Sondela KuThixo
Ngaba Libhaliwe Igama Lakho ‘Kwincwadi Yokukhumbuza’ KaThixo?
NGABA uYehova uyayibona imigudu yokumvuyisa eyenziwa ngabakhonzi bakhe? Ewe, uyayibona! Kodwa akapheleli nje ekuboneni izenzo zabo zokholo, wazi kwaneengcinga zabo ezintle abanazo ngaye. Okubaluleke nangakumbi kukuba, uYehova akanakuze abalibale abantu bakhe nezenzo zabo. Yintoni esenza siqiniseke? Impendulo siyifumana kumazwi awabhalwa ngumprofeti uMalaki.—Funda uMalaki 3:16.
Ngenkulungwane yesihlanu Phambi Kwexesha Eliqhelekileyo, xa uMalaki wayengumprofeti, imilinganiselo yokuziphatha neyonqulo kwaSirayeli yayiwohlokile. Ababingeleli bayityeshela imisebenzi yabo, yaye abantu baqalisa izenzo zokungahloneli Thixo ezaziquka ukukhafula, ukukrexeza nokurhwaphiliza. (Malaki 2:8; 3:5) Nangona kwakugquba ububi, ayekho amaSirayeli awahlala enyanisekile kuThixo. Ahlala njani enyanisekile?
UMalaki uthi: “Abo bamoyikayo uYehova bathetha omnye komnye.” Ukoyika uThixo luphawu oluhle. Apha, uMalaki uthetha ngamaSirayeli awayenentlonelo enzulu ngoYehova, nawayenomnqweno wokungenzi izinto ezingamkholisiyo uThixo. Phawula ukuba abo babemoyika uThixo “bathetha omnye komnye.” Babehlanganisana ukuze bathethe ngoYehova yaye bekhuthazana, ukuze bangatyhafiswa okanye bawele kububi obabusenziwa ngabo babangqongileyo.
La maSirayeli athembekileyo abonisa intlonelo enzulu ngoYehova nangenye indlela eyile: “Ayecinga ngegama lakhe.” Enye inguqulelo ithi “abonisa uthando ngegama Lakhe.” Loo maSirayeli oyika uThixo abonisa nakwiingcinga zawo ukuba ayamthanda. Ezintliziyweni zawo ayecamngca ngoYehova nangegama lakhe elikhulu. Ngaba uYehova wayekubona oko?
UMalaki uthi: “UYehova wanikela ingqalelo ephulaphule.” Nangona ekwindawo yakhe ephakamileyo yokuhlala, emazulwini, uYehova wawaphulaphula waza waweva amazwi endumiso avela kubakhonzi bakhe ababewathetha omnye komnye. Wayekwazi noko kwakusezintliziyweni zabo. (INdumiso 94:11) Kodwa, uYehova wenza okungakumbi kunokubona nje izenzo neengcinga zabo ezintle.
UMalaki uthi, “Incwadi yokukhumbuza yabhalwa phambi kwakhe.” Le ncwadi ineengxelo zabo bonke abantu abahlala bethembekile kuYehova. Phawula ukuba ibizwa ngokuthi ‘yincwadi yokukhumbuza.’a Oku kusibonisa ukuba uYehova akanakuze abalibale abakhonzi bakhe abathembekileyo nabamdumisayo—ngezenzo ezilungileyo, ngamazwi nangeengcinga. Kodwa uThixo unesizathu sokubakhumbula. Uthembisa ukubajizeka ngobomi obungunaphakade abo banamagama abhalwe kwincwadi yakhe yokukhumbuza.b—INdumiso 37:29.
Kuthuthuzela ngokwenene ukwazi ukuba uYehova uyakuxabisa konke esikwenzayo ukuze simkhonze ngendlela eyamkelekileyo! Amazwi akuMalaki 3:16 asenza sicamngce nzulu ngolwalamano lwethu noYehova. Siya kuba senza kakuhle ukuzibuza, ‘Ngaba elam igama libhaliwe ‘kwincwadi yokukhumbuza’ kaThixo? Liya kubhalwa ukuba senza, sithethe, size sicamngce ntsuku zonke ngezinto eziya kwenza uYehova asikhumbule.
Izibhalo Onokuzifunda NgoDisemba:
a Igama lesiHebhere elithetha “ukukhumbuza,” lithetha okungakumbi kunokukhumbula nje into ethe qatha engqondweni. Likwabhekisela ekwenzeni okuthile ngoko uye wakukhumbula.
b Ukuze ufumane inkcazelo engakumbi ngesithembiso sikaYehova sobomi obungunaphakade, funda isahluko 3 sencwadi ethi Yintoni Ngokwenene Efundiswa YiBhayibhile? epapashwe ngamaNgqina kaYehova.