Ngaba Unokufana NoFinehasi Xa Ujongene Nezilingo?
KULILUNGELO elixabisekileyo ukukhonza njengomdala webandla. Noko ke, iLizwi likaThixo lithi abadala baye bajamelane nezinto ezilucelomngeni. Ngamanye amaxesha, basingatha amatyala athile esono apho kuye kufuneke ‘bagwebe ngenxa kaYehova.’ (2 Kron. 19:6) Okanye umveleli usenokufumana isabelo acinga ukuba akasilungelanga, njengoko kwakunjalo ngoMoses, owabuza wathi ngokuphathelele esinye isabelo: “Ndingubani na mna ukuba ndingade ndiye kuFaro?”—Eks. 3:11.
IZibhalo, eziphefumlelwe kwangomoya oyingcwele omisela abadala, zisinika imizekelo yabaveleli abajongana neemvavanyo ngempumelelo. UFinehasi wayengunyana kaEleyazare ekwangumzukulwana ka-Aron, yaye ngenxa yoko wayeza kuba ngumbingeleli omkhulu. Izinto ezintathu ezenzeka ebomini bakhe zibalaselisa imfuneko yokuba abadala namhlanje bajamelane nocelomngeni ngenkalipho, babe nokuqonda baze bayame ngoYehova.
“Wasuka Ngoko Nangoko”
Ngexesha amaSirayeli ayemise iinkampu kumaThafa akwaMowabhi, uFinehasi wayengumfana. IBhayibhile ithi: “Baqala abantu baba neentlobano zokuziphatha okubi neentombi zakwaMowabhi. . . . Baza baqubuda koothixo bawo.” (Num. 25:1, 2) UYehova wababetha abo benzi bobubi ngesibetho esibulalayo. Ngaba unokuyithelekelela indlela le ngxelo yokwenza okubi nesibetho esabangelwa yiyo emele ukuba yamchaphazela ngayo uFinehasi?
Iqhubeka ithi le ngxelo: “Khangela! kweza ndoda ithile yakoonyana bakaSirayeli, yasondeza kubazalwana bayo umfazi womMidiyan phambi kwamehlo kaMoses naphambi kwamehlo endibano yonke yoonyana bakaSirayeli, ngoxa babelila emnyangweni wentente yokuhlangana.” (Num. 25:6) Wayeza kwenza ntoni umbingeleli uFinehasi? Wayeselula, yaye loo mSirayeli wayesenza okubi wayesisikhulu esasikhokela abantu kunqulo.—Num. 25:14.
Kodwa uFinehasi woyika uYehova kunabantu. Wathi akubona esi sibini, ngoko nangoko wathatha incula, wayilandela indoda leyo yakwaSirayeli ukuya ententeni waza wabahlaba bobabini. Wayijonga njani uYehova inkalipho nokuzimisela kukaFinehasi? UYehova wakhawuleza wasiphelisa isibetho waza wavuza uFinehasi ngomnqophiso wokuba ububingeleli buhlale kumnombo wakhe ‘ixesha elingenammiselo.’—Num. 25:7-13.
Ewe kona, abadala abangamaKristu namhlanje ababheneli kugonyamelo. Kodwa njengoFinehasi, abadala bamele bakulungele ukuzijul’ ijacu baze babe nenkalipho. Ngokomzekelo, uGuilherme wayeneenyangana nje engumdala xa wacelwa ukuba akhonze kwikomiti egwebayo. Ityala lesono ababelisingatha lalibandakanya umdala owanceda uGuilherme xa wayeselula. Uthi, “Ndaziva ndingakufanelekelanga ukusingatha elo tyala. Ndandilala obungehliyo. Ndaqhubeka ndiyijikajika engqondweni yam indlela endandinokulisingatha ngayo eli tyala ngaphandle kokuba ndivumele imfobe indivale amehlo ndingagwebi ngokwemilinganiselo kaThixo. Zaqengqeleka iintsuku ndithandaza yaye ndiphanda nakwiimpapasho ezisekelwe eBhayibhileni.” Oku kwamnceda waba nenkalipho yokusingatha loo meko waza wanikela uncedo lokomoya kumzalwana wakhe owonileyo.—1 Tim. 4:11, 12.
