Okuphuma Koovimba Bethu
Ukuba Kunye Nabo Bahambela Ezonqulo
“ANDINAKUKWAZI ukushumayela kwindlu ngendlu!” Baninzi abantu abasandul’ ukufundelwa iBhayibhile abaye bavakalelwa ngaloo ndlela xa becinga ngokushumayela kubantu abangabaziyo! Noko ke, esi isikhalazo sasivela kwisithethi esingumpondo zihlanjiwe nesasikwangumfundisi weBhayibhile owayehambela ezonqulo.
Uninzi lwabafundi beZion’s Watch Tower abashiya iicawa zabo babelangazelela ukunxulumana nabanye abantu ababeyinxanelwe njengabo inyaniso yeBhayibhile. Eli phephancwadi labongoza abafundi balo ukuba bakhangele abanye abanokholo olufana nolwabo ukuze bahlanganisane baze bafunde kunye iBhayibhile rhoqo. Ukususela malunga nowe-1894, iWatch Tower Society yathumela abameli abahambahambayo ukuba baye kumaqela awayecele ukutyelelwa. Phakathi kwezinye izinto, la madoda anamava nasebenza nzima, akhethwa ngenxa yokululama kwawo, ukwazi kwawo iBhayibhile, ukukwazi kwawo ukuzibeka izinto, ukufundisa kwakunye nokunyaniseka kwawo kwidini lentlawulelo. Ayetyelela kangangosuku olunye, kuthi ke xa exakekile ezo ntsuku zibe mbini. Uninzi lwaBafundi beBhayibhile lwaqala ukuya entsimini xa kwakusasazwa izimemo zentetho yesidlangalala eyayiza kunikelwa ngumzalwana owayehambele ezonqulo. Emva kwentetho awayinikela ngolo rhatya esikolweni, uHugo Riemer, owaba lilungu leQumrhu Elilawulayo kamva, waphendula imibuzo yeBhayibhile de kwangentseni. Ediniwe kodwa onwabile, watsho ukuba le ntlanganiso “ibisemagqabini.”
IMboniselo yatsho ukuba “eyona njongo” yotyelelo lomzalwana ohambela ezonqulo kukwakha “indlu yokholo” ukuqhuba iintlanganiso kumakhaya amakholwa. ABafundi beBhayibhile abasuka kwiingingqi ezikufutshane babesiza kuphulaphula iintetho kwakunye neengxubusho zemibuzo neempendulo. Emva koko, kwakuvuleleka nethuba lokuba amaKristu abonakalise umoya wokubuk’ iindwendwe. UMaude Abbott nowayekho kwintetho yakusasa, emva kokuba behlanganisene kwitafile ende, uthi: “Kwakukho ukutya okumnandi okuninzi—ihagu, inyama yenkuku eqhotsiweyo, iintlobo ngeentlobo zesonka, iipayi kwakunye neekeyiki! Apho satya sahlutha, yaye malunga nentsimbi yesibini ngenjikalanga saphulaphula enye intetho.” Kodwa uthi: “Ngelo xesha sonke sasisozela.” Lakha lathi elinye ikhwahla kumsebenzi wokuhambela ezonqulo uBenjamin Barton, ‘Ukuba ndandisitya yonke into endiyinikwayo, ngendafa kudala.’ Kamva ileta evela kwikomkhulu eBrooklyn yacebisa oodade abanobubele ukuba bekunokuba kuhle ukuphekela iindwendwe ezihambele unqulo “kutya okuqhelekileyo nokulula” baze bazivumele “zilale ngokwaneleyo.”
Abahambi ngezonqulo babephum’ izandla ekufundiseni ngeetshati kunye nayo nantoni na eyayinokuphuhlisa iintetho zabo. Iintetho zikaR. H. Barber “zazisoloko zinongiwe.” UW. J. Thorn owayenobuzali wayethetha “ngathi ngusolusapho wamandulo.” Ngenye imini ngoxa babehamba ngesithuthi esiyiModel A Ford, ngesiquphe uShield Toutjian wakhwaza esithi, “Misa!” Wehla emotweni, waya kukha iintyantyambo zasendle, waza ngokukhawuleza wafundisa abo wayehamba nabo ngendalo kaYehova.
