IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w11 9/15 iphe. 25-29
  • Ngaba Uyaziwa NguYehova?

No video available for this selection.

Sorry, there was an error loading the video.

  • Ngaba Uyaziwa NguYehova?
  • IMboniselo Evakalisa UBukumkani BukaYehova—2011
  • Imixholwana
  • Amanqaku Afanayo
  • Uyise Wabo Banokholo
  • Ukulindela KuYehova Kubonisa Ukuba Sinokholo
  • Umahluko Phakathi Kokuthobeka Nokuba Nekratshi
  • Ukuthobela Ulwalathiso LukaYehova Kufuna Ukuthobeka
  • UYehova Uyabazi Abangabakhe
  • Lithobele Ngokunyaniseka Igunya LikaThixo
    IMboniselo Evakalisa UBukumkani BukaYehova—2002
  • ‘Ukuhamba Ngokholo, Kungekhona Ngokubona’
    IMboniselo Evakalisa UBukumkani BukaYehova
  • Bamjikela UYehova
    Indifundisa Ntoni IBhayibhile?
  • UYehova Wathi ‘Ngumhlobo Wam’
    IMboniselo Evakalisa UBukumkani BukaYehova (Efundwayo)—2016
Khangela Okunye
IMboniselo Evakalisa UBukumkani BukaYehova—2011
w11 9/15 iphe. 25-29

Ngaba Uyaziwa NguYehova?

“UYehova uyabazi abakhe.”—2 TIM. 2:19.

1, 2. (a) Yintoni eyayixhalatyelwe nguYesu? (b) Yiyiphi imibuzo esimele siyihlole?

NGENYE imini kweza omnye umFarisi kuYesu waza wambuza lo mbuzo: “Nguwuphi owona myalelo mkhulu eMthethweni?” UYesu waphendula wathi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mat. 22:35-37) UYesu wayemthanda gqitha uYise wasezulwini ibe wayephila ngokuvisisana naloo mazwi. Kwakhona, uYesu wayeyixhalabele indlela awayejongwa ngayo nguYehova, yaye wakubonisa oko ngekhondo lakhe lokuthembeka. Ngoko ke, ngaphambi nje kokufa kwakhe, wayenokutsho ukuba uThixo wayemazi njengomntu owayethobela imiyalelo yakhe ngokuthembeka. Ngenxa yoko uYesu wahlala eluthandweni lukaYehova.—Yoh. 15:10.

2 Abantu abaninzi namhlanje bathi bayamthanda uThixo. Ngokuqinisekileyo sizibalela kwelo nani nathi. Kodwa ke, kukho imiba ebalulekileyo esimele siyihlole, ethi: ‘Ngaba ndiyaziwa nguThixo? Undijonga njani uYehova? Ngaba undazi njengomntu wakhe?’ (2 Tim. 2:19) Kulilungelo ngokwenene ukuba nolwalamano olusondele ngolo hlobo noMongami wendalo iphela!

3. Kutheni abanye abantu bethandabuza enoba bangabakaYehova kusini na, yaye yintoni enokunceda ukuze kulungiswe loo ngcinga?

3 Sekunjalo, kuba nzima kwabanye abantu abamthandayo uYehova ukukholelwa ukuba uThixo unokubazi ngezinto ezintle. Abanye baziva bengento yanto, baze bayithandabuze into yokuba bangabakaYehova. Sivuya ngokwenene ke thina kuba uThixo unokusijonga ngendlela eyahlukileyo! (1 Sam. 16:7) Umpostile uPawulos wathi kwamanye amaKristu: “Ukuba nabani na uyamthanda uThixo, uyaziwa nguye.” (1 Kor. 8:3) Ukuze waziwe nguThixo kubalulekile ukuba umthande kuqala. Cinga ngoku: Kutheni ufunda le mpapasho? Kutheni uzama ukukhonza uYehova ngentliziyo, ngomphefumlo, ngengqondo namandla akho ephela? Ukuba uzahlulele kuThixo yaye ubhaptizwe, yintoni eyakwenza wathatha loo manyathelo? IBhayibhile ithi uYehova, ohlola iintliziyo, utsala abanqwenelekayo. (Funda uHagayi 2:7; noYohane 6:44.) Ngoko ke, unokugqiba kwelokuba ukhonza uYehova ngenxa yokuba ekutsalile. Akasoze abashiye abantu abatsalileyo ukuba bahlala bethembekile. UThixo ubajonga njengabaxabisekileyo, yaye ubathanda kakhulu.—INdu. 94:14.