Xa bezimisela baze babonakalise inkalipho xa kukho iimeko ezifuna loo nto ebandleni, abadala bamisela umzekelo wokuba nokholo nokunyaniseka. Kakade ke, namanye amaKristu kukwafuneka abe nenkalipho, ngokuthi xa efumanisa ukuba kwenziwe isono esinzulu asichaze. Ngokufanayo, kufuna ukunyaniseka ukuze umntu ayeke ukunxulumana nomhlobo okanye isalamane esisuswe kubudlelane.—1 Kor. 5:11-13.
Ukuba Nengqiqo Kuyayithintela Intlekele
Inkalipho kaFinehasi yayingebobutyhuthutyhuthu nje bobuntwana. Cinga ngendlela awakubonisa ngayo ukuqonda—ngokwenza ngobulumko nangengqiqo—xa weva ngenye ingxelo. Izizwe zakwaRubhen nesakwaGadi nesiqingatha sesizwe sakwaManase zakha isibingelelo kufutshane noMlambo iYordan. Amanye amaSirayeli agqiba kwelokuba eso sibingelelo sasakhelwe unqulo lobuxoki aza aqula elungiselela imfazwe.—Yosh. 22:11, 12.
Wenza ntoni uFinehasi? UFinehasi kunye nezikhulu zakwaSirayeli, zawuxubusha ngobulumko lo mbandela kunye nabo babakhe eso sibingelelo. Ezo zizwe zazityholwa zawucacisa loo mba, zisitsho ukuba enyanisweni eso sibingelelo sasenzelwe “inkonzo kaYehova.” Ngaloo ndlela, kwathintelwa intlekele.—Yosh. 22:13-34.
Ukuba umKristu uva isityholo okanye ingxelo embi ngomnye umkhonzi kaYehova, kuya kuba bubulumko ngokwenene ukuba axelise uFinehasi! Ukuba nengqiqo kusinceda singacaphuki msinya okanye sisasaze izinto ezimbi ngabazalwana bethu.—IMize. 19:11.
Ukuba nengqiqo kunokubanceda njani abadala baxelise uFinehasi? UJaime, obe ngumdala ngaphezu kweminyaka elishumi, uthi: “Xa umvakalisi eqalisa ukundibalisela ngengxabano yakhe nomnye umntu, ndiye ndikhawuleze ndicele uYehova andincede ndingathathi cala kodwa ndinikele ukhokelo lweZibhalo. Kwakha kwafika omnye udade endixelela ngengxaki awayenayo ephathelele indlela awaphathwa ngayo ngumzalwana oneembopheleleko okwelinye ibandla. Ekubeni loo mzalwana wayengumhlobo wam, kwakunokuba lula ngam ukuba ndiye kuthetha naye. Kunoko, ndaqiqa nalo dade ngemigaqo eliqela yeBhayibhile. Wavuma ukuya kuthetha nalo mzalwana ngokwakhe kuqala. (Mat. 5:23, 24) Akuzange kube lula ukuxolelana kwangoko. Ngoko ndambongoza lo dade ukuba ahlole eminye imigaqo yeZibhalo. Wagqiba ekubeni aphinde ayithandazele loo meko aze azabalazele ukuxolela.”
Waba yintoni umphumo? UJaime uthi: “Kwiinyanga eziliqela kamva, lo dade weza kum. Wachaza ukuba, emva kwexesha laa mzalwana wazisola ngento awayithethayo. Walungiselela ukuba basebenze kunye entsimini waza wamxelela nendlela amxabisa ngayo. Yalungiswa loo ngxaki. Ukuba ndandiyingenile loo ngxabano, ndibe ndibonakala ngathi ndithatha icala, ngaba ikho into ebhetele engendandiyenzile?” IBhayibhile ithi: “Musa ukungxama ngokuya kuchophela ityala.” (IMize. 25:8) Abadala abanengqiqo bawacebisa ngobulumko amaKristu aneengxabano namanye ukuba asebenzise imigaqo yeZibhalo ukuze akhuthaze aze adale uxolo.
Wabuzisa KuYehova
UFinehasi wayenelungelo lokukhonza njengombingeleli wabantu abanyulwe nguThixo. Njengoko kubonisiwe, waba nenkalipho nengqiqo ebalaseleyo eselula kakhulu. Noko ke, ukujamelana kwakhe ngempumelelo nocelomngeni kwakuxhomekeke ekuthembeleni kwakhe kuYehova.
Emva kokudlwengulwa nokubulawa kweshweshwe lomLevi ngamadoda aseGibheya, esizwe sakwaBhenjamin, ezinye izizwe zavusa imfazwe nxamnye namaBhenjamin. (ABagwe. 20:1-11) Zathandazela uncedo lukaYehova ngaphambi kokuya kulwa, kodwa zoyiswa kwade kwakabini, kwabulawa abantu abaninzi. (ABagwe. 20:14-25) Ngaba zazinokugqiba kwelokuba zazithandazela ilize? Ngaba ngokwenene uYehova wayenomdla wokuzibona zisabela kububi obenzekileyo?
Eqinisekile, uFinehasi, owayesele engumbingeleli omkhulu wakwaSirayeli, wavela kwakhona. Wathandaza esithi: “Ndiphume na kwakhona ndiye edabini nxamnye noonyana bakaBhenjamin umzalwana wam okanye ndiyeke?” UYehova wamphendula, waza wanikela amaBhenjamin esandleni sabo, yaye iGibheya yatshiswa ngomlilo.—ABagwe. 20:27-48.
Sinokufunda ntoni kule ngxelo? Ezinye iingxaki zebandla zisenokuqhubeka zikho nakuba abadala besenza imigudu yaye bethandazela uncedo lukaThixo. Xa oku kusenzeka, abadala bafanele bakhumbule la mazwi kaYesu: “Qhubekani nicela [okanye nithandaza], niya kunikwa; qhubekani nifuna, niya kufumana; qhubekani ninkqonkqoza, niya kuvulelwa.” (Luka 11:9) Nokuba imithandazo ibonakala ngathi ayiphendulwa msinya, abaveleli banokuqiniseka ukuba uYehova uya kuyiphendula ngexesha lakhe.
Ngokomzekelo, elinye ibandla laseIreland lalikufuna ngamandla ukuba neHolo yoBukumkani kodwa lingathandwa ngunocanda wasekuhlaleni. Wazikhaba zonke izicelo zesiza abazalwana ababenethemba lokwakha kuso. Kwabonakala ngathi oyena mntu wayenokuzamkela izicelo zabo ligosa eliyintloko elikwiofisi yelizwe lonke. Ngaba umthandazo wawuza kubanceda, njengoko kwakunjalo ngemihla kaFinehasi?
Omnye umdala wasekuhlaleni uthi: “Emva kokuthandaza nokukhunga ngamandla, saya kwiofisi ephezulu yoonocanda. Ndaxelelwa ukuba mhlawumbi kwakuya kudlula iiveki ngaphambi kokuba sithethe negosa eliyintloko. Noko ke, sakwazi ukuba nentlanganiso yemizuzu emihlanu kunye nalo. Emva kokuba libone iiplani zethu ezizotywe ngokutsha, lakhawuleza lasinika imvume yokuqhubeka, yaye ukususela ngoko unocanda wasekuhlaleni wenza konke okusemandleni akhe ukusinceda. Loo mava asiqinisekisa ngendlela onamandla ngayo umthandazo.” Ngokwenene, uYehova uya kuyiphendula imithandazo enyanisekileyo yabadala abathembela ngaye.
UFinehasi wayethwele iimbopheleleko ezinzima kuSirayeli wamandulo; kodwa ngenxa yenkalipho, ingqiqo nokuthembela ngoThixo, wakwazi ukujamelana ngempumelelo nolo celomngeni. Yaye indlela uFinehasi awayelinyamekela ngokuzimisela ngayo ibandla likaThixo yamenza wakholiseka kuYehova. Kwiminyaka eli-1 000 kamva, uEzra waphefumlelwa ukuba abhale la mazwi: “YayinguFinehasi unyana kaEleyazare owayeyinkokeli yabo ngaphambili. UYehova wayenaye.” (1 Kron. 9:20) Ngamana kungaba njalo kubo bonke abakhokela abantu bakaThixo namhlanje, eneneni, kuwo onke amaKristu amkhonza ngokunyaniseka.