‘Thuthuzela Bonke Abazilileyo’
“UYehova undithambisele . . . ukuthuthuzela bonke abazilileyo.”—ISA. 61:1, 2.
1. UYesu wabenzela ntoni abo bazilileyo yaye ngoba?
UYESU KRISTU wathi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.” (Yoh. 4:34) Xa wayesenza isabelo asinikwe nguThixo, uYesu wabonakalisa iimpawu ezibalaseleyo zikaYise. Phakathi kwazo luthando lukaThixo olubalaseleyo ngabantu. (1 Yoh. 4:7-10) Umpostile uPawulos wathetha ngenye indlela olwaboniswa ngayo olo thando xa wachaza uYehova ‘njengoThixo wentuthuzelo yonke.’ (2 Kor. 1:3) UYesu wabonisa olo thando xa wenza oko kwachazwa kwisiprofeto sikaIsaya (Funda uIsaya 61:1, 2.) UYesu wafunda eso siprofeto kwindlu yesikhungu yaseNazarete waza wabhekisela amazwi aso kuye. (Luka 4:16-21) Ngalo lonke ixesha lobulungiseleli bakhe, ngothando uYesu wathuthuzela abazilileyo, ebakhuthaza yaye ebanika uxolo lwengqondo.
2, 3. Kutheni abalandeli bakaKristu bemele bamxelise ekuthuthuzeleni?
2 Bonke abalandeli bakaYesu kufuneka bamxelise ngokuthuthuzela abo bazilileyo. (1 Kor. 11:1) UPawulos wathi: “Hlalani nithuthuzelana yaye nisakhana.” (1 Tes. 5:11) Kufuneka sithuthuzelane ngamandla, kuba ngoku uluntu luphakathi ‘kumaxesha amanqam ekunzima ukujamelana nawo.’ (2 Tim. 3:1) Ngaphezu koko, abantu abaneentliziyo ezinyanisekileyo bathuthuzelwa ngabantu abathetha baze benze izinto ezibangela iintlungu nosizi.
3 Njengoko iBhayibhile yaprofetayo, kwimihla yokugqibela yale nkqubo ingendawo yezinto, abantu abaninzi ‘bayazithanda, bangabathandi bemali, bayazidla, banekratshi, bayanyelisa, ababathobeli abazali, abanambulelo, abanyanisekanga, abanawo umsa wemvelo, abayifuni kwaphela imvisiswano, bayanyelisa, abakwazi kuzeyisa, baziindlobongela, abakuthandi ukulunga, bangabangcatshi, baneentloko ezilukhuni, bakhukhumele likratshi, bangabathandi beziyolo kunokuba bathande uThixo.” Ngoku ezo zimo zengqondo zithath’ unyawo kunanini na ngaphambili kuba, ‘abantu abangendawo namabhedengu baye bahambela phambili ebubini.’—2 Tim. 3:2-4, 13.
4. Kwenzeka ntoni kwiimeko zehlabathi zomhla wethu?
4 Konke oku akumele kusothuse, ekubeni iLizwi likaThixo liyibeka icace into yokuba “ihlabathi liphela lisemandleni ongendawo.” (1 Yoh. 5:19) “Ihlabathi liphela” liquka ezobupolitika, unqulo nezorhwebo kunye namajelo aqhatha abantu. Ngaphandle kwamathandabuzo, uSathana uMtyholi ufanele ukubizwa ngokuba ‘ngumlawuli wehlabathi’ ‘nothixo wale nkqubo yezinto.’ (Yoh. 14:30; 2 Kor. 4:4) Iimeko ziyaqhubeka zidodobala ngenxa yokuba ngoku uSathana unomsindo omkhulu, esazi ukuba usalelwe lixesha elifutshane ngaphambi kokuba uThixo amshenxise. (ISityhi. 12:12) Kuthuthuzela ngokwenene ukwazi ukuba uThixo sele eza kuyeka ukunyamezela uSathana nenkqubo yakhe ekhohlakeleyo yaye umba owaphakanyiswa nguSathana ngokuphathelele ulongamo lukaYehova uza kuzinziswa!—Gen., isahlu. 3; Yob., isahlu. 2.