4. Kutheni sifanele siqhubeke sicinga ngesibakala sokuba sisaziwa nguThixo?

4 Xa sele uYehova esitsalile, eyona nto simele sizixhalabise ngayo kukuba sihlale eluthandweni lwakhe. (Funda uYude 20, 21.) Khumbula, iBhayibhile ithi kunokwenzeka ukuba sikhukuliseke okanye simke kuThixo. (Heb. 2:1; 3:12, 13) Ngokomzekelo, ngaphambi nje kwamazwi akweyesi-2 kuTimoti 2:19, umpostile uPawulos wakhankanya uHimenayo noFileto. Kuyacaca ukuba la madoda mabini ayekhe angabakaYehova ngaxa lithile, kodwa kamva ayishiya inyaniso. (2 Tim. 2:16-18) Kwakhona khumbula ukuba, kumabandla aseGalati, abanye ababekhe baziwa nguThixo abazange bahlale ekukhanyeni kokomoya ababekade bekunandipha. (Gal. 4:9) Ngamana singangaze siyithathe lula indlela exabisekileyo esijongwa ngayo nguThixo.

5. (a) Ziziphi ezinye iimpawu uThixo azixabisayo? (b) Yiyiphi imizekelo esiza kuyixubusha?

5 Kukho iimpawu uYehova azixabisa ngokukhethekileyo. (INdu. 15:1-5; 1 Pet. 3:4) Ukholo nokuthobeka zazisahlula abanye abantu ababesaziwa nguThixo. Makhe sihlole umzekelo wamadoda amabini ukuze sibone indlela ezi mpawu ezazibenza bathandwe ngayo nguYehova. Siza kufunda nangendoda eyayicinga ukuba iyaziwa nguThixo kodwa yaba nekratshi yaza yafumanisa ukuba uYehova uyigatyile. Siya kufunda lukhulu kule mizekelo.

Uyise Wabo Banokholo

6. (a) UAbraham walubonisa njani ukholo kwizithembiso zikaYehova? (b) Wayesaziwa njani uAbraham nguYehova?

6 UAbraham wayeyindoda ‘eyayikholwa kuYehova.’ Eneneni, ubizwa ngokuba “nguyise wabo bonke abo banokholo.” (Gen. 15:6; Roma 4:11) Ngokholo, uAbraham walishiya ikhaya lakhe, abahlobo bakhe nezinto zakhe eziphathekayo ukuze aye kwilizwe elikude. (Gen. 12:1-4; Heb. 11:8-10) Sele kudlule iminyaka emininzi kamva, ukholo luka-Abraham lwalusomelele. Oku kwabonakala xa “kwafana nokuba wayemnikele uIsake” unyana wakhe ngenxa yokuthobela umyalelo kaYehova. (Heb. 11:17-19) UAbraham wabonisa ukholo kwizithembiso zikaYehova, ngoko uThixo wamjonga njengomntu okhethekileyo; wayemazi ngokwenene uAbraham. (Funda iGenesis 18:19.) Apha asithethi ngokwazi nje ukuba kwakukho umntu ofana noAbraham; uYehova wayemxabisa njengomhlobo.—Yak. 2:22, 23.

7. Yintoni ebangel’ umdla ngenzaliseko yeziprofeto zikaYehova, yaye yamchaphazela njani le nto uAbraham?

7 Ibangel’ umdla into yokuba uAbraham akazange alifumane ngexesha awayephila ngalo ilifa lelizwe awayelithenjisiwe. Kanti akazange ayibone nembewu yakhe isiba “njengentlabathi eselunxwemeni lolwandle.” (Gen. 22:17, 18) Nangona ezi zithembiso zingazange zizaliseke ngexesha lika-Abraham, wahlala enokholo olomeleleyo kuYehova. Wayesazi ukuba xa uThixo ethethile, kwakufana nokungathi sele yenzekile loo nto. Ewe, uAbraham wayephila ngokuvisisana nokholo awayenalo. (Funda amaHebhere 11:13.) Ngaba uYehova usazi njengabantu abanokholo olufana noluka-Abraham?

