Mmuupuwele Mwaara a Looti

Looti aakhala ni atiiyu-ye Abrahaamu Elapo ya oKanaani. Nuuvira okathi, Abrahaamu ni Looti yaahikhalana inama dhawaatta mpakha ohikaweryaneya okhala opuro mmodha. Tivondho Abrahaamu aahinleela Looti wiira: ‘Okhala wiira khonweryaneya nyuwo ni miyo okhala opuro mmodha, safatali nthanle elapo muntthunna nnyu. Nyuwo mwaarowa moono weethiyana, miyo kinoorowa moono weelopwana. Abrahaamu aahinvaha Looti eparakha ya opacera othanla. Nyuwo khannoona wiira Abrahaamu aahoonihera ooreera nrima?

Looti aahoona nttetthe wooreera wa elapo ya oKanaani epoma ya oSodoma. Epoma ele yaahikhalawo maadhi awaatta ni malasi. Ndho Looti ahithanla othaamela epoma ele vamodha ni emudhi-ye.

Atthu a oSodoma ni atthu a epoma ya Okomora yaari ootepa otakhala. Mweekhweli, atthu awo yaari ootepa otaakhala mpakha Yehova olakela opwetesa ipoma idhe dhoopili. Masi aanitthuna omoopola Looti ni emudhi-ye, tivondho aahiruma malaikha maili wiira erowe yanleele Looti wiira: ‘Mwaakuve nkhume-va! Okhala wiira moohilokela Yehova onoopwetesa epoma ela.’

Masi Looti khaakhumme mwawaakuveya. Tivondho malaikha ale yaahimpharela Looti, amwaariye ni ana yakhumihera otta wa epoma ele. Ni yaaleela wiira: ‘Atthu etthawe wiira yoopole ikumi-dha, ni atthu ehilipele ottuli; atthu yalipelawo, anookhwa!’

Okathi Looti ni emudhi-ye yaaphin’ya awa epoma ya oSowari, Yehova aahimorosela mooro waakhuma wiirimu epoma ele ya oSodoma ni Okomora. Ipoma idhe dhoopili Yehova aahipwetesa moomalela. Okathi amwaariye Looti yaahaamwiiwelenla awa Yehova ni elipela ottuli, awo yaahithatuwa nluku na maakha! Masi Looti ni ane yaari oophareleleya okhala wiira awo yaahimwiiwelela Yehova. Masi-tho yaahiriipiwa nrima mwaha wa ele yaairanen’ye. Munniwerya woona otthuneya-wa omwiiwelela Yehova?