Ngaba Ubusazi?
Kwakutheni ukuze abantu bamaxesha okubhalwa kweBhayibhile basebenzise ibhitumene njengodaka?
▪ Ngokuphathelele abakhi benqaba yaseBhabheli, iBhayibhile ithi “basebenzisa izitena endaweni yamatye, nebhitumene endaweni yodaka.”—Genesis 11:3.”
Ibhitumene iphuma emhlabeni, yaye ifumaneka lula eMesopotamiya xa iphezu komhlaba iyajiya. Ukukwazi kwayo ukuncamathelisa izinto kwakuse kusaziwa kwanangamaxesha okubhalwa kweBhayibhile. Enye imbekiselo ithi, ibhitumene “yayiyeyona isetyenziswayo xa usakha ngezitena ezitshisiweyo.”
Umbhali wenqaku elikulind’ ixesha iArchaeology uchaza utyelelo lwakutshanje kumabhodlo enqaba kwisixeko samandulo iUre, eseMesopotamiya. Uthi: “Udaka lwebhitumene—enye yezinto zokuqala ukusetyenziswa kwiindawo ezineoli kumazantsi eIraq—isabonakala phakathi kwezo zitena zitshileyo. Le ntlama incangathi, namhlanje ingunobangela wokungabikho kozinzo yaye ikwabangela kubekho ugonyamelo, ngaphambili yayiyimanyanisa impucuko. Ukusetyenziswa kwebhitumene nokutyabeka ngayo kwakukhusela izitena zodaka ukuze zingangenwa ngamanzi, nto leyo yayibangela ukuba izakhiwo zihlale iminyaka emininzi.”
Lalinjani “iphepha” elalisetyenziswa ngamaxesha okubhalwa kweBhayibhile?
▪ Lo mbuzo uphakama ngenxa yamazwi awathethwa ngumbhali weBhayibhile uYohane: “Nangona ndinezinto ezininzi zokunibhalela, andinqweneli kwenjenjalo ngephepha neinki”—2 Yohane 12.
Igama lesiGrike ukharʹtes, eliguqulelwe ngokuthi “iphepha,” ngokoqobo libhekisela kwiphepha elenziwe “ngepapyrus” (umpampiri), uhlobo oluthile lomzi okhula emanzini. Xa ichaza ubuchule bokwenza la maphepha ngesi sityalo enye imbekiselo ithi: “Esi sityalo, esithi maxa wambi sibe ziimitha ezintathu ubude, siyaxotyulwa emva koko siyasikwa sibe yimicu ethi idityaniswe, ize ikhandwe ngehamile eyenziwe ngomthi emva koko siyagudiswa ukuze kubhalwe kuso.”
Abembi bezinto zakudala baye bafumana amaxwebhu enziwe ngompapiri eYiputa nakummandla ongqonge uLwandle Olufileyo. Amanye ala maxwebhu aneZibhalo aye afunyanwa kwezi ndawo, asusela ngemihla kaYesu okanye ngaphambi koko. Kusenokwenzeka ukuba iileta zeBhayibhile, ezabhalwa ngabapostile, ekuqaleni zabhalwa kweli phepha.
[Inkcazelo Ngemifanekiso ekwiphepha 11]
Spectrumphotofile/photographersdirect.com
© FLPA/David Hosking/age fotostock