Nina Nisanda Kutshata​—Ukusebenzela UYehova Makube Phambili Kubomi Benu

1-2. (a) Kutheni le nto kufuneka abantu abasand’ utshata bathembele kuYehova? (INdumiso 37:3, 4) (b) Eli nqaku liza kuthetha ngantoni?

NGABA uza kutshata okanye usanda kutshata? Ukuba kunjalo, nakanjani ufuna ukuphila kamnandi nesithandwa sakho. Yabona ke, ubomi basemtshatweni bunamaqhina, kube phofu kukho nezigqibo ezibalulekileyo ekufuneka nizenzile. Ukonwaba kwenu kumtshato wenu kuza kuxhomekeka kwindlela eniza kuwanyuka ngayo loo maqhina nezigqibo eniza kuzenza. Ukuba niyamthemba uYehova, niza kwenza izigqibo zobulumko, nomtshato wenu uza kuqina nonwabe. Ukuba anilisebenzisi icebiso likaYehova, niza kuba neengxaki emtshatweni, ningonwabi.​—Funda iNdumiso 37:3, 4.

² Nangona eli nqaku lenzelwe abantu abasand’ utshata, liza kuthetha nangeengxaki ababa nazo bonke abantu abatshatileyo. Liza kuchaza nezinto esinokuzifunda kumadoda namabhinqa athembekileyo aseBhayibhileni. Siza kufunda nangezinto esinokuzenza xa sineengxaki ebomini nasemtshatweni. Siza kuphinda sijonge nezinto esinokuzifunda kubantu abatshatileyo namhlanje.

ZEZIPHI IINGXAKI ABANOKUBA NAZO ABANTU ABASAND’ UTSHATA?

3-4. Zeziphi iingxaki abanokuba nazo abantu abasand’ utshata?

³ Abanye basenokuthi indoda nomfazi abasand’ utshata mabaphile ngendlela abantu abaninzi abaphila ngayo namhlanje. Ngokomzekelo, abazali nezizalwana basenokubaxelela ukuba bakhawuleze babe nabantwana. Okanye abahlobo nentsapho basenokuthi mabathenge indlu nezinto eziza kubenza baphile kamnandi.

⁴ Ukuba abalumkanga banokwenza izigqibo eziza kubafaka ematyaleni. Loo nto inokwenza bobabini kufuneke basebenze bagob’ umqolo bezama ukubhatala loo matyala. Banokuzibona sebengenalo ixesha lokuzifundela iBhayibhile, elokwenza unqulo lwentsapho nelokushumayela. Banokuphoswa naziintlanganiso kuba befuna ukusebenza ixesha elongeziweyo ukuze babe nemali eninzi okanye bangagxothwa emsebenzini. Loo nto ingenza baphoswe zizinto ezivuyisayo abebenokuzenza enkonzweni kaYehova.

5. Ufunda ntoni kuKlaus noMarisa?

⁵ Amava abonisa ukuba xa sizifunela izinto ezininzi ebomini asizukonwaba. Khawuve ukuba uKlaus noMarisa bathini.b Emva kokuba betshatile, bobabini basebenza ukuze baphile kamnandi. Kodwa babengonwabanga. UKlaus uthi: “Sasinayo yonke into esiyifunayo kodwa sasingazimiselanga kumsebenzela uYehova. Xa ndithetha inyani ndandidikiwe ndinestres.” Mhlawumbi nawe ufumanise ukuba ukufuna izinto ezininzi akukwenzi waneliseke. Ukuba kunjalo, ungatyhafi. Ukujonga indlela abaye benza ngayo abanye kungakunceda. Masiqale sithethe ngezinto ezinokufundwa ngamadoda kuKumkani uYehoshafati.

