Yehova Aahinvaha Ikuuro Sansooni

Atthu awaatta akina a wIsarayeeli yahitthikela wakokhorela amuluku eetheru, ndho mwaha wa elo Yehova ahiwiiriha aFiliisti wahaasa aIsarayeeli. Masi aIsarayeeli akina yaanimpheta Yehova. Mmodha atthu awo ari Manowa ni mwaari-ye, yawo yahaarina mwaana. Ndho nihiku nimodha nlaikha na Yehova nahaleela amwaari-ye Manowa wiira: ‘Yehova onawovahani mwaana yoowo on’ya owoopola aIsarayeeli mmatatani wa aFiliisti. Mwaana owo on’ya okhala nNaziri.’ Nyuwo munnadhuwela aNaziri? aNaziri yaari atthu yaanrumeela Yehova mwa enamuna ya vameekha aya ni khiyakasiwa maihi.

Noovira okathi vakhani, Manowa ni amwaari-ye yaahin’yara mwaana yoowo aitthaniwa Sansooni. Yehova ahinvaha ikuru dhawaatta Sansooni dheidho dhaamwirinhe omwiipha mwatto ni matata. Nihiku nimodha, Sansooni aahiwiipha aFiliisti 30 meekhe. aFiliisti yaninnyokha vawaatta Sansooni ni yaanitthuna omwiipha. Ohiyu omodha Sansooni aruupaka epoma emodha enitthaniwa oGaaza, aFiliisti yaahura wiira enlipelele vankhora wa esidadi ele mpakha mmelommwa ohihiyu. Masi ohiyu eriyari, Sansooni ahivenya aphola nkhora wa esidadi ele ni atthepa arowa athomeya vadhulu wa mwaako esidadi ekina!

Masi hata ori dhidho aFiliisti khiyahin’ye onkoca Sansooni. Tivondho awo yaahivenya erowa yamphwanya Daliila mwari-ye Sansooni ni enleela wiira: ‘Hiyo nintthuna omphara Sansooni, ndho mwanileela etthu emmwiriha okhalana ikuru dhawaatta, ninawooovahani nsurukhu wawaatta wa eparatha.’ Daliila aanitthuna vawaatta nsurukhu ole, tivondho owo ahaakhalihera aFiliisti. Woopacerani, Sansooni khaatthuna onleela Daliila etthu yaamwiriha okhalana ikuru. Masi okhala wiira owo ahikhanyereera onkoha, Sansooni aahinleela wiira: ‘Miyo ka nNaziri ni nkinakasiwe maihi, ndho akhala wiira maihi aka anookasiwa ikuru inookimalela.’ Sansooni khupuwenle saana para onleela Daliila etthu yaamwiiriha okhalana ikuru dhaawaatta. Moodhuwela etthu Daliila apanke iye?

Mwawaakuveya Daliila ahirowa waaleela aFiliisti wiira: ‘Nennava, koodhuwela etthu emmwiriha Sansooni okhalana ikuru dhawaatta!’ Tivondho noomala owo otthika ahimwiriha Sansooni oruupa vamettoni-ve, ni aahinleela ntthu mmodha wiira akase maihi-ye. Noovira okathi vakhani aFiliisti yaahura wiira emphare Sansooni. Ndho okathi Sansooni aatthuna iye wiidhaakiha, ahoona wiira khaarina ikuru!’ Tivondho aFiliisti yahimphara esonyola maitho-ye ni entthukela nkateya.

Nihiku nimodha aFiliisti yahithukumana wiira enkokhorele muluku-ya Dakooni, awo yaanikhuwela yiiraka: ‘Noowerya omphara Sansooni nikhaliheriwaka ni muluku nhu Dakooni! Ndho okathiya yoole yaahavekela atthu-ya wiira akhumiheriwe Sansooni vaate, noomala okhumihiwa atthu ale yaahintthukelela ni mapotto maili yalipinhe empa ele ni yaahipacera ontheya. Masi okhala wiira maihi a Sansooni yaaira epacenre wunnuuwa, owo ahinvekela Yehova airaka: ‘Oo Yehova, safatali nkivahe ikuru oleelo vaava pahi.’ Ndho Sansooni akhaliheriwaka ni Yehova ahiphwanya ikuru ni aahikakhavo mapotto ale. Ndho empa ele yaahamorela atthu ootheene yaari opuro ole ni atthu ootheene yahuukhwa onhela mpuwa Sansooni.