nangona ngoku bengasekho, banokugqalwa njengoomakad’ enetha beembaleki abanokukhuthaza iimbaleki ezisakhasayo elugqatsweni. Khawucinge nje ngendlela imbaleki enokuvakalelwa ngayo xa ibisazi ukuba ingqongwe okanye ibukelwe zezinye iimbaleki ezinamava neziphumeleleyo. Ngaba ibingayi kuchukumiseka ize izilahlele nofele? Abo bakhonzi bamandulo banokungqina ukuba ugqatso lokomfuziselo, lunokuphunyelelwa kungakhathaliseki ukuba lunzima kangakanani na. Ngenxa yoko, ngokusoloko ecinga ngomzekelo ‘welifu lamangqina,’ amaKristu enkulungwane yokuqala ayenokuba nenkalipho aze ‘alubaleke ngonyamezelo ugqatso’—njengoko nathi sinokwenjenjalo namhlanje.

12. Ibaluleke ngantoni kuthi imizekelo eyacatshulwa nguPawulos?

12 Uninzi lwabantu abathembekileyo uPawulos awathetha ngalo lwalujongene neemeko ezifana nezethu. Ngokomzekelo, uNowa wayephila xa ihlabathi langaphambi koNogumbe lalisesiphelweni. Siphila kufutshane nesiphelo sale nkqubo yezinto. UAbraham noSara bayalelwa ukuba balishiye ilizwe labo ukuze basukele unqulo lwenene baze balindele ukuzaliseka kwesithembiso sikaYehova. Nathi sibongozwa ukuba sizincame sikholise uYehova size sizuze iintsikelelo asithembisa zona. UMoses wahamba kwintlango eyoyikekayo, esingise kwiLizwe Lesithembiso. Nathi sihamba kwindlela enqumla kule nkqubo yezinto ifayo, sisingise kwihlabathi elitsha esilithenjisiweyo. Izinto awatyhubela kuzo la madoda, impumelelo nokoyisakala kwawo kuquka amandla nobuthathaka bawo, kubaluleke kakhulu ukuba siziqwalasele.—Roma 15:4; 1 Kor. 10:11.

Aphumelela—Njani?

13. UNowa wajongana naluphi ucelomngeni, yaye wancedwa yintoni ukuze aloyise?

13 Yintoni eyomeleza aba bakhonzi bakaYehova ukuze banyamezele baze baphumelele elugqatsweni? Phawula oko kwabhalwa nguPawulos ngoNowa. (Funda amaHebhere 11:7.) ‘Unogumbe wamanzi emhlabeni owawuza konakalisa yonke inyama’ wawuyinto uNowa ‘awayengekayiboni.’ (Gen. 6:17) Kwakungazange khe kubekho into ekuthiwa nguNogumbe ngaphambili. Sekunjalo, uNowa akazange athi ayinakwenzeka okanye ayithandabuze loo nto. Sasiyintoni isizathu? Kuba wayenokholo lokuba uYehova uya kuphumeza nantoni na ayithethileyo. UNowa akazange avakalelwe kukuba into awayeyalelwe ukuba ayenze yayinzima kakhulu. Kunoko, “wenza kanye njengoko.” (Gen. 6:22) Xa sicinga ngako konke uNowa awayefanele akwenze—ukwakha umkhombe, ukuqokelela izilwanyana, ukufaka ukutya kwabantu nokwezilwanyana emkhombeni, ukushumayela isigidimi esisisilumkiso nokugcina intsapho yakhe iqinile ngokomoya—kwakungengomsetyenzana nje owawunokwenziwa ngumntu “kanye njengoko.” Sekunjalo, ukholo nonyamezelo lukaNowa lwaphumela kubomi nasekusikelelweni kwakhe nentsapho yakhe.

14. Ziziphi iimvavanyo ezanyanyezelwa nguAbraham noSara, yaye isifundisa ntoni loo nto?

14 Kuludwe lukaPawulos ‘lwelifu lamaNgqina elisingqongileyo’ kulandela uAbraham noSara. Bayalelwa ukuba bayishiye iUre, indawo ababeqhele ukuhlala kuyo, yaye ikamva labo lalibonakala lingaqinisekanga. Bazingqina beyimizekelo yabantu abanokholo olungagungqiyo nabathobelayo ngexesha lovavanyo. Kuzo zonke izinto uAbraham awalungela ukuzincama ngenxa yonqulo lwenene, kwakufanelekile ukuba abizwe ‘njengoyise wabo bonke abo banokholo.’ (Roma 4:11) Ekubeni abaphulaphuli bakaPawulos babezazi kakuhle iinkcukacha zobomi buka-Abraham, uPawulos wathetha ngeengongoma eziphambili kuphela. Nangona kunjalo sifunda lukhulu kula mazwi kaPawulos: “Bonke aba [kuquka uAbraham nentsapho yakhe] bafela elukholweni, nangona bengazange bayifumane inzaliseko yazo izithembiso, kodwa bazibona zisekude, bazithakazelela baza bavakalisa esidlangalaleni ukuba babengabasemzini nabemi bokwexeshana elizweni elo.” (Heb. 11:13) Licacile elokuba bancedwa lukholo lwabo kuThixo kunye nolwalamano ababenalo kunye naye ukuze balubaleke ngonyamezelo ugqatso.