MTHEMBE UYEHOVA NJENGOKUMKANI UYEHOSHAFATI

6. UYehoshafati wawasebenzisa njani amazwi akwiMizekeliso 3:5, 6 xa umkhosi omkhulu weza kulwa naye?

⁶ Bayeni, ngaba nikhe nizive ninzinyelwa ngamanye amaxesha kukuthwala imisebenzi yenu? Ukuba kunjalo, ninokufunda kuKumkani uYehoshafati. Umsebenzi wakhe yayikukuqiniseka ukuba uhlanga lonke lukhuselekile. Wawenza njani lo msebenzi unzima kangaka? Wazama ngazo zonke iindlela ukubakhusela abantu bakhe. Waqiniseka ukuba izixeko zakwaYuda zikhuselekile waza wakha umkhosi onamandla, owawunamajoni angaphezu kwe-1 160 000. (2 Kron. 17:12-19) Ekuhambeni kwexesha waba nengxaki enkulu. Umkhosi omkhulu wama-Amoni, owamaMowabhi namadoda asuka kwimimandla yeentaba zaseSehire wawufuna ukubulala intsapho yakhe nabantu bakhe. (2 Kron. 20:1, 2) Wenza ntoni? Wacela uYehova amncede amphe amandla. Wayesenza into ethethwa kwiMizekeliso 3:5, 6. (Yifunde.) Umthandazo kaYehoshafati wokuzithoba okwi-2 Kronike 20:5-12 ubonisa ukuba wayemthembe nyhani uYehova uTata wakhe. Wathini ke uYehova kuYehoshafati?

7. UYehova wawuphendula njani umthandazo kaYehoshafati?

⁷ UYehova wathetha noYehoshafati esebenzisa uYahaziyeli umLevi. Wathi: “Yimani ngeendawo zenu, nime ngxi, nize niyibone indlela uYehova aza kunisindisa ngayo.” (2 Kron. 20:13-17) Akudli ngokuliwa kanje emfazweni. Kodwa lo myalelo wawungasuki mntwini, wawusuka kuYehova. UYehoshafati wenza le nto ayixelelwayo kuba wayemthembile uYehova. Kunokuba abeke amajoni axhobileyo ngaphambili xa babeyokulwa neentshaba zabo, wabeka iimvumi ezazingaxhobanga. UYehova zange amyekele uYehoshafati. Wamnceda woyisa emfazweni.​—2 Kron. 20:18-23.

8. Abayeni banokufunda ntoni kuYehoshafati?

⁸ Bayeni, ninokufunda kuYehoshafati. Ngumsebenzi wakho myeni ukuqiniseka ukuba intsapho yakho ihleli kakuhle. Ngoko kufuneka usebenze nzima ukuze yenzeke loo nto. Xa kukho ingxaki, unokucinga ukuba ungakwazi ukuyilungisa ngokwakho. Kodwa sukuzithemba. Thandaza kuYehova ucele akuncede. Nantsi enye into, thandaza nomfazi wakho nixelele uYehova yonke into. Ukuze wazi into efunwa nguYehova, funda iBhayibhile neencwadi zentlangano, wenze loo nto zikuxelela yona. Abanye basenokungavumelani nezigqibo oncedwe yiBhayibhile ukuba uzenze. Basenokude bathi uphambene. Banokukuxelela ukuba imali nezinto onazo zizo eziza kukhusela intsapho yakho. Kodwa, uyamkhumbula uYehoshafati? Wathemba uYehova wayenza into awamxelela yona. UYehova zange amlahle futhi nawe soze akulahle. (INdu. 37:28; Heb. 13:5) Yintoni enokwenziwa ngabantu abatshatileyo ukuze bonwabe?

NJENGOMPROFETI UISAYA NOMFAZI WAKHE, UKUKHONZA UYEHOVA MAKUBALULEKE EBOMINI BENU

9. Khawubalise ngomprofeti uIsaya nomfazi wakhe.

⁹ Umprofeti uIsaya nomkakhe benza ukukhonza uYehova yayeyona nto ibalulekileyo ebomini babo. Wayengumprofeti, mhlawumbi nomfazi wakhe wayeneyakhe imisebenzi yokuprofeta awayeyenza. Yiloo nto kusithiwa ‘ngumprofetikazi.’ (Isa. 8:1-4) KuIsaya nomfazi wakhe, ukukhonza uYehova yayiyeyona nto iphambili. Abantu abatshatileyo namhlanje, banokufunda into eninzi kubo.

10. Ukufunda iziprofeto zeBhayibhile kunokubanceda njani abantu abatshatileyo bazimisele ukukhonza uYehova?

¹⁰ Abantu abatshatileyo namhlanje banokufana noIsaya nomkakhe ngokuthi bazame ngamandla ukusebenzela uYehova. Banokufunda iziprofeto zeBhayibhile kunye baze bajonge indlela abanokuzisebenzisa ngayo. Loo nto inokubanceda baye bemthemba uYehova.c (Tito 1:2) Banokucinga ngendlela abanokuncedisa ngayo ukuze kwenzeke ezo ziprofeto. Ngokomzekelo, banokuncedisa ukuze kwenzeke isiprofeto sikaYesu esikukushumayela iindaba ezilungileyo ngaphambi kokuba isiphelo sifike. (Mat. 24:14) Xa beqinisekile ukuba iziprofeto zeBhayibhile ziyenzeka, baza kutsho bazimisele ukumsebenzela uYehova.

