Itthu Dhinkhalihera Opaka Yoosoma Voohiloverya
Atthu awaatta annitthuna opaka yoosoma ya Biibiliya ya omwaneene. Masi onnaaliperya opaka elo voohilorya ni mwa enamuna yoohakalaliha. Eseeni en’ya wookhaliherani ohiloverya yoosoma nnyu ya Biibiliya ya omwaneene ni opaka elo mwa enamuna yoohakalaliha? Muupuwelele etthu enookhaliherani ohihiyerera ovara itthu mumpaka nnyu khuta nihiku nkhama orapa ni ofula. Ekhweeli wiira miteko idha dhinvekela okathi ni ikuru, masi hata eri dhiidho ovara miteko idho onnoophwanyihani ohakalala. Emodha-modharu, vaavo nininsoma nhu Biibiliya ʼninnirapihiwa ni noolumo na Muluku, nkhama orapihiwa ni maadhiʼ. (aEef. 5:26) Moone malakihero an’ya wookhaliherani ohiloverya yoosoma nnyu:
Nkhalena eprokaraama. Yoosoma ya Biibiliya ya omwaneene etthu emodha yootepa otthuneya nkiristau ohinreerela iye oliyala opaka mahiku ootheene. (aFil. 1:10) Wiira nwerya opaka elo, nhaana opweha eprokaraama ya yoosoma nnyu opuro wookhweya woona, nkhama opateya vasaala aahiidho vankhora wa okwaartu winyu. Nitho mwakhalana telefooni, nyuwo pooti onttapunya alaarme wiira akawuupuseryani ihalaka minuutu vakhaani.
Nlamalelihe makhalelo nnyu. Eseeni en’ya wookhaliherani nihiku nno? Niire opaka yoosoma nnyu ekwaha emodha hata nvirihaka minuutu dhawaatta? Aahiidho nnoona wiira nnootepa ottottela nreerelo mpakaka ekwaha enxira emodha mwa okathi woovirikana? Nyuwo munnidhuwela makhalelo nnyu. Ndho mpaka yoosoma nnyu moovarihana ni makhalelo nnyu. Akhala wiira nihiku nimodha nnoona wiira khamunwerya opaka yoosoma nnyu ya omwaneene, mwiilipihere waakhwanihera, pooti mpakaka minuutu vakhaani pahi. Opaka elo enawookhaliherani ohudha itthu ipheya mwahaaya nnyu odhuwela mwaaloverye. Ndho elo enoowiirihani otthuna odhuwela itthu dhikina.—aFil. 2:13.
Nthanle mwaha mun’ya nnyu osoma khalairu: Nhaana opaka eliista ya miyaha mun’ya nnyu osoma khalayiru; mwaahiire dhiidho nyuwo nnoohonona okathi nnyu mahaleene. (aEef. 5:16) Mwa ntakihero, nyuwo pooti waatikha eliista ya miyaha muntthuna nnyu osoma. Akhala wiira enookhala etthu nhinwerya nnyu wiiwasasa, mwaatikhwe vawarakhani. Woomalani wa khuta yoosoma, nyuwo pooti waacerera valiistani vinyu itthu nnoona nnyu wiira munnitthuna wiiseriha odhuwela winyu.
Nkhale nvayi. Tivootthuneya okhala anvayi vaavo mumpaka nnyu yoosoma nnyu, nvarerye okathi munviriha nnyu ni miyaha munthanla nnyu osoma. Etthu yootepa otthuneya khahi nihiku, mwaattelo wa okathi aahiidho mwaha munsoma nnyu; Etthu yootthuneya ohiloverya yoosoma nnyu.
Vaavo nimpaka nhu yoosoma nhu moohiloverya, hiyo ninnittottela nreerelo. Waataana wihu ni Yehova onnilipa, ninnihudha opaka dhoothanla mwa miruku ni ninnikhala Makiristau ookhomala.—Yoox. 1:8.