Ukulindela KuYehova Kubonisa Ukuba Sinokholo

8. Yiyiphi iminqweno efanelekileyo abanye abantu abanqwenela ukuyibona ifezeka?

8 Kusenokwenzeka ukuba sineminqweno esijonge ngamehl’ abomvu ukuba ifezeke. Ukutshata, ukuba nabantwana, nokuba sempilweni zizinto eziqhelekileyo nekufanelekileyo ukuba sizinqwenele. Kodwa ke, kubantu abaninzi zisenokungafezeki zonke ezo zinto. Ukuba kunjalo nakuthi, indlela esiyisingatha ngayo loo meko inokubonisa ukholo esinalo.

9, 10. (a) Abanye baye bazama njani ukwanelisa iminqweno yabo? (b) Uvakalelwa njani ngenzaliseko yeziprofeto zikaThixo?

9 Akuyi kuba bubulumko ukuzama ukufezekisa le minqweno ngendlela eya kungqubana nobulumko bukaThixo. Loo nto inokubeka ulwalamano lomntu noThixo esichengeni. Ngokomzekelo, abanye baye bakhetha ukunyangwa ngendlela engqubana nesiluleko sikaYehova. Kanti abanye baye bathatha umsebenzi obenza basoloko bekude neentsapho zabo okanye iintlanganiso zebandla. Okanye kuthekani ngokuthandana nomntu ongeloNgqina? Ukuba umKristu ulandela elo khondo, ngaba ngokwenene ufuna ukwaziwa nguYehova? Wayenokuvakalelwa njani uYehova ukuba uAbraham wayenokuphelelwa ngumonde ngenzaliseko yezithembiso zikaThixo? Kuthekani ukuba uAbraham wayenokuzithathela kuye izinto, azakhele indlu aze azenzele igama elidumileyo kunokuba alindele kuYehova? (Thelekisa iGenesis 11:4.) Ngaba wayeza kuqhubeka esaziwa kakuhle nguYehova?

10 Yiyiphi iminqweno ofuna ukuyibona ifezeka? Ngaba ukholo lwakho lomelele ngokwaneleyo ukuba ulindele kuYehova, othembisa ukwanelisa iminqweno yakho efanelekileyo? (INdu. 145:16) Njengoko kwakunjalo kuAbraham, ezinye izithembiso zikaThixo zisenokungazaliseki ngokukhawuleza ngendlela ebesifuna ngayo. Sekunjalo, uYehova uyayixabisa into yokuba sizama ukuba nokholo olufana noluka-Abraham nokuphila ngokuvisisana nalo. Ngokuqinisekileyo, siya kungenelwa kakhulu xa sisenza loo nto.—Heb. 11:6.

Umahluko Phakathi Kokuthobeka Nokuba Nekratshi

11. Ngawaphi amalungelo ekusenokwenzeka ukuba ayenanditshwa nguKora, yaye loo nto yayibonisa ntoni ngendlela awayemkhonza ngayo uThixo?

11 UMoses noKora bahluke ngendlela ephawulekayo kumba wokuhlonela ilungiselelo nezigqibo zikaYehova. Izenzo zabo zayichaphazela indlela uYehova awayebajonga ngayo. UKora wayengumLevi ongumKohati yaye wanandipha amalungelo amaninzi ekusenokwenzeka ukuba phakathi kwawo yayikukubona ukuhlangulwa kohlanga kuLwandle Olubomvu, ukuxhasa imigwebo kaYehova nxamnye namaSirayeli angathobeliyo kwiNtaba yeSinayi, nokuba nenxaxheba ekuthwaleni ityeya yomnqophiso. (Eks. 32:26-29; Num. 3:30, 31) Wayenyanisekile kuYehova kangangeminyaka emininzi yaye wayethenjwa ngabantu abaninzi enkampini yamaSirayeli.

