Ileta Evela KwiQumrhu Elilawulayo
HAYI indlela esibabalwe ngayo! NjengamaNgqina kaYehova, sinelungelo kungekuphela nje elokwazi uYehova, okuphela koThixo oyinyaniso nophilayo, uMdali wendalo iphela, kodwa elokuthwala igama lakhe nelokumkhonza. Enjani yona intsikelelo!—Isa. 43:12; Heb. 8:11.
Sinethemba losindiso yaye sithunywe ukushumayela iindaba ezilungileyo zoBukumkani ukuze nabanye banqule uYehova baze babelane nathi ngethemba esinalo. (Mat. 24:14; Roma 10:13,14; 1 Tes. 5:8) Kwakhona sivuyiswa kukuba ngabanquli ababubuzalwana bezizwe ngezizwe abathandanayo nabakuvuyelayo ukuncedana. Hayi indlela okunomvuzo ngayo oku!
IBhayibhile isikhuthaza ngokufanelekileyo isithi: “Mkhonzeni uYehova ninemihlali. . . . Ngenani emasangweni nibulela, ezintendelezweni zakhe nidumisa. Bulelani kuye, nibongoze igama lakhe. Kuba uYehova ulungile; ububele bakhe bothando bukho ukusa kwixesha elingenammiselo, nokuthembeka kwakhe kukwizizukulwana ngezizukulwana.” (INdu. 100:2-5) Ukukhonza uYehova sivuya kunento yokwenza nokuba nolwalamano lobuqu olomeleleyo kunye naye. Nguye owenza sibe nolwalamano olunjalo, yaye sinelungelo lokuluhlakulela. Xa sinolwalamano olunjalo, siyazi ukuba uYehova usoloko ekulungele ukusinceda nokusomeleza ngamaxesha anzima. Siqinisekile ukuba uya kusomeleza ngokomoya aze asinike ulwalathiso olufunekayo ukuze sikwazi ukuhlangabezana nocelomngeni lokuphila kule mihla yokugqibela yale nkqubo yezinto. Phezu kwayo nje ingcinezelo esijamelene nayo, siyavuyiswa bubulungiseleli bethu, yaye yonke imihla siyambulela uYehova, kuba kanye njengokuba sikhunjuzwa liLizwi lakhe, ‘usikhathalele.’—1 Pet. 5:7.
Kunyaka ophelileyo, ngokwenene uYehova uye wasisikelela ngokuyintabalala. KwiNdibano YeSithili ‘Yabenzi Belizwi LikaThixo’, sachulumanca kukuba kunye namawaka abanye abanokholo oluxabisekileyo olufana nolwethu, sicula kunye yaye sizondla kwitafile yokomoya kaYehova. KwiZifundo Zencwadi ZeBandla esikuzo, siye sanandipha ukufunda kunye amava omeleza ukholo akwincwadi ethi Nikela Ingqalelo Kwisiprofeto SikaDaniyeli! Ukongezelela, hayi indlela esachulumanca ngayo xa sifumana uMqulu 1 wempapasho entsha ethi Isiprofeto SikaIsaya—Ukhanyiselo Lwalo Lonke Uluntu! ‘Indebe yethu iyaphuphuma.’—INdu. 23:5.
Olunjani uvuyo olubangelwa kukwazi ukuba izigidi zethu, thina bazalwana noodade bokomoya, zimanyene ekunquleni uYehova! Hayi indlela ekulukhuthazo ngayo ukufunda ngeencopho ezintsha ngokuphathelele ubulungiseleli basentsimini! Sivuyiswa luninzi lwabo babekho kwiSikhumbuzo sokufa kweNkosi yethu—ababekho phezu kwazo nje ezi meko zehlabathi. Njengoko sikhangela kwintsimi yehlabathi lonke, kucacile ukuba “isivuno, eneneni, sikhulu.” (Luka 10:2) Ngokomlinganiselo, kunyaka ophelileyo veki nganye izifundo zeBhayibhile ezingama-5 555 bezisenza inkqubela ukusa kwinqanaba lokuba zifuzisele uzahlulelo lwazo ngokubhaptizwa emanzini. Ngoxa isivuno sisikhulu kwiinxalenye ezithile zomhlaba kunakwezinye, sonke siyavuyiswa koko uYehova akwenzayo. Sibona ubungqina obuqinisekileyo bentsikelelo yakhe kwimigudu emanyeneyo yabakhonzi bakhe.
