Iza Kuba Nini Imfazwe YeArmagedon?

‘Ndabona naso isihlwele esikhulu, ekungekho mntu wakwaziyo ukusibala, siphuma kuzo zonke iintlanga nezizwe nezizwana neelwimi . . siphuma embandezelweni enkulu.’—ISITYHILELO 7:9, 14.

NGOKU sele etshayelwe amabala ukulungiselela iArmagedon. Njani?

Ehlabathini jikelele sele bekho abantu abakhonza uYehova nabaphila ngemilinganiselo ephakamileyo yeBhayibhile. Bexhaswa nguYehova, izigidi eziphuma kuzo zonke iintlanga, izizwe, neelwimi zibuthelana ndawonye ngokumanyeneyo, naseluthandweni lobuzalwana. Obu buzalwana bukho phakathi kwamaNgqina kaYehova.—Yohane 13:35.

Kungekudala uSathana uza kuhlanganisa imikhosi aze ahlasele ngolunya, aba bantu baseluxolweni nababonakala bengakhuselekanga. (Hezekile 38:8-12; ISityhilelo 16:13, 14, 16) Ungaqiniseka njani ukuba oku kuza kwenzeka? IBhayibhile ichaza iziganeko ezisinceda sikwazi ukubona ixesha eza kuza ngalo iArmagedon. Iziganeko ezininzi ethetha ngazo sele zenzekile.

Iziganeko Ozibona Zisenzeka

Abafundi bakaYesu bambuza ukuba baza kwazi njani xa lisondele ixesha ‘lokupheliswa kwenkqubo yezinto.’ (Mateyu 24:3) UYesu waphendula, ngokwalatha kwixesha awathi “uhlanga luya kuvukelana nohlanga nobukumkani buvukelane nobukumkani, yaye kuya kubakho ukunqongophala kokutya neenyikima zomhlaba kwiindawo ngeendawo.” Wandula wathi: “Zonke ezi zinto zikukuqala kwenimba.” (Mateyu 24:7, 8) Kwa eli xesha linye umpostile uPawulos walibiza ngokuthi ‘yimihla yesiphelo,’ ebonisa ukuba loo mihla iya kuba ‘ngamaxesha amanqam ekunzima ukujamelana nawo.’ (2 Timoti 3:1) Ngaba kuwe ezi ziprofeto zichaza iziganeko ezenzeka namhlanje?

Kutheni iza kuba lixesha elinzima kangaka eli? Umpostile uYohane uyasichaza isizathu. Waxela kwangaphambili ukuba uSathana needemon zakhe baza kuba ‘nexesha elifutshane’ lokwenza umsebenzi wabo apha emhlabeni. USathana uchazwa ‘njengonomsindo omkhulu’ ngeli xesha. (ISityhilelo 12:7-12) Ngaba xa ujongile uyawubona na umsindo nogonyamelo phakathi kwabantu namhlanje, kungekhona nje kummandla othile kodwa emhlabeni wonke?

Kwangeli xesha lobunzima, uYesu wathi kwakuza kwenziwa nomsebenzi omkhulu. Wathi: “Ezi ndaba zilungileyo zobukumkani [bukaThixo] ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Namhlanje, kumazwe angaphezulu kwangama-235, amaNgqina kaYehova ashumayela iindaba ezilungileyo zoBukumkani bukaThixo ngeelwimi ezingaphezulu kwama-500. Oolindixesha bawo ababini abasekelwe eBhayibhileni, iMboniselo noVukani!, ngabona basasazwa kakhulu ehlabathini. Kwakhona amaNgqina aye aguqulela iBhayibhile kwiilwimi ezimalunga ne-100. Umsebenzi wawo wenziwa ngamatsha-ntliziyo yaye uxhaswa ngeminikelo yokuzithandela ngokupheleleyo. Akungebi bethu eli phulo lokushumayela lizalisekisa isiprofeto sikaYesu?

Kwakhona iBhayibhile ichaza iziganeko eziya kukhokelela ngqo kwimfazwe eya kuba phakathi kukaYehova nabo bamchasayo. Khawuqwalasele ezi ziprofeto zithathu uza kuzibona zizaliseka.

Iziganeko Oza Kuzibona Zisenzeka Kungekudala

Isiprofeto 1. IBhayibhile ithi iintlanga ziya kwenza isibhengezo sokuba “luxolo nonqabiseko.” Basenokucinga ukuba basecicini lokucombulula iingxaki ezinkulu. Noko ke, iziganeko eziya kulandela eso sibhengezo ziya kuba zingelulo uxolo kwaphela.—1 Tesalonika 5:1-3.

Isiprofeto 2. Emva koko, oorhulumente bagqiba kwelokuba bahlasele iinkonzo zehlabathi. EBhayibhileni, aba rhulumente bamelwa lirhamncwa, luze lona unqulo lobuxoki lehlabathi limelwe libhinqa elikhwele irhamncwa. (ISityhilelo 17:3, 15-18) Eli rhamncwa lokomfuziselo liza kutshabalalisa unqulo lobuxoki lingaqondi ukuba liphumeza ukuthanda kukaThixo.

Ngemifuziselo, umpostile uYohane usichaza ngale ndlela esi siganeko: “Iimpondo ezilishumi ozibonileyo, nerhamncwa, ngabo baya kulithiya ihenyukazi, baliphanzise, balihlube libe ze, bazidle iinxalenye zenyama yalo baze balitshise ngokupheleleyo ngomlilo. Kuba uThixo ubeke oko ezintliziyweni zabo ukuba baphumeze ingcamango yakhe.”—ISityhilelo 17:16, 17.

Isiprofeto 3. Emva kokuhlaselwa konqulo lobuxoki, uSathana uya kugaya iintlanga ukuze zihlasele abanquli bakaYehova uThixo.—ISityhilelo 7:14; Mateyu 24:21.

Uya Kuchaphazeleka Njani Wena?

Ukuba awukhange ube nalo ithuba lokufunda iBhayibhile, kusenokuba nzima ukukholelwa kwezi ziganeko kuthethwe ngazo ngasentla ziza kwenzeka. Kodwa unesizathu esibambekayo sokukholelwa ukuba zonke ezi nkcukacha ziza kuzaliseka nokuba ezi ziganeko ziza kwenzeka kungekudala. Uthotho lweziprofeto eziseBhayibhileni ezisele zizalisekile zisisiqinisekiso.a

Kutheni ungakhe uziphe ixesha lokuphanda ukuba kutheni amaNgqina kaYehova eyisekile ukuba “imfazwe yemini enkulu kaThixo uSomandla” isondele yaye kutheni ungafanele uyoyike? Bacele bathethe nawe ngoko umele ukwenze ukuze ube phakathi kwabo uYehova aza kubakhusela. (ISityhilelo 16:14) Oko ukufundayo kunokuyitshintsha imbono yakho ngekamva.

[Umbhalo osemazantsi]

[Amagama acatshulweyo akwiphepha 8]

Ngaba umsebenzi wamaNgqina kaYehova uzalisekisa isiprofeto seBhayibhile?