UBUKUMKANI BUKATHIXO MABUZE KUQALA KUNI NJENGAKUAKWILA NOPRISILA

11. Yintoni abayenzayo uAkwila noPrisila, ibe kutheni?

¹¹ Abantu abasebatsha abasand’ utshata banokufunda kuPrisila noAkwila ababengamaYuda, behlala kwidolophu yaseRoma. Beva ngeendaba ezilungileyo ezingoYesu baza baba ngamaKristu. Sinokutsho ngomzimba ongenaxhala ukuba babeyithanda indlela ababephila ngayo. Kodwa ubomi batshintsha bengalindelanga kuba uMlawuli uKlawudiyo wathi amaYuda mawemke eRoma. Yayithetha ukuthini loo nto kuAkwila noPrisila? Kwakuza kufuneka bashiye iindawo ababesele beqhelene nazo, bayokuqala ikhaya elitsha futhi baqale phantsi neshishini labo lokwenza iintente kwenye indawo. Ngaba le nto yayiza kwenza ukukhonza uYehova kungabaluleki ebomini babo? Mhlawumbi sowuyazi impendulo. Kwikhaya labo elitsha eKorinte, uAkwila noPrisila bancedisana nompostile uPawulos ukuze baqinise ibandla lalapho. Emva koko, baya nakwezinye iidolophu ezazidinga abantu bokushumayela. (IZe. 18:18-21; Roma 16:3-5) Babexakekile, kodwa yayibavuyisa indlela ababephila ngayo!

12. Kutheni kufuneka abantu abatshatileyo bathethe ngezinto abafuna ukuzenzela uYehova?

¹² Abantu abatshatileyo namhlanje banokufana noPrisila noAkwila ngokusebenzela uYehova ebomini babo. Elona xesha lokuthetha ngezinto abafuna ukuzenza ebomini, kuxa besathandana. Xa besenza izigqibo bobabini baze bazimisele ukusebenzela uYehova, batsho babone ukuba uyabanceda. (INtshu. 4:9, 12) Khawucinge ngoRussell noElizabeth. URussell uthi, “Xa sasisathandana, sathetha ngezinto esiza kumenzela zona uYehova.” UElizabeth uthi, “Sathetha ngazo ukuze naxa kufuneka senze ezinye izigqibo, siqiniseke ukuba aziphazamisani nezinto esasithe siza kumenzela zona uYehova.” URussell noElizabeth bakwazi ukuya kuncedisa eMicronesia kwindawo efuna abavakalisi abangakumbi.

13. INdumiso 28:7 ithi kuza kwenzeka ntoni xa simthemba uYehova?

¹³ NjengoRussell noElizabeth, abantu abaninzi abatshatileyo baye bagqiba ekubeni bayeke ukwenza ezinye izinto ukuze ixesha labo elininzi balisebenzise ekushumayeleni nasekufundiseni abantu. Xa bethetha ngezinto abaza kumenzela zona uYehova baze bancedisane kuzo, batsho basikelelwe. Baza kubona ukuba uYehova ubakhathalele kangakanani, bamthembe nangakumbi baze bonwabe nyhani.​—Funda iNdumiso 28:7.

MTHEMBE UYEHOVA UKUBA UZA KUKWENZELA IZINTO AKUTHEMBISA ZONA NJENGOMPOSTILE UPETROS NOMFAZI WAKHE

14. Umpostile uPetros nomfazi wakhe babonisa njani ukuba bayithembile into ethethwa kuMateyu 6:25, 31-34?

¹⁴ Kwakhona abantu abatshatileyo banokufunda kumpostile uPetros nomfazi wakhe. Kwiinyanga ezimalunga neziyi-6 emva kokuba edibene noYesu, umpostile uPetros kwafuneka enze isigqibo esibalulekileyo. Wayeziphilisa ngokuloba iintlanzi. Ngoko xa uYesu wayemcela ukuba aqhubeke emlandela, kwafuneka acinge nangomfazi wakhe. (Luka 5:1-11) UPetros wakhetha ukuncedisa uYesu kumsebenzi wakhe wokushumayela. Wasebenzisa ingqondo! Ngoko sinesizathu esivakalayo sokuthi umfazi kaPetros wavumelana naye kwesi sigqibo. Kaloku iBhayibhile ithi emva kokuvuswa kukaYesu, umfazi kaPetros wakhe wahamba naye kangangexesha elithile. (1 Kor. 9:5) Kuba umfazi wakhe wayelimela kakuhle igama labafazi abangamaKristu, uPetros wakwazi ukucebisa abayeni nabafazi ekhululekile. (1 Pet. 3:1-7) Kucacile ukuba uPetros nomfazi wakhe bamthemba uYehova ukuba uza kuyenza into ayithethileyo yokuba uza kubanika izinto abazidingayo ukuba eyona nto iphambili kubomi babo kukumsebenzela.​—Funda uMateyu 6:25, 31-34.