Iindaba Ezilungileyo Ziyashunyayelwa Emhlabeni Wonke
5. Isiprofeto esiphathelele umsebenzi wokushumayela sizaliseka njani kule mihla yokugqibela?
5 Ngeli xesha linzima kwimbali yabantu, oko kwaprofetwa nguYesu kuyazaliseka. Wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mat. 24:14) Lo msebenzi wokunikela ubungqina ngoBukumkani bukaThixo emhlabeni wonke wenziwa ngomkhamo omkhulu ngendlela engathethekiyo. Namhlanje, angaphezu kwe-7 500 000 amaNgqina kaYehova, ahlanganisana kumabandla angaphezu kwe-107 000 emhlabeni wonke ashumayela ngoBukumkani bukaThixo, kanye njengoko uYesu wabenza umxholo wakhe wokushumayela nokufundisa. (Mat. 4:17) Ngenxa yomsebenzi wethu wokushumayela owenziwa kule mihla, baninzi abantu abazilileyo abathuthuzelwayo. Kaloku, kwiminyaka emibini edluleyo, abantu abangama-570 601 baye babhaptizwa baba ngamaNgqina kaYehova!
6. Ucinga ntoni ngomkhamo owenziwa ngawo umsebenzi wethu wokushumayela?
6 Ukuze uwuqonde kakuhle umkhamo owenziwa ngawo lo msebenzi wokushumayela, phawula ukuba ngoku amaNgqina kaYehova aguqulela aze asasaze uncwadi lweBhayibhile ngeelwimi ezingaphezu kwama-500. Akuzange kwenzeke nantoni na enjengale kuyo yonke imbali yoluntu! Ubukho, ukusebenza nokukhula kwenxalenye esemhlabeni yentlangano kaYehova kukhetheke ngokwenene. Ukuba belungekho uncedo nolwalathiso lomoya kaThixo oyingcwele nonamandla, ibingenakwenzeka into enjalo kwihlabathi elilawulwa nguSathana. Ngenxa yokuba iindaba ezilungileyo zishunyayelwa kuwo wonke umhlaba omiweyo, ngoku intuthuzelo esuka eZibhalweni ayifunyanwa ngamaKristu esikhonza kunye nawo kuphela kodwa kwanangabo bazilileyo bamkela isigidimi soBukumkani.
Ukuthuthuzela Amanye AmaKristu
7. (a) Kutheni singenakulindela ukuba uYehova asuse zonke iimeko ezibangela uxinezeleko ngoku? (b) Sazi njani ukuba sinako ukunyamezela intshutshiso nembandezelo?
7 Kweli hlabathi lizaliswe bubungendawo nokubandezeleka, siqinisekile ukuba siza kuhlangabezana neemeko ezixinezelayo. Asinakulindela ukuba uThixo asuse zonke izinto ezisibangela ukuba singonwabi okanye zisenze buhlungu, de ayitshabalalise le nkqubo yezinto. Kwangaxeshanye, xa sijamelene nentshutshiso eyayiprofetiwe, ingqibelelo yethu kuYehova iba sengozini njengabaxhasi bakhe kwimbambano yolongamo lwendalo iphela. (2 Tim. 3:12) Noko ke, njengoko sincedwa size sithuthuzelwe nguBawo wethu wasezulwini, sinokufana namaKristu athanjisiweyo eTesalonika yamandulo, awanyamezela iintshutshiso neembandezelo ngokholo.—Funda eyesi-2 kwabaseTesalonika 1:3-5.
8. Bubuphi ubungqina obuseZibhalweni bokuba uYehova uyabathuthuzela abakhonzi bakhe?
8 Asithandabuzi ukuba uYehova uyabanika intuthuzelo eyimfuneko abakhonzi bakhe. Ngokomzekelo, xa ubomi bukamprofeti uEliya babusongelwa nguKumkanikazi uIzebhele ongendawo, loo mprofeti waphelelwa yinkalipho waza wabaleka, esitsho nokuba ubawela ukufa. Kodwa kunokuba amkhalimele uEliya, uYehova wamthuthuzela waza wamomelezela ukwenza umsebenzi wakhe njengomprofeti. (1 Kum. 19:1-21) Isibakala sokuba uYehova uyabathuthuzela abantu bakhe sinokubonwa kumava ebandla lamaKristu lenkulungwane yokuqala. Ngokomzekelo, sifunda ngexesha apho “ibandla kulo lonke elakwaYuda naseGalili naseSamariya laba noxolo, lisakheka. Ngaphezu koko, “njengoko lalihamba ekoyikeni uYehova nakwintuthuzelo yomoya oyingcwele laqhubeka lisanda.” (IZe. 9:31) Sinombulelo ongazenzisiyo kuba nathi ‘sinentuthuzelo yomoya oyingcwele’!
