Elizabeeti Aahin’yara Mwaana

Dhaahivira miyaakha 400 nuumala makokoro a oYerusaleemu otekiwa. Zakariiya ni mwaariye Elizabeeti, yaakhala waattamela esidadi yele. Dhaahivira miyaakha dhawaatta Zakariiya ni Elizabeeti ethelanne, masi ehaana mwaana. Nihiku nimodha Zakariiya ahivolowa ntempulu mwa Yehova wiira avahe nkuttho. Ndho nlaikha Gabriyeeli naahinkhumelela. Zakariya aahoova vawaatta, masi nlaikha Gabriyeeli naahinleela wiira: ‘Nhoove, miyo kooruhenleni ihapari dhooreera dhinkhuma wa Muluku. Mwaarinyu Elizabeeti, onookhalalna mwaana nnanlopwana yoowo mun’ya nnyu onvaha ndhina na Yoohaani. Yehova onthanla owo wiira avare nteko wavameekhaya.’ Masi Zakariiya ni Elizabeeti yahuuluvala wiira ekhalena mwaana, tivondho Zakariiya khaakhupanli moolumo yaalottiwe ni nlaikha nne. Ndho mwaha awa elo nlaikha Gabriyeeli naahinleela wiira: ‘Miyo kirummwe ni Muluku wiira kooleeleni moolumo ala. Masi okhala wiira nyuwo khankhupanli, nnoohiya olotta mpakha mwaana owo oyariwa.’

Zakariiya aahiviriha okatthi wawaatta ari nipuro nawaarya ntempulu. Okathi akhumenle iye vaate, atthu yanitthuna oodhuwela etthu yankhumelenle. Masi okathi owo, Zakariiya khaawerya olootta, masi aathoonya pahi ni matata. Ndho atthu yahidhuwela wiira Zakariiya aahiruuheliwa ihapari dhinkhuma wa Muluku.

Noovira mahiku vakhaani, Elizabeeti aahirupala ni aahin’yara mwaana nnanlopwana, nkhama nlaikha nle nalontta awa. Axirikha-ye ni amudhi-ye yaahihakalala vawaatta ni yaahuura omoona mwaana owo. Elizabeeti ahilotta wiira: ‘Mwaana ola ndhina-ne ti Yoohaani.’ Atthu yaahakhula wiira: ‘Mweemudhini mwinyu khaamo ntthu oniitthaniwa Yoohaani, akhale Zakariiya ndhina na apaapa-ye.’ Masi Zakariiya aahikusa ethaapwa eekhaani aatikha wiira: ‘Ndhina-ne ti Yoohaani.’ Naanaanoru Zakariiya ahitthikela oolotta! Ihapari idhe voohima dha mwaana ole dhaahivuwa nttetthe wootheene wa oYuda, ndho atthu yaanikohana yiiraka: ‘Mwaana yoola annuwa on’ya okhala aani?’

Yehova aahimwiiriha Zakariiya odhala nnepa wawaarya. Ndho owo aahilotta airaka: ‘Attottopeliwe Yehova, okhala wiira owo aahimmanela natiri Abrahaamu wiira arowa onruma moopoli, Mesiya, wiira anaakihe. Yoohaani on’ya okhala profeeta, ni onawaakhalihera atthu wiilokihera wiira emwaakhele Mesiya.’

Nitho, yookhala etthu ekina yootikiniha yamwiiraneenle Maria mmudhi-ye Elizabeeti. Yaari eseeni? Ninawoona mwaha onttharelana.