Ukwakhiwa kweeHolo zoBukumkani kuye kwasesinye sezizathu zovuyo olukhulu! Saneliswa kakhulu kukubona abazalwana noodade abakumazwe asakhasayo bewuxhasa ngokusuka ezintliziyweni lo msebenzi. Sele kwakhiwe iiHolo zoBukumkani ezininzi ngoncedo Lwamaqela Okwakha IiHolo ZoBukumkani aye aqeqeshwa ngendlela efanelekileyo. Aba bazalwana baye basuka kwelinye ibandla besiya kwelinye elikwilizwe labo ukuze bakhokele kumsebenzi wokwakha iiHolo zoBukumkani. Ekubeni kusafuneka kwakhiwe amawaka eeHolo zoBukumkani, kucelwa abasebenzi bokuzithandela abangakumbi abaphuma kumazwe asakhasayo ukuba bancede kulo msebenzi ubalulekileyo. Ukuba uhlala kwelinye lamazwe anjalo, ngaba ungazenza ufumaneke? Hayi indlela abazalwana noodade abakuxabisa ngayo ukuba neHolo yoBukumkani yabo abahlanganisana kuyo ukuze banqule! Yaye hayi indlela abanombulelo ngayo kubazalwana abasehlabathini lonke ngoncedo lwemali abalunikelayo ukuze babe neyabo!
Siyachulumanca kukuva iindaba zoloyiso olungokwasemthethweni. Sekunjalo, kumazwe amaninzi kukwakho nabantu abanempembelelo abebengathanda ukuluphelisa unqulo lukaYehova. Njengoko sihlangabezana nezi meko, siqinisekile ukuba, uYehova uya kusinceda kungakhathaliseki nokuba baninzi kangakanani na abachasi okanye bachanabeke kangakanani na abakhonzi bakhe. (2 Kron. 14:11) Sinincoma ngokufudumeleyo nonke nina bazalwana noodade abaqhubeka beqinile kunqulo lokwenyaniso.
Qhubekani nisomeleza ukholo lwenu yaye nikholose ngoYehova ukuze anikhokele njengoko nizalisekisa imbopheleleko yenu yobuKristu ngovuyo. (IMize. 3:5, 6) Asinasizathu sokutyhafa, kungakhathaliseki oko utshaba lunokuvunyelwa lukwenze. Khumbula indlela uElisha awamkhuthaza ngayo umlindi wakhe owayenxubile: “Musa ukoyika, ngokuba baninzi ngakumbi abo bakunye nathi ngaphezu kwabo bakunye nabo.” (2 Kum. 6:15-17) Namhlanje, umkhosi kaYehova wasezulwini ukulungele ukukhusela izilangazelelo zonqulo olunyulu njengoko wawunjalo ngomhla kaElisha. Sijongene nekamva ngentembelo. NguYehova ophethe iintambo. Iintlanga azinto yanto xa zithelekiswa naye. Uye wabeka uNyana wakhe etroneni emnike lonke igunya lokulawula. “Banoyolo bonke abo basabela kuye.”—INdu. 2:1-6, 12.
Nonke nina bazalwana noodade abathandekayo ncedani nikhumbule ukuba sihlala sicinga ngani. Umthandazo wethu onyanisekileyo ngowokuba ngamnye wenu ‘ame ngokuqinileyo, angahexi kuko konke ukuthanda kukaThixo.’—Kol. 4:12.
Abazalwana benu,
IQumrhu Elilawulayo LamaNgqina KaYehova