9. Kutheni ukufunda ngoYesu kunokusithuthuzela?
9 NjengamaKristu kuyasithuthuzela ukufunda ngoYesu Kristu nokuhamba emanyathelweni akhe. UYesu wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu. Kuba idyokhwe yam yeyobubele nomthwalo wam ukhaphukhaphu.” (Mat. 11:28-30) Ukufunda ngendlela ekhuthazayo uYesu awayebaphatha ngayo abantu nokulandela umzekelo wakhe omhle kukodwa nje kothula uxinezeleko olusenokuba semagxeni ethu.
10, 11. Ngubani onokukwazi ukuthuthuzela ebandleni?
10 Sinokuthuthuzelwa nangamanye amaKristu. Ngokomzekelo, cinga ngendlela abadala abasemabandleni ababanceda ngayo abo baxinezelekileyo ngenxa yeemeko ezithile. Umfundi uYakobi wabhala wathi: “Ngaba kukho nabani na ogulayo [ngokomoya] phakathi kwenu? Makabizele kuye amadoda amakhulu ebandla, aze wona amthandazele.” Ube yintoni umphumo? “Umthandazo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.” (Yak. 5:14, 15) Namanye amalungu ebandla anokusithuthuzela.
11 Amabhinqa adla ngokukufumanisa kulula ukuthetha namanye amabhinqa ngeengxaki ezahlukahlukeneyo. Oodade abasele bekhulile ngokukhethekileyo banokunikela amacebiso amahle kakhulu koodade abaselula. Kusenokwenzeka ukuba aba dade sele beqolile baye batyhubela kwiimeko ezifanayo kubomi babo. Uvelwano neempawu zabo zobufazi lunokubanceda gqitha. (Funda uTito 2:3-5.) Kambe ke, abadala nabanye banako yaye bamele ‘bayithuthuzele imiphefumlo edandathekileyo’ phakathi kwabo. (1 Tes. 5:14, 15) Yaye kuhle ukukhumbula ukuba uThixo ‘uyasithuthuzela kuyo yonke imbandezelo yethu, ukuze sikwazi ukuthuthuzela abo bakulo naluphi na uhlobo lwembandezelo.”—2 Kor. 1:4.
12. Kutheni kubalulekile ukubakho kwiintlanganiso zamaKristu?
12 Eyona ndlela isemagqabini esinokuthuthuzelwa ngayo, kukubakho ezintlanganisweni zamaKristu, apho sikhuthazwa khona ngokuxutyushwa kweBhayibhile. Sifunda ukuba uYudas noSilas “babakhuthaza abazalwana ngokuthetha okuninzi baza babomeleza.” (IZe. 15:32) Ngaphambi nasemva kweentlanganiso, amalungu ebandla adla ngokuncokola ngezinto ezakhayo. Ngoko enoba sixinezelekile ngenxa yeemeko ezithile, masingaze sizikhethe, kuba ukwenjenjalo akuyi kuzilungisa izinto. (IMize. 18:1) Kunoko, siya kuba senza kakuhle xa sithobela isiluleko esiphefumlelweyo sikampostile uPawulos esithi: “Masinyamekelane, sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane, ngokungakumbi njengoko nibona ukuba imini iyasondela.”—Heb. 10:24, 25.
Fumana Intuthuzelo KwiLizwi LikaThixo
13, 14. Khawuchaze indlela iZibhalo ezinokusithuthuzela ngayo.
13 Enoba singamaKristu abhaptiziweyo okanye sisandul’ ukufunda ngoThixo neenjongo zakhe, iLizwi likaThixo elibhaliweyo linokusithuthuzela gqitha. UPawulos wathi: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) IZibhalo Ezingcwele zinako ukusithuthuzela zize zisenze ‘siwufanelekele size siwuxhobele ngokupheleleyo wonke umsebenzi olungileyo.’ (2 Tim. 3:16, 17) Ukwazi inyaniso engeenjongo zikaThixo nokuba nethemba lokwenene ngekamva kunokusithuthuzela ngokuqinisekileyo. Ngoko ke, masilisebenzise ngokupheleleyo iLizwi likaThixo, iBhayibhile neempapasho ezisekelwe kulo ezinokusithuthuzela zize zisincede ngeendlela ezininzi.
