Ewarakha ya Nikhuru Noolamulela

Anna ni Arokora Oophetiwa:

Ompheta wihu Muluku vamodha ni atthu onniniiriha ‘orowa waahudhiha atthu a ilapo dhootheene wiira ekhale ahudheri, naapatisika.’ (Mat. 28:19, 20; Mar 12:28-31) Waapheta atthu, wookhalana owerya wuulupale. Opheta onniwerya ophara mirima dha atthu arina ‘nrima wooreera wiira yaakhele ekumi yoohimala.’—Miteko 13:48.

Khalai, naniilipihera otakiha dhawoonihera dhinkhumiheriwa khuta mweeri ni okawa iliivuru. Masi vano nihaana opaka marukunuso voohima dha moopora ninvaanela nhu ni atthu akina. Hiyo nintthuna woonihera wiira ninnaapheta atthu nilottaka miyaha dhinaadhivela awo. Wiira nipake elo, nihaana okhalana nvayi ni wiilipihera wuupuwelela itthu dhininxakiha ni dhimmudhivela khuta ntthu. Ndho ebroxuura ela en’ya onikhalihera dhai opaka elo?

Ebroxuura ela yookhalana dhoosoma 12 dhinoonihara mikhalelo ninreerela nhu wunnuwihera wiira niwerye woonihera waapheta atthu ni waapaka ahudheri. Khuta yoosoma ennivarihana ni yawiiraneya ya mBiibiliyani enttittimihera nkhalelo mmodha Yeesu aahiidho Makiristau a eseekulu yoopacera yoonihera awa evaraka nteko woolaleerya. Yoolakela nhu kahi otakiha dhawoonihera dhinkhumiheriwa khuta mweeri, masi waadhya moopora nikhanle nhu woonihera waapheta atthu. Mikhalelo dhinromoliwa ebroxuura ela dhinnivareleya nteko inamuna dhootheene dha nteko nhu woolaleerya. Masi vaavo nin’ya nhu othokorerya ebroxuura ela ninawoona moopora mikhalelo dhikina dhiraawa dhootthuneya wiira nipacerihe ovaanela, osekurya aahiidho wiiriha dhoosoma dha Biibiliya.

Ndho vaavo munthokorerya nnyu khuta yoosoma, muupuwelele moopora nkhanle nnyu woonihera nkhalelo owo okathi munvaanela nnyu ni atthu nttetthe munkhala nnyu. Mwaacerere ompheta winyu Yehova ni atthu. Nitho oxira itthu dhootheene, opheta onawookhaliherani waakhwanihera yoolakela nnyu ya waapaka ahudheri.

Ninnihakalala okhalana eparakha ela yuulupale ya ovara vamodha ni nyuwo ni nrima mmodharu. (Sof. 3:9) Ninvekela wiira Yehova ahihiye oreeliha wiilipihera winyu owoonihera waapheta atthu ni waapaka ahudheri!