15. Ufunde ntoni kuTiago noEsther?

¹⁵ Ukuba utshatile, ungenza njani ukuze ube nomdla wokuqhubeka usebenzela uYehova? Into yokuqala kukufunda nakwabanye abantu abatshatileyo. Ngokomzekelo, ungafunda amanqaku athi “Bazinikela Bengaqhutywa Mntu.” La manqaku anceda uTiago waseBrazil nomfazi wakhe uEsther banomdla wokuncedisa kwindawo edinga abavakalisi. UTiago uthi: “Xa safunda ngendlela uYehova abancede ngayo abakhonzi bakhe namhlanje, nathi sazimisela ukwenza into athi masiyenze size sibone xa esinceda.” Baya eParaguay. Ukususela ngo-2014, bebesebenza kwintsimi yesiPhuthukezi apho. UEsther uthi: “Umbhalo esiwuthanda kakhulu ngamaEfese 3:20. Siyibonile le nto ithethwa apha isenzeka ebomini bethu njengoko sisebenzela uYehova.” Kule leta yayisiya e-Efese, uPawulos wathi uYehova uza kusinika izinto ezininzi kunezo sizicelayo. La mazwi aye ayinyani!

16. Bangancedwa ngubani abantu abasebatsha abasanda kutshata abafuna ukusebenzela uYehova?

¹⁶ Abantu abasebatsha abasand’ utshata bangancedwa kukufunda kwabanye abaye bamthemba uYehova. Kusenokwenzeka ukuba indoda nomfazi wayo sebeneminyaka besebenzela uYehova. Ukuba nawe ufuna ukumsebenzela, kutheni ungakhe ubabuze ukuba benze njani bona? Le yenye indlela yokubonisa ukuba umthembile uYehova. (IMize. 22:17, 19) Nabadala bangabanceda abantu abasebatsha abasand’ utshata bazi ukuba bangenza njani ukuze bamsebenzele ngendlela abafuna ngayo uYehova.

17. Yintoni eyenzeka kuKlaus noMarisa? Isifundisa ntoni thina?

¹⁷ Sisenokufuna ukusebenzela uYehova ngaphezu kokuba sisenza, kodwa izinto zingahambi ngale ndlela besifuna ngayo. Kwenzeka loo nto kuKlaus noMarisa, esithethe ngabo ekuqaleni. Emva kweminyaka emithathu betshatile, bemka kwikhaya labo baya kuncedisa kumsebenzi wokwakha kwisebe laseFinland. Kodwa bafumanisa ukuba abazukuvunyelwa bahlale apho ixesha elingaphezu kweenyanga ezintandathu. Ekuqaleni babephoxekile. Kwadlula ixeshana, bacelwa ukuba baye kwiklasi efundisa isiArabhu. Ngoku bashumayela kwintsimi yesiArabhu bonwabile kwelinye ilizwe. Xa ecinga ngale nto, uMarisa uthi: “Ndiyoyika ukwenza into endingazange ndayenza. Kuye kwafuneka ndimthembe nyhani uYehova. Kodwa ndimbonile esinceda ngeendlela esingazange sazilindela. Ngoku ndimthemba kakhulu kunakuqala.” Le mizekelo isenza siqiniseke ukuba uYehova uza kusoloko esisikelela ukuba simthemba ngokupheleleyo.

18. Abantu abatshatileyo banokwenza ntoni ukuze baqhubeke bethembe uYehova?

¹⁸ Umtshato sisipho esivela kuYehova. (Mat. 19:5, 6) Ufuna abantu abatshatileyo basonwabele esi sipho. (IMize. 5:18) Bantu abasebatsha abasand’ utshata, nifanele nizibuze ukuba nenza ntoni ngobomi benu? Ngaba nenza yonke into eninokuyenza ukuze nibonise uYehova ukuba niyambulela ngesipho somtshato? Khanithandaze kuye nithethe naye. Khangelani eBhayibhileni imigaqo enokuninceda. Emva koko yenzani loo nto anixelela yona. Ukuba nizimisela ukusebenzela uYehova emtshatweni wenu, kuza kuba mnandi.