12. Njengoko kuboniswe kwiphepha 28, ikratshi layichaphazela njani indlela uKora awayesaziwa ngayo nguThixo?

12 Kodwa ke, ngoxa uhlanga lwakwaSirayeli lwalusiya kwiLizwe Lesithembiso, uKora wabona izinto awayecinga ukuba ziingxaki kwilungiselelo likaThixo. Yaye namadoda angama-250 awayekhokela uhlanga aba ngakwicala likaKora ezama ukwenza utshintsho. Kusenokwenzeka ukuba uKora nabanye babeqinisekile ngolwalamano lwabo noYehova. Bathi kuMoses: “Kwanele ngani, ngokuba indibano iphela ingcwele yaye uYehova uphakathi kwayo.” (Num. 16:2, 3) Babezithembile yaye benekratshi ngokugqith’ emgceni! Wathi uMoses kubo: “UYehova uya kusazisa lowo ungowakhe.” (Funda iNumeri 16:5.) Kwathi kuphela usuku olulandelayo, wabe uKora namahlakani akhe emvukelo sele befile.—Num. 16:31-35.

13, 14. Ziziphi iindlela uMoses awabonakalisa ngazo ukuthobeka?

13 Ngokwahlukileyo, uMoses ‘wayengoyena mntu ululamileyo kubantu bonke ababephezu komhlaba.’ (Num. 12:3) Wabonakalisa ukululama nokuthobeka ngokuzimisela ukulandela ulwalathiso lukaYehova. (Eks. 7:6; 40:16) Akukho nto ebonisa ukuba uMoses wayedla ngokuthandabuza indlela kaYehova yokwenza izinto okanye adikwe kukulandela imiyalelo ebekwe nguYehova. Ngokomzekelo, uYehova wakhupha umyalelo ophathelele ukwakhiwa komnquba echaza nezona nkcukacha zincinci, njengombala womsonto nenani lamarhintyela awayemele asetyenziswe ekwenzeni amalaphu entente. (Eks. 26:1-6) Ukuba kukho umveleli ongumntu entlanganweni kaThixo okhupha imiyalelo eneenkcukacha ezininzi ngokugqithiseleyo, mhlawumbi usenokudikwa ngamanye amaxesha. Kodwa ke, uYehova ungumveleli ogqibeleleyo, okhe abasebenzise abakhonzi bakhe nobathembayo. Xa enika iinkcukacha ezininzi, uyenza loo nto ngesizathu esihle. Kodwa ke, phawula ukuba uMoses akazange adikwe nguYehova xa wamnika ezo nkcukacha, ngokungathi uYehova uyamdelela okanye ubujongela phantsi ubuchule anabo, emohlutha inkululeko yokuzenzela izinto. Kunoko, uMoses waqinisekisa ukuba abasebenzi “benza kanye njengoko” ukulandela ulwalathiso lukaThixo. (Eks. 39:32) Wayethobeke ngokwenene! UMoses wayeqonda ukuba yayingumsebenzi kaYehova yaye yena wayefana nje nesixhobo sokwenza loo msebenzi.

14 Indlela uMoses awayethobeke ngayo yabonakala kwakhona xa wajongana nocelomngeni olwachaphazela yena ngenkqu. Ngesinye isihlandlo, uMoses akazange akwazi ukubamba umsindo wakhe waza akamngcwalisa uThixo xa wayeqhubana nabantu ababekhalaza. Umphumo waba kukuba, uYehova axelele uMoses ukuba akazi kubakhokelela abantu kwiLizwe Lesithembiso. (Num. 20:2-12) Yena nomntakwabo uAron banyamezela ukumbombozela kwamaSirayeli kangangeminyaka. Kodwa kuba nje uMoses wona ngeso sihlandlo sinye kuphela, waphulukana nento awayesoloko eyilindele kangangexesha elide! Wasabela njani ke uMoses? Ewe kona waphoxeka, kodwa uMoses wasamkela ngokuthobeka isigqibo sikaYehova. Wayesazi ukuba uYehova unguThixo olungileyo ekungekho bugqwetha kuye. (Dut. 3:25-27; 32:4) Xa ucinga ngoMoses, ngaba akumjongi njengomntu owaziwa nguYehova?—Funda iEksodus 33:12, 13.

