Yeesu Ahaakhumelela Arummwa-ye

Nuuvira okathi vakhaani Yeesu aakhumelele arummwa-ye, nrummwa Peedru aahirowa ociya epahari ya oKalileeya. Tome, Yaakobe, Yoohaani ni arummwa akina yaahintthara. Yaahiviriha ohiyu wootheene eciyaka masi khiyaiphale etthu.

Oyaaka osa, arummwa ale yahimoona nlopwana mmodha eemenle ekhopela ekina. Owo ahaakoha wiira: ‘Atthu ahiipha ihopa?’ Arummwa yahaakhula wiira: ‘Naari, khiniimphe etthu!’ Ndho nlopwana ole aahaaleela wiira: ‘Nttikhele nthavi moono weelopwana wa ekalawa nnyu.’ Okathi arummwa yapanka awa elo, nthavi nahidhala ihopa mpakha ehikawerya opurulela eri nkalawani. Okathi-ya yoole nrummwa Yoohaani ahoona wiira ari Yeesu, tivondho aahilotta wiira: ‘Ole ti Yeesu!’ Mwawaakuveya, nrummwa Peedru aahituphela mmaadhini arapelela mpakha ekhopela ekina ya epahari. Masi arummwa akina yaanthara ottuli ni ekalawa.

Okathi arummwa ale yaaphin’ya awa okhopela iwe, yaahipwanya iphawu ni ihopa dhoosiwaka vaikho. Ndho Yeesu ahaleela arummwa ale wiira eruhe ihopa ikina yoose. Nuumala-vo Yeesu vamodha ni arummwa-ye yaahikhura iphawu idhe ni ihopa.

Nuumala okapari oca, Yeesu aahinkoha Peedru wiira: ‘Peedru munnikipheta oxira nteko nnyu?’ Peedru ahaakhula wiira: ‘Nyuwo moodhuwela wiira miyo kinnoophetani.’ Ndho Yeesu ahinleela wiira: ‘Akhala wiira ti dhiidho nkhapelele ipwittipwitthi dhaka.’ Okathi-ya yoole Yeesu aahitthikela onkoha-tho Peedru wiira: ‘Mweekhweeli nyuwo munnikipheta?’ Peedru ahaakhula evaara ya naili airaka: ‘Kiirale kinnophetani.’ Okathi Yeesu aankonhe iye Peedru evaara ya neeraru akhala wiira aanimpheta, Peedru aahiriipiwa nrima ni ahaakhula wiira: ‘Pwiya nyuwo moodhuwela saana wiira miyo kinnophetani.’ Ndho Yeesu aahinleela Peedru wiira: ‘Nkhapelele ipwittipwitthi dhaka ni nhihi-ye okhala nrummwa aka.’