Ukuhambela ezonqulo kwakungelula, ngokukodwa kwabo sele behanjelwe yiminyaka. Noko ke, eyona nto yayibavavanya abanye, kukutshintsha komsebenzi. Ngoku kwakulindelwe ukuba bakhokele kumsebenzi wokushumayela kwindlu ngendlu. IMboniselo kaMatshi 15, 1924, yathi “olona thumo luyintloko” kumKristu wokwenene “kukushumayela ngobukumkani. Lowo ngowona msebenzi wabo bahambela ezonqulo.”
Kuyabonakala ukuba olu tshintsho lwabacaphukisa abanye abahambi ngezonqulo kuba bawushiya umsebenzi wokuhambahamba, kanti abanye ababengaxolanga bazimisela awabo amaqela onqulo. URobie D. Adkins wabalisa ngomnye umzalwana owayehambela ezonqulo ekwasiso nesithethi esiphum’ izandla. Uthi lo mzalwana wayekhalaza ngelithi: “Eyona nto ndiyenza kakuhle kukuthetha eqongeni. Andinakukwazi ukushumayela kwindlu ngendlu!” UMzalwan’ uAdkins uthi: “Ndaphinda ndadibana nalo mzalwana wayekhalaza kwindibano yesithili yowe-1924 eyayiseColumbus, eOhio. Wayelusizana olwalumi lodwa phantsi komthi, lubonakala lungonwabanga phakathi kwaloo mawakawaka abazalwana abonwabileyo. Ngokukhawuleza emva koko wayishiya intlangano. Andizange ndiphinde ndimbone.” Kwelinye icala, “uninzi lwabazalwana abonwabileyo ababedlula ngakuye bephethe iincwadi besiya ezimotweni zabo,” babekhangele phambili ekushumayeleni kwindlu ngendlu.—IZenzo 20:20, 21.
Abazalwana abaninzi ababehambela ezonqulo, babenovalo kanye njengabo babethunyelwa ukuba baye kubaqeqesha kodwa sekunjalo basebenza ngokuzimisela. UMaxwell G. Friend (Freschel) owayethetha isiJamani ehambela ezonqulo wabhala wathi ngokuphathelele ukunikela ubungqina kwindlu ngendlu: “Le nxalenye yomsebenzi wokuhamba ngezonqulo wongeza kwiintsikelelo ezifumaneka ngokuhambahamba.” UJohn A. Bohnet owayesenza umsebenzi ofanayo wanikela ingxelo yokuba abazalwana bayithanda gqitha into yokuba kugxininiswe kumsebenzi wokushumayela ngoBukumkani. Wathi abaninzi “babekufuna ngamandla ukuba phambili edabini.”
Ukutyhubela iminyaka, abazalwana abahambahambayo abathembekileyo bebelukhuthazo kubazalwana. Elinye iNgqina eliligqala uNorman Larson lithi: “Ndaphawula ukuba aba bazalwana baxabisekile yaye baluncedo ngendlela engathethekiyo, nangona ndandiseyinkwenkwana ngelo xesha. Bandinceda ndakhula kakuhle.” Nanamhlanje, abaveleli abahambahambayo nabathembekileyo banceda amaKristu ukuba athi: “Sinako ukuya kwindlu ngendlu!”
[Amagama acatshulweyo akwiphepha 32]
Kwakusiba mnandi xa kufike umzalwana ohambele ezonqulo!
[Umfanekiso okwiphepha 31]
Ngowe-1905 kwakucwangciswe ukuba uBenjamin Barton atyelele iindawo ezili-170
[Umfanekiso okwiphepha 32]
UWalter J Thorn wayehambela ezonqulo, ebizwa ngelikaPappy ngenxa yobuzali bakhe nokuxelisa uKristu
[Umfanekiso okwiphepha 32]
UJ. A. Browne wathunyelwa eJamaica njengomhambi ngezonqulo malunga nowe-1902, ukuze aqinise aze akhuthaze amaqela amancinane alapho ali-14
[Umfanekiso okwiphepha 32]
Umsebenzi womhambi ngezonqulo wawulwakha ukholo, uqinisa umanyano lobuKristu yaye usondeza abazalwana kwintlangano