Marapasi Masese Yaamwiiwelenle Yehova

Nabukhodonosori anitthuna wathanla ni wakhaliha makhuluupale alopwana aaphanre iye oYuda wiira ekanvarela miteko. Tivondho aahinruma nlopwana aaitthaniwa Axipenazi waathanla marapasi yaarina ikuru ni yaadhuwela ovara saana miteko. Marapasi awo yaanhudhihiwa ovara itthu dhawaatta miyakha miraru. Okhala wiira yaaya ekanrumeela mwene, yaanitthuneya ohudha oleeri, waatikha ni olotta elottelo ya oBabilooniya. Nitho marapasi awo yaaya ekaca eyooca aaca mwene opalaasiyu. Marapasi awo yaaitthaniwa Daniyeeli, Ananiiya, Mixayeeli ni Azariiya. Masi Axipenazi ahavaha madhina makina yawo yaitthaniwa: Baltasari, Sadraki, Mesaki ni Abedineeku. Niire itthu yaahudhihiwa awa oBabilooniya dhanhonona waatana-wa ni Yehova?

Marapasi awo masese yaahilakela omwiiwelela Yehova. Awo yaahidhuwela wiira oBabilooniya dhaniciwawo iyooca ikina, dhaakhoottihiwa ni nlamulo na Yehova. Ndho mwaha wa elo, awo yaahinvekela Axipenazi wiira: ‘Safatali nhivivahe eyooca ya mwene.’ Axipenazi aahiwaakhula wiira: ‘Akhala wiira nyuwo khamunca eyooca ela ya mwene, ni mwene oona wiira ankhala nkhama atthu anoowereiwa, mwene onookipha!’

Daniyeeli aahirowa olotta ni nlopwana akhapelela marapasi ale, anleelaka wiira: ‘Safatali, nkanivaha mathapa ni maadhi pahi. Noovira mahiku 10 nlikanyihe irutthu dhihu ni irutthu dha marapasi makina anca eyooca ya mwene.’ Nlipa olipelela ole ahakhulela.

Noovira mahiku 10 yaahehereriwa, Daniyeli ni axirikha-ye ale araru yaari oreerela ni ooneeneva waxira marapasi makina. Yehova aahihakalala vawaatta okhala wiira marapasi ale yaahimwiiwelela. Yehova aahinvaha Daniyeeli miruku dha odhuwela otaphulela dhooloha.

Noovira miyakha miraru, Axipenazi aahaakusa marapasi ootheene aaroiha wa Nabukodonosori. Mwene aahilotta ni khula mmodha a marapasi ale, ndho owo aahoona wiira Daniyeeli, Hananiiya, Mexayeeli ni Azariiya yaari oodhuwela waxira marapasi makina. Tivondho mwene aahaathanla marapasi ale masese wiira ekanrumeela. Ndho khula mwaha muulupale, mwene anaavekela miruku marapasi ale asese. Yehova aahaavaha miruku ni aakhili waaxira adhuweli ootheene ni anahako a mwene.

Ata Daniyeeli, Hananiiya, Mixayeeli ni Azariiya yaaroihiwe elapo yoottaiwene, khiyaaliyanle onkokhorela Yehova. Khi nyuwo niire nnovikaniha onruumela Yehova ata nkhalaka ottaiwene ni anaan’yari nnyu?