15. Yintoni eyakhuthaza uMoses ukuba aphile ngendlela awaphila ngayo?

15 UMoses ngomnye umkhonzi kaYehova ongumzekelo phakathi ‘kwelifu lamangqina.’ UMoses washiya ubomi bokuba sisityebi, “enyula ukuphathwa kabuhlungu kunye nabantu bakaThixo.” Yintoni eyamkhuthaza ukuba enjenjalo? UPawulos waphendula wathi; ‘Wakhangela ngenyameko emvuzweni. . . . Waqhubeka eqinile ngokungathi uyambona Lowo ungabonakaliyo.” (Funda amaHebhere 11:24-27.) UMoses akazange aphazanyiswe ‘kukuziyolisa ngesono okwexeshana.’ UMoses wayegqala uThixo njengomntu wokwenene kunye nezithembiso zakhe kangangokuba wabonisa inkalipho nonyamezelo olubalaseleyo. Wayezibhokoxa engadinwa ekhokela amaSirayeli ukuphuma eYiputa ukuya kwiLizwe Lesithembiso.

16. Kwakutheni ukuze uMoses angathi khunubembe xa wayengazange avunyelwe ukungena kwiLizwe Lesithembiso?

16 NjengoAbraham, uMoses akazange akubone ukuzaliseka kwesithembiso sikaThixo ngexesha awayephila ngalo. Ngexesha amaSirayeli ayelinde ukungena kwiLizwe Lesithembiso, waxelelwa oku uMoses: “Uya kulibonela mgama ilizwe elo, kodwa akuyi kungena kulo ilizwe endilinika oonyana bakaSirayeli.” Isizathu soku yayikukuba ngaphambilana yena noAron, ngenxa yokucatshukiswa yimvukelo yabantu, abazange ‘banyaniseke kuThixo phakathi koonyana bakaSirayeli emanzini aseMeribha.’ (Dut. 32:51, 52) Ngaba uMoses wathi khunubembe okanye waba krakra? Nakanye. Wabasikelela abantu waza waqukumbela ngala mazwi: “Unoyolo, Sirayeli! Ngubani na onjengawe, sizwana esisindiswe nguYehova, olikhakha loncedo lwakho, nekrele lobuhandiba bakho?”—Dut. 33:29.

Oko Sikufundayo

17, 18. (a) Ngokuphathelele ugqatso lobomi, sifunda ntoni ‘kwilifu lamangqina’? (b) Kuza kuthethwa ngantoni kwinqaku elilandelayo?

17 Njengoko siye sahlola ubomi babanye abantu ‘abalilifu elikhulu lamangqina elisingqongileyo,’ kucacile ukuba ukuze thina silubaleke silugqibe ugqatso, simele simthembe ngokupheleleyo uThixo nezithembiso zakhe. (Heb. 11:6) Ukholo alumele luze mva; kodwa lumele lube yeyona nto iphambili ebomini bethu. Ngokwahlukileyo kubantu ababengenalukholo, abakhonzi bakaYehova bakhangela phambili kwikamva. Siyakwazi ukumbona “Lowo ungabonakaliyo” size ngaloo ndlela silubaleke ngonyamezelo ugqatso.—2 Kor. 5:7.

18 Ugqatso lwamaKristu aluyondlwan’ iyanetha. Nangona kunjalo, sinako ukulugqiba ugqatso ngempumelelo. Kwinqaku elilandelayo, siza kuthetha ngoncedo olungakumbi esinalo.

Ngaba Unokuchaza?

• Kwakutheni ukuze uPawulos abhale okuninzi ngamangqina athembekileyo amandulo?

• Ukuba nomfanekiso ngqondweni ‘welifu lamangqina elisingqongileyo’ kunokusikhuthaza njani ukuba sibaleke ngonyamezelo?

• Ufunde ntoni wakuhlola amangqina athembekileyo afana noNowa, uAbraham, uSara, noMoses?

[Umfanekiso okwiphepha 19]

UAbraham noSara babekulungele ukushiya ubomi obutofotofo baseUre

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share