Kutheni UMphulaphuli Wemithandazo Evumela Ukubandezeleka?
ENOBA abanye abantu bayathandaza, abanye bayathandabuza ukuba uThixo ukho. Kutheni bethandabuza nje? Mhlawumbi babona oku kubandezeleka kungaka ehlabathini. Ngaba wakhe wazibuza ukuba kutheni uThixo evumela ukubandezeleka?
Ngaba uThixo wabenza abantu bayile nto bayiyo namhlanje—abangafezekanga nababandezelekileyo? Asinakuze simhlonele uthixo ofuna abantu babandezeleke ngabom. Khawucinge ngale nto: Ubuka imoto entsha kodwa uthi xa ujikela kwelinye icala ufumanisa ukuba ibotyokile, ngaba ubunokugqiba ngelithi ngumzi-mveliso oyenze yanjalo? Kakade ke akunjalo! Ubunokugqiba kwelokuba umzi-mveliso ubuyenze “ngokugqibeleleyo” loo moto nokuthi ngumntu okanye ikho into ebangele ukuba loo moto ibotyoke.
Ngokufanayo, xa sibuka indalo elungelelanisiweyo emangalisayo kuthi kusenjalo siphawule umbhodamo norhwaphilizo olugqugqisileyo kwintsapho yabantu, sifanele sigqibe ngelithini? IBhayibhile ifundisa ukuba uThixo wadala isibini sokuqala esingabantu esifezekileyo kodwa kamva baye bona ngaloo ndlela bonakala. (Duteronomi 32:4, 5) Iindaba ezimnandi zezokuba uThixo uthembise ukuwulungisa umonakalo—ukubuyisela abantu abathobelayo kwimfezeko. Kodwa ke, kutheni elinde ixesha elide kangaka?
Kutheni Elinde Ixesha Elide Kangaka?
Kungenxa yokuba kufuneka kucace ukuba ngubani omele alawule uluntu. UYehova akazange abadale abantu ngohlobo lokuba bazilawule. Kwakumele abe nguMlawuli wabo. IBhayibhile ithi: “Asikokomntu ohambayo ukwalathisa inyathelo lakhe.” (Yeremiya 10:23) Okubuhlungu, kukuba abantu bokuqala bakhetha ukuluvukela ulawulo lukaThixo. Isenzo sabo sokwaphula umthetho sabenza aboni. (1 Yohane 3:4) Umphumo, yaba kukuba baphulukana nemfezeko baza babangela umonakalo kubo nakwinzala yabo.
Kangangamawaka eminyaka, uYehova uye wavumela abantu ukuba bazilawule, yaye imbali iye yabonisa ukuba. Ibonisa ukuba bonke oorhulumente babantu babangela ukubandezeleka. Akukho namnye oye waphelisa imfazwe, ulwaphulo mthetho, okungekho sikweni okanye izifo.
UThixo Uza Kuwulungisa Njani Umonakalo?
IBhayibhile ithembisa ukuba kungekudala uThixo uza kuzisa ihlabathi elitsha elinobulungisa. (2 Petros 3:13) Kuphela ngabo baye ngenkululeko yabo yokuzikhethela bakhetha ukubonisa uthando kwabanye nakuThixo abaya kuvunyelwa bahlale kulo.—Duteronomi 30:15, 16, 19, 20.
Kwakhona iBhayibhile ithi ‘ngemini yomgwebo’ eza ngokukhawuleza, uThixo uya kuphelisa ukubandezeleka nabo bakubangelayo. (2 Petros 3:7) Emva koko, uMlawuli okhethwe nguThixo, uYesu Kristu, uya kulawula abantu abathobelayo. (Daniyeli 7:13, 14) Yintoni eya kufezwa lulawulo lukaYesu? IBhayibhile ithi: “Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:11.
NjengoKumkani wasezulwini, uYesu uya kulungisa umonakalo—oquka ukugula, ukwaluphala nokufa—okungumphumo wokuba abantu beye bavukela uYehova, “umthombo wobomi.” (INdumiso 36:9) UYesu uya kubaphilisa bonke abo bamkela ulawulo lwakhe ngothando. Phantsi kolawulo lwakhe, ezi zithembiso ziseBhayibhileni zilandelayo ziya kuba yinyaniso:
◼ “Akakho ummi wakhona oya kuthi: ‘Ndiyagula.’ Abemi belo lizwe baya kuzixolelwa iziphoso zabo.”—Isaya 33:24.
◼ “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:4.
Ngaba akuthuthuzeli ukwazi ukuba kungekudala uThixo uya kusizalisekisa isithembiso sakhe sokuphelisa konke ukubandezeleka? Okwangoku, asimele siphelelwe yintembelo yokuba uyayiphulaphula imithandazo yethu kuba nje evumele ukubandezeleka.
UThixo ukho. Uyakuva, kwanaxa ugcuma yaye usentlungwini. Yaye ukhangele phambili ngolangazelelo ekukuboneni uphila ngokonwaba xa onke amathandabuzo neentlungu ziya kuba zingasekho.