Imibuzo Evela Kubafundi
Kutheni ukufa kwabo banyanisekileyo kuThixo “kuxabisekile emehlweni kaYehova”?
▪ Ephefumlelwe umdumisi wacula wathi: “Kuxabisekile emehlweni kaYehova ukufa kwabanyanisekileyo bakhe.” (INdu. 116:15) Ubomi bomnquli ngamnye kaYehova buxabiseke kakhulu kuye. Noko ke, amazwi akwiNdumiso 116 abhekisela kwinto engaphaya kokufa komntu.
Xa kunikelwa intetho yomngcwabo womKristu, akufanelekanga ukusebenzisa iNdumiso 116:15 kulo mntu uswelekileyo, nangona efe engumkhonzi kaYehova onyanisekileyo. Ngoba? Ngenxa yokuba oko kuthethwa ngumdumisi kunentsingiselo ebanzi. Kuthetha ukuba uThixo akayi kuvumela ukuba lonke iqela labakhonzi bakhe abanyanisekileyo life ngenxa yokuba ulijonga njengelixabisekileyo.—Sicela ufunde iNdumiso 72:14; 116:8.
INdumiso 116:15 isiqinisekisa ukuba uYehova akayi kuvumela abakhonzi bakhe abanyanisekileyo njengeqela ukuba batshayelwe emhlabeni. Phofu ke, imbali yethu yakutshanje ibonisa ukuba sele sinyamezele ukuvavanywa nokutshutshiswa ngokuqatha, nto leyo ebonisa ngokucacileyo ukuba uThixo akasayi kuvuma ukuba sitshayelwe.
Ngenxa yamandla akhe angenakuthelekiswa nanto nangenxa yenjongo yakhe engasayi kuze isilele, uYehova akayi kuvumela ukuba sitshatyalaliswe njengeqela. Ukuba uThixo ebenokuyivumela loo nto, ibiya kuthetha ukuba iintshaba zakhe zinamandla kunaye—nto leyo engasoze yenzeke! Kanti ibiya kuthetha ukuba injongo kaYehova yokuba umhlaba umiwe ngabantu abanyanisekileyo ayizi kuzaliseka—kodwa siyazi ukuba iza kuzaliseka. (Isa. 45:18; 55:10, 11) Kaloku, nokunikelwa kwenkonzo engcwele kuYehova bekungazi kubakho ukuba bekungekho bantu abaza kumnqula kwiintendelezo ezisemhlabeni zetempile yakhe enkulu yokomoya! Bekungazi kubakho bantu baza kuba sisiseko ‘somhlaba omtsha’—ibutho labantu abangamalungisa abaza kuphila emhlabeni phantsi ‘kwamazulu amatsha.’ (ISityhi. 21:1) Kwakhona uLawulo lukaKristu Lweminyaka Eliwaka belungazi kubakho xa bengekho abantu aza kubalawula emhlabeni.—ISityhi. 20:4, 5.
Beliza kuthandatyuzwa igunya likaThixo ukuba ebenokuvumela iintshaba zakhe zibatshabalalise bonke abantu bakhe emhlabeni. Ukuvumela kwakhe loo nto, bekuya kusonakalisa isigxina sikaYehova njengoMongami Wendalo iphela. Ukongezelela, ngenxa yegama lakhe elingcwele nangenxa yokuba ezihlonela, uYehova akayi kukuvumela ukufa kweqela labantu abanyanisekileyo. Phawula oku: Ekubeni uThixo engenabo “ubugqwetha,” akanakoyiswa kukukhusela iqela labantu abamkhonze ngokunyanisekileyo. (Dut. 32:4; Gen. 18:25) Ngaphezu koko, ukuvumela ukutshatyalaliswa kwabakhonzi bakhe njengeqela bekuya kungqubana noko kuthethwa liLizwi likaThixo xa lisithi: “UYehova akayi kubalahla abantu bakhe ngenxa yegama lakhe elikhulu.” (1 Sam. 12:22) Eneneni, “uYehova akayi kubashiya abantu bakhe, engayi kulishiya nelifa lakhe.”—INdu. 94:14.
Kuthuthuzela ngokwenene ukwazi ukuba abantu bakaYehova abayi kutshabalala emhlabeni! Ngoko, ngazo zonke iindlela masihlale sinyanisekile kuThixo, sithembele kwisiqinisekiso sakhe esithi: “Nasiphi na isixhobo esiya kuyilwa nxamnye nawe asiyi kuphumelela, nalo naluphi na ulwimi oluya kuphakama nxamnye nawe ekugwetyweni uya kulugwebela isohlwayo. Lilo elo ilifa labakhonzi bakaYehova, yaye ubulungisa babo buphuma kum.”—Isa. 54:17.
[Amagama acatshulweyo akwiphepha 22]
UThixo akayi kuvumela abakhonzi bakhe batshayelwe