Yehova Ahimpisera Nrima Yoona

Niinive yaari esidadi ya wAasiiriya, atthu a esidadi ele yaari ootepa otakhala. Tivondho Yehova aahinruma profeeta Yoona wiira aalopole atthu a oNiinive wiira erukunse mirima-dha. Masi ohiya Yoona orowa oNiinive, owo aahiwela ekalawa athyawela esidadi yottaivela oNiinive, yeelo yaithaniwa oTarsi.

Yeettaka dhiidhaale ni eKalawa, yahikhumelela ettheku yawaatta yeelo yaakhumihenre meepi muulupale. Ndho atthu ootheene yaari nKalawani mmwe yaahova vawaatta. Tivondho khuta ntthu aahipacera onvekela muluku-ye, wiira atthu edhuuwele etthu yairinhe okhumelela ettheku ele. Ndho Yoona ahaaleela atthu yaari nkalaawani mmwe wiira: ‘Nthowa ti nawaka. Yehova okirumme orowa ovara nteko-ye oNiinive, ndho miyo kitthyawa. Akhala wiira atthu anokirahela mpahari-mu ettheku ela enoomala.’ Atthu yeettiha eKalaawa ele yahikhootta opaka ele yavekeliwa awa ni Yoona, masi veene ahaakhanyerera. Okathi ariheliwe iye mpahari ettheku yahimaala.

Yoona ahiphwina ni uupuwela wiira ankhwa. Tivondho owo ahinvekela Yehova. Okathi yoole Yehova aahiruma ehopa wiira yammirye Yoona, ehopa ele yahimmirya masi khiyaamwimphe. Yoona ari mmirimani wa ehopa ahivekela airaka: ‘Oo Yehova kinnolaiherani wiira okhuma nenna-va mpakha nhoolo, kikanwiiwelelani.’ Yoona ahiiviriha mahiku maraaru ari mmirimani wa ehopa, ndho Yehova ahiiriha ehopa ele onrapheela vatthayani ya wuuma.

Niire wiira elo entaphulela wiira Yoona aya otthikela owaani? Naari. Yehova ahinruma-tho ekhwaha ya naili wiira arowe oNiinive. Masi ekhwaha ela Yoona ahiwelela. Okathi aphin’ye iye oNiinive, Yoona ahaaleela atthu otakhala airaka: ‘Yaamala maiku 40, Niinive onopwetesiwa.’ Masi mootikiniha yaahikhumelela etthu yahalipeleliwa. Atthu ootheene a oNiinive yaahirukunsa mirima-dha. Ni-tho mwene ahaaleela atthu ootheene wiira: ‘Ninvekele Muluku, wiira anilevelele. Woonawene owo onoonilevelela.’ Okathi Yehova onna iye wiira atthu a oNiinive yaahittharuwa, owo ahilakela ohipwetesa esidadi ele.

Noomala Yoona woona ele ahinanariwa vawaatta. Owo khaapisenre nrima atthu a oNiinive, nkhama dhiidhale Yehova ampinsenre iye nrima. Owo aahikhuma esidadi ele ananariwe vawaatta, arowa akilathi nkhitto wa nttaikho wa marakuxa. Masi mwawaakuveya nrakuxa ole waahukhwa ndho elo yahimwiiriha Yoona otepa onaanariwa. Ndho Yehova ahinhudhiha etthu yootepa otthuneya Yoona airaka: ‘Nyuwo nhoonela othunku nrapela ola waaxira atthu a oNiinive. Miyo nkaapwetense awo okhala wiira kihaamorela ikharariʼ. Epontu seeni enttittimiheriwa nva? Atthu a oNiinive yaari ootthuneya oxira nrapela ole.