Muluku Opattunse Erimu ni Elapo ya Vathi

Yehova Muluku mpattusa nhu. Owo oopattusa itthu dhootheene dhikhanle, itthu ninwerya nhu woona ni idhe nihinwerya nhu woona. Woopacerani Yehova oopattusa malaikha awaatta. Munnidhuwela malaikha taani? Malaikha dhoopattusiwa dhoomunepani anlikana ni Muluku ni ankhala wiirimu. Hiyo khaninwerya woona malaikha, nkhama dhiidhale nihinwerya nhu omoona Muluku. Nlaikha noopacera Yehova opattunse iye nahikhala namakhalihera-ye. Nlaikha nno naahinkhalihera Yehova opaka ittheneri, iplaneeta, ni itthu dhootheene dhikhanle. Eplaneeta emodha Elapo yela yooreera ninkhalanhumo.

Yehova oopattusa ni okociha Elapo wiira ekakhalamo apinaatamu vamodha ni inama. Owo ohiiriha waarya wa ndhuwa omwaleela elapo ya vathi. Mottharelana Yehova oopattusa miyaako, ipahari ni miratthi.

Eseeni yaakhumelenle mootharelana? Yehova aahilotta wiira: ‘Miyo kinoopattusa malasi ni mittaikho’. Mottharelana Yehova aahipattusa ifuruta dhoovirikana, makukhu, ni ifoloore. Ni aahipattusa inama ineetta, dhinvava, dhinkhala mmaadhini ni dhiniipurula. Owo ohaapatusa aneenama akhani-akhani nkhama Anamarokolo ni uuluupale nkhama itthepo. Nyuwo dhinnodhivelani inama? Nneenama seeni ontepa woodhivelani?

Moottharelana Yehova aahilotta ni nlaikha noopacera airaka: “Naapattuse atthu.” Awo an’ya okhala oovirikana ni inama. Ekaanwerya opaka itthu, olotta, otheya ni ovekela. Awo ekankhapelela elapo ni inama. Moodhuwela ndhina na nlopwana oopacera? Nirowe noone.