Ukuthobela Ulwalathiso LukaYehova Kufuna Ukuthobeka

15. Sifunda ntoni kwikhondo likaKora lokuba nekratshi?

15 Indlela esisabela ngayo kutshintsho olwenziwa kwibandla lamaKristu ehlabathi lonke nakwizigqibo ezenziwa ngabazalwana abakhokelayo inegalelo kwindlela esaziwa ngayo nguYehova. UKora namahlakani akhe bazahlula kuThixo ngenxa yokuzithemba ngokugqith’ emgceni, ikratshi nokungabi nalukholo. Nangona emehlweni kaKora yayinguMoses owayesenza izigqibo zemihla ngemihla, eneneni yayinguYehova owayesalathisa uhlanga. UKora akazange ayiqonde loo nto waza wayeka ukunyaniseka kubantu ababesetyenziswa nguThixo. Kwakuya kuba bubulumko ukuba uKora alindele ukuba ibe nguYehova ocacisa izinto okanye owenza utshintsho xa ngokwenene oko kuyimfuneko. Ngoko ke, yonke inkonzo kaKora yokuthembeka yemka namanzi ngenxa yezenzo zakhe zekratshi!

16. Ukulandela umzekelo kaMoses wokuthobeka kunokuyichaphazela njani indlela esaziwa ngayo nguYehova?

16 Loo ngxelo isisilumkiso esingamele sithathwe lula ngabadala nabanye ebandleni. Ukukwazi ukulindela kuYehova size silandele ulwalathiso lwabo bamiselwe ukuba bakhokele namhlanje kufuna ukuthobeka. Ngaba sibonisa ukuba sithobekile yaye sinobulali njengoMoses? Ngaba siyabahlonela abo bakhokelayo phakathi kwethu size sizithobe kulwalathiso esilufumanayo? Ngaba xa siyakwazi ukuzeyisa xa siphoxeka? Ukuba kunjalo, nathi siya kwaziwa kakuhle nguYehova. Ukuthobeka kwethu kuya kusenza sithandwe nguye.

UYehova Uyabazi Abangabakhe

17, 18. Yintoni enokusinceda siqhubeke sisaziwa njengabantu bakaYehova?

17 Siya kungenelwa xa sicinga ngabantu abatsalwa nababesaziwa kakuhle nguYehova. UAbraham noMoses babengafezekanga yaye babezenza iimpazamo, njengoko nathi sinjalo. Sekunjalo, uYehova wayebazi njengabantu abangabakhe. Kodwa ke, umzekelo kaKora, ubonisa ukuba kunokwenzeka ukuba nathi simshiye uYehova size singaziwa kakuhle nguye. Ngamnye kuthi uya kuba wenza kakuhle xa ezibuza le mibuzo: ‘Undijonga njani uYehova? Ndifunda ntoni kule mizekelo yeBhayibhile?’

18 Kuyathuthuzela ukwazi ukuba uYehova ubajonga njengabangabakhe abantu abathembekileyo abatsalileyo. Qhubeka usiba nokholo olungakumbi, uthobeke uze ube nezinye iimpawu ezikwenza uthandwe nangakumbi nguThixo wakho. Ayinakuphikiswa into yokuba ukwaziwa nguYehova kulilungelo elixabisekileyo elisenza saneliseke ebomini bethu ngoku, nelisenza sikhangele phambili kwiintsikelelo ezingummangaliso kwikamva.—INdu. 37:18.

Ngaba Uyakhumbula?

• Luluphi ulwalamano oluxabisekileyo onokuba nalo noYehova?

• Unokuluxelisa njani ukholo luka-Abraham?

• Ziziphi izinto esinokuzifunda kuKora noMoses?

[Umfanekiso okwiphepha 26]

NjengoAbraham, ngaba sinokholo lokuba uYehova uya kuzizalisekisa ngokupheleleyo izithembiso zakhe?

[Umfanekiso okwiphepha 28]

UKora wayengakulungelanga ukuthobela ulwalathiso

[Umfanekiso okwiphepha 29]

Ngaba waziwa nguYehova njengomntu othobekileyo noluthobelayo ulwalathiso?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share