14 UYesu wasimisela umzekelo omhle ngokusebenzisa iZibhalo xa wayefundisa naxa wayethuthuzela abanye. Ngokomzekelo, ngesinye isihlandlo emva kokuba evusiwe ‘wabavulela iZibhalo ngokupheleleyo’ abafundi bakhe ababini. Njengoko wayethetha nabo, iintliziyo zabo zachukumiseka kakhulu. (Luka 24:32) Exelisa umzekelo kaYesu obalaseleyo, umpostile uPawulos ‘waqiqa ngeZibhalo.’ EBhereya, abo babemphulaphule “balamkela ilizwi ngeyona ntumekelelo inkulu yengqondo, bezincina ngenyameko iZibhalo mihla le.” (IZe. 17:2, 10, 11) Kufaneleke ngokwenene ukufunda iBhayibhile yonke imihla, sizondle ngayo nangeempapasho zamaKristu ezenzelwe ukusithuthuzela zize zisinike ithemba kula maxesha azele ziingxaki!
Ezinye Iindlela Zokuthuthuzela Abanye
15, 16. Ziintoni esinokuzenza ukuze sincede size sithuthuzele amanye amaKristu?
15 Zininzi iindlela esinokunceda size sithuthuzele ngazo amanye amaKristu. Ngokomzekelo, mhlawumbi sinokuya kuthengela abo sele bekhulile okanye abagulayo izinto ezithile ezivenkileni. Sinokunceda abanye ngokubenzela imisetyenzana ethile yasekhaya, ngaloo ndlela sibonisa ukuba sibakhathalele. (Fil. 2:4) Mhlawumbi sinokubancoma abazalwana bethu ngeempawu zabo ezintle, njengothando, ubuchule obuthile, inkalipho nokuba nokholo.
16 Enye indlela esinokuzama ngayo ukuthuthuzela abakhulileyo kukubatyelela size siphulaphule kakuhle xa besibalisela ngamava abo exesha elidluleyo nangeentsikelelo abazifumana kwinkonzo kaYehova. Kaloku, oku kunokukhuthaza kuze kuthuthuzele kwathina! Sinokufunda iBhayibhile okanye iimpapasho ezisekelwe kuyo nabo sibatyelelayo. Mhlawumbi sinokuhlola inqaku eliza kuxutyushwa kwiSifundo seMboniselo kuloo veki okanye umbandela oza kuxutyushwa kwiSifundo SeBhayibhile Sebandla saloo veki. Sinokubukela nabo iDVD esekelwe eZibhalweni. Kanti sinokufunda okanye sibalise amava akhuthazayo akwiimpapasho zethu.
17, 18. Njengabakhonzi bakaYehova abanyanisekileyo, kutheni sinokuqiniseka ukuba uya kusixhasa aze asithuthuzele?
17 Ukuba siphawula ukuba omnye umkhonzi kaYehova ufuna ukuthuthuzelwa, sinokumkhankanya kwimithandazo yethu yobuqu. (Roma 15:30; Kol. 4:12) Njengoko sijamelana neengxaki zobomi yaye sizimisele ukuthuthuzela abanye, sinako ukuba nokholo nolweyiseko awayenalo umdumisi owacula wathi: “Umthwalo wakho wulahlele kuYehova, yaye yena wokuxhasa. Akayi kuliyekela ilungisa lishukunyiswe.” (INdu. 55:22) Eneneni, uYehova uya kusoloko ekulungele ukusithuthuzela nokusixhasa njengabakhonzi bakhe abanyanisekileyo.
18 UThixo wathi kubakhonzi bakhe bamandulo: “Mna—mna ndinguLowo unithuthuzelayo.” (Isa. 51:12) UYehova uya kusenzela okufanayo yaye uya kuzisikelela izenzo namazwi ethu obubele njengoko sithuthuzela abo bazilileyo. Enoba sinethemba lokuphila ezulwini okanye emhlabeni, ngamnye kuthi unokuthuthuzelwa ngamazwi kaPawulos awawabhalela amaKristu athanjiswe ngomoya, athi: “INkosi yethu uYesu Kristu ngokwayo noThixo uBawo wethu, owasithandayo waza wasinika intuthuzelo engunaphakade nethemba elilungileyo ngobubele obungasifanelanga wanga angazithuthuzela iintliziyo zenu aze aniqinise kuso sonke isenzo esilungileyo nelizwi.”—2 Tes. 2:16, 17.
Ngaba Uyakhumbula?
• Wenziwa ngomkhamo ongakanani umsebenzi wethu wokuthuthuzela abo bazilileyo?
• Ziintoni ezinye izinto esinokuzenza ukuze sithuthuzele abanye?
• Bubuphi ubungqina obuchazwa ziZibhalo obubonisa ukuba uYehova uyabathuthuzela abantu bakhe?
[Umfanekiso okwiphepha 28]
Ngaba nawe uyabathuthuzela abo bazilileyo?
[Umfanekiso okwiphepha 30]
Enoba siselula okanye sesikhulile sinako ukubakhuthaza abanye