Yoosiya Aanipheta Malamulo a Yehova

Yoosiya akhanle mwene arina miyaakha 8. Okathi ole, atthu awaatta yaapaka itthu dhahandhivela Yehova, awo yaanipaka itthu nkhama maxiya, waakokhorela amuluku a etheeru. Noomala Yoosiya okhalana miyaakha 16, veene ahiilipihera onkokhorela Yehova mwa enamuna yookhalela. Okathi aariyena miyaakha 20, aahipaka ekampaanya ya waapwetesa amuluku etheeru ni itempulu-dha elapo yootheene. Ni noomala okhalana miyaakha 26, owo aahiruma okociheriwa etempulu ya Yehova.

Nankuttho muulupale Hilikiya, ahiphwanya eroolu ntempulu yaarina malamulo a Yehova, woona wene elo yaatikhiwe ni Moise. Sekeretaariyu a mwene, Safaani, ahikusa eroolu ele aroiha wa Yoosiya ni aahisoma mwa enamuna ya wiiweya. Okathi Yoosiya aiwale iye moolumo a nroluni mmwe, ahidhuwela wiira atthu yaahihiya onkokhorela Yehova mwa miyaakha dhawaatta. Mwene Yoosiya aahinleela Hilikiya wiira: ‘Yehova oonanariwa vawaatta ni hiyo. Nrowe mwalotte ni veene, woonawene onoonileela etthu nintthune-ya nhu opaka.’ Yehova aahakhula anrumelaka profeeta Hulda, owo alontte wiira: ‘Atthu a oYuda aahiya okikokhorela, atthu awo anawaakhela ehukhumu, masi mwene Yoosiya naari okhala wiira veene ohiyeviha ohoolo waka.’

Noomala mwene Yoosiya wiiwa molumo ale, aahirowa otempulu aathukumanya atthu ootheene a oYuda. Asoma malamulo a Yehova para atthu ootheene, noomala-vo atthu ootheene yaahilaihera onkokhorela ni omwiwelela Yehova pahi ni nrima-ya wootheene.

Mwa miyaakha dhawaatta atthu a oYuda khiyaapaka efeesta ya paasikha. Masi noomala Yoosiya osoma nlamulo nne, owo ahilakela opaka efeesta ya paasikha para Yehova. Owo ahivaha inama-dhe para mikutthu, ni ahaapweha atthu awiipa ntempulu. Noomala efeesta ya paasikha ovira, atthu yaahilakela opaka-tho efeesta ya iphaawu dhoohiheliwa eferamenta mpakha mahiku 7. Okhuma okathi wa Samuweeli mpakha okathi ole, khaatanke opakiwawo paasikha nkhama yoole. Mweekhweeli Yoosiya anipheta malamulo a Yehova. Khi nyuwo? Niire tho onnodhivelani ohudha